On tlatlachalistin, on temachistiltin niman on ixnextilistin yejuan kiteijliaj ika uajlas on castigo (12.1 – 24.7)
On tlatlachalistli kampa Ezequiel okitak ika on israelitas kinuikaskej ken esclavos ipan okse país ipampa intlajtlakoluan
12
ToTEKO oksejpa onechnots, niman onechijlij: 2 “Tejua tlaltikpaktlakatl, tichanti intsajlan on yejuan nion xipanteitanij. Maski kimpiyaj inmixtololojuan, yejuamej xkitaj on tlen melauak, niman maski kimpiyaj iminnakasuan, yejuamej xkakij on tlen nikinmijlia, pampa nion xipanteitanij. 3 Yejua ika tej, tejua tlaltikpaktlakatl, xmochiua ken mitsuikaskiaj ken esclavo ipan okse país, para ijki, motech ma kitakan kenijki nochiua ijkuak se kuikaj ipan okse país. Xmotlatlajtlalili ken para mitsuikaskiaj ken esclavo ipan okse país. Niman ijkuak tlajokaj, ijkuak nochimej mitsitaskej, xkisa ne mochan ken tiaskia ipan okse país; kas ijki kajsikamatiskej maski yejuamej xipanteitanij. 4 Ijkuak tlajokaj ijkuak nochimej mitsitaskej, xmotlatlajtlalili ken para mitsuikaskiaj ken esclavo ipan okse país. Kemaj tiotlak ijkuak nochimej mitsitaskej, xkisa ken para mitsuikaskiaj ken esclavo ipan okse país. 5 Ijkuak nochimej mitsitaskej, xkoyoni itepan mokal niman ompa xkisa iuan on tlajtlamach tlen tikiktis. a 6 Niman ijkuak tlayouas, xmokechpanolti nochi on tlajtlamach tlen tikiktis. Kemaj xkisa ijkuak nochimej mitsitaskej. Xmixtlapacho para xtikitas on mopaís kampa tinejnemis. Nochi on tlen nimitsnauatia xchiua, para tikintitis on israelitas ika yejuamej xokaman kitaskej iminpaís."7 Nejua tej, onikchiu ken toTEKO onechnauatij, niman ijkuak tlajokaj katka onikis niman onitlaijiktik ken ijkuak se kuikaj ken esclavo ipan okse país. Niman ijkuak tiotlak, ika nomauan onikoyonij on tepanchinantli, niman ijkuak otlayouak nochimej onechitakej ken oninokechpanoltij on tlajtlamach tlen nikiktiya, niman onikis.
8 Uajmostla kualkan, toTEKO onechnots niman onechijlij: 9 “Tejua tlaltikpaktlakatl, on xipanteitanij israelitas omitstlajtoltijkej tline ijkon tikchiua. 10 Yejua ika tej, xmokuepa niman xkinmijli ika nejua nemoTEKO Dios nikijtoua ika in sen temachistijli para on rey de Jerusalén niman para nochimej on israelitas yejuan ompa chantij. 11 Xkimijli ika on tlen tejua otikchiu, kijtosneki ijki impan nochiuas pampa yejuamej kinuikaskej ken esclavos ipan okse país. 12 Xkinmijli ika on rey Sedequías, ika onkaj kechpanos on tlajtlamach tlen kiktis, niman ijkuak ye tlayoua, kisas kampa koyoniskej on tepanchinantli. Ijkuak kisas, ixtlapachijtias para maka yakaj kitas, niman yejua xokaman kitas ipaís. 13 Ipan nochiuas ken nikchapaniliskia nomatlau para nikajsis, niman nikchiuas para on soldados yejuan itlauelikniuan ma kuikakan Babilonia. Pero yejua xkitas on tlajli Babilonia, niman ompa mikis. 14 Niman on isoldados yejuan cuidarouayaj, nochiuiyan nikinchajchayauas iminuan on oksekimej isoldados. Niman nikintlaueltotokas ikan noespada para nikinmiktis. 15 Niman ijkuak nejua yonikinchajchayau impan oksekimej miyekej naciones, yejuamej kimatiskej ika nejua niiminTEKO. 16 Pero nejua nikchiuas para keskimej ma nomanauikan de on nouijsokilistli, de on apistli niman de on kokolistli, para ijkuak yaskej ipan on oksekimej naciones kitetlajtlajtouiliskej on tlajtlamach tlen sanoyej tetlajyeloj okichijkej. Niman ijki kimatiskej ika nejua niiminTEKO.”
On ixnextilistli de kuekuetlakalistli yejuan kintitiaj on israelitas ika ijki kiseliskej incastigo
17 ToTEKO oksejpa onechnots, niman onechijlij: 18 “Tejua tlaltikpaktlakatl, xmojkakuekuetlaka ijkuak titlakua, niman xmojkamiki ijkuak titlaoni. 19 Niman on chanejkej ipan in país niman Jerusalén, niman nochimej on israelitas, xkinmijli ika nejua nemoTEKO Dios ijkin kijtoua: 'Nemejuamej nentlakuaskej ikan ueyi ajmantli, niman nentlaoniskej ikan miyek nemojtijli pampa in país kixoxotoniskej niman xitlaj nokauas. Ijkon nochiuas pampa on yejuan nikan chanejkej sanoyej nouikaj ikan xompayejyeueualistli yejuan tetlajyouiltij. 20 Nochimej on uejueyikalpanmej kampa chantiua, kinxoxotoniskej, niman in país nokauas ken xalpatlajkan. Niman ijki tej, nemejuamej nenkimatiskej ika nejua ninemoTEKO.' "
21 ToTEKO oksejpa onechnots, niman onechijlij: 22 “Tejua tlaltikpaktlakatl, ¿tlinon kijtosnekij on israelitas ijkuak kijtouaj in ueyitlajtojli yejuan kijtoua: ‘On tonaltin panouaj, niman on itlatlachalisuan ken itemikpan on tiotlajtojketl xnochiua’? 23 Tejua tej xkinmijli, ika nejua nemoTEKO Dios nikijtoua ika nejua nikchiuas para ipan on tlajli Israel makasa ma kijtokan in ueyitlajtojli. Niman no xkinmijli ika ye nisiu on tonajli ijkuak nochiuas nochi on tlinon yonikinmijlij ipan on intlatlachalisuan ken intemikpan on tiotlajtojkej. 24 Xokaman oksejpa on yejuan xmelauak tiotlajtojkej kinmijliskej on israelitas on tlatlachalistin ken ipan temiktli yejuan xmelauak, nion xokaman kinmijliskej on tiotlajtoltin yejuan san tlakajkayaualistli. 25 Ijki nochiuas pampa nejua akin niiminTEKO Dios, nejua nitlajtos, niman on tlinon nikijtos xuejkauis ika nochiuas. Sano nemejuamej israelitas yejuan xipan nenteitanij, nenkitaskej chika nennemij. Nejua nitlajtos, niman nikchiuas para ma nochiua on tlinon nejua nikijtos. ¡Nejua akin ninemoTEKO Dios, ijki yonikijtoj nochiuas!”
26 Kemaj toTEKO oksejpa onechnots, niman onechilij: 27 “Tejua tlaltikpaktlakatl, on israelitas kijtojtinemij ika on tlatlachalistin ken ipan temiktli yejuan otikpix, xnimantsin nochiuas. 28 Yejua ika tej, xkinmijli ika nejua nemoTEKO Dios yejuan nochi ueli nikichiua ijkin nikijtoua: 'On tlen onikijtoj, xuejkauis ika nochiuas; ika onkaj nocumpliros. ¡Nejua akin ninemoTEKO Dios, ijki yonikijtoj nochiuas!' ”