2 Jon
1
Ane, Owane Sitewi lo lu feni lo meni owane, menitani ta, Owane Sitewi lai ariariyeye ape, eimane werese lo aiwawe maꞌe one towe eite ausawiyei. Owane Sitewi lo peri pefine aꞌi se ane fene marepi erasi aꞌi tote wawesiyesiya. Sosu aiwawe lu taune, tamo Owane Sitewi lo peri pefine aꞌi tote umasisiya ape, lowe fene maꞌe marepi erasi aꞌi tote wawesiyesiya. 2 Owane Sitewi lo peri pefine aꞌi marepi hepene nomo lo papu ironamisiya su, sosu mi mi pasi pasi weriyei nomo papu ironamitorowa. Serai nomo fene ne marepi erasi aꞌi tote wawesiyesiya. 3 Owane Sitewi lo ferafereiyei, sosu seremareyeyei, sosu Owane Sitewi lo marepi fetane aꞌi, etiri ape mo Owane Sitewi, Tai Pefine, maꞌe fai. Sosu aiwawe Jisas Krais Tai Pefine lo meni eime maꞌe fai. Owane Sitewi lo peri pefine aꞌi sosu tote wawesiyeyei nomo papu irosiya su, etiri hesi aꞌi ape nomo mase ironamitorowa.4 Ane peri ta eimane no tamo ne wanuwe su, lowe Owane Sitewi lo peri pefine aꞌi umasiteye ape, ane marepi erasi nineꞌiteye. Apou wou aꞌi Owane Sitewi Tai Pefine aꞌi nomo maꞌe teꞌeteye.a 5 Sosu aꞌi pe einei ano, ane peri ta ne maꞌe ei towerisiya. Peri ape ne ane ne maꞌe peri heꞌi aꞌi ausawi taꞌame. Ahowa, Owane Sitewi lo peri ape tu naifa weriyei nomo maꞌe wanu tote tawesiye. Peri ape apou aꞌi ne. Serai nomo lu taune werese Owane Sitewi lo peri umasiteye ape, marepi erasi aꞌi tote wawesiye tiyatinamite.b 6 Wawesiyeyei lo sitewi ape apou aꞌi teꞌesiya, “Nomo werese Owane Sitewi lo peri wiyeme aꞌi wanu tote tawesi umasite.” Fene peri ape tu naifa weriyei wanu tote tawesiteye ape, fene mi mi pasi pasi marepi erasi aꞌi tote wawesiyenamite. 7 Fene Owane Sitewi lo tote wawesiyeyei papu ironamirowa su, lu tamo fene arearerowata. Lu taune areareyei aꞌi tamo peri wawero au teꞌe fiyarisiya. Lowe peri wawero apou aꞌi teꞌesiya. “Tu naifa Jisas Krais tahe paꞌare se itorai taꞌama.” Lowe omo werese maꞌe peri wawero lowe lo ape au teꞌe fiyarititeye. Marepi apou ape lai sepei luwaru areareyei aꞌi maꞌe fai. Le Krais maꞌe airame ai atu tiyatinamisiya.c 8 Weiyai! Fene peri wawero lowe lo ape wanu tote umasirowa su, wiyawi wisere aꞌi ape mo, fene taꞌaneteye ape, tote iꞌane arunatirowa. Ahowa, fene Owane Sitewi lo peri pefine tote tawesi umasiyei su, Owane Sitewi lai ferafereiyei erasi lo fene maꞌe aurowa. 9 Lu taune tamo Krais lo peri arunatirowawe, peri wawero heꞌi aꞌi ape umasirowa su, lowe Owane Sitewi mase irotorowata. Ahowa, lu taune tamo Krais lo peri wanu tote tawesi umasisiya su, lowe Tai Pefine aꞌi, sosu meni eime lo aiwawe ironamisiya. 10 Lu taune tamo fene maꞌe heneraiyei su, sosu fene maꞌe peri wawero Krais ne au teꞌe fiyariyei. Fene wesi fene lo owe ape ei hene wire. Sosu aiwawe fene lowe maꞌe owe ape eritere. 11 Lu taune tamo meni areareyei aꞌi maꞌe eriteyei su, lowe lai meni areareyei aꞌi lo yo seni luwaru aꞌi aiwawe irowei.
12 Ane etiri tomu neꞌese fene maꞌe au teꞌesiya. Ahowa, ane one towe, sosu kere se leseyei wou taꞌama. Ahowa, ane fene maꞌe sewiyeyei ne totesiya. Serai ane nihari fene lo maꞌe au teꞌe tiyatiyei. Serai ane fene maꞌe aiyeyei su, nomo werese marepi nineꞌi erasi aꞌi au temeꞌeriyerowa. 13 Sosu aꞌi pe einei ano, Owane Sitewi lai ariariyeye ape, einei lo eimane lai fene maꞌe au teꞌe erite ausawiyei.