2 Kaiyemo, Owane Sitewi ne tote tawesiyei no tei kairefiyesiya su, ane Owane Sitewi maꞌe ne ne aiwawe aꞌi ei towerisiya. Wiyawi werese no wisere aꞌi fa ironamite! Sosu tahe paꞌare no wisere aꞌi tei kairefiyerowa. 3 Lu tamo, ne maꞌe fai ape, ane maꞌe sewiyeyei ne fai su, marepi ano wisereye erasi aꞌi nineꞌisiya. Lowe ane maꞌe fai su, lowe ane maꞌe ne ne au teꞌesai. Ne Owane Sitewi lo peri pefine aꞌi tote tawesinamisiya. Sosu ne Owane Sitewi lo peri pefine aꞌi marepi werese mi mi pasi pasi umasinamisiya.^b 4 Lu taune werese ane lai au noweinoweisiya ape, lowe eimane ano wou aꞌi ne. Serai ane lowe ne aiwawe aꞌi Owane Sitewi lo peri pefine aꞌi, umasinamisiya ape, wanunamisiya su, marepi ano nineꞌiyei erasi wiyeme aꞌi totenamisiya.

5 Kaiyemo, ne etiri werese lu ape mo sahe, Owane Sitewi lo peri au teꞌe areiye fiyarisiya ape, iroteye su, ne Owane Sitewi lo peri pefine tote umasinamisiya. Aiwawe aꞌi lowe pani eyeri maꞌe fai ape, ne lowe marepi wisere aꞌi au isafiye noweinoweinamiteye. 6 Lowe ane maꞌe si tame fai su, lowe Owane Sitewi lo lu feni maꞌe marepi wawesiyeyei no au teꞌerai. Lowe ne maꞌe si tame aiyeyei su, ane ne maꞌe ei towerirowa. Ne Owane Sitewi lo marepi wisereye aꞌi tote umasire. Ne lowe eimawesawiyei su, ne ayei etiri tamo lowe fa isafiye nonere.^c 7 Serai lowe Krais lo iyape se omo werese maꞌe Owane Sitewi lo peri au teꞌeyei ne fi. Lowe etiri werese awei lo lu taune maꞌe ani taꞌame.^d 8 Awei lu taune lowe maꞌe isafiye none taꞌame su, nomo lai lowe maꞌe faraꞌu isafiye nonerowa. Serai lu apou ape tamo nomo maꞌe heneraiyei su, nomo lowe maꞌe faraꞌu isafiye nonerowa. Nomo lu feni apou ape mo au noweinoweiyei su, nomo Owane Sitewi lo peri pefine aꞌi tote umasirowa. Serai nomo lowe mase Owane Sitewi lo wiyawi pati ferafereirowa.

9 Sosu ane one towe tereꞌe ta Owane Sitewi lo lu feni maꞌe lese ausawi. Ahowa, meni Diotrefes, meni owane tutawe heneraiyei ne totesiya ape, le peri nomo lo wanu arisiye. 10 Serai ane ne maꞌe aiyeyei su, ane meni ape lo yo seni ne, ne maꞌe au teꞌe areiyerowa. Le nomo maꞌe peri wawero aꞌi au teꞌe areareteye. Sosu aiwawe, lu ape mo Owane Sitewi lo peri au teꞌesiya ape, meꞌiyeni maꞌe atati tei arunati. Lu taune tamo lowe maꞌe au isafiyeyei ne totesiya, le lowe maꞌe einamiye. Sosu le lowe Owane Sitewi lo wesi nowe maꞌe ei naꞌari fiyari hene arosai.

11 Kaiyemo, ne yo seni luwaru aꞌi apou ape owe ape umasite. Ahowa, ne yo seni aseyaro aꞌi umasinamite. Lu taune tamo yo seni aseyaro aꞌi umasinamiyei su, lowe Owane Sitewi maꞌe fai. Ahowa, lu taune tamo yo seni luwaru aꞌi ironamiyei su, lowe Owane Sitewi maꞌe siye soꞌoruwerowata. Ne meni Demitrius totere.^e 12 Lu taune tomu neꞌese meni Demitrius ne au teꞌe wisereyeye. Sosu aiwawe peri pefine aꞌi lai le ne au teꞌe wisereyeye. Nomo aiwawe aꞌi meni ape ne au teꞌe wisereyeye. Ne peri pefine nomo lo soꞌoruwesiya. Peri werese nomo lo wiyeme aꞌi ne.

13 Ane peri tomu neꞌese ne maꞌe au teꞌereme. Ahowa, ane etiri ape mo one towe eite sahe, kere se leseyei wou taꞌama.^f 14-15 Ane nowe witane aꞌi ne siyenaraiyei ne totesiya. Serai ane notosi nihari no maꞌe teꞌe tiyatirowa.

Owane Sitewi lo marepi fetaneye aꞌi ne maꞌe irotorowa. Kaiyemo mo werese, ane mase sato irosiya ape, ne maꞌe teꞌe erite wisereyesawisiya. Sosu ne kaiyemo mo, ne mase irosiya ape, iyape towafi lowe lo se erite wisereyere.