Jọn îtim ikpan̄ Kendebeyọs
16
Jọn oneninan̄a me Gejeri isi imun̄ Saimọn ogwu ute, mè ikpa inu Kendebeyọs okirọ inyi ogwu ute. 2 Saimọn ogwegwen bọn ebirieen̄ kan̄ iba, Judas mè Jọn, ebi ìrere ugane ichit, mè ibe ema, “Emi mè ebi ngwan̄ n̄a mè ebi uwu nte n̄a ebene me akarake ijija kiji ikitim akọn̄ me ibot ebi Ijeren mege inire chereyi. Inu geelek ojeje ijaan̄ me ubọk kiji, eji esasa me ikeya inyan̄a ido Ijeren isibi owuwa mgbọ.3 “Mgbọ keyi, ukan îra ire emi lek; me nsan Awaji, enyi si mîtibi isibi. Eya orọ, ìbọkọ irek n̄a mè irek ngwan̄ n̄a, mè ìsibi ìsi ìtim akọn̄ me ibot ido kiji. Kè Awaji ikup me akpabin inyọn̄ itap ubọk inyi enyi.” 4 Jọn onenigobo akọp obop ene iba me ido kiban̄, ebi akọn̄ ukot ukot mè ebi akọn̄ inyọn̄ inyinya. Ema enenisibi isi ikweek Kendebeyọs, mè igba ikup me Modeyin me eririeen̄ ya. 5 Me lek obum egwe, ema enanan̄a ibene ije inin̄ me lek òla ijọn̄, mè initoon̄ me lek ikpele urum akọn̄, ebi ukot ukot mè ebi inyọn̄ inyinya, ekije ikweek ema. Ire, îkaan̄ okolo òkup me etete kiban̄. 6 Jọn melek urum ebi akọn̄ kan̄ ekekeke me onineen̄ iyaka isi ida ebibilọ. Ire, ukpook isasaba okolo otetet ebi kan̄. Mgbọ Jọn omun̄be ikeya, idadasi isaba. Ebi kan̄ imumun̄, esasaba igọọk ọmọ. 7 Inenifele urum ebi akọn̄ ukot ukot irek iba, mè itap ebi inyinya me etete kiban̄, mije, urum akọn̄ inyinya echi ebi ochicha îmin enenen. 8 Ema ewuwut otita akọn̄, mè ililaba Kendebeyọs mè ebi urum akọn̄ kan̄. Owuwa kiban̄ ebeben unan mè ikwaan̄, ebi ìsisik elilim igwu ikom ifo uwu mgban akọn̄ kiban̄ me Kedirọn isi ilileek. 9 Mgbọ ya, Judas, ngwan̄ kè Jọn, obeben unan. Ire, Jọn orerieen̄ ebi ochicha cha mege Kendebeyọs olilibi ire Kedirọn, ere înamabe mgban akọn̄. 10 Ebi ochicha cha elilim isi ire lek uwu-oket echi òkup me oron Ajọtọs. Jọn otatap ukan̄ iwọp uwu-oket cha itaka iriọk. Ebi ochicha ìkwakwaan̄ inin̄ me akọn̄ ya ìre akọp obop ene iba. Jọn onenika inu Judia me utelelek.
Mîkpan̄ Saimọn mè ebi bọn
11 Me ike mgbọ ya, mîsa Tolemi gwun̄ kè Abubus ito ogwu ibot akọn̄ òkikpulu òla ijọn̄ Jeriko. Ọmọ îkaan̄ ogbogbo alata okuket mè alata araran̄, 12 mije, Saimọn ogwu òban Awaji ore nte nwa kan̄. 13 Tolemi onenikaan̄ ikpele ejit, mè iweek ikpukpulu otutuuk ido ya. Ibebene ikitaka otọt ijo inu ibak Saimọn mè ebi bọn. 14 Me ike mgbọ ya, Saimọn okekijijen̄e ikana ido ikikpọ ama, mè ikikpọ chieen̄ me lek inu òkukup ebi ama cha me uyọt. Ije ya obeben ọmọ melek ebi bọn Matatiyas mè Judas inire Jeriko me acha efit mè akọp jaaba mè jaaba, me emen onyan̄ Sebat, òrere òso akọp mè onyan̄ ge me acha ya. 15 Tolemi, gwun̄ kè Abubus, oleleke ema itap me gwun̄ uwu mgban akọn̄ ge ekigwen Dok, eyi ọmọ ya onamabe, mè ito ikpele ijọk irerie mè inwọnwọ inyi ema. Îwuuk lek ilileek ebi ene ikana me ere ya. 16 Mgbọ Saimọn mè ebi bọn enwọbe miin̄ ikana me chieen̄, Tolemi mè ebi kan̄ esisibi ikeke, mè iteen̄ nroon̄ akọn̄ kiban̄ isa ilibi inin̄ uwu ijọk ya, mè ikpan̄ ọmọ mè bọn kan̄ ebirieen̄ iba cha, melek usini ebi ikwaan̄ kiban̄. 17 Inu yi Tolemi orọbe ìre ikpele ijo welewele ofiaan̄, îsa ijo inu ikpe ewe ata inu.
Jọn îbọkọ irek kè Saimọn
18 Tolemi onenige ikpa ijet ogwu ubọọn̄ Antiọkus ofolek inu ya îrọbe, mè ibeek ibe iria ebi akọn̄ inu, inyi enetap ubọk enyi ọmọ, mè ibe ogwu ubọọn̄ iyaka ama cha mè ido ya inyi ọmọ ikikpulu. 19 Ineniria ofifi ebi ene isi Gejeri ibe esi ekpan̄ Jọn, mè ige ikpa ijet ebi ibot akọn̄ ibe esibi enu me lek kan̄, ke ọmọ mônyi ema alata okuket mè alata araran̄ mè owuwa esese uche. 20 Îria si ofifi ukpa ebi akọn̄ ibe esi ebọkọ ama Jeruselem mè orioon̄ ere Uwu Mbuban okekebe. 21 Ire, ene ge ofefet ukot igwat lek ilibi isi ikpa inyi Jọn me Gejeri ibe ke Tolemi îkpan̄ nte kè ogwugwu mè ebi ngwan̄ kè ogwugwu, mè itumu isọkọ si ibe: “Òkiria ene inu ibe enekpan̄ owu si.” 22 Mgbọ Jọn obọkọbe etip ya, mbiribọ ogwogwook ọmọ me lek. Ikpekpebe ebi ife cha ìnunu ibenikpan̄ ọmọ, mè ikpan̄ ema isan̄a, mije, îwuuk lek iriọọn̄ ibe ke enu ibenikpan̄ ọmọ.