Antiọkus îge ikpa ijet Saimọn
15
Antiọkus, gwun̄ ogwu ubọọn̄ Demetirọs, onenikup me lek achọ emen awaji ige ikpa ijet Saimọn ogwu òban Awaji mè ogwu ibot mkpulu ebi Ju, mè otutuuk ido. 2 Inu îgebe ìre ikeyi:“Ogwu ubọọn̄ Antiọkus îtọp Saimọn, ogwu òban Awaji mè ogwu ibot mkpulu, amọn, mè itọp si ido ebi Ju. 3 Îkaan̄ usini ijo ebilene ìtetet ido ebi nte nte kiji ibọkọ. Emi ǹkitọt ibọbọkọ ido ya isan̄a me ubọk kiban̄, inyi m̀kpọk ǹrọ inyi ido ya ibene ikeke, mè ikup kubọk îwuukbe lek ikup. Bak me lek keya, nteen̄ ebi ọkọ akọn̄ isa ikaan̄ ikpele urum akọn̄ òmimin, mè ibọp si owuwa uji akọn̄. 4 Nkeek n̄a ìre ikọkọp isi itoon̄ me ido ya, mè isulu ebi ìjijijaka ido kiji osusut, mè isulu si ebi ìgwak owuwa ama me ido n̄a igwook.
5 “Eya orọ, mgbọ keyi, mkpukpe geelek mè otitip geelek echi ebi ubọọn̄ ebi ìdadasi ikpulu me isi n̄a esan̄abe enyi isan̄a me lek, emi ǹkirọ inye ibe ke mîsan̄a enyi isan̄a me lek. 6 Nnyi enyi unye ibe enyi erom ikpoko eyi ubọk kinyi, echi enyi mêsabe ikinyam ewe me ido kinyi. 7 Nsan̄a Jeruselem mè Uwu Mbuban isan̄a me lek otitip. Otutuuk nroon̄ akọn̄ geelek enyi erombe mè uwu mgban akọn̄ geelek enyi enamabe cha echi òkup me ubọk kinyi mgbọ keyi, ìre echi kinyi. 8 Urieek geelek enyi ekaan̄be ikpekpe itap me akpa ikpoko ogwu ubọọn̄, mè echi mgbọ òkup me isi, mîgwak, bene me mgbọ keyi mege ire mgbọ geelek. 9 Eji isibọkọ ido kiji, eji mênyi enyi ikpele umin, enyi melek ido kinyi melek Uwu Mbuban kinyi, inyi umin kinyi itaan̄ etip iso otutuuk linyọn̄.”
Antiọkus îtim Tirifo akọn̄ me lek
10 Me acha efit mè akọp jaaba mè ini, Antiọkus òso jaaba onenijibi akọn̄ isi me ido ebi nte nte kan̄. Otutuuk urum akọn̄ ekakana igọọk ọmọ, inenisik ene inen mè inen gaalek melek kè Tirifo. 11 Antiọkus orerieen̄ Tirifo, ililibi ifo Doru me agba awaji, 12 mije, îriọọn̄ ibe ke uyọrọlek îkana ichit ọmọ, ebi akọn̄ kan̄ si mîyat itele ọmọ. 13 Antiọkus onenirieen̄ akọn̄ iyaka ida ama Doru, ọmọ mè ebi akọn̄ ukot ukot, efit mè akọp obop ene iba, mè ebi akọn̄ inyọn̄ inyinya, obop ene jeeta. 14 Inenikpa mbin akọn̄ ikana ama ya, uji akọn̄ kan̄ cha otatap iriaak me agan̄ okwaan̄. Itatap ama ya inwaan̄ me ijọn̄ mè okwaan̄, ìkanyi ene geege irek ininin̄ mè isisibi me ama ya.
Ebi Rom mîgọọk ebi Ju ikeke
15 Me ike mgbọ ya, Numeniọs mè ebi melek kan̄ eneninan̄a me Rom ika, mè isa ikpa egebe ijet ebi ubọọn̄ mè esese ido ikaan̄ me ubọk ika. Inu egebe me ikpa ya ìre ikeyi:
16 “Lusiọs, ogwu otuchieen̄ ebi Rom, îtọp Tolemi amọn. 17 Ebi otuchieen̄ ebi Ju mînu me lek kiji kubọk ebi unene mè ebi melek kiji ekaan̄be mgbaan̄-nrọ, inenirọ irek unene mè mgbaan̄-nchieek kiji melek kiban̄, eyi òwuwuuk lek ikup mgbọ òraraka, inye. Saimọn ogwu òban Awaji mè ebi Ju eria ema inu. 18 Ema mîsa uche agbọ alata araran̄ òlolobo iso efit kilo go inu. 19 Mije ikeya, eji mîtumu ifieek ibe ege ikpa ejet esese ebi ubọọn̄ mè esese ido, esa etaba ema ubọk me utọn̄ ibe ekasisaak ebi Ju, ekasisi si akọn̄ me lek kiban̄, mè ìre lek ama kiban̄, mè ìre lek ido kiban̄, mè ekagọgọọk si ife geege ebi ìniweek ema ikọ ìkeke. 20 Eji mîchieek ibe ke mêbọkọ agbọ ya ema enyibe eji. 21 Eya orọ, ire ikaan̄ ebi ijo ife geelek ìlilibi inan̄a me ido kiban̄ inilet me ubọk kinyi, ìyaka ema ìnyi Saimọn ogwu òban Awaji, inyi isulu ema osusut igọọk me lek Ikan kiban̄.”
22 Lusiọs, ogwu otuchieen̄ ya, oraria si chieen̄ ikpa yaage ijet ebi ubọọn̄ Demetirọs, mè Atalọs, mè Ariarates, mè Arisakes, 23 mè iria si ijet otutuuk ido geelek: ido Sampisamis, mè Sipata, mè Delos, mè Mindos, mè Sikiọn, mè Karia, mè Samos, mè Pamfilia, mè Laisia, mè Alikanasọs, mè Rodis, mè Faselis, mè Kọs, mè Side, mè Aradọs, mè Gọritina, mè Kinidọs, mè Saipọrọs, mè Sairini. 24 Mîria si chieen̄ ikpa yaage ijet Saimọn ogwu òban Awaji.
Antiọkus òso jaaba îgwaka itele Saimọn
25 Ogwu ubọọn̄ Antiọkus òso jaaba onenikpa mbin akọn̄ ikana ama Doru òso mgbọ iba, mè ikpọkpọ ikiria ebi akọn̄ itap. Înama nroon̄ akọn̄ ekisa igbugbọ mgban, mè igon Tirifo ikam me emen ama ya, inyi ikanan̄a ìsibi, mè ikaraka si ìnin̄. 26 Saimọn onenigobo obop ene iba, mè alata araran̄ melek alata okuket, mè owuwa nroon̄ akọn̄ iria ijet Antiọkus, isa itap ubọk inyi. 27 Antiọkus ojijit ibọbọkọ inu cha, mè igwak otutuuk mgbaan̄-nchieek cha ọmọ mè Saimọn egbaan̄be ikaan̄, mè igwaka lek kan̄ isan̄a Saimọn me lek.
28 Antiọkus oneniria Atinobiọs, ene ge me lek ebi ogbo Unene kan̄, isi lek kè Saimọn ibe isi ikpa inyi ibe ikeyi, “Owu otet Jọpa, mè Gejeri, mè uwu mgban akọn̄ òkup me Jeruselem ibọkọ isak, ama chi ìre ama òkup me ido n̄a. 29 Owu ojijaka ido kiban̄, mè itap ikpele unan me ijọn̄ ya; owu otet owuwa ama òkup me ido n̄a ibọkọ me unye isak. 30 Ire oweek ibe inwọn, yaka ama cha obọkọbe me unye, melek ikpoko otipbe me ibot ama cha, òrere ama echi ikakupge me okike ido Judia, nyi emi. 31 Ilọ ikeya, kpe emi efit ikpoko alata okuket go me useen̄ ama cha melek inu cha ojijakabe, mè kpe si ofifi efit ikpoko alata okuket go me ibot otitip ama cha. Ire òkarọ ikeya, eji mênu owu akọn̄ me lek.”
32 Mgbọ Atinobiọs, ene ge me ogbo ebi Unene ogwu Ubọọn̄, orebe Jeruselem, mè imun̄ òrirọ ubọọn̄ kè Saimọn, mè okop efeek melek efeek alata araran̄ mè echi alata okuket òkup me emen, mè ogbogbo inu ubọọn̄ îkaan̄be, iweweke ọmọ ibot. Inenilook Saimọn etip ogwu ubọọn̄ olookbe. 33 Saimọn ofọfọọk otu ibe, “Eji kpebọkọ ijọn̄ ebi ichen geege me unye, eji kpefufum si inu ebi ichen geege, igak ìrot ebi nte nte kiji eyi ebi ochicha ebọkọbe me mgbọ òraraka, me oniin̄ ikanenge. 34 Mgbọ keyi irek osibibe inyi eji, eji ebetetet ìrot ebi nte nte kiji ikaan̄. 35 Òfo me lek Jọpa mè Gejeri, echi enyi ebe ke îre enyi ekaan̄, echichi ìre ama òkitap ebi kiji ikpele unan me lek, mè ikijijaka si ido kiji. Eji mêkpe obop kilo alata okuket ita mè efit ini ya me ibot kiban̄.” Atinobiọs ìkasan̄a amọn geege.
36 Ire, isasa ikpele unaan̄-ejit ifo isi ikpa inu Saimọn ofọọkbe inyi ogwu ubọọn̄, mè ikpa si òrirọ ubọọn̄ kè Saimọn mè inu geelek îmun̄be inyi. Ogwu ubọọn̄ onanaan̄ ejit enenen.
Antiọkus îria Kendebeyọs isi akọn̄ me lek ebi Ju
37 Tirifo oninin̄ emen uji ile, mè ilibi ifo Oritosia. 38 Ogwu ubọọn̄ Antiọkus onenisa Kendebeyọs irọ ogwu ibot akọn̄ kan̄ me ido agan̄ agba awaji, mè inyi urum akọn̄ ebi ukot ukot mè ebi inyọn̄ inyinya, 39 mè inyi ida ibe ijibi akọn̄ isi irieen̄ ikeme ido Judia, mè inama ama Kedirọn, mè inama otunchit kan̄ inye, mè itim akọn̄ me lek ebi Ju. Ọmọ ogwu ubọọn̄ me lek kan̄ ojijibi akọn̄ igọọk Tirifo. 40 Kendebeyọs onunu me Jaminia, mè ibene ikinyi ebi Ju ufialek, mè isi akọn̄ me Judia, mè ikpulu ebi ene agam agam isa isi ikpan̄. 41 Înama mgban ikana ama Kedirọn, mè igwook urum akọn̄ inyọn̄ inyinya mè urum ukot ukot, inyi ekejijen̄e me lek oniin̄ Judia ekerọ nnaan̄, kubọk ogwu ubọọn̄ Antiọkus onyibe ida.