Mîtet ogwu ubọọn̄ Demetirọs òso iba
14
Me acha efit mè akọp jaaba mè iba, ogwu ubọọn̄ Demetirọs òso iba onenititiin̄ urum akọn̄ kan̄, mè ijibi isi ido Midia ibosi iweek ntap-ubọk, inyi ọmọ ikọt itim akọn̄ me lek kè Tirifo. 2 Mgbọ Arisakes, ogwu ubọọn̄ Midia mè Pesia, onọbe ibe ke Demetirọs înin̄ ido kan̄, iraria ene ge me lek ebi ibot akọn̄ kan̄ ibe isi itet Demetirọs agam agam isa inu. 3 Ogwu ibot ya osisi, mè itim ikpan̄ urum akọn̄ kè Demetirọs, mè itet Demetirọs isa ijet Arisakes, Arisakes otatap ọmọ me mkpọn.Mîtọn̄ Saimọn
4 Ido Juda îkup me utelelek me otutuuk usen ukot kè Saimọn.
Îweek nnwọn inyi ido kan̄;
otutuuk ene emama mkpulu kan̄,
mè inyi ọmọ umin me otutuuk ugwem kan̄.
5 Îbọkọ umin òmimin igak otutuuk
me mgbọ îbọkọbe ama Jọpa isa irọ ama mgba uji,
mè ichili oniin̄ isisi otutuuk achọ emen awaji geelek.
6 Îda okike ijọn̄ ido kan̄ iwele,
mè ikaan̄ unye ikpulu otutuuk ido ya.
7 Îkpulu owuwa ene me akọn̄ inigwook,
mè itim ikpan̄ Gejeri mè Bet Suru
mè uwu mgban akọn̄ òkup me Jeruselem,
mè isan̄a ochichaka inu geelek òkup me emen isan̄a;
ene geege ìkaje ìkeme ọmọ.
8 Ebi ene mîwop uko me esuuk,
ijọn̄ osisibi inu iwa,
uti lek òla ijọn̄ ototo mfut.
9 Ebi ugane ebirieen̄ mîkup me lek oniin̄ me utelelek,
ikikpa ubọk inu ojebe ijaan̄,
nsabọn irieen̄ ekekitaak ujuja ofọnti akọn̄.
10 Înyi inorie iso otutuuk ama geelek,
mè inama mgban akọn̄ ikwek ama geelek,
mege etip kan̄ otaan̄be iso
ntutun̄ ere geelek me linyọn̄.
11 Îtap esuuk me ido,
Ijeren okakaan̄ ikpele unwọọn̄ mè ubelejit.
12 Ene geelek okekikup me irak olik gerep kan̄ mè uti figi kan̄,
kpunu ogwu ònikitap ema ukpook me lek.
13 Kpunu ogwu ochicha òsisik me lek ijọn̄ ikitim ema akọn̄ me lek,
mîtim ikpan̄ ebi ubọọn̄ geelek me ukot keya.
14 Îtap ubọk inyi ebi ugbọọn̄ me etete ebi kan̄;
îrọ ibe etet Ikan Awaji enye,
mè isan̄a ebi òkpaka ibot mè ebi kpekisun̄ Ikan Awaji isan̄a.
15 Îbala Uwu Mbuban ijaan̄,
mè itap nroon̄ ikwaan̄ uwu ya isọkọ.
Saimọn îkaan̄ mgbaan̄-nchieek melek Sipata mè Rom
16 Mgbọ etip mkpa kè Jonatan onire Rom, mè ire Sipata, ere ujọn̄ọ ere ya, ife cha efefieek ejit enenen. 17 Ire, mgbọ enọbe ibe ke ogwu ngwan̄, Saimọn, îkana ogwu òban Awaji me useen̄ kan̄, mè ikikpulu ido ya mè ama geelek òkup me emen, 18 ebi Sipata esasa akpakpa ekwe ige ikpa ijet ọmọ isa irọ mgbaan̄-nchieek melek irek unene eyi ema erọbe melek ebi ngwan̄ kan̄, Judas mè Jonatan, inye. 19 Ebi Ju efufuk ikpa ya isibi me isi ntitiin̄ ama me Jeruselem.
20 Chieen̄ ikpa ya ebi Sipata egebe ìre ikeyi:
“Ebi mkpulu mè ebi ama Sipata mîtọp Saimọn ogwu òban Awaji mè ebi ugane mè ebi ngwugwa mè otutuuk ebi Ju kechilọ amọn. 21 Ebi otuchieen̄ enyi eriabe osat inu me lek ebi kiji mîtumu ubọk enyi esabe itaan̄ etip, mè ikaan̄ umin. Inunu ema enube îbele eji ejit. 22 Eji mîge inu ema etumube itap me ikpa ntitiin̄ ama ibe ikeyi: ‘Numeniọs gwun̄ kè Antiọkus, mè Antipata gwun̄ kè Jasin, ebi otuchieen̄ ebi Ju, mînu me lek kiji, inenirọ unene ebi Ju melek kiji inye. 23 Ebi kiji mîbele ejit ibọbọkọ ife chi itap me ulibi, mè isun̄ ge me lek chieen̄ ikọ kiban̄, echi egebe, me ere ama ekisun̄ ikpa mfufuk, inyi ebi Sipata ekaan̄ ikpa cha esun̄. Ema mîria si chieen̄ ikpa yaage ijet Saimọn ogwu òban Awaji.’ ”
24 Mgbọ eyi orakabe, Saimọn oraria Numeniọs isi Rom, mè inyi ikpele agbọ alata araran̄, òlolobo iso efit kilo go, kubọk uche esabe inirọ mgbaan̄-nchieek inye melek kiban̄.
Mînyi Saimọn umin ebi ijọn̄
25 Mgbọ ebi Ijeren enọbe otutuuk inu chi Saimọn orọbe, ema ebebe, “Mọmọ ubọk eji ebesa itọn̄ Saimọn mè ebi bọn? 26 Mije, ọmọ melek ebi ngwan̄ mè ebi uwu nte kan̄ mîkeke inye, mè itim akọn̄ ikpan̄ ebi ochicha ido Ijeren, mè irieen̄ ema isan̄a, mè irọ ibe ido kiji ikaan̄ lek.” Eya orọ, ema enenige inu me lek akpakpa ekwe, mè itoon̄ me ibot atà igwuun̄ me ogoon̄ Sayọn.
27 Chieen̄ inu ema egebe ìre ikeyi:
“Me òso akọp mè usen jeeta, me onyan̄ Elulu, me acha efit mè akọp jaaba mè iba, eyi òrere òso acha ita me ukot kè Saimọn ikpele ogwu òban Awaji, 28 me Asaramen, me emen uga ntitiin̄ ebi ngwugwa mè ebi ama, mè ebi ibot mkpulu ido mè ebi ugane ijọn̄ Ijeren, mîlook ibe ikeyi:
29 “Mgbọ akọn̄ okinu isi ge isi ge me ido yi, îre Saimọn, gwun̄ kè Matatiyas, ogwu ngwugwa ònan̄a me ọgbọn̄ kè Jioyaribu, melek ebi ngwan̄ kan̄ echieek mkpa isibi ichichini ebi ochicha ido kiban̄, inyi inu geege ikare lek Uwu Mbuban kiban̄ mè Ikan kiban̄. Ema mîsa me ikeya isa ikpele umin ijet ido kiban̄. 30 Jonatan îgbaan̄ ebi ido kiban̄ ititiin̄, mè ikana ogwu òban Awaji inyi ema, mè ikwu ifo igọọk ebi kiban̄.
31 “Mgbọ ebi ochicha etọtbe inunu akọn̄ inijijaka ido kiban̄, mè igwak Uwu Mbuban, 32 Saimọn osisibi ikeke, mè itim akọn̄ me ibot ido kiban̄. Îfiat owuwa ikpoko ubọk kan̄, mè ilep owuwa nroon̄ akọn̄ itaak me ubọk ebi akọn̄ ido kiban̄, mè ikikpe ema mkpukpe kiban̄. 33 Înama mgban ikana ama ile geelek me Judia, mè Bet Suru òkup me otubọk ijọn̄ ido Judia, ere ogwu ochicha okiwuuk lek isun̄ nroon̄ akọn̄ kan̄, mè ito ebi akọn̄ ebi Ju ibe ekebem. 34 Înama si mgban ikana Jọpa me agba okwaan̄, mè Gejeri me otubọk ijọn̄ ebi Ajọtọs, ere ebi ochicha ewuukbe lek ikiluk, mè igwook ebi Ju me ere ya ibe ekeluk, mè ikinyi ebi ene inu geelek òkup ema me uyọt me otutuuk ama cha geelek.
35 “Ebi ene mîmun̄ ichechieek Saimọn okaan̄be, mè ubọk îbenbe me ejit isasa umin ijet ido kiban̄. Enenisa me ikeya irọ ọmọ ogwu ibot kiban̄ mè ogwu òban Awaji kiban̄, bak me lek inu chi geelek îrọbe, mè unen oyerebet mè ikekeke inye eyi îkekebe inye me lek ido kiban̄, mè efuuk îtapbe imumun̄ ibe ke ido kiban̄ îkaan̄ umin.
36 “Me ukot kan̄, mè irak ubọk mkpulu kan̄, inu geelek îje ijaan̄. Mîrieen̄ ebi ofifi ido isibi me ido kiban̄, mè irieen̄ si ebi ìkup me ama kè Debit me Jeruselem isibi, ebi ìnanama uwu mgban akọn̄ inyi lek kiban̄ me ere ya, mè ikinan̄a me uwu ya ikisibi inikififila oyet egep Uwu Mbuban, mè ikichaka mbuban me lek uwu ya. 37 Îgwook ebi akọn̄ ebi Ju me ere ya ibe eluk, mè inama mgban ikana, inyi ire ikwek-lek ebi ido mè ebi ama, mè inama mgban ama Jeruselem ibene.
38 “Mije keyi ke ogwu ubọọn̄ Demetirọs orọ irek òban Awaji kan̄ ijot, 39 mè irọ ọmọ ene ge me otu ogbo ebi Unene kan̄, ogwu ubọọn̄, mè inyi si ọmọ ubene ubene umin. 40 Mije, Demetirọs înọ ibe ke ebi Rom mîgwen ebi Ju ebi unene kiban̄, mè ebi mgbaan̄-nchieek kiban̄, melek ebi ngwan̄ kiban̄; înọ si ibe ke mîsa me umin ibọkọ ebi otuchieen̄ kè Saimọn itap.
41 “Ebi Ju mè ebi ngwugwa mîchieek ibe ke Saimọn môre ogwu ibot kiban̄ mè ogwu òban Awaji kiban̄ ire mgbọ geelek, mege ire mgbọ ata ogwu nriran mêtoon̄be ejit me lek môsibibe. 42 Ọmọ môre si ogwu ibot mkpulu ido kiban̄, mè ikikpọ chieen̄ me lek Uwu Mbuban, mè ikito ebi ibot ebi ìbekikpọ chieen̄ me lek ikwaan̄ me Uwu Mbuban, mè ebi ìbekidọmo inu me ido, mè ebi ìbekikpọ chieen̄ me lek nroon̄ akọn̄ melek uwu mgban akọn̄ geelek òkup me ido. 43 Ene geelek môkisiki ibot inyi ọmọ. Ikpa mbubek geelek mkpulu obokige, ebekisa erieen̄ kan̄ ige. Ọmọ môkitap ofọnti irio irio, mè ikisa alata araran̄ ibala lek.
44 “Kpebechieek ibe ogwu ikike mè ìre ogwu ngwugwa ida ikọ chi geege ito; mè ìre ije ikeme inu geelek Saimọn otumube; mè ìre igwen ntitiin̄ me ere geelek me ido, ire ìkabọkọ unye me ubọk kè Saimọn; mè ìre itap ofọnti irio irio; mè ìre inwaan̄ amana alata araran̄ me oguga. 45 Ene geelek òjeje ikeme inu kechi ekanabe igwook, mè ìre ijit geelek me lek ikan chi, ebesusulu ene ya osusut.”
46 Otutuuk ene echechieek ibe enyi Saimọn unye ibe irọ inu ikpọ me lek inu kechi geelek ekanabe igwook. 47 Saimọn obọbọkọ itap, mè ichieek ikukup me irek òban Awaji, mè irere ogwu isi akọn̄, mè ogwu ibot mkpulu ebi Ju melek ebi ngwugwa, mè ikukup me ibot otutuuk kiban̄. 48 Eneninyi ida ibe etibi ikan chi me lek akpakpa ekwe, mè egwuun̄ me ere chieen̄ otutuuk ene obokigwat lek imun̄ me oyet egep Uwu Mbuban, 49 mè ege chieen̄ ikpa ya esun̄ si me uwu isun̄-inu, enyi Saimọn me ebi bọn.