Saimọn îkana ogwu ibot
13
Saimọn oneninọ ibe ke Tirifo îtitiin̄ ikpele urum akọn̄ ìbosa inu akọn̄ inijijaka Juda isan̄a, 2 mè imun̄ ubọk ebi ene ekiran bak me lek ukpook. Inenisi Jeruselem, mè igween̄ otutuuk ene ititiin̄, 3 mè inyi ema ukarajit ibe, “Enyi me lek kinyi mîriọọn̄ ikpele inu echi emi mè ebi ngwan̄ mè ebi ototun̄ ukan̄ kè nte n̄a erọbe bak me lek Ikan kiji melek Uwu Mbuban. Enyi mîriọọn̄ si owuwa akọn̄ eji etimbe, mè owuwa kwulukwulu eji ekwukwulube. 4 Mije inu chi, otutuuk ebi ngwan̄ n̄a mîkwaan̄ ita me ibot ebi Ijeren, emi gaalek nsik. 5 Awaji ikachieek ibe emi ǹre ogwu òbonyan̄a ebek ugwem n̄a me mgbọ geelek ùrioon̄ onin̄be, mije, emi ǹkanwọn ìgak ebi ngwan̄ n̄a. 6 Ire, emi mâtim akọn̄ me ibot ido kiji mè ibot Uwu Mbuban, mè ibot ebi nwa kinyi melek nsabọn kinyi, mije, me mgbọ keyi ebi ofifi ido kperiọọn̄ Awaji cha mîra ititiin̄ ibesa ijo ejit inikpan̄ eji isan̄a kpai.”7 Mgbọ ebi ene enọbe ikọ cha, ekwukwu kiban̄ ojijibi ibene. 8 Ema etataan̄ ukpo itumu ibe, “Owu ore ogwu ibot kiji me useen̄ kè Judas melek Jonatan ebi ngwan̄ kwun̄. 9 Tim akọn̄ kiji geelek nyi eji, ke eji mêrọ inu geelek otumube.”
10 Eya orọ, itititiin̄ otutuuk ebi usọ akọn̄, mè irọ ibe egwat lek enama mgban Jeruselem, mè etap okwukwek ekat ekana. 11 Ineniria Jonatan gwun̄ kè Abusolọm melek ikpele urum akọn̄ isi Jọpa. Jonatan orerieen̄ ebi ama ya isibi, mè iraka ere ya ikup.
Ataak mè ofiaan̄ kè Tirifo
12 Tirifo onenisa ikpele urum akọn̄ inan̄a me Tolemayas isibi ikinu akọn̄ me ido Juda, mè isa Jonatan igbaalek inu. Ekibebem Jonatan mgbọ ya. 13 Saimọn oneniririeen̄ akọn̄ me Adida, iyaka isi ikikpọ lek òla ijọn̄. 14 Mgbọ Tirifo onọbe ibe ke Saimọn îraka irek ogwu ngwan̄ Jonatan ikup, mè ikiweek inunu ọmọ akọn̄ me lek, iraria ebi ene ibe esi elook ọmọ etip ibe: 15 “Ngwan̄ kwun̄ Jonatan îkaan̄ urieek me irek ikwaan̄ îkupbe eyi ìbokpe itap me akpa ogwu ubọọn̄, îre eya orọ eji etetbe ọmọ ikaan̄. 16 Ire oria efit ikpoko alata okuket mè bọn ebirieen̄ kan̄ ene iba ijet eji etet ekaan̄, inyi, ire eji isan̄a ọmọ ubọk me lek, ìkpoyaka inikpaka ibot, eji mêsan̄a ubọk me lek kan̄.”
17 Saimọn îriọọn̄ ibe ke etip ya ìre ofiaan̄. Ire, iraria ibe esa ikpoko ya mè nsabọn cha enu. Ukpook kan̄ ìre ke ebi ene mêtap uyọrọlek enenen, 18 mè itumu ibe ke Jonatan ìkwu bak me lek Saimọn ìkachieek iboria ikpoko mè nsabọn cha ijet Tirifo. 19 Eya orọ, iraria nsabọn cha mè efit ikpoko ya ijet Tirifo. Ire, Tirifo ìkasan̄a ubọk me lek kè Jonatan.
20 Mgbọ Tirifo obọkọbe ikpoko cha mè nsabọn cha isan̄a, ijijibi akọn̄ ije ibonijijaka ido Juda, mè isi ije ikat ikana me lek oniin̄ ama Adora. Ire, Saimọn mè urum akọn̄ kan̄ ekekikana ikweek ọmọ me agan̄ geelek îjebe inin̄.
21 Me ike mgbọ ya, ebi ìkup me uwu mgban akọn̄ me Jeruselem ekpọkpọ ikiria osat ijet Tirifo ibe ije ikana me oniin̄ agan̄ emen èwê inu, mè isa inorie ijet ema. 22 Tirifo otititiin̄ otutuuk urum akọn̄ kan̄ ibosa ije, ire, ibot awo onenirep me eririeen̄ usen ya enenen; ìkayaka ìkọt ije, mije ibot awo ya òrerep. Eya orọ, igwugwu ikom, mè ijibi inin̄ agan̄ Giliadi. 23 Mgbọ îjebe igbet ama Basikama, ikpakpan̄ Jonatan, ebeben ifuun̄ me ere ya. 24 Tirifo ogwugwu ikom, mè ije ifo ido kan̄.
Saimọn îfuun̄ Jonatan me Modeyin
25 Saimọn oneniria ebi ene, esisi isa ukwuuk ogwu ngwan̄ Jonatan ika. Ibeben ifuun̄ me Modeyin, ama ebi nte nte kiban̄. 26 Otutuuk ebi Ijeren efefieek ejit enenen inyi Jonatan, mè ito ito kan̄ owuwa usen. 27 Saimọn onanama inu ǹkeek me inyọn̄ udọn̄-ufuun̄ ogwu ute mè ebi ngwan̄, înama inu ya ibene, inyi chieen̄ ene ikigwat lek imun̄, mè isa ewuuk ekwukwuk lek irọt igbaka me isi mè udun̄. 28 Înama si uwu osọt-ibot jaaba, ge okiyaka isi ikpọ ge, inyi ogwu ute mè ogwu uga melek ebi ngwan̄ ini kan̄. 29 Înama si ikpele ubene atà ikana uwu osọt-ibot cha geelek, mè ikọ nroon̄ akọn̄ òbokup ire mgbọ geelek itoon̄ me inyọn̄ atà cha geelek, mè itibi uji ile me agba lek nroon̄ akọn̄ cha geelek, inyi ebi geelek ìkọp me okwaan̄ mêkimun̄ lek. 30 Udọn̄ ufuun̄ ya înamabe me Modeyin ọmọ òwa si mege inire cherekeyi.
Saimọn melek Demetirọs òso iba mîrọ esuuk
31 Tirifo onenirọ inu me lek ogwu ubọọn̄ Antiọkus òso gweregwen ofiaan̄ ofiaan̄, mè ikpan̄ ogwa, 32 mè ikana ubọọn̄ me irek kan̄, mè ikana ogwu ubọọn̄ Esia, mè itap ikpele ùrioon̄ me ido ya. 33 Saimọn oneninama uwu mgban akọn̄ geelek me Judia ikeke, mè isa uwu-oket òbebene mè mgban òmimiin̄ mè otunchit melek olọkọrọ me lek iwak ikat ikana, mè itaak inorie ijot uwu mgban̄ akọn̄ cha geelek.
34 Saimọn oneniria ebi otuchieen̄ isi me lek ogwu ubọọn̄ Demetirọs òso iba ibe isan̄a ido kiban̄ isan̄a me ikpekpe otitip mkpulu, mije, otutuuk inu Tirifo orọbe ìre mfum. 35 Ogwu ubọọn̄ Demetirọs ogege ikpa ifọọk otu mbeek kan̄ ibe:
36 “Ogwu ubọọn̄ Demetirọs îtọp Saimọn ogwu òban Awaji, òrere unene ebi ubọọn̄, mè ebi ugane, melek ido ebi Ju, amọn. 37 Eji mîbọkọ okpibot ubọọn̄ alata araran̄ melek nlak asaak alata araran̄ eyi enyi eriabe ijet eji me ubelejit. Eji mîbem lek irọrọ esuuk me agan̄ geelek melek kinyi, mè igege ikpa ijet ebi ibot mkpulu kiji ibe esan̄a enyi me lek otitip mkpulu. 38 Otutuuk mgbaan̄-nrọ geelek eji ekaan̄be melek kinyi ìbokekeke inye; uwu mgban akọn̄ cha geelek enyi enamabe, ìre echi kinyi. 39 Eji mîtele nrọ-nlọ geelek enyi erọbe mege inire cherekeyi, mè igwak urieek otitip ogwu ubọọn̄ geelek enyi ekaan̄be, mè ichit ibe enyi ekayaka ìkpe mkpukpe geelek ekikpe me Jeruselem. 40 Ire, ikaan̄ ebi kinyi ìgbegbe isisi ikwaan̄ inyi ogwu ubọọn̄, etap erieen̄ kiban̄, mè esuuk ikup me etete kiji melek kinyi.”
41 Îre me acha efit mè akọp jaaba ke ọgbọn usun̄ ebi ekariọọn̄ge Awaji onan̄a me ebek ebi Ijeren. 42 Ebi Ijeren ebebene ikige me lek ikpa geelek, melek ikpa mbubek kiban̄, geelek ibe, “Me adasi acha mkpulu kè Saimọn, ikpele ogwu òban Awaji, mè ogwu isi akọn̄, mè ogwu ibot ebi Ju.”
Saimọn îbọkọ ama Gejeri
43 Me ike mgbọ ya, Saimọn onenikpa mbin akọn̄ ikana ama Gejeri, mè ito urum akọn̄ kan̄ ikana okokop. Inenirom nroon̄ akọn̄ ekisa igbugbọ mgban, mè isa inu me ama ya, mè inigbugbọ uwu-oket ge, mè ibọkọ uwu-oket ya. 44 Ebi akọn̄ ìkup me emen nroon̄ akọn̄ ya ewuwulu inin̄ emen ama ya, wọlọwọlọ oninin̄ me emen ama ya. 45 Ebi ama cha, mè ebi nwa melek nsabọn, egwagwak ofọnti me lek, mè ikilibi inene lek mgban ama ya, mè ikitaan̄ ukpo unye unye inyi Saimọn ibe irọ esuuk melek kiban̄, 46 mè ikibe, “Soso, eji mîrọ owu ilọ, ire, kasa ijo inu kiji ìkpe eji! Soso, kaan̄ ejit nsan me lek kiji!”
47 Saimọn ogọgọọk ema itumu ifieek, mè itele ititim akọn̄ me lek kiban̄. Ire, ilalap ema isibi me ama ya, mè igbama lek uwu geelek mkpọmfaka okupbe me emen, mè isa okwa mè itọn̄ inin̄ emen ama ya. 48 Îsan̄a inu geelek òkichaka mbuban isan̄a me emen ama ya, mè isa ama ya inyi ebi ìkisun̄ Ikan Awaji ibe eluk me emen, mè ininama mgban òkakana ama ya inye, mè inama si uwu eyi lek kan̄ me emen ama ya.
Saimọn îbọkọ uwu mgban akọn̄ òkup me Jeruselem
49 Mîkwek ebi ìkup me uwu mgban akọn̄ me Jeruselem ibe ekasibi oyet ìsi ìlep inu geege, ekasisibi si ìsi ìnyam inu geege. Mije keya, uraafiọọn̄ otetet ema enenen, usini kiban̄ ekwakwaan̄ mije akan̄. 50 Ema eneniriaak Saimọn ibe igọọk ema irọ esuuk, ichechieek. Ire, irerieen̄ ema isibi me uwu mgban akọn̄ ya, mè igbama lek uwu ya isan̄a mbuban geelek me lek.
51 Me òso akọp usen iba mè ita, me òso onyan̄ iba, me acha efit mè akọp jaaba mè ge, ebi Ju ejeje melek ijọk iraka inin̄ emen uwu mgban akọn̄ ya, mè nlak me ubọk, mè uneen̄ melek mkpamkpa, mè nkwukwak echi olik, mè ikikọt okwa isa iraka inin̄. Ema ekirie ijọk ya, mije, mîtim ikpan̄ ikpele ogwu ochicha, mè itọp ọmọ isibi me ido Ijeren. 52 Saimọn onyinyi ikan ibe ke usen ya môkire usen ijọk mè unwọọn̄ me acha geelek. Ineninama mgban òkup me ikana orioon̄ Uwu Mbuban me isi agan̄ uwu mgban akọn̄ ya inye, ọmọ mè ebi akọn̄ kan̄ eneniluk me ere ya. 53 Mgbọ Saimọn omun̄be ibe ke Jọn, gwun̄ kan̄, îmin iso enerieen̄, isasa irọ ogwu ibot otutuuk urum akọn̄. Jọn osisi iluk me Gejeri.