Jonatan îgbaan̄ itọbọ melek ebi Rom mè ebi Sipata
12
Jonatan onenimun̄ ibe ke mgbọ ya înwọn me lek kan̄, mè inigobo ene iria isi Rom ibe esi erọ mgbaan̄-nchieek ema ewuukbe lek ikaan̄ melek ebi Rom enye, mè ikana ayaya. 2 Îria si ikpa ijet ebi Sipata mè ofifi ido si me lek ibot inu yaage. 3 Ebi etip kan̄ cha enenire Rom, mè inin̄ emen Uwu Oru Ido, mè ilook etip ibe, “Jonatan ogwu òban Awaji melek ido ebi Ju eria eji inu ibe enerọ irek unene mè igbagbaan̄ itọbọ eyi ebi Rom ewuukbe lek ikaan̄ melek ebi Ju enye kubọk adasi mgbọ.”4 Ebi Rom enyinyi ema ikpa ibe esa enyi ebi ibot ido geelek ema ebeje itibi, ibe esa ema eje me utelelek esi ere ido Juda. 5 Chieen̄ ikpa ya Jonatan ogebe ijet ebi Sipata ìre ikeyi:
6 “Jonatan ogwu òban Awaji, mè Oru ebi ido, mè ebi ngwugwa mè otutuuk ebi Ijeren mîtọp ebi Sipata, ebi ngwan̄ kiban̄, amọn. 7 Me mgbọ òraraka, ikpa înan̄a me ubọk kè Ariọs, ene ge me lek ebi ubọọn̄ kinyi, inu inyi Onias ogwu òban Awaji. Ikpa ya ìkibe ke enyi ìre ebi ngwan̄ kiji me atikọ, kubọk egebe me emen chieen̄ ikpa ya, eyi eji esabe iriaak me lek ikpa keyi. 8 Onias îsa me umin ibọkọ ebi ìnu osat ya itap, mè ibọkọ ikpa ya si, eyi òkitumu ikọ unene mè mgbaan̄-nchieek ya itap. 9 Me lek kiji, kpunu inu eji ebesa echichi irọ, mije, eji mîkaan̄ ikpa mbuban me ubọk, echi òkinyi eji ukarajit. 10 Eji ekige ikpa keyi isasa irọ ibe irek ngwan̄ mè unene kiji melek kinyi ikpọk ikana ayaya, inyi eji ekare ebi ichen me lek kinyi, mije, mgbọ îraka ijọn̄ọ akarake enyi eriabe ikpa ijet eji. 11 Mgbọ geelek me irek geelek, me mgbọ ijọk kiji, mè ofifi usen orirọ esun̄be, eji ekikekeek enyi mgbọ eji isikigwa ngwugwa mè ikiriaak uriaak kubọk înenbe mè igbe ibe ekeek ebi ngwan̄ ene. 12 Eji mîkibele ejit ibe ke enyi mêkitaan̄ etip. 13 Ire, eyi kiji, eji ekup me emen owuwa ntọ-mkpọ mè owuwa akọn̄; ebi ubọọn̄ ìluluk ikana eji mîtim eji akọn̄ me lek. 14 Me emen akọn̄ chi geelek, eji kpeweek isisisaak enyi, mè ìre ofifi ebi unene kiji mè ebi melek kiji ekaan̄be mgbaan̄-nrọ. 15 Mije, Awaji òkup me akpabin inyọn̄ okitap ubọk inyi eji, mè ikinyan̄a eji isibi me ubọk ebi ochicha kiji, mè ikikeme ema isiki. 16 Eya orọ, eji mîgobo Numeniọs gwun̄ kè Antiọkus, mè Antipata gwun̄ kè Jasin, iria isi lek ebi Rom, ibe esi erọ irek unene ya eji ewuukbe lek ikup mè mgbaan̄-nrọ ya eji ewuukbe lek ikaan̄ enye, inyi ikana ayaya. 17 Eji mînyi si ema ida ibe enu lek kinyi, mè etọp enyi amọn, mè enyi enyi ikpa yi ofolek irọrọ inyi irek ngwan̄ kiji ikpọk ibene ayaya. 18 Eya orọ, soso, ìnyi eji ifọọk ikpa yi.”
19 Chieen̄ ikpa ya ogwu ubọọn̄ Ariọs ogebe ijet Onias ìre ikeyi:
20 “Ariọs ogwu ubọọn̄ ebi Sipata îtọp Onias ogwu òban Awaji amọn. 21 Eji mîsi imun̄ ikpa òfo me lek ebi Sipata mè ebi Ju, eyi òbe ke ema ìre ngwan̄, mè ire ebi owot iman kè Ebereyam. 22 Mgbọ keyi eji eniriọọn̄ ikeyi, môtop eji me lek ire enyi ige ikpa inyi eji itumu ubọk inu okupbe enyi me lek. 23 Eji ekitumu inyi enyi ibe ke anam kinyi mè inu enyi ekaan̄be ìre echi kiji, echi kiji si, ìre echi kinyi. Eya orọ, eji mînyi ebi eji eriabe osat ida ibe elook enyi etip òfo me lek inu yi.”
Ofifi akọn̄ Jonatan mè Saimọn etimbe
24 Jonatan oneninọ ibe ke ebi ibot akọn̄ kè Demetirọs mîsa urum akọn̄ òmimin igak eyi adasi mgbọ igwu ikom inu ibenitim ọmọ akọn̄ me lek. 25 Eya orọ, isisibi itele Jeruselem isi ikweek ema me agan̄ Amat, ìkanyi ema irek ibe esa akọn̄ enin̄ ido kan̄. 26 Ineniria ebi enun̄unun̄ isi m̀gba-ǹgwele ukan̄ kiban̄, ekaka inikpa inyi ibe ke ebi ife cha ekibem lek inunu akọn̄ me lek ebi Ju me eririeen̄. 27 Mgbọ ura onimbe, Jonatan onyinyi ida ibe ebi akọn̄ kan̄ ekup me mbem lek, mè ekaan̄ nroon̄ akọn̄ kiban̄ me ubọk ebem lek ititim akọn̄ mgbọ geelek me eririeen̄ ya. Îto si ebi mbem ikana m̀gba-ǹgwele ukan̄ kiban̄ okokop. 28 Mgbọ ebi ochicha cha eriọọn̄be ibe ke Jonatan mè ebi kan̄ mîbem lek akọn̄, ukpook otetet ema, ufieek-owot oninin̄ ijot ema emen, ema echichim ukan̄ itap me lek m̀gba-ǹgwele ukan̄ kiban̄, mè isibi itele. 29 Jonatan mè ebi kan̄ mîmun̄ ukan̄ cha okisak, ire, mege egwe owelebe, ema kperiọọn̄ ibe ke ebi ochicha cha mîsim ita. 30 Jonatan ogọgọọk ema igak, ire ìkasoon̄ ema. Mije, ife cha mîwuwuuk lek isaba okwaan̄ Eliyuterọs. 31 Eya orọ, Jonatan ogwugwu ikom iben akọn̄ inin̄ lek ebi Arabu, ebi ekigwen ebi Jabadia, mè itim ikpan̄ ife cha, mè ifum inu kiban̄. 32 Inenijibi inan̄a me ere keya isi Damasikọs, mè ijijen̄e ikana otutuuk agan̄ ya.
33 Me ike mgbọ ya si, Saimọn ojijibi si akọn̄ eyi kan̄ isibi, mè ije isi ire Asikelọn mè ama uwu mgban akọn̄ echi òkukup ikana. Inenikana isi Jọpa, mè itim akọn̄ ibọkọ ama ya me ekakpọge chieen̄. 34 Mije, înọ ibe ke ebi ama ya ebesa uwu mgban akọn̄ òkup me ama ya inyi ebi Demetirọs oriabe inu ama ya. Itoto ebi akọn̄ kan̄ ibe ekebem ama ya.
Mînama mgban ama Jeruselem inye
35 Mgbọ Jonatan okabe, igwegwen ntitiin̄ ebi ugane, mè igọọk ema itọt ifieek ibe ke mênama owuwa uwu mgban akọn̄ me Judia, 36 mè inama mgban ama Jeruselem ibene, mè inama okwukwek òbebene me etete uwu mgban akọn̄ melek emen ama, inyi esa esan̄a uwu mgban akọn̄ ya eto esese me lek ama, mè ikup si ọkpọkpọ, ufuna ebi ìkiluk me uwu ya ekakininyam inu mè ìnilep si inu me emen ama. 37 Ema egbagbaan̄ ititiin̄ ininama ama ya. Okpọkọ me lek mgban ama ya òkup me iteke ijọn̄ agan̄ mbum-ura îwuuk lek igbugbọ igwook. Ema ekpọkpọk inama si okpọkọ agan̄ ekigwen Chafenata ikeke.
38 Me ike mgbọ ya si, Saimọn onanama ama Adida me lek orioon̄ ebon ogoon̄, mè inama mgban ikana, mè itaak otunchit melek olọkọrọ iso lek.
Tirifo îleke Jonatan isi ikpan̄
39 Tirifo oneniweek ititim ikpan̄ ogwu ubọọn̄ Antiọkus òso gweregwen, inyi ọmọ ikana ubọọn̄ me Esia, mè ikwuun̄ okpibot ubọọn̄ me ido ya. 40 Ire, ikekitet ukpook ibe ke Jonatan ìkpochieek inyi ọmọ, ke môkọt itim ọmọ akọn̄ me lek. Eya orọ, ikekiweek ubọk ìbosa itet Jonatan ikpan̄. Inenijibi akọn̄ isibi inu me Bet San. 41 Jonatan ogogobo akọp obop ebi usọ akọn̄ ini isa isibi isi Bet San isi ichichini ọmọ. 42 Mgbọ Tirifo omun̄be ọmọ melek urum akọn̄ ile ya, ukpook otetet ititim akọn̄ me lek kan̄. 43 Kpan̄asi ikeya, ibọbọkọ Jonatan itap me umin, mè isa ijeen̄ otutuuk ebi Unene kan̄, mè iche uche inyi, mè itumu inyi ebi Unene kan̄ mè ebi akọn̄ kan̄ ibe esiki ibot enyi Jonatan kubọk ekisiki inyi ọmọ. 44 Inenibe Jonatan, “Keke orọ otapbe ebi ife chi ufialek me lek ikeyi me ere eji kpekaan̄ akọn̄ me etete kiji? 45 Tumu ibe ema egwu ekom efon, mè gobo ene inen ebi mêkupbe melek kwun̄, mè na gọọk emi si Tolemayas. Mâyaka ama ya, mè uwu mgban akọn̄ kechilọ geelek, mè urum akọn̄ echi òsisik melek ebi ibot kiban̄, inyi owu. Ibot ije n̄a nnube me ere yi ire eya. Nsirọ isan̄a, mâgwu ikom ifo.”
46 Jonatan ototoon̄ ọmọ ejit me lek, mè irọ ubọk îtumube. Îria ebi akọn̄ kan̄ ibe efon, ebiba ekaka inu me ido Judia. 47 Obop ene ita ke îtele melek kan̄, obop iba me lek ke îtele me Galili, mè isa obop ge keyilọ igbaalek kan̄ ije. 48 Ire, Jonatan irere Tolemayas, ebi Tolemayas egogoon̄ otunchit ikwek, mè itet ọmọ, mè isa oge akọn̄ ikpan̄ otutuuk ebi melek kan̄ enin̄be ama ya isan̄a.
49 Tirifo oraria urum ebi akọn̄ ukot ukot mè ebi inyọn̄ inyinya isi me ikpele Òla Ijọn̄ òkup me Galili ibe esi ekpan̄ otutuuk ebi akọn̄ kè Jonatan esan̄a. 50 Ire, ebi akọn̄ cha erọriọọn̄ ibe ke mîtet Jonatan, mè igbaan̄ ọmọ melek ebi kan̄ ikpan̄ isan̄a. Ema, ge orọrọ ge inye, mè ijibi ije igbaan̄ ikije, ukpa ge iriaak me lek ge, mè ibem lek ititim akọn̄. 51 Mgbọ ebi ìkinu ema akọn̄ me lek cha emun̄be ibe ke ema mîbem lek ititim akọn̄ me ibot ugwem kiban̄, ife cha egwugwu ikom. 52 Ema otutuuk ekaka inire ido Juda me atata, mè ifieek ejit inyi Jonatan me ebi akọn̄ melek kan̄. Ire, ikpele urimi oninin̄, otutuuk ebi Ijeren egwogwook inin̄ me uga ufieejit. 53 Otutuuk ebi ofifi ido cha ìluluk ikana ema ekekiweek oniin̄ ikpakpan̄ ema isan̄a. Mije, ekibe, “Ema kpekaan̄ ogwu ibot, kpekakaan̄ si ebi ntap-ubọk geege. Eji enesi etim ema akọn̄ me lek, mè echep ema esan̄a, inyi ekayaka ìkeek inu ofolek kiban̄ ofifi.”