4 Mgbọ îrebe Ajọtọs, esasa ọmọ ijeen̄ uwu Dagọn ewọpbe itaka iriọk, mè ijeen̄ si ama Ajọtọs mè ama echi òkukup ikana, echi ekpukpukube igwook, mè ijeen̄ si nkwukwu ene etọọn̄be ikana ere; mîjeen̄ si mkpukpuku ene ebi Jonatan owọpbe ikpan̄ me akọn̄ ya, echi ema ekpulube ititiin̄ me èdọ me èdọ me lek oniin̄ Tolemi okije iraka. 5 Mîkpa si inu Jonatan orọbe inyi ogwu ubọọn̄, inyi esa efieek Jonatan ikọ. Ire, ogwu ubọọn̄ ìkasan̄a amọn. 6 Jonatan ojeje isi ibọkọ ogwu ubọọn̄ Tolemi itap òrirọ òrirọ me Jọpa, ema etọtọp lek kiban̄ amọn, mè ilaak iwele egwe me ere ya. 7 Jonatan onenigọọk ogwu ubọọn̄ ije mege inire lek okwaan̄ ekigwen Eliyuterọs, mè igwu ikom ika Jeruselem.

8 Ogwu ubọọn̄ Tolemi onenikaan̄ otutuuk ama òkup me agba okwaan̄ isi igwook me ama Selusia òkup me agba awaji, mè ikitọt ijo otitọt ibak Alikisenda. 9 Ineniria ikwaan̄ inyi ogwu ubọọn̄ Demetirọs ibe, “Na, mè eji egbaan̄ ekaan̄ mgbaan̄-nchieek. Mânyi owu gwun̄ n̄a enenwaan̄, ogwu òrere nwa kè Alikisenda mgbọ keyi, owu mônenikikpulu ido nte kwun̄ okpulube. 10 Mbọnọ lek ibe ke nsa gwun̄ n̄a inyi ene ya, mije, ìkiweek ikpakpan̄ emi.” 11 Ìkitoon̄ Alikisenda ikọ, mije, ìkimin ejit me lek ido kè ogwa, iweek itetet ibọkọ. 12 Inenibọkọ gwun̄ kan̄ enenwaan̄ isan̄a me ubọk kè Alikisenda, mè isa inyi Demetirọs, mè ifieek lek inan̄a me lek kè Alikisenda, ochicha kiban̄ osisibi utoon̄.

13 Tolemi oneninin̄ Antiọk, mè ibọkọ okpibot ubọọn̄ Esia ikwuun̄ me ibot; mgbọ yi, ìkikwuun̄ okpibot ubọọn̄ iba me ibot kan̄, eyi Ijipiti melek eyi Esia. 14 Me ike mgbọ ya, ogwu ubọọn̄ Alikisenda ìkup me agan̄ Silisia, mije, ebi agan̄ ya mîbene unye-ibot. 15 Mgbọ înọbe inu Tolemi orọbe, ijijibi akọn̄ isi lek kan̄. Tolemi osasa urum akọn̄ ònyenye isibi ikweek ọmọ, mè ililaba ọmọ. 16 Alikisenda olilibi isi itap ibot me Arebia, ogwu ubọọn̄ Tolemi otitim ikpan̄. 17 Ogwu Arabu ge ekigwen Jabidien ofefieek Alikisenda ibot, mè isa iria ijet Tolemi. 18 Ire, egwe ita iraraka, Tolemi okwukwu, ebi ama cha ekpakpan̄ ebi akọn̄ kan̄, ebi îtobe me uwu mgban akọn̄ kan̄ cha ibe ekebem, isan̄a kpai. 19 Sa me ikeya, Demetirọs onenikana ubọọn̄, me acha efit mè akọp gweregwen mè jaaba.

20 Me ike mgbọ ya, Jonatan onenititiin̄ ebi Judia ibe esi akọn̄ me lek uwu mgban akọn̄ òkup me Jeruselem, ema enanama owuwa nroon̄ akọn̄ ekisa igbugbọ mgban, inyi mêsabe igbugbọ uwu mgban akọn̄ ya. 21 Ire, usini ebi òkpaka ibot, ebi kpema ido kiban̄, esisi itumu inyi ogwu ubọọn̄ Demetirọs ibe ke Jonatan òkikpa mbin ikana uwu mgban akọn̄ me Jeruselem. 22 Mgbọ ogwu ubọọn̄ onọbe ikọ ya, inanaan̄ ejit. Mgbọ yaage, inanan̄a ije, mè inire Tolemayas, mè ige ikpa ijet Jonatan ibe ìkayaka ìkpa mbin akọn̄ ya, mè igwat lek inu me Tolemayas inichichini ọmọ, inyi ema ekaan̄ ntitiin̄.

23 Mgbọ Jonatan obọkọbe etip yi, inyinyi ida ibe ekpa mbin akọn̄ ya enyi isi, mè inigobo usini ebi ugane Ijeren melek ebi ngwugwa, mè ichieek mkpa 24 isa alata okuket mè alata araran̄, mè ekwut melek owuwa esese chieen̄ uche, ije isi Tolemayas isi imun̄ ogwu ubọọn̄ Demetirọs, mè ikaan̄ nnwọn-isi me isi ogwu ubọọn̄. 25 Ubọk geelek usini ebi ido kan̄ ebi òkpaka ibot ekitoon̄ ọmọ ikọ, 26 ogwu ubọọn̄ orọrọ ọmọ me lek ubọk yaage ebi ìkpukpulu me isi kan̄ erọbe ọmọ me lek, mè ibene ọmọ me isi otutuuk ebi Unene kan̄. 27 Ogwu ubọọn̄ orọrọ ọmọ ijot me irek òban Awaji îkupbe, mè ofifi irek umin geelek echi îwuwuuk lek ikaan̄, mè itap ọmọ me ogbo ebi ilile me etete ebi Unene Ogwu Ubọọn̄. 28 Jonatan onenibeek ogwu ubọọn̄ ibe isan̄a ebi Judia me lek otitip, mè isan̄a si agan̄ ita òkup me Sameria me lek otitip, mè ichieek use ibe ke ọmọ môkpe efit ikpoko ita me useen̄. 29 Ogwu ubọọn̄ ochechieek, mè ige otutuuk inu chi itap me ikpa inyi Jonatan ibe ikeyi:

38 Mgbọ Demetirọs omun̄be ibe ke esuuk òwa me ido me irak mkpulu kan̄, ke kpunu ene geege òkije ikeme ọmọ, iyiyala urum akọn̄ kan̄, mè iria otutuuk ebi akọn̄ ifon uwu kiban̄, îtata urum akọn̄ ebi ofifi ido echi îbọkọbe me lek achọ ebi ofifi ido cha. Eya orọ, otutuuk ebi urum akọn̄, ebi ìrọrọ ikwaan̄ me irak ebi ìkpukpulu me isi kan̄, echacha ọmọ. 39 Ene ge me lek ebi ìwuwuuk lek ikigọọk Alikisenda ikeke, ogwu ekigwen Tirifo, omumun̄ ibe ke otutuuk ebi urum akọn̄ mêkinunuun̄ ikeme Demetirọs, mè inisi lek kè Imalikuwe, ogwu Arabu, ogwu òkikpukpo Antiọkus ogwu ijija, gwun̄ kè Alikisenda, òrere Antiọkus òso gweregwen, 40 mè ikpọkpọ ikisisaak ibe inyi ọmọ gwun̄ ya, inyi iniraka irek ubọọn̄ ogwu ute ikup. Îkpa inu Demetirọs orọbe mè ochicha ebi urum akọn̄ ekaan̄be me lek kan̄ inyi Imalikuwe, mè ikup me ere ya ifiin̄ mgbọ.

41 Me ike mgbọ ya, Jonatan oneniria etip isi lek ogwu ubọọn̄ Demetirọs ibe isan̄a urum akọn̄ òkup me uwu mgban akọn̄ me Jeruselem isan̄a, mè isan̄a si urum akọn̄ ebi ìkibem ere me uwu mgban akọn̄ ya isan̄a, mije, ife cha ekpọkpọ ikitim akọn̄ me lek ebi Ijeren. 42 Demetirọs oneniria ifọọk ijet Jonatan ibe ikeyi, “Ìkare inu keyi gaalek ke mbarọ inyi owu mè ido kinyi, mâkinyi owu mè ido kinyi umin mgbọ geelek irek osibibe. 43 Mgbọ keyi, ria-nu urum akọn̄ jet emi, inyi enetap ubọk enyi emi, mije, ebi akọn̄ n̄a mîkpaka ibot iyat ita.” 44 Jonatan oraria obop ebi akọn̄ ita, ìrọriọọn̄ ukot akọn̄, ijet ọmọ me Antiọk. Mgbọ ife cha erebe lek ogwu ubọọn̄, ogwu ubọọn̄ obebele ejit ibe ke ema mînire.

45 Ebi ene enenititiin̄ me emen ama ya, ene mêsobe efit mè akọp obop iba, ikiweek ikpakpan̄ ogwu ubọọn̄ Demetirọs. 46 Ogwu ubọọn̄ olilibi inin̄ emen uwu ogwu ubọọn̄ isi ilet. Ebi ama ya ekpọkpọk ichit lek oniin̄, mè ibene akọn̄. 47 Ogwu ubọọn̄ ogwegwen ebi akọn̄ ebi Ju cha ibe etap ubọk enyi ọmọ, ife cha etotobo ikana ọmọ, mè ikpọk ichon ikana emen ama. Usen ya, mîkpan̄ iso efit obop ene. 48 Ema ewọwọp ama ya, mè ifum owuwa inu, mè inyan̄a ogwu ubọọn̄ isibi. 49 Mgbọ ebi ama ya emun̄be ibe ke ebi Ju cha mîbọkọ ama, ejit kiban̄ ìkayaka ìnye, ema ebebeek ogwu ubọọn̄ mbeek ibe, 50 “Nyi eji esuuk, mè be ebi Ju chi etele ubọk me lek kiji melek ama kiji.” 51 Ebi ama ya etọtọọn̄ nroon̄ akọn̄ kiban̄ igwook, mè irọ esuuk. Ebi Ju cha enenikaan̄ umin me isi ogwu ubọọn̄ mè isi otutuuk ebi geelek si ìkup me irak mkpulu kan̄. Ema enenisa owuwa inu efumbe igbaalek ika inu Jeruselem.

52 Ogwu ubọọn̄ Demetirọs onenikup inyi isi me inyọn̄ ogboon̄ mkpulu kan̄, ido kan̄ si okukup me utelelek. 53 Ire, inwenwene ejit, mè ififila otutuuk use cha îchieekbe, ìkayaka ìnyi Jonatan isi, ìkakpekpe si Jonatan mkpukpe geege me lek otutuuk ata inu cha îrọbe inyi ọmọ. Ire, ikekirọ Jonatan inu me lek ikpak ikpak.

54 Mgbọ inu chi orọbe iraka, Tirifo onenisa gwun̄ enerieen̄ ya, Antiọkus òso gweregwen, ika, inenikana ubọọn̄, ekwukwuun̄ ọmọ okpibot ubọọn̄. 55 Otutuuk urum ebi akọn̄ Demetirọs oyiyalabe cha etititiin̄ me udun̄ kè Antiọkus, mè ijibi akọn̄ igọọk Demetirọs, igagak, igwugwu ikom ilibi. 56 Tirifo ofufum eniin̄ cha, mè ibọkọ ama Antiọk. 57 Antiọkus ijija onenige ikpa ijet Jonatan ibe, “Nrọ inye ibe owu òre òban Awaji, mè irọ owu ogwu ibot me agan̄ mkpulu ini cha, mè imọnọ owu me lek ebi ogbo Unene Ogwu Ubọọn̄.” 58 Îria si efeek inorie eyi alata araran̄ ijet, mè inyi unye ibe ikisa ekpen̄ alata araran̄ inwọ miin̄, mè ikitap ofọnti irio irio, mè ikinwaan̄ ikpele amana alata araran̄ me oguga ofọnti. 59 Îsa si Saimọn, ngwan̄ kè Jonatan, ito me ibot mkpulu agan̄ òkup me agba awaji, bene me Taya si re okike ijọn̄ Ijipiti.

60 Jonatan oneninan̄a ikije ikana me agan̄ okwaan̄ Yuferetis me ama me ama me agan̄ ya. Otutuuk urum akọn̄ ebi Siria etititiin̄ inigbaan̄ itọbọ me lek kan̄. Inenire Asikelọn, ebi ama ya ebọbọkọ ọmọ itap òrirọ òrirọ. 61 Inanan̄a me ere ya isi Gaja, ire, ebi Gaja egogon otunchit ikwek ọmọ. Eya orọ, ikpakpa mbin akọn̄ ikana ama ya, mè iwọp iriọk melek asabọn ama kan̄, mè ifum inu kiban̄. 62 Ebi Gaja etotolek iniriaak ọmọ, igọgọọk ema irọ esuuk. Ire, ikpukpulu bọn ebi ilile me ama ya me usun̄ akọn̄ iria ifo Jeruselem. Inenije ikana otutuuk ido ya isi igwook me Damasikọs.

63 Jonatan oneninọ ibe ke ebi ibot akọn̄ kè Demetirọs mînire Kades me Galili melek ikpele urum akọn̄, inenirieen̄ ọmọ isan̄a me irek kan̄. 64 Isisibi isi ikweek ema, mè itele Saimọn ogwu ngwan̄ me ido ya. 65 Saimọn okpakpa mbin ikana Bet Suru, mè itim akọn̄ me lek ama ya owuwa usen, mè inwan ema ikam. 66 Ema enenibeek esuuk, inyinyi ema. Irerieen̄ ema isibi me ama ya, mè ibọkọ ama ya, mè ito ebi akọn̄ ibe ekebem.

67 Me ike mgbọ ya, Jonatan melek urum ebi akọn̄ kan̄ mîgwugwuun̄ uwu ọfọ kiban̄ me agba oyô Geneseret. Me obum egwe, ema enanan̄a ikeke, mè ije isi ire lek òla ijọn̄ Asọru. 68 Urum akọn̄ ebi ichen cha mîdasi ilileek ene me inyọn̄ ogoon̄ ikikpọ ọmọ, mè inisibi ikweek ọmọ me lek òla ijọn̄, mè ibene akọn̄ me lek kan̄ isi mè isi. 69 Urum ebi ìlilileek cha eneniwọọk isibi, mè igọọk inin̄ me lek akọn̄ ya. 70 Otutuuk ebi melek kè Jonatan elililim. Ene ge ikeyi ìkasik, îtata Matatiyas gwun̄ kè Abusolọm mè Judas gwun̄ kè Kalifi, ebi ibot akọn̄ kan̄. 71 Jonatan otataba ofọnti òkup ọmọ me lek igwak, mè ichibi ntọn̄ igwook me ibot, mè iriaak uriaak. 72 Inenigwu ikom inin̄ isi akọn̄, mè itim ikpan̄ ebi ochicha cha, ife cha elilim. 73 Mgbọ ebi kan̄ ebi ìlilibi inan̄a cha emun̄be ikeya, egwugwu ikom inu, mè inililaba ebi ochicha cha mege isi ire Kades ere m̀gba-ǹgwele ukan̄ ebi ochicha cha okupbe, mè igwugwuun̄ uwu ọfọ echi kiban̄ me ere ya. 74 Ebi ìkwakwaan̄ me lek urum akọn̄ ebi ochicha cha me usen ya mêso obop ene ita. Jonatan ogwugwu ikom ika inu Jeruselem.