Ebi ubọọn̄ mînyinyan̄a Jonatan mè irọ ọmọ òban Awaji
10
Me acha efit me akọp gweregwen, Alikisenda Epifanes, gwun̄ kè Antiọkus, onunu inire Tolemayas, mè ibọkọ ama ya ikaan̄. Ebi ama ya ebọbọkọ ọmọ itap, ikekikpulu. 2 Mgbọ ogwu ubọọn̄ Demetirọs onọbe inu ya, itititiin̄ ikpele urum akọn̄ isa isibi ibosi akọn̄ me lek kè Alikisenda. 3 Demetirọs oneniria ikpa unene ijet Jonatan ikisa itọn̄ ogwa, 4 mije, ìtumu ibe, “Eji edasi egọọk ebi Ju erọ esuuk sabum Jonatan môbe ọmọ igọọk Alikisenda ikeke irọ ikeme eji. 5 Mije, ìkabowuuk otutuuk ijo inu eji erọbe ọmọ, mè ebi ngwan̄, mè ido kiban̄.” 6 Eya orọ, Demetirọs onyinyi Jonatan unye ibe ibọkọ ene melek akọn̄, mè irom nroon̄ akọn̄, mè ikana ogwu òkibieen̄ ọmọ udun̄. Înyi si ida ibe esan̄a ebi ekpulube me akọn̄ igon ikam me uwu mgban akọn̄ me Jeruselem esibi enyi Jonatan.7 Jonatan onenisa ikpa ya isi Jeruselem isi ifuk inyi otutuuk ene melek ebi ìkup me uwu mgban akọn̄ ya, inyi enọ. 8 Mgbọ ife cha enọbe ibe ke ogwu ubọọn̄ înyi Jonatan unye ibe iteen̄ ene me lek akọn̄, ukpook otetet ema. 9 Ebi akọn̄ ìkup me uwu mgban akọn̄ ya esasan̄a ebi ekpulube me akọn̄ igon ikam cha ikana itap Jonatan me ubọk, iyayaka ema inyi ebi ute mè ebi uga.
10 Jonatan onenisi iluk me Jeruselem, mè ibene ikikpọk inama ama ya, mè ikinen̄e isun̄. 11 Înyi ebi ìkisi ikwaan̄ ida ibe enama mgban mè ukput ekana ogoon̄ Sayọn okokop, mè esa ewuuk ebakbe isi gweregwen ìkike enama, inyi inye. Erọrọ si ikeya.
12 Ebi ichen ìkup me uwu mgban cha Bakides onamabe elilim itele uwu cha, 13 mè iyat itele irek ikwaan̄ kiban̄, ogwu ikup ofo ido kiban̄. 14 Bet Suru gaalek ke ibot ene inen mè inen, ebi ìjijit Ikan Awaji mè inu îtọbe, esik; mije, ema esa ere ya irọ ere ilet-lek.
15 Ogwu ubọọn̄ Alikisenda oneninọ use cha geelek Demetirọs ochieekbe Jonatan, mè inọ si inu ofolek akọn̄ Jonatan mè ebi ngwan̄ etimbe, mè owuwa inu unye-ejit ema erọbe, mè ofaak ema ebọkọbe. 16 Inenibe, “Ìre eji mêkọt imun̄ mbet lek ene òkup keyi ni? Eji egwagwat lek etet unene melek kan̄, mè esa ọmọ erọ ogwu melek kije!” 17 Eya orọ, igege ikpa ijet Jonatan, mè itumu inyi ibe:
18 “Ogwu ubọọn̄ Alikisenda îtọp Jonatan ngwan̄ kan̄ amọn. 19 Eji mînọ ibe ke owu ìre ikpele ogwu usọ akọn̄, mè ire si ogwu ògbegbe irere unene kiji. 20 Mije keya, eji mîmọnọ owu me chereyi isa irọ ogwu òban Awaji inyi ido kinyi. Erieen̄ umin kwun̄ ìre, ‘Unene Ogwu Ubọọn̄’; owu môgọọk eji ikeke, mè ire si unene kiji.” Îria si irio irio ofọnti ebi ubọọn̄ mè okpibot ubọọn̄ alata araran̄ igbaalek ijet Jonatan.
21 Me òso onyan̄ jaaba me acha efit mè akọp gweregwen, me usen ijọk Uwu Nlak, Jonatan onenikpulu ofọnti mbuban itap, mè iteen̄ ebi ene me lek akọn̄, mè inyi ema nroon̄ akọn̄ owuwa owuwa.
Demetirọs îria ikpa ijet Jonatan
22 Mgbọ Demetirọs onọbe inu ya òrọrọ, lek kan̄ osisisik, ibebe, 23 “Keke ke eji erọ ikeyi, mè itele inyi Alikisenda iraka eji isi igọọk ebi Ju itet unene isa irọ irek kan̄ inye? 24 Emi si mâria ikpa unene ijet ema, mè ichieek ibe mânyi ema irek ilile mè inu ubọọn̄, ufuna ema etap ubọk enyi emi.”
25 Inenige ikpa ijet ebi Ju ibe:
“Ogwu ubọọn̄ Demetirọs îtọp ido ebi Ju amọn. 26 Eji mînọ ibe ke enyi mîkeke inye me lek mgbaan̄-nchieek kinyi melek kiji, mè igọọk eji ikigbaan̄ inu irọ kubọk unene, kpetele eji isi ikana igọọk ebi ochicha kiji ikeke. Îtop eji me lek enenen. 27 Eya orọ, ìkeke ìnye melek kiji ikeya ìnyi isi, ke eji mênyi enyi ata mkpukpe me useen̄ inu enyi erọbe inyi eji. 28 Eji mêsan̄a owuwa otitip ido isan̄a enyi me lek, mè inyi enyi owuwa uche.
29 “Bene me mgbọ keyi, nnyi otutuuk kinyi ebi Ju utelelek, mè isan̄a enyi isan̄a me lek otutuuk otitip mkpulu geelek, mè ikpoko ibot uchi, mè otitip ogwu ubọọn̄. 30 Ofifi si, irek ge me irek ita me lek akpa geelek ewọpbe, mè ìkike iba mfut uti geelek echi òre unen n̄a mabọkọbe, ntele, bene me chereyi fo isi. Ido Juda, melek agan̄ ita ekpọkọbe me agan̄ Sameria mè Galili itap isọkọ, kpebekikpe si inu chi geege bene me chereyi si re mgbọ geelek. 31 Jeruselem mè ama echi òkukup mè irak kan̄ môkup me mbuban, irek ge me akọp irek mè otitip geelek òkinu inyi ema, kpebeyaka ikikpe mkpukpe geege me ibot. 32 Ntele si ubọk me lek uwu mgban akọn̄ òkup me Jeruselem, mè iyaka isa inyi ogwu òban Awaji, inyi igobo ebi akọn̄ ìneme ọmọ ito ibe ekebem. 33 Otutuuk ebi Ju geelek etetbe me akọn̄ isun̄ me ere geelek me mkpulu n̄a, ntele ibe efon me ọsọ, mè ekakpe mkpukpe geege. Ǹkinyi si ikan ibe otutuuk ebi ibot mkpulu esan̄a otutuuk kiban̄ me lek otitip ido mè otitip ibot anam kiban̄.
34 “Otutuuk usen ijọk geelek, mè Usen Mbuban, mè ijọk Aya Onyan̄, mè usen orirọ geelek esun̄be esese, melek egwe ita sabum ijọk mè egwe ita ijọk orakabe, otutuuk usen kechi, ìbore usen utelelek inyi otutuuk ebi Ju ìkup me irak mkpulu n̄a, ema kpebekpe otitip ido geege me usen chi. 35 Me usen cha, ene geege ìkpodo ema otitip geege, ene geege ìkporọrọ si ema me lek unye unye, òfo me lek inu geege.
36 “Mêbọkọ ebi Ju itap me lek ebi akọn̄ ogwu ubọọn̄ iso akọp obop ene ita, mè ikikpọ ema chieen̄ me lek kubọk ekikpọ otutuuk ebi geelek ìkup me urum akọn̄ ogwu ubọọn̄. 37 Mêto usini kiban̄ me uga uwu mgban ogwu ubọọn̄ cha, mè ito si usini kiban̄ me irek ilile me mkpulu. Ebi ibot mkpulu kiban̄ mè ebi ilile kiban̄ ebere ebi kiban̄. Ema mêluk me irak ikan kiban̄ kubọk ogwu ubọọn̄ onyibe ida ibe ikup me ido Juda.
38 “Òfo me lek agan̄ ita cha ekpọkọbe me agan̄ Sameria itap me agan̄ Judia, mêsa ema isọkọ me lek Judia, inyi ema ekup me irak mkpulu ge, mè ekegban̄ utọn̄ enyi ogwu òban Awaji gaalek, ìkare ofifi ene. 39 Nche ikpoko geelek òkinan̄a me Tolemayas mè asabọn ama kan̄ inyi Uwu Mbuban me Jeruselem, ibe esa ekekpe ewe inu geelek ògbegbe echi ekisa ifaka mfaka me Uwu Mbuban. 40 Mâkinyi si akọp mè obop ikpoko alata araran̄ go acha geelek, eyi môkinan̄a me lek ikpoko ogwu ubọọn̄ me ere ògbegbe. 41 Otutuuk ikpoko òsisik, echi ebi otuchieen̄ ikwaan̄ kpekpe itap, kubọk ekpebe me acha echi òraraka cha, bene me mgbọ keyi fo isi, ema ebekikpe inyi esa ekerọ ikwaan̄ me Uwu Mbuban.
42 Ofifi kan̄, obop ikpoko alata araran̄ go echi ebi ikwaan̄ n̄a ekibọkọ me inyọn̄ ibot ikpoko geelek ekikaan̄ me Uwu Mbuban me acha me acha, kpebeyaka ibọkọ, mije, ìkup inyi ebi ngwugwa ebi ìkirọ ikwaan̄ me ere ya. 43 Otutuuk ebi geelek ìlilibi inin̄ Uwu Mbuban, mè ìre ere geelek me oyet egep uwu ya, isi ilet bak me lek urieek ekaan̄be ogwu ubọọn̄, mè ìre ofifi urieek geelek, mêfuk urieek cha ichep inyi ema, mè isan̄a ema isibi, mè iyaka inu kiban̄ geelek efumbe inyi ema. Ikeyi ke ìbokup me ere geelek me mkpulu n̄a.
44 “Ikpoko geelek mêsabe ikpọk inama Uwu Mbuban mè ineen̄ isun̄, ìbonan̄a me akpa ogwu ubọọn̄. 45 Ikeya si, ikpoko ebesa ikpọk inama mgban ama Jeruselem mè itap okwukwek ikat ikana, mè eyi ebesa inama mgban ikana ofifi ama geelek me Judia, ìbonan̄a si me akpa ogwu ubọọn̄.”
Mkpa kè Demetirọs
46 Mgbọ Jonatan mè ebi ene enọbe ikọ chi Demetirọs ogebe, ema kpechieek, kpebọbọkọ si itap. Mije, ema mînikeek ikpele ijo inu cha îrọbe me Ijeren, mè ubọk îsabe itutuku ema. 47 Kpan̄asi ikeya, Alikisenda otat ema me lek, mije ọmọ odasi itumu ikọ esuuk inyi ema. Eya orọ, ema egọgọọk Alikisenda ikeke otutuuk usen ugwem kan̄.
48 Ogwu ubọọn̄ Alikisenda onenijibi ikpele urum akọn̄ òmimin ije isi ikweek Demetirọs. 49 Ema ebi ubọọn̄ iba egbagbaan̄ ikwak me isi akọn̄, ebi urum akọn̄ kè Demetirọs elilim. Alikisenda ogọgọọk ema, mè itim ikpan̄ ema. 50 Îtim akọn̄ ya inye enenen mege ura onimbe, akọn̄ orerie Demetirọs me usen ya.
Alikisenda melek Tolemi mîkaan̄ mgbaan̄-nchieek
51 Alikisenda oneniria ebi otuchieen̄ isi lek kè Tolemi ogwu ubọọn̄ Ijipiti ibe:
52 “Nra ika inu ido n̄a, mè inene ogboon̄ ubọọn̄ ebi nte nte n̄a ikup, mè ibene ikikpulu, bak me lek nra itim ikpan̄ Demetirọs, mè inibọkọ ido n̄a ikikpulu. 53 Ǹtitim akọn̄ me lek kan̄, mè igbaan̄ ọmọ melek urum akọn̄ kan̄ ijijaka, mè iraka inyọn̄ ogboon̄ ido kan̄ ikikpulu. 54 Eya orọ, mgbọ keyi, owu melek kiji enekaan̄ mgbaan̄-nchieek, mè ekana unene. Nyi emi gwun̄ kwun̄ enenwaan̄ me lek nwa, inyi mâkana ugot inyi owu. Mânyi owu melek gwun̄ kwun̄ enenwaan̄ uche echi ògbegbe irek kwun̄.”
55 Ogwu ubọọn̄ Tolemi ofọfọọk otu ibe, “Usen ya okabe inu me ido ebi nte nte kwun̄, mè inene ogboon̄ ubọọn̄ kiban̄ iraka ikup, ìre usen ikpele unwọọn̄ inyi owu! 56 Mârọ inu odobe inyi owu. Ire, na na chichini melek n̄a me Tolemayas inyi eji emun̄ isi mè isi, emi mânenikana nte nwa kwun̄, ike otumube.”
57 Tolemi oneninan̄a me Ijipiti, ọmọ melek Kilopatira, gwun̄ kan̄ enenwaan̄, mè ije inire Tolemayas me acha efit mè akọp gweregwen mè iba. 58 Ogwu ubọọn̄ Alikisenda osisi ichichini ọmọ, Tolemi osasa ogwu gwun̄ enenwaan̄, Kilopatira, inyi Alikisenda me lek nwa, mè ito ikpele ijọk ido-nwa òsisisik Tolemayas, ike ebi ubọọn̄ ekirọ.
Mîrọ Jonatan ogwu ibot akọn̄ mè mkpulu
59 Ogwu ubọọn̄ Alikisenda oraria ikpa ijet Jonatan ibe inu inimun̄ ọmọ. 60 Jonatan ojeje òrirọ òrirọ isi Tolemayas, mè isi ichichini ebi ubọọn̄ iba cha, mè iche uche alata okuket mè alata araran̄ mè owuwa esese uche inyi ebi ubọọn̄ cha mè ebi unene kiban̄, ema emama ọmọ. 61 Usini ebi Ijeren ebi ijo ife, ebi òkpaka ibot, etititiin̄ ibenifiat ọmọ. Ire, ogwu ubọọn̄ Alikisenda ìkanyi ema isi. 62 Ogwu ubọọn̄ onyinyi ida ibe ewọọk ofọnti Jonatan otapbe esan̄a, mè etap ọmọ ofọnti irio irio. Erọrọ si ikeya. 63 Ogwu ubọọn̄ onyinyi ọmọ irek ibe ikweek me agba lek kan̄, mè itumu inyi ebi ibot ikwaan̄ kan̄ ibe, “Ìsa ọmọ ìsibi ìsi eden̄ ama, mè ilook ibe ene geege ikayaka ìtumu ikọ geelek ìtoon̄ ọmọ, inu geelek îrebe; mè ene geege ikatap ọmọ unaan̄-ejit, inu geelek ikerọrọ.” 64 Mgbọ ebi ìkitoon̄ ọmọ uraamọn emun̄be umin enyibe ọmọ, sa me ulook ya elookbe, mè imun̄ si etapbe Jonatan ofọnti irio irio, otutuuk kiban̄ elilim. 65 Ogwu ubọọn̄ onyinyi ọmọ ofifi umin, îtap ọmọ me ogbo ebi ilile me etete ebi Unene Ogwu Ubọọn̄, mè irọ ọmọ ogwu otu uji akọn̄ mè ogwu ibot mkpulu me agan̄ ido ere înan̄abe. 66 Jonatan okaka inu Jeruselem me esuuk mè ubelejit.
Jonatan îtim ikpan̄ Apoloniọs
67 Me acha efit mè akọp gweregwen mè go, Demetirọs òso iba, gwun̄ kè Demetirọs, onanan̄a me Keret ika inu me ido ebi nte nte kan̄. 68 Mgbọ ogwu ubọọn̄ Alikisenda onọbe inu yi, lek kan̄ osisisik, igwugwu ikom ifo Antiọk, òrere ama ibot me ido Siria. 69 Demetirọs òso iba ototo Apoloniọs ibe ikikpulu agan̄ Kole-Siria. Apoloniọs otititiin̄ ikpele urum akọn̄ isa isi irieen̄ akọn̄ me Jamina, mè iria etip ijet Jonatan ogwu òban Awaji ibe ikeyi:
70 “Owu gaalek okọt inan̄a ikeke itọ eji ubọk me isi. Emi nkana ogwu ochak mè ogwu esip mije kwun̄. Keke orọ okupbe me inyọn̄ ogoon̄ ikikpulu, mè ikirọ ikeme eji? 71 Ire osa urum akọn̄ kwun̄ itoon̄ ejit, nan̄a sibi ijọn̄ na me lek òla ijọn̄ na chichini eji, inyi ekpọ unye ge òbogak ge me ere ya. Urum akọn̄ ama ile geelek ekup inyi emi. 72 Kido kana, ke mêtumu inyi owu ene emi nrebe, mè mbet lek ebi ìkekeke eji me udun̄. Mêtumu inyi owu ibe ke owu òkpokọt ikeke ida eji, mije, mgbọ iba ke eji etim akọn̄ ikpan̄ ebi nte nte kwun̄ me lek ijọn̄ kiban̄ gaalek, ema elilim. 73 Mgbọ keyi si, owu òkpokọt ikeke ida urum akọn̄ inyọn̄ inyinya n̄a, mè ikpele urum akọn̄ ebi ukot ukot ìwawa ikeyi, me lek òla ijọn̄, ere kpunube ewuuk, mè ìre nchicha, kpukpunu si ere ebelibi isi ilet.”
74 Mgbọ Jonatan obọkọbe etip kè Apoloniọs, inanaan̄ ejit. Inenigobo akọp obop ebi akọn̄ isa igbaalek ijibi inan̄a me Jeruselem isibi, ogwu ngwan̄ Saimọn osasa si ebi akọn̄ kan̄ isibi igọọk ọmọ. 75 Inenirieen̄ akọn̄ me isi ama Jọpa. Ire, ebi ama ya egogoon̄ otunchit kiban̄ ichit, mije Apoloniọs îgwook urum akọn̄ me Jọpa. 76 Ema etitim akọn̄ me lek ama ya, ebi ama ya efefieek owot, mè ichili otunchit cha, Jonatan obọbọkọ ama Jọpa.
77 Mgbọ Apoloniọs onọbe inu ya òrọrọ, isasan̄a ebi akọn̄ inyọn̄ inyinya, obop ita, melek ikpele urum akọn̄ ebi ukot ukot isibi igọọk, mè ije isi Ajọtọs, mè ikirọ kubọk ìboraraka ifo isi. Ire, ijijibi inin̄ lek òla ijọn̄ ya, mije, îkaan̄ ikpele urum ebi akọn̄ inyọn̄ inyinya, ebi îsabe itoon̄ ejit. 78 Jonatan ogọgọọk ọmọ isi ire Ajọtọs, urum akọn̄ agan̄ iba cha ebebene akọn̄. 79 Apoloniọs îlet obop ebi akọn̄ inyọn̄ inyinya me udun̄ urum kè Jonatan. 80 Jonatan oneniriọọn̄ ibe ke ebi akọn̄ òwa me udun̄ kan̄ eletbe, mije, ebi akọn̄ cha mîkpa ikana urum akọn̄ kan̄, mè ikisa oraan̄ isook ema ibene me ewelegwe ire agan̄ ikakwun̄. 81 Ire, ebi akọn̄ kè Jonatan ekekeke inye, kubọk înyibe ema ida, efuuk otata me owot inyinya kebilọ.
82 Me ike mgbọ ya, mgbọ lek owọbe ebi akọn̄ inyọn̄ inyinya cha, Saimọn onenisa urum akọn̄ kan̄ ibum itibi inin̄ lek ebi akọn̄ ukot ukot cha, igagak ebiba, elililim. 83 Ebi akọn̄ inyọn̄ inyinya cha elilim iyiyala ikana lek òla ijọn̄ ya, mè ilim ifon Ajọtọs isi inin̄ emen uwu Dagọn, yọk kiban̄, isi ilileek. 84 Ire, Jonatan owọwọp Ajọtọs mè ama echi òkukup ikana, mè ifum ama cha, mè itap ukan̄ iwọp uwu Dagọn ya melek ebi ìlilibi isi ilet me emen itaka iriọk. 85 Otu ifuk ebi ìkwakwaan̄ me otu oge akọn̄ mè ebi ewọpbe ikpan̄ ìre obop ene jeeta.
86 Jonatan onanan̄a me ere ya, ọmọ mè ebi kan̄ esisi igwugwuun̄ uwu ọfọ me agba lek ama Asikelọn; ebi ama ya esasa ijọk isibi inu inibọkọ ọmọ itap. 87 Jonatan onenika inu Jeruselem, mè isa owuwa inu efumbe me akọn̄ igbaalek ika. 88 Mgbọ ogwu ubọọn̄ Alikisenda onọbe inu chi òrọrọ, inyinyi Jonatan umin isọkọ me lek echi îwuukbe lek inyi, 89 mè iria ikpele amana alata araran̄ ekigọbọ me oguga ofọnti ijet Jonatan, mbet lek eyi ekinyi ebi ogbo umin ekigwen, “Ngwan̄ Ogwu Ubọọn̄,” mè isa si ama Ekurọn melek okike ijọn̄ ama ya inyi, ibe isak.