5 Me ike mgbọ ya, Judas îrieen̄ akọn̄ me Elasa, ọmọ melek obop ene ita egogobo. 6 Mgbọ ema emun̄be ikpele urum akọn̄ ebi ochicha cha, ukpook otetet ema, owuwa kiban̄ efọfiọọk isibi me m̀gba-ǹgwele ukan̄ ya. Ebi ìsisik kpewa iraka efit ene jeeta.

7 Mgbọ Judas omun̄be ibe ke ebi akọn̄ kan̄ mîfiọọk ilibi inan̄a, ke akọn̄ mônibumu, îsisaak ekwukwu kan̄ enenen, mije, mgbọ kpunu isasa iyaka ititiin̄ ema. 8 Efuuk otetet ọmọ, ire, itutumu inyi ebi ìsisik melek kan̄ ibe, “Eji enan̄a ekeke ejibi akọn̄ enin̄ lek ebi ochicha kiji. Usini mgbọ, eji mêkọt ikaan̄ unye itim ema akọn̄ me lek.” 9 Ire, ebi kan̄ eweweek irọrọ inyi ọmọ inwene ejit, mè itumu ibe, “Eji kpekaan̄ efuuk isasa itim akọn̄ mgbọ keyi. Kpan̄asi ikeya, eji esa ebek ugwem kiji esi ere uwu mgbọ keyi-nu, sabum eji èyaka esa bọn ulọk kiji ègbaalek esibi ènu ènetim ife chi akọn̄ me lek. Eji mîse enenen.”

10 Ire, Judas obebe, “Emi m̀kpakọt ilibi itele ife kechi. Ire mgbọ mkpa kiji îre, eji ekat ejit ekwaan̄ me ibot ebi kiji, mè ekasa okpa geege ìken umin kiji.”

11 Urum ebi akọn̄ kè Bakides ejijibi inan̄a me m̀gba-ǹgwele ukan̄ kiban̄, mè inikeke me irek ininin̄ akọn̄ me lek ebi Ju. Efefele urum akọn̄ ebi inyọn̄ inyinya ukpa iba; ebi olik mgbọlọ mè ebi oraan̄ eje me isi ebi urum akọn̄ cha, ebi ibot ebi usọ akọn̄ ejeje si me isi. 12 Bakides okup me okpọkọ urum akọn̄ agan̄ ulom, sà ebi akọn̄ ukot ukot eje me etete urum ebi akọn̄ inyọn̄ inyinya iba cha, ikigọọk me ida otita. Ebi akọn̄ kè Judas ekekiwut si otita akọn̄ echi kiban̄. 13 Okput akọn̄ ebi urum akọn̄ cha osisisik ijọn̄, ema etitim akọn̄ ibene me ewelegwe ire ikakwun̄.

14 Mgbọ Judas onimun̄ ibe ke unye ebi akọn̄ kè Bakides ìkup me agan̄ ulom, ọmọ melek ebi kan̄ ebi ejit onyebe ekakana ifo agan̄ ya, 15 mè itim akọn̄ ikpan̄ ebi agan̄ ulom cha, mè igọọk ema mege isi ire ebon ogoon̄ Ajọtọs. 16 Mgbọ urum akọn̄ òkup me agan̄ ujit emun̄be ibe ke mîtim ikpan̄ urum agan̄ ulom, ema ekakana igọọk Judas mè ebi kan̄ me agan̄ udun̄. 17 Akọn̄ onenire ugwem mè mkpa, owuwa ene me agan̄ iba cha ekwakwaan̄, mè iben uga unan. 18 Judas me lek kan̄ okwukwu, ebi kan̄ ebi ìsisik elilim.

19 Jonatan mè Saimọn ebeben ngwan̄ kiban̄ Judas isi ifuun̄ me udọn̄-ufuun̄ ebi nte nte kiban̄ me Modeyin, 20 mè ito ito me ibot kan̄. Otutuuk ebi Ijeren etoto ito, mè ifieejit enenen enenen inyi ọmọ owuwa usen, mè ikikọt okwa ito ibe:

23 Mgbọ Judas okwube iraka, ebi òkpaka ibot cha, enanan̄a me ere geelek ema eletbe me Ijeren isibi; otutuuk ebi ìkirọ inu ikpak cha ekakana isibi. 24 Me ike mgbọ ya si, ikpele unye akan̄ oninin̄, otutuuk ebi ido ekakana igọọk ebi ijo ife cha. 25 Bakides oteteen̄ ebi kperiọọn̄ Awaji igwook ibe ekekpulu ido. 26 Ebi mkpulu chi etoto ebi ene ikana ikiweek ebi unene kè Judas, mè ikisa ijet Bakides, Bakides orọrọ ema useen̄, mè irọ ema inu ochak. 27 Ikpele ujaralek oninin̄ me ido Ijeren, mbet kan̄ ìkakukup karake ebi nriran etabe me etete kiban̄.

28 Otutuuk ebi unene kè Judas enenititiin̄, mè initumu inyi Jonatan ibe, 29 “Akarake ngwan̄ kwun̄, Judas okwube, kpunu ene geege òbet lek kan̄, ogwu òbokọt itim akọn̄ me lek ebi ochicha kiji mè Bakides, mè isulu si ebi ido kiji ebi ìchacha eji osusut. 30 Eya orọ, cherekeyi, eji mîgobo owu ito me irek kè Judas ibe owu òre ogwu mkpulu mè ogwu isi ònyi eji, mè òkotim akọn̄ ònyi eji.” 31 Me usen ya, Jonatan ochechieek ikakana ogwu ibot ebi Ju me irek ogwu ngwan̄ Judas.

32 Mgbọ Bakides onọbe etip yi, iweweek ikpakpan̄ Jonatan. 33 Ire, Jonatan mè Saimọn ogwu ngwan̄ mè ebi melek kiban̄ enọnọ, mè ilibi isi ilet me emen èwê Tekowa, mè ikiluk me uwu ọfọ me agba lek òkpuku mun̄ Asifa. 34 Bakides oneninọ etip ya me Usen Mbuban, mè inisa otutuuk urum kan̄ isaba okwaan̄ Jodan.

35 Jonatan oneniria Jọn, ogwu ngwan̄, ogwu òkikpọ chieen̄ me lek urum ebi melek kiban̄, ibe isi lek ebi Nabatiya, ebi unene kan̄, ibe ebọkọ owuwa akpan ema ebemebe cha esun̄ enyi ema. 36 Ire, ebi ototun̄ ukan̄ kè Jambiri ìnan̄a me Medeba enunu, mè itet Jọn agam agam, mè ikpulu otutuuk akpan kiban̄ cha isa ifon.

37 Sọnja mgbọ iraraka, enenikpa inyi Jonatan mè Saimọn ogwu ngwan̄ ibe, “Ebi ototun̄ ukan̄ kè Jambiri mîkaan̄ ikpele orirọ ido-nwa. Ema melek ikpele urum ebi ene mêkisa ogwu enenwaan̄ òbat olom, gwun̄ ogwu ilile ge me ido Kenan, inan̄a me ama Nadabat ikisi ere orirọ ya.” 38 Ema enenikeek ubọk ekpan̄be Jọn, ngwan̄ kiban̄, mè ininene inyọn̄ ogoon̄ isi ilileek. 39 Ike ema ekupbe ikikpọ ere, ema emumun̄ ikpele urum ebi ene ekikpulu inu, mè ibeen̄ owuwa owuwa akpan. Ogwu enerieen̄ òdo nwa ya mè ebi unene kan̄ mè ebi ototun̄ ukan̄ kiban̄, esasa ekpete mè nkwukwak, melek nroon̄ akọn̄ me ubọk isibi inikweek ema.

40 Ebi Ju cha enanan̄a me ere ema elileekbe isibi, mè ikpaan̄ ebi ife cha, Owuwa kiban̄ ebeben unan, mè ikwaan̄. Ebi ìsisik elilim ifon lek ogoon̄, ebi Ju ekpukpulu otutuuk akpan kiban̄ cha. 41 Orirọ ido-nwa ya okakana ufieejit, okwa ebi ifit cha okakana okwa ito. 42 Mgbọ ebi Ju cha esan̄abe useen̄ eje ngwan̄ kiban̄ isan̄a òjot òjot, ema egwugwu ikom ifon emen nria agba okwaan̄ Jodan isi ikup.

43 Mgbọ Bakides onọbe inu ya òrọrọ, isasa ikpele urum akọn̄ inu me agba okwaan̄ Jodan me Usen Mbuban. 44 Jonatan otutumu inyi ebi melek kan̄ ibe, “Ìnan̄a ikeke, mè eji etim akọn̄ ebek ugwem kiji! Mije, cherekeyi ìkabet lek usen echi òraraka. 45 Ìkpọ, akọn̄ òwa me isi kiji mè udun̄ kiji. Okwaan̄ Jodan me agan̄ ge, nria mè nsisaan̄ oron me agan̄ keyilọ, kpunu agan̄ eji ebetap ibot. 46 Ìtaan̄ ukpo ìgwen Awaji òkup me akpabin inyọn̄ ibe ininyan̄a eji isibi me ubọk ebi ochicha kiji.” 47 Akọn̄ obubumu. Jonatan onenibokpan̄ Bakides, ire, ifafiala, mè ikpebe ifo udun̄. 48 Jonatan mè ebi kan̄ ewuwulu igwook me okwaan̄ Jodan, mè isaba itoon̄ me agba keyilọ. Ire, ebi ochicha kpesaba igọọk ema. 49 Ebi akọn̄ kè Bakides ìkwakwaan̄ me usen ya mêso obop ene.

50 Bakides ogwugwu ikom ika inu Jeruselem, mè inama owuwa ama mgban akọn̄ me Judia: înama uwu mgban akọn̄ me Jeriko, mè Emayọs, mè Bet Oron, mè Beten, mè Timinat, mè Paratọn melek Tefọn, mè inama mgban ikana, mè itaak otunchit mè olọkọrọ iso lek. 51 Îto urum akọn̄ me ama cha geelek isa ikisisaak ebi Ijeren. 52 Înama si mgban ikana ama Bet Suru, mè Gejeri, mè inama uwu mgban akọn̄ me Jeruselem, mè isun̄ urum akọn̄ melek ogbogbo inorie me emen kiban̄. 53 Îkpulu bọn ebi ilile me ido Ijeren me usun̄ akọn̄, mè igon ema ikam me emen uwu mgban akọn̄ me Jeruselem, mè ito ebi akọn̄ ibe ekebem ema.

54 Me emen onyan̄ iba me acha efit mè akọp go mè ita, Alikimọs onyinyi ida ibe egbugbọ mgban oyet egep agan̄ emen me Uwu Mbuban. Ìrọ inu ya isasa ijijaka ubọk ikwaan̄ ebi nriran. 55 Alikimọs ibebene ikigbugbọ mgban ya, orukan̄ ngọm otetet, ikwaan̄ kan̄ ya òyayaka ikeke. Uga kan̄ ogọgọm. Ngọm òtetet ọmọ ire lek, ìkayaka ìkọt ìtumu ikọ geege, ìkayaka ìkọkọt ìtọ ikọ geege òfo me lek uwu kan̄. 56 Ikafifiin̄ mgbọ, ikwukwu me emen mgbọ ya, ìkwu mkpa ikpele nyanya. 57 Mgbọ Bakides omun̄be ibe ke Alikimọs îkwu, igwugwu ikom ifo igọọk ogwu ubọọn̄ Demetirọs. Ido Juda okukup me esuuk acha iba.

58 Otutuuk ebi òkpaka ibot cha enenitaka otọt ibe, “Mgbọ keyi Jonatan mè ebi kan̄ ekupbe me esuuk mè utelelek, eji enesa Bakides egwu ekom enu, inyi inikpulu otutuuk kiban̄ isan̄a me eririeen̄ ge gaalek.” 59 Ema esisi lek kè Bakides, mè itumu ikana igwook. 60 Mgbọ yaage, Bakides osasa ikpele urum akọn̄ inan̄a ije inu, mè inyi otutuuk ebi melek kan̄ erebe otu ge ìkup me Judia ida ibe etet Jonatan mè ebi kan̄. Ire, ife cha kpekọt, mije otitọt kiban̄ îkpọk mbum. 61 Kpan̄asi ikeya, Jonatan mè ebi kan̄ etetet akọp ene go me ido ya ebi ìre ebi ibot me lek ijo otitọt ya, mè ikpan̄ ema isan̄a.

62 Jonatan mè Saimọn melek ebi kiban̄ ekpekpebe lek ifo emen èwê isi ikup me ama Bet Basi, mè ikpọk inama ere egwakbe me lek ama ya, mè iwak si mgban ikput. 63 Mgbọ Bakides onọbe etip ya, ikpukpulu otutuuk urum akọn̄ kan̄, mè ilook etip ikana me lek ebi ìkeke melek kan̄ me Judia. 64 Ineninu me Bet Basi, mè ikpa mbin akọn̄ ikana, mè inama esese chieen̄ nroon̄ akọn̄ ibieen̄ me lek mgban ama ya.

65 Ire, Jonatan otetele Saimọn ogwu ngwan̄ me emen ama ya, mè inan̄a isibi ifo emen nsisaan̄ oron òkup me ere ya, ọmọ melek ibot ene inen gaalek, 66 mè isi akọn̄ me lek kè Odomera mè ebi ngwan̄ me ere ya, mè itim ikpan̄ ema, mè isi si akọn̄ me lek bọn kè Fasirọn me emen uwu ọfọ kiban̄, mè itim si ikpan̄ ebiba. Ebi îtimbe ikpan̄ chi ekakana igọọk ọmọ ikeke isi itim akọn̄.

67 Me ike mgbọ ya, Saimọn mè ebi akọn̄ kan̄ elilibi isibi me emen ama ya, mè initap ukan̄ iwọp esese chieen̄ nroon̄ akọn̄ ekisa igbugbọ mgban cha. 68 Ema etitim akọn̄ me lek kè Bakides, mè itim ikpan̄. Akọn̄ ya onwanwan Bakides enenen, nkeek kan̄ mè akọn̄ kan̄ cha okakana inu ikike. 69 Eya orọ, inanaan̄ ejit enenen inyi ebi òkpaka ibot cha ìnigwen ọmọ, mè isọp owuwa kiban̄ ikpan̄. Inenitumu ifieek ibe ke ọmọ môgwu ikom ifo ido kiban̄.

70 Mgbọ Jonatan omun̄be ikeyi, iraria osat isi lek Bakides ibe erọ esuuk, mè itele ebi îkpulube me usun̄ akọn̄ cha. 71 Bakides ochechieek, mè irọ ike Jonatan obe ọmọ irọ, mè inyan̄a ibot inyi Jonatan ibe ke ọmọ ìkpoyaka isisaak Jonatan ofifi me otutuuk usen ugwem kan̄. 72 Ineniyaka ebi îkpulube me usun̄ akọn̄ me ido Juda inyi Jonatan, mè igwu ikom ifo ido kiban̄; ìkayaka ìkpọk ìnu me lek ijọn̄ ebi Ju ofifi. 73 Oge akọn̄ oyayaka me ikeya me ido Ijeren. Jonatan oluluk me Mikimas, mè ibene ikikpulu ebi ene, mè ijijaka ebi kperiọọn̄ Awaji isan̄a me Ijeren.