Unye melek orọmijọn̄ ebi Rom
8
Judas oneninọ ubọk ebi Rom etaan̄be etip, mè inọ ibe ke mîkaan̄ unye ititim akọn̄, mè ikinwọọn̄ ebi geelek ìgọgọọk ema igbaan̄ inu irọ, mè ikima itetet unene melek ebi geelek ìnunu lek kiban̄ iniweek ntap-ubọk, 2 mè ikekisa ikpele unye kiban̄ ibieen̄ ife cha inye. Mîkpa si inu òfo me lek akọn̄ ebi Rom etimbe, mè ikpele ntim-mkpan̄ ema etimbe ikpan̄ ebi Gọọlu, mè itet ebiba me unye ibe eketip otitip mkpulu enyi ema. 3 Înọ si inu ema erọbe me ido Sipen isa ibọkọ udọn̄ ere ekirọkọ alata okuket mè alata araran̄ òkup me agan̄ ya, 4 mè ubọk esabe ikana ebi ìkitọ ikọ me otutuuk agan̄ ya sa me ubọk ema ekidọmọ inu, melek ukarajit ema ekaan̄be, ubọk geelek ere cha ojọn̄ọbe ere enenen me lek kiban̄. Mîkpa si ubọk ema etimbe ikpan̄ ebi ubọọn̄ ìnan̄a me okputut linyọn̄ inu ema akọn̄ me lek, mè ikpukpuku ife cha igwook, mè ijijaka ema enenen, ebi ìsisik ekekitip otitip mkpulu inyi ema me acha me acha. 5 Mîtim si ikpan̄ Filip mè Pesiọs ebi ubọọn̄ Mesidonia, mè ebi ofifi ife ìnunu ema akọn̄ me lek.6 Mîtim si ikpan̄ Antiọkus Ogwu-ile, ogwu ubọọn̄ ido Esia, ogwu òsasa efit mè akọp eniin̄ iba, mè ebi akọn̄ inyọn̄ inyinya mè ebi akọn̄ ìkilibi me uji akọn̄ mè ikpele urum ebi akọn̄ ukot ukot inu ema akọn̄ me lek. 7 Etetet Antiọkus agam agam, mè ifieek ikpele otitip mkpulu itoon̄ me ibot kan̄ mè ibot ebi geelek mêkanabe ubọọn̄ me irek kan̄, mè ibe inyi ema ebi îkpulube me akọn̄, mè iyaka si usini me lek agan̄ ido kiban̄ ònwọnwọn ichit inyi ema, 8 òrere ido India mè Midia mè Lidia. Ebọbọkọ ido chi me ubọk kan̄ isa inyi ogwu ubọọn̄ Yumenes.
9 Mgbọ ebi Giris etọtbe ibe mêjibi akọn̄ isi ikpan̄ ebi Rom isan̄a, 10 otitọt ya onenire utọn̄ ebi Rom, ema eraria ogwu ibot akọn̄ ge isi lek kiban̄ ibe isi itim akọn̄ me lek kiban̄. Ene ya okpakpan̄ owuwa kiban̄, mè itap owuwa ene unan me lek. Ebi Rom ekpukpulu ebi nwa kiban̄ mè bọn kiban̄ me usun̄ akọn̄, mè ifum inu kiban̄, mè ibọkọ ido kiban̄, mè igbugbọ uwu mgban akọn̄ kiban̄ igwook, mè itap ema me usun̄ mege inire chereyi. 11 Otutuuk ido kechilọ geelek mè achọ geelek ìweweek ema ikọ me lek, ejijijaka isan̄a, mè isa irọ usun̄. 12 Ire, isire inu ògbaan̄ me lek ebi unene kiban̄, mè ebi ìtatap ibot me irak kiban̄, ema ekikekeke igba. Ema mîtim ikpan̄ owuwa ebi ubọọn̄, ebi ìkukup igbet mè ebi ìkup me ujọn̄ọ ere. Otutuuk ebi geelek ìnọnọ etip kiban̄ ekitetet ukpook. 13 Ebi ema eweekbe itatap ubọk inyi mè irọ ubọọn̄, ebiba ke ema erọ ubọọn̄. Ebi geelek ema eweekbe isasan̄a me irek ubọọn̄, ebiba ke ema esan̄a me irek ubọọn̄. Ebi ene ekekibene ema ifo inyọn̄ enenen. 14 Ire, me otutuuk inu chi, kpunu ene geege me lek kiban̄ òkwukwuun̄ okpibot ubọọn̄, mè ìre itap ofọnti irio irio echi ebi ubọọn̄ ekitap, isa ikigugo lek. 15 Ema mîkaan̄ Uwu Oru Ido, eyi efit ebi oru ita mè akọp iba ekikup usen geelek ikidọmọ inu òfo me lek nnwọn ebi ene, mè ubọk ebesa ikikpulu ema ijaan̄. 16 Ema ekito ene ge me acha ge ibe ikikpulu ema, mè ikikpọ chieen̄ me lek ijọn̄ ido kiban̄. Otutuuk ene mîra ikisiki ibot inyi ene ge ya, kpemin ejit me lek, kpeto si mba me lek.
Ebi Ju mîgbaan̄ itọbọ melek ebi Rom.
17 Judas onenigobo Yupolemọs gwun̄ kè Jọn gwun̄ kè Akos, mè Jasin gwun̄ kè Elieja, iria isi Rom ibe esi egọọk edọmọ ubọk ebi Rom melek ebi Ju mêgbaan̄be itọbọ, mè ire unene, 18 inyi ema ebi Ju esa me ikeya esibi me irak usun̄ ebi ofifi ido, mije, ema mîmun̄ ibe ke ebi ido Giris ekisasa ebi Ijeren itap me usun̄. 19 Ebi eriabe osat cha enenije ujọn̄ọ ije isi ire Rom, mè inin̄ emen Uwu Oru Ido ya, mè ibum ibot ije kiban̄ inyi ebi oru cha ibe, 20 “Judas, ogwu ekigwen si Makabiyọs, mè ebi ngwan̄, melek ebi Ju, eria eji inu me lek kinyi, ibe eji eneweek mgbaan̄-nrọ mè esuuk melek kinyi, mè enyi etap erieen̄ kiji me otu ifuk ebi ìkigọọk enyi igbaan̄ inu irọ, mè ebi unene kinyi.” 21 Ebi oru cha emama otitọt ya, mè ibọkọ itap, 22 mè inige ikpa etip erọkọbe me lek akpakpa ekwe iria ijet me Jeruselem, inyi ebi Ju esun̄ esa ekekeek esuuk mè mgbaan̄-nrọ yi.
23 Ege me ikpa etip ya ìbe ikeyi: “Kè inu ije ijaan̄ inyi ebi Rom mè ido ebi Ju, me okwaan̄ mè inyọn̄ ijọn̄, ire mgbọ geelek! Kè akọn̄ mè ochicha ije ijọn̄ọ ere me lek kiban̄! 24 Ire akọn̄ idasi irọn̄ inyi Rom, mè ìre ido ge me lek ebi ìkaan̄ mgbaan̄-nrọ melek kan̄ me otutuuk ere îkikpulu, 25 ido ebi Ju mêsa otutuuk ejit kiban̄ itap lek kubọk ebi ìkaan̄ mgbaan̄-nrọ melek Rom, mgbọ geelek inu òkup ikeya osibibe. 26 Ebi ochicha geelek ìjijibi akọn̄ inu Rom, ebi Ju kpebenyi inorie, kpeberaria si inorie, mè nroon̄ akọn̄, mè ikpoko, mè ìre uji ile òkije me okwaan̄ ijet. Ikeya ke ebi Rom etumu ifieek. Inu geelek òkukup inyi ebi Ju irọrọ, eberọ me ọsọ.
27 “Ikeya si, ire akọn̄ idasi initoon̄ ido ebi Ju, ebi Rom mêkeke ukot inye me udun̄ kiban̄, mgbọ geelek inu òkup ikeya orọbe. 28 Ema kpebenyi ebi ochicha inorie, mè nroon̄ akọn̄, mè ikpoko, mè ìre uji ile òkikọp me okwaan̄. Ikeya ke ebi Rom etumu ifieek. Inu geelek òkukup inyi ebi Rom irọrọ, mêrọ, kpebefit ifiọk.
29 “Echichi ore ikan òkikpulu mgbaan̄-nrọ ebi Rom melek ebi Ju. 30 Isibene ikirọ inu igọọk me lek ikan chi, ire agan̄ iba chi iweek itatap inu isọkọ, mè ìre ìsasan̄a inu me lek, mêkọt irọ, ire agan̄ iba chi igbaan̄ ichieek. Inu geelek esọkọbe, mè ìre esan̄abe isan̄a ikeya, îbọp ema isi mè udun̄.
31 “Òfo me lek ijo inu echi ogwu ubọọn̄ Demetirọs okirọ ema, eji mîra ige ikpa ijet ọmọ ibe, ‘Keke orọ mè òsa uga ukwook òkeme ebi Ju, ebi unene kiji ebi ema melek kiji ekaan̄be mgbaan̄-nrọ? 32 Ire ema ikpọk inu ofifi mgbọ inibeek ibe eji etap ubọk esan̄a ema esibi me irak ubọk kwun̄, eji mêgbini unen kiban̄, mè itim owu akọn̄ me lek me isi mun̄ mè inyọn̄ ijọn̄.’ ”