Mîkpan̄ Antiọkus mè Lisias
(II Makab 14:1-36; 15:1-36)
7
Me acha efit mè akọp go, Demetirọs, gwun̄ kè Seliyukọs,a onenisa ibot ene inen melek kan̄ ikọp me okwaan̄ inan̄a me Rom initoon̄ me ama geb me agba okwaan̄ Mediterenia, mè inirọ lek kan̄ ubọọn̄ me ama ya, mè ibene ikikpulu. 2 Mgbọ îkije ibosi inin̄ uwu ubọọn̄ ebi nte nte kan̄ iluk,c ebi akọn̄ ìkup me ama ya etetet Antiọkus òso go melek Lisias ibesa inu me isi kan̄. 3 Ire, mgbọ Demetirọs onọbe inu ya, ibebe, “Ikachechieek ibe chieen̄ n̄a irieen̄ me lek kiban̄!” 4 Eya orọ, ebi akọn̄ cha ekpakpan̄ ife cha. Demetirọs onenene inyọn̄ ogboon̄ ubọọn̄ ikup ikikpulu me mkpulu kan̄.5 Otutuuk ebi Ijeren ìkpakpaka ibot, ebi kperiọọn̄ Awaji cha, enunu me lek kan̄. Alikimọs, ene ge me etete kiban̄, ogwu òkiweek irere òban Awaji, oje me isi isa ema inu. 6 Ema enenitoon̄ ebi Ju kechilọ uraamọn ibe, “Judas mè ebi ngwan̄ mîkpan̄ otutuuk Ebi Une kwun̄ isan̄a, mè irieen̄ eji isibi me ido kiji. 7 Ria ene ge otoon̄be ejit me lek, inyi isi ikpọ otutuuk jakajaka Judas ojijakabe eji mè ijijaka ido owu okikpulu igwook, mè ene ya isulu ọmọ melek ebi ngwan̄, mè ebi geelek ìkirọ ema inye, osusut.”
8 Ogwu ubọọn̄ Demetirọs onenigobo Bakides, ene ge me ogbo ebi Unene ogwu Ubọọn̄, ogwu òkikpulu ido òkup me Usaba Okwaan̄,d mè ire si ene ilile me emen mkpulu, òkisiki ibot inyi ogwu ubọọn̄. 9 Ogwu ubọọn̄ oneniria ọmọ, melek Alikimọs ogwu ikariọọn̄ge Awaji, ogwu îsabe irọ ogwu òban Awaji, mè inyi ema ida ibe esulu ebi Ijeren osusut me useen̄ inu ema erọbe. 10 Ema esasa ikpele urum akọn̄ ijibi ije inan̄a me Antiọk isi ido Juda. Mgbọ ema erebe, ema eraria ebi etip isi lek kè Judas mè ebi ngwan̄, mè ifiaan̄ ibe enerọ esuuk. 11 Ire, Judas melek ebi kan̄ kpegban̄ ikọ kiban̄, mije ikpele urum akọn̄ ema esabe inu.
12 Ubọk geelek si, urum ebi ìjeen̄ Ikan esisibi inu me lek kè Alikimọs melek Bakides ibeniweek esuuk me ubọk ònenen. 13 Adasi ebi ìsisibi isi iweek esuuk ya ìre ebi Asidiya, ìrere ebi Ju ebi ìtetet Ikan inye. 14 Ebi Asidiya chi ekibe, “Eyi îrebe ogwu ngwugwa owot iman kè Erọn osa ebi akọn̄ inu, ìkporọ eji inu ikpak geege me lek.”
15 Alikimọs onenigọọk ema ikpa ubọk mêrọbe esuuk ya, mè inyan̄a ibot inyi ema ibe, “Eji kpebesak enyi, mè ìre ebi unene kinyi, unan geege me lek.”
16 Ife cha etotoon̄ ọmọ ejit me lek. Ire, itetet akọp ene gweregwen me lek kiban̄, mè ikpan̄ isan̄a me egwe ge gaalek. Eya onenirọ iso inu egebe me ikpa mbuban otumube ibe,
17 “Akpalek ebi ìkekeke inye me lek kwun̄, mîtọọn̄ ikana ere;
eje kiban̄, mîfifin ikana
otutuuk emen ama Jeruselem;
kpunu ene geege òsisik inifuun̄ ebi ìkwakwaan̄.”
18 Ukpook mè urimi kiban̄ ogwogwook ebi ene me lek, ekekibe, “Kpunu atikọ me emen kiban̄, kpukpunu si ata irọrọ geege, mije, ema mîchaka inu ema egbaan̄be ichieek, mè ichaka si inyan̄a-ibot ema enyan̄abe.”
19 Bakides oneninan̄a itele Jeruselem, mè isi ikup me Bet Jayit, mè ikup me ere ya iria ebi ene, etetet owuwa ebi ìnanan̄a me etete ebi Ju ililibi igọọk ọmọ, melek usini ebi ene si, mè ikpan̄, mè itọọn̄ nkwukwu kiban̄ igwook me emen ikpele udọn̄. 20 Inenito Alikimọs ibe ikikpulu agan̄ ya, mè itele urum akọn̄ ibe ikitap ubọk inyi. Ọmọ Bakides onenigwu ikom ifo igọọk ogwu ubọọn̄ Demetirọs.
21 Alikimọs ochechieek mkpa si ikirọ ikwaan̄ ogwu òban Awaji. 22 Otutuuk ebi ìkisisaak ebi kiban̄ egọgọọk ọmọ ikeke. Ema ebọbọkọ ido Juda ikikpulu, mè ijijaka Ijeren enenen.
23 Judas omumun̄ inu cha Alikimọs mè ebi melek kan̄ erọbe me Ijeren, mè imun̄ ibe ke îfieek igak echi ebi ofifi ido erọbe. 24 Eya orọ, ijeje ikana otutuuk okike ido Judia ikisan̄a useen̄ me lek ebi ìlilibi itele ebi Ju, mè ikikwek ife cha ebi ìluk me uga ama ibe ekasibi ìsi ere geege me ido ya.
25 Mgbọ Alikimọs omun̄be ibe ke Judas mè ebi melek kan̄ mînye lek enenen, mè iriọọn̄ si ibe ke ọmọ ìkakaan̄ unye isasa ikeke ida, igwugwu ikom isi lek ogwu ubọọn̄ Demetirọs, mè isi ifuk ikan ibot ile ikeme ema.
Nikanọ îtim akọn̄ me lek kè Judas
26 Ogwu ubọọn̄ Demetirọs oneniria Nikanọ, ene ge me lek ebi isi akọn̄ kan̄ ebi enyibe umin, ogwu òchacha ebi Ijeren ijo ijo, ibe isi ikpan̄ otutuuk ebi Ju isan̄a kpai. 27 Nikanọ onenire Jeruselem melek ikpele urum akọn̄ îsabe inu, mè ifiaan̄ iniria ikwaan̄ ijet Judas melek ebi ngwan̄ ibe, 28 “Etim ikasibi ìnyi owu melek n̄a. Mâsa ene inen mè inen inu me esuuk inimun̄ enyi isi mè isi.”
29 Inunu me lek kè Judas, ema etọtọp lek kiban̄ amọn esuuk esuuk. Ire, ogwu ochicha îneen̄ lek isun̄ isan̄a itetet Judas me uwuuk-lek isa ije. 30 Judas oneniriọọn̄ ifiọk Nikanọ osabe inu me lek kan̄, mè ikaan̄ ukpook me lek kan̄, mè ijit ikpọkpọk ichichini melek kan̄ ofifi. 31 Nikanọ imumun̄ ibe ke ijo nkeek kan̄ îkpọk mbum, isasa akọn̄ isi ichichini Judas me ama Kafarisalama. 32 Ebi akọn̄ kè Nikanọ ekwakwaan̄ iso efit ene go me emen akọn̄ ya. Ebi ìsisik elilibi isi ilileek me Jeruselem, ama kè Debit.
Nikanọ îriak lek iwọwọp Uwu Mbuban
33 Mgbọ inu chi orakabe, Nikanọ onenisi ogoon̄ Sayọn. Usini ebi ngwugwa esisibi me Uwu Mbuban inu, ema melek usini ebi ugane, ibenibọkọ ọmọ itap me esuuk, mè ijeen̄ ọmọ ngwugwa ewọwọp eyi ema ekigwa me ibot ogwu ubọọn̄. 34 Ire, irọrọ ema inu ochak, mè iyomo ema, mè ichaka ema mbuban me lek, mè itumu ikọ me ubenelek inyi ema, 35 mè isa me unaan̄-ejit inyan̄a ibot ibe, “Îtata enyi eyayaka Judas mè ebi akọn̄ kan̄ itap emi me ubọk me mgbọ keyi, ire enyi kperọ, ǹkichieek enyi use ibe, ire nsigwu ikom ika me atata, m̀bawọwọp uwu yi iriọk mgbọ yaage nkabe!” Inanaan̄ ejit enenen, mè ije inan̄a. 36 Mije iriak-lek Nikanọ oriakbe, ebi ngwugwa egwugwu ikom inin̄ emen oyet egep ya, mè isi ikeke me isi ntook melek Uwu Mbuban, mè ikito ito ibe,
37 “Jei Okumugwem, owu ogobo uwu yi,
ibe ikichieek erieen̄ kwun̄,
mè ire uwu uriaak mè mbeek inyi ebi kwun̄.
38 San̄a useen̄ me lek ogwu enerieen̄ yi mè urum akọn̄ kan̄,
mè rọ ema ekwaan̄ me otu oge akọn̄;
kawuuk ikọ unyechieen̄ ema etumube,
kachieek ene geege me lek kiban̄ inwọnọ mkpa.”
Nikanọ îkwu me Adasa
39 Nikanọ oneninan̄a me Jeruselem isi ikup me Bet Oron, urum akọn̄ ebi Siria onunu inigbaan̄ itọbọ melek kan̄. 40 Me ike mgbọ ya, Judas melek obop ene ita ebi melek kan̄ ekup me Adasa. Judas oneniriaak uriaak ibe, 41 “Mgbọ ebi ikwaan̄ ebi ogwu ubọọn̄ Asiria oriabe inu enyebe chieen̄ itumu ikọ inyi owu, ogwu osat kwun̄ îsibi isi ikpan̄ efit mè akọp obop ene jeeta mè obop ene go me etete ebi Asiria cha. 42 Ikeya si, soso, sa me ubọk kiji kpan̄ urum akọn̄ keyi san̄a cherekeyi, inyi otutuuk ebi ofifi ife geelek eriọọn̄ ibe ke ene yi îtumu ikọ unyechieen̄ ibak Uwu Mbuban kwun̄. Sulu ọmọ osusut kpọ me lek inu ikpak îrọbe.”
43 Urum akọn̄ iba cha etitim akọn̄ me òso akọp mè usen ita me onyan̄ Adari. Etitim ikpan̄ urum akọn̄ kè Nikanọ, ọmọ me lek kan̄ ore adasi ene òkwukwu me akọn̄ ya. 44 Mgbọ ebi akọn̄ kè Nikanọ emun̄be ibe ke Nikanọ îkwu, ema etọtọọn̄ nroon̄ akọn̄ kiban̄ ifiin̄, mè ilim. 45 Ebi Ju egọgọọk ema otuuk kè egwe usen ge, bene me Adasa ya isi ire Gajera. Ike ekigọọk ema, ekekiwut otita akọn̄ kiban̄. 46 Ebi Ju enanan̄a me otutuuk asabọn ama Judia inikwek ebi ochicha cha, mè ikirieen̄ ema igwu ikom ikitap me lek ebi ìkililaba ema. Sa me ikeya, otutuuk ife cha ekwakwaan̄ isan̄a me otu oge akọn̄, ene geege ìkasik. 47 Ebi Ju ebọbọkọ inu ebi ife cha efumbe, mè ifum si inu echi ife cha ekaan̄be, mè ifieek ibot kè Nikanọ mè ubọk kan̄ agan̄ ulom ya eyi înyanabe ikisa inye chieen̄, mè isa isi iwele me agba lek ama Jeruselem, inyi ebi ene ekemun̄.