Mîfieek otu inyi ebi ofifi ido
16
Môfieek inyi enyi, ebi Babilọn mè ebi Esia! Môfieek inyi enyi, ebi Ijipiti mè ebi Siria! 2 Ìkwun abaka mè ekwut ikpa ebot, ìto ito, mè ìfieek ejit ìnyi bọn kinyi, mije mgbọ ebejijaka enyi îgbet. 3 Mîra iria oge akọn̄ ijet enyi, ekene okup ogwu òbokọt ibieen̄ oge akọn̄ ya igwu ikom? 4 Mîra iria ukan̄ ijet enyi, ekene okup ogwu òbokọt iniin̄? 5 Mîra iria ùrioon̄ igwook enyi me lek, ekene okup ogwu òbokọt ilap isan̄a? 6 Ìre ekene obokọt ilap egbe àtat uraafiọọn̄ otetbe me oron? Sà ìre ene obokọt iniin̄ ukan̄ me lek nkirika mgbọ îbenebe ikilomo? 7 Ìre ekene obokọt irọ ibe oraan̄ ogwu ubọk onyebe osookbe igwu ikom? 8 Okumugwem Awaji isiria ùrioon̄ inu, ekene obokọt ilap isan̄a? 9 Unaan̄-ejit kan̄ ìkisasak ukan̄ me lek, ekene okup ogwu òbokọt iniin̄? 10 Ọmọ isiria omumen inyọn̄ inu, ekene ke ukpook ìkpotet? Isiria nsook-isinyọn̄ inu, ekene kpofieek owot? 11 Okumugwem isitap ene ukpook me lek, ìre ekene kpokpọk isan me isi kan̄? 12 Linyọn̄ mè irak irak ijọn̄ kan̄ îsisik; ugwuuk okwaan̄ îfuku, ekoon̄ mè irin̄ òkup me emen kan̄ ekup me ufialek me isi Okumugwem mè ujamgbugbo eyi unye kan̄. 13 Ubọk kan̄ îkisa inwun ogbaan̄ minye, oraan̄ kan̄ îkisook ìsọsọọk otu; ere geelek îsookbe ikpọ me okputut linyọn̄, ìkakilọlọ irere ere cha. 14 Ùrioon̄ cha îriabe isibi, kpebegwu ikom ika, mege ema mêkanabe otutuuk linyọn̄ eso. 15 Mîra isọk ukan̄, kpebeniin̄ mege môtakabe irak irak linyọn̄ iriọk. 16 Ike oraan̄ ogwu usọ oraan̄ osookbe ìkakigwu ìkom ìka, ikeya si, ùrioon̄ cha eriabe igwook me linyọn̄ ìkpogwu ikom ika. 17 Jei, môfieek inyi emi! Môfieek inyi emi. Ekene obonyan̄a emi isibi me usen cha?Ùrioon̄ echi mgburudun̄ usen
18 Ufieejit isibene, itoto ito mômin; akan̄ isibene, owuwa ene mêkwaan̄; akọn̄ isibene, ebi unye geelek mêfieek owot; ùrioon̄ isibene, otutuuk ene mêriran. Keke ke ebilene eberọ mgbọ ùrioon̄ chi isinu? 19 Awaji ìkiria ukan̄ mè ijo orukan̄ mè ufialek mè ofaak inu kubọk osusut isasa inen̄e ebilene isun̄. 20 Ire, otutuuk kechi ìkarọ ibe ema egwu ekom me nrọ-nlọ kiban̄, mè ekegbala chieen̄ ekpọ osusut kiban̄. 21 Me atikọ, mgbọ òkinu, mgbọ inorie môfebe ewe enenen me linyọn̄, ebilene mêkekikeek ibe ke esuuk îra inu inyi ema. Me ekakpọge chieen̄, ùrioon̄ môbubumu me linyọn̄, òrere oge akọn̄, mè akan̄, mè ikpele wọlọwọlọ. 22 Mije, akan̄ môkpan̄ owuwa ebi ìluk me linyọn̄, ebi inwọnọ akan̄, mêkwaan̄ me otu oge akọn̄. 23 Mêkekikwọọk nkwukwu ene ifiin̄ kubọk ekwọọk ifin anam, ene geege ìkpokat ebi ene ejit; mije, linyọn̄ môlaak ukpọk, mêgbugbọ si ama geelek igwook. 24 Kpunu ogwu òboyaka isik inikup ikigbọ uko, mè ìre ikiwop inu me linyọn̄. 25 Ebi kè uti mêkito mfut, ire, ìre ekene obokiteen̄? 26 Mfut gerep môkiren̄e, ire, ìre ekene obokichimi ema? Mije otutuuk ere ìbonọnọọn̄.
27 Ene môkiweek imumun̄ ofifi ebilene, mè ìre inọnọ ukpọk ukpọk lek ida ene. 28 Mije, me emen ikpele ama ile ge, akọp ene gaalek ebesik, me emen otutuuk asabọn ama òkukup ikana, ene iba gaalek, ebi ìlilileek lek kiban̄ me emen ekpuk oron mè agbagba chieen̄ ewuuk, ebesik. 29 Ike mêkọtbe itele ibot mfut olifu ita mè ìre ini me ibot uti geelek me uko olifu, me mgbọ ekigbeme mfut olifu, 30 mè ike usini ten̄eten̄e njọ gerep okilọ chieen̄ ebi ìkititiin̄ gerep me uko me mgbọ ekigbeme gerep, ubọk geelek ema egwuun̄be chieen̄ ikiweek, 31 ikeya si, mgbọ ya isire, ebi akọn̄ isikisa oge akọn̄ ikisaan̄ ikana emen uwu geelek, chieen̄ kiban̄ môlọ me lek ene ita mè ìre ini. 32 Linyọn̄ môlaak ukpọk, abọm egbe abọm egbe obotibi ichit oron kan̄, ukpak môtitibi ijot me lek oniin̄ ile mè asabọn oniin̄ geelek, mije, arọọn̄ geege ìkpoje me lek oniin̄ cha iraka. 33 Obaak nsabọn ibaan̄ mêfieek ejit, mije, kpunu ebi ìbere nlom kiban̄; ebibaan̄ mêfieek ejit, mije, ema kpekaan̄ olom; nsabọn ibaan̄ kiban̄ mêfieek ejit, mije, ema kpekaan̄ ebi ntap-ubọk. 34 Nsabọn irieen̄ ebi mêdobe ema mênin̄ me akọn̄; akan̄ môkpan̄ ebi nlom ebibaan̄ cha isan̄a.
Ebi eyi Awaji mêbem lek iban òta mgbọ
35 Ìgban̄ inu kechi, mè ìgobo ìtet, enyi ebi ikwaan̄ Okumugwem. 36 Eyiyi ìre ikọ Okumugwem; ìbọkọ ìtap, mè ikajit ichechieek inu Okumugwem otumube. 37 Ùrioon̄ cha îtaba igbet, ìkpofiat mgbọ. 38 Ìbet lek nwa-owot, onyan̄ onaan̄ge isiso, mè mgbọ uman kan̄ isigbet, môdasi inọ ufiak mbubak mgbọ iba mè ìre ita me lek akpa gwun̄. Ire, mgbọ gwun̄ isinan̄a me akpa ikisibi, ifiat mgbọ geege ìkayaka ìkikup. 39 Ikeya si, ùrioon̄ cha ìkpofiat mgbọ itotoon̄ linyọn̄. Mgbọ ya, linyọn̄ môto mfi, ufiak òbotet ọmọ me otutuuk agan̄ geelek.
40 Jei ebi n̄a, ìnọ ikọ n̄a ma! Ìbem lek akọn̄, mè ìsun̄ lek kubọk ebi ichen me linyọn̄ me emen ùrioon̄ cha. 41 Ogwu ònyam ewe, inyam ukot ge me mgbidim; ogwu òlep ewe, ikup kubọk ogwu inu kan̄ obochep. 42 Ogwu òkirọ mbubek, ikup kubọk ogwu kporebe oruru; ogwu ònama uwu, ikup kubọk ogwu ìkpoluk me emen. 43 Ogwu òkiwop uko, ikup kubọk ogwu ìkporọkọ inu me uko; ikeya si, ogwu òkikpaan̄ lek olik gerep, ikup kubọk ogwu ìkpotitiin̄ mfut gerep. 44 Ebi ìkaan̄ olom, ekup kubọk ebi kpebekaan̄ bọn; ebi kpekaan̄ olom, ekup kubọk ebi nwakpa. 45 Mije, ebi ìkirọ nninaan̄, ekirọrọ ichep. 46 Ebi ichen ebekpulu mfut kiban̄, mè ifum inu kiban̄, mè igbugbọ uwu kiban̄ igwook, mè ikpulu bọn kiban̄ me usun̄ akọn̄; mije, ema ebekup me usun̄ akọn̄ mè emen akan̄ ikiboon̄ bọn. 47 Ebi ìkirọ mbubek ekirọ iban ebi ìbenifum. Ike ema ekibala ama kiban̄, mè uwu kiban̄, mè inu kiban̄, mè akpalek kiban̄, inyi môkijaan̄ enenen, 48 ikeya ke mâkinaan̄ ejit inyi ema enenen, mije ijo inu kiban̄. Emi Okumugwem ntumu. 49 Ike enenwaan̄ òkaan̄ ulibi mè ata eru okijọ ejit me lek ogwu òje oyet, 50 ikeya ke ata irọrọ okijọ ejit me lek nrọ-nlọ, ubọk geelek nrọ-nlọ okenbe lek kan̄ isan̄a. Ata irọrọ môkpọk mbum otutuuk nrọ-nlọ geelek me linyọn̄, mè itip ema oyerebet isi mè isi, me mgbọ Awaji ogwu òkitumu ikọ ibot ata irọrọ mônube.
Unye mè iriọọn̄-inu eyi Awaji
51 Eya orọ, kanin̄ ogbo melek ijo irọrọ, karọrọ si inu îkirọ. 52 Mije, sọntiik mgbọ, mêsan̄a nrọ-nlọ isan̄a me linyọn̄, ata irọrọ môkekikpulu eji. 53 Ebi ijo ekatumu ibe ke ema kperọ ijo inu; mije, Awaji môwọp mbubuuk ukan̄ me ibot ene geelek òbe, “Ǹkarọ ijo inu geege me isi Awaji, mè isi ujamgbugbo kan̄.” 54 Okumugwem îriọọn̄ inu geelek ebilene ekirọ, mè iriọọn̄ nkeek kiban̄, mè ekiket kiban̄, mè ejit kiban̄ isan̄a kpai. 55 Okumugwem ìtumu ibe, “Linyọn̄ ikup,” linyọn̄ okukup. Itutumu si ibe, “Akpabin ikup,” akpabin okukup. 56 Sa me ikọ kan̄ ke enwaan̄ ntoronyan̄ me irek kiban̄, ọmọ si oriọọn̄ otu ifuk ebi kè ntoronyan̄. 57 Ọmọ osaan̄ emen ugwuuk okwaan̄ ikpọ, mè iweek inu ubọọn̄ òkup me emen kiban̄ imun̄. Ọmọ otọ okwaan̄, mè itọ si inu geelek òkup me emen. 58 Îsa me ikọ kan̄ igon okwaan̄ ikam me ere mun̄ ogbebe ikukup, mè isun̄ ijọn̄ ibene isaba iraka inyọn̄ isi mun̄. 59 Îyat akpa inyọn̄ iwele kubọk okwuun̄, mè irọ ibe ikeke inye me inyọn̄ mun̄; 60 mè itap ògbugbuk mun̄ me emen èwê, mè itoon̄ òkpuku mun̄ me inyọn̄ ogoon̄, inyi iria ebi kè okolo me ere òbebene ibe ikigbuk mun̄ igwook me linyọn̄. 61 Ọmọ orom ebilene, mè itap ejit me emen akpalek ene, mè inyi ene efuuk mè ugwem mè ngobo-ntet, 62 mè inyi ọmọ si ekwukwu Ogwu Òkaan̄ Unye Geelek, ogwu òrorom otutuuk inu geelek, mè ikiweek inu geelek òlelet me ere nlelet isibi. 63 Me atikọ, ọmọ îriọọn̄ nkeek kinyi mè iriọọn̄ inu geelek enyi ekikeek me emen ejit kinyi! Môfieek inyi ebi ìkirọ ijo inu, mè ikiweek ilelet ijo inu kiban̄. 64 Okumugwem môruk chieen̄ ikpọ otutuuk ikwaan̄ geelek enyi erọbe, mè isan̄a enyi isibi ito me isi ogbo ama. 65 Me usen ya, mgbọ ijo inu kinyi isikpọk mbum me isi ogbo ama, esip môtetet enyi; nrọ-nlọ kinyi mônanan̄a ikeke ikitip enyi oyerebet. 66 Keke ke enyi eberọ? Enyi ebejeje ikọt ilet ijo inu kinyi me isi Okumugwem mè isi ebi osat kan̄? 67 Me atikọ, Awaji ore ogwu ibot oyerebet, ìtet ukpook me lek kan̄! Ìtele ijo inu kinyi, mè ìwuuk nrọ-nlọ kinyi, ikayaka ìkpọk ìrọ inu cha ofifi, inyi Awaji isa enyi ije, mè isan̄a enyi isibi me otutuuk uyọrọlek geelek.
Mêsisaak ebi eyi Awaji
68 Unaan̄-ejit òkilolomo kubọk ukan̄, eyi urum ebi ene enaan̄be, òkisak me lek kinyi. Ebi urum ene cha mêtaba usini kinyi ije, mè itet enyi me unye ibe erie inorie esabe igwa ngwugwa inyi mkpọmfaka. 69 Ebi geelek ìbọbọkọ inorie cha irie, mêchak ema me imọm, mè irọ ema esip, mè ijak ema me ukot. 70 Mije, me owuwa ere, mè ama geelek òkukup igbet, mêgwook ichit ebi ìkitet ukpook Awaji, mè irọ ema inu me lek afa afa. 71 Ife cha ebekup kubọk ebi iraak, kpebesan̄a ene geege ubọk me lek, ire mêkifum inu, mè ikijijaka ebi ìkitet ukpook Okumugwem. 72 Mêjijaka ema, mè ifum inu kiban̄, mè ililaba ema isibi me uwu me ama kiban̄. 73 Mgbọ ya, mênenimun̄ ibe ke itọtọ etọbe ebi ngobobe inyi lek n̄a ikpọ, îrọ ibe ata ugwem kiban̄ isibi utoon̄. Ema ebekitotoon̄ kubọk alata araran̄ ekalabe me emen ukan̄.
Awaji îchieek use ibe ọmọ mônyan̄a ene
74 Okumugwem ìtumu ibe ikeyi, “Enyi ebi emi ngobobe inyi lek n̄a, ìgban̄! Usen ufialek îta me ubọk, ire, mânyan̄a enyi isibi. 75 Ikatet ukpook, ikakaan̄ ejit iba, mije, îre Awaji okisa enyi ije.”
76 Okumugwem Awaji ìbe, “Enyi ebi ìkisun̄ Ikan n̄a mè orọmijọn̄ n̄a, ikachieek ibe ijo inu kinyi ikeme enyi ikaan̄, ikachieek ibe nrọ-nlọ kinyi itọ ikọ inyi enyi. 77 Môfieek inyi ebi ijo inu kiban̄ oletbe efuuk, mè ebi nrọ-nlọ kiban̄ ojotbe igak! Ema ekup kubọk uko oron otibibe ichit, eyi ukpak ogwookbe ichit agbagba oniin̄ kan̄, inyi ene geege ikakọt ìje ìraka ìnin̄. 78 Egogon ichit, mè isun̄ iban ukan̄ môtakabe iriọk.”