5 Okumugwem onenibe, “Ìgbala chieen̄, mije, emi gwa ǹkisa ijo inu, òrere akọn̄ mè akan̄ mè mkpa melek mfufiat, inu me linyọn̄. 6 Mije, nrọ-nlọ îkpọk ikana iso ido geelek; ijo inu kiban̄ si îre okike.” 7 Eya orọ, Okumugwem ìbe, 8 “Emi m̀kpayaka iriaan̄ ere ofifi òfo me lek inu ebi ekariọọn̄ge Awaji cha echi ema ekirọ, kpekaan̄ ulibi. Emi m̀kpayaka imeme si ikpak ikpak lek orọmijọn̄ kiban̄ igak ikeya. Eje ebi ata irọrọ mè ebi kpelọ ikan geege òkitaan̄ ito igwen emi, ibot-ejit ebi ata ife òkito ito mgbọ geelek. 9 M̀kpalọlọ isasan̄a useen̄ me ibot kiban̄. Emi Okumugwem ntumu. Mâsan̄a useen̄ me lek kiban̄, mije otutuuk eje ebi kpelọ ikan cha ema efiatbe. 10 Kpọ ubọk ekisa ebi n̄a ije kubọk arọọn̄ ebesa isi igwu; emi m̀kpayaka itele ibe ema eluk egak ikeya me ido Ijipiti. 11 Ire, mâsa unye ubọk, eyi mbenebe ifo inyọn̄, isan̄a ema isibi, mè isa ijo orukan̄ inyi ebi Ijipiti osusut, kubọk mgbọ keyilọ, mè ijijaka otutuuk ido kiban̄.

12 “Tele Ijipiti ifieek ejit ire lek ọdọ irak ijọn̄ kan̄, mije ijo orukan̄ Okumugwem môriabe ijet ema, isa ikan̄ inu inyi ema, mè isa isulu ema osusut. 13 Kè ebi uko ebi ìkibak ijọn̄ iwop mfut efieek ejit, mije, ukwuuk uti kiban̄ ìkpotibi; orukan̄ uti mè ibot mgbọlọ mè unye egwijo môjijaka uti kiban̄ isan̄a kpai. 14 Môfieek enenen inyi linyọn̄ mè ebi ìluk me emen kan̄! 15 Mije, oge akọn̄ mè nyanya òkikpat igbet, ido mônan̄a ikeke itim akọn̄ me lek ofifi ido, mè oge akọn̄ me ubọk kiban̄. 16 Jikijiki mônin̄ me etete ebi ene; usini ene mêkaan̄ unye igak usini ene, bak me lek unye ya, kpebeyaka inyi ogwu ubọọn̄ kiban̄ mè ìre ogwu ibot ebi ibot kiban̄ ulibi. 17 Ene môtọt isisi ama ge, ire, ìkpokọt isi. 18 Wọlọwọlọ mônin̄ me ama cha bak me lek ugumulek kiban̄, mêgbugbọ owuwa uwu igwook, ebi ene mêfefieek owot. 19 Ene geege ìkpoto ebi melek kan̄ njijin, ire, môsa oge akọn̄ ibum inin̄ uwu ebi melek kan̄, mè ifum inu ebiba ekaan̄be, mije ebek inorie melek ikpele ufialek.

20 “Emi Okumugwem nkitumu ibe, ‘Ìkpọ ubọk ngween̄be otutuuk ebi ubọọn̄ me linyọn̄ ititiin̄, nan̄a me agan̄ mbum-ura mè nan̄a me Lebanọn, ibe egwu ekom enu me lek n̄a. Emi m̀be ema egwu ekom enu eneyaka inu enyibe ema enekpe. 21 Mârọ ema inu ema erọbe ebi ngobobe inyi lek n̄a mege inire chereyi, mâyaka ikpe itap inwaan̄ ema me otu.’ ” Okumugwem Awaji ìtumu ibe, 22 “Ubọk ulom n̄a ìkpotele ebi ijo, oge akọn̄ n̄a ìkponan̄a me lek ebi ìkifiat eje ebi kpelọ ikan me linyọn̄. 23 Ukan̄ unaan̄-ejit n̄a îseme, mè itaka linyọn̄ ire ọdọ irak ijọn̄ kan̄, mè itaka ebi ijo iriọk, kubọk mfurufu ewọpbe. 24 Môfieek inyi ebi ìrọ ijo, ebi kpekisun̄ Ikan n̄a. Emi Okumugwem ntumu. 25 M̀kpatele ema ubọk me lek. Ìje ìnan̄a, enyi bọn una ichechieek! Ikanififila Uwu Mbuban n̄a.”

26 Awaji îriọọn̄ otutuuk ebi ìrọrọ ọmọ ijo inu. Eya orọ, môyaka ema inyi mkpa, mè jakajaka. 27 Ùrioon̄ îra itoon̄ otutuuk linyọn̄, enyi mêbia me emen. Awaji ìkpotaba enyi isibi, mije, enyi mîrọ ọmọ ijo inu. 28 Ìkpọ ikpele inu ukpook òkinan̄a me agan̄ mbum-ura isibi inu! 29 Ido ebi Arebia ìbet lek nga ijijinu ile, ema mêsa owuwa uji akọn̄ isibi inu; bene me usen ema mêsibibe, ida okput kiban̄ môtaan̄ ichit linyọn̄, inyi ebi geelek ìnọnọ mêfieek owot, mè ikiran. 30 Ebi Karamọn, ebi unaan̄-ejit okifufuku me ejit, mêje kubọk orie okodi oron ònan̄a me oron isibi, mè inisa ikpele unye inu akọn̄ me lek nga ijijinu ile cha, mè isa oduk kiban̄ ijijaka okpọkọ ijọn̄ ebi Asiria. 31 Ebi kè nga ijijinu ile cha mênenikeek ere ema esibibe, mè initap unye isọkọ. Ire ema igbaan̄ itọbọ isa ikpele unye igwu ikom igọọk ebi Karamọn, 32 ebi Karamọn mêneniyiyala, unye ebi kè nga ijijinu ile cha mônenirọ ibe otu ichit ebi Karamọn, mè egwu ekom elim. 33 Me ido ebi Asiria, ogwu ochicha òtutuun̄ ikikpọ ema môjibi akọn̄ inin̄ ema lek, mè ijijaka ene ge me etete ebi ubọọn̄ kiban̄. Urum akọn̄ kiban̄ mêfefieek owot, mè ikiran, ebi ubọọn̄ kiban̄ mêninin̄ sese.

34 Kpọ owuwa oduku inyọn̄ òkinan̄a me agan̄ mbum-ura mè agan̄ inyọn̄ ikifo agan̄ osiki! Ubọk ema ekupbe ìkitap ene ukpook igak lek, unaan̄-ejit mè egwijo ojot ema emen. 35 Ema mêgbaan̄ ikwak, mè igbugbọ unye egwijo igwook me linyọn̄, mè egwijo eyi lek kiban̄ si. Eje ebi mêkwaan̄be me otu oge akọn̄ môbene me ijọn̄ ire irak owot inyinya, 36 mè ibene ire owut-ukot ebilene, mè ire si akpatukot aligọ. 37 Linyọn̄ môfieek owot enenen, mè ikiran; urimi môtet ebi mêmun̄be unaan̄-ejit ya, ema mêkekiran. 38 Eya isiraka, uga oduku inyọn̄ eyi egwijo môjibi inan̄a me agan̄ osiki, mè inan̄a me agan̄ inyọn̄, mè ofifi okpọkọ onan̄a me agan̄ ichep-ura. 39 Ire, efet ònan̄a me agan̄ mbum-ura môkaan̄ unye igak oduku inyọn̄ òje me lek unaan̄-ejit ya, mè iwut oduku inyọn̄ ikpọk. Egwijo ya eyi òbosa mfufiat inu, efet agan̄ mbum-ura môwut ọmọ ikpak ikpak isi ichik me agan̄ osiki mè agan̄ ichep-ura. 40 Ikpele unye oduku inyọn̄, òjojot me unaan̄-ejit mè egwijo, môduku inu, mè ijijaka otutuuk linyọn̄ mè ebi ìluk me emen kan̄, mè igbuku egwijo ukpook igwook me inyọn̄ ubene ubene orioon̄ mè ogoon̄ geelek, 41 mè isa ukan̄, mè ibot mgbọlọ, mè oge akọn̄ òkiwuwulu mè agbugbuk, itap mun̄ ijot otutuuk oron, mè otutuuk ibot mun̄ geelek. 42 Inu chi môgbugbọ ama melek mgban, mè ogoon̄ melek orioon̄, mè uti òkup me oron melek mbubet emen nsisaan̄, mè mfut ibot ibot kiban̄. 43 Ema mêsa ikeya iraka isi ire Babilọn, mè igwak Babilọn ifiin̄. 44 Ema mêre lek ama Babilọn, mè ikpa mbin ikana, mè igbuku egwijo ya mè otutuuk unaan̄-ejit kan̄ igwook ikeme ama ya. Mfuun̄ mè oduku kan̄ môkekibumu isi ire akpa inyọn̄. Ebi geelek ìluluk ikana ọmọ mêkekifieek ejit inyi ọmọ. 45 Ebi geelek ìsisik mêkisi ikwaan̄ inyi ebi ìgwagwak ama ya.

46 Ire owu, Esia, ogwu òkaan̄ uche me lek uja mè umin eyi ama Babilọn, 47 môfieek inyi owu, ogwu nyanya ikike! Mije, owu osun̄ lek kwun̄ kubọk kan̄. Owu obala bọn ebibaan̄ kwun̄ igwook me lek òje oyet, isa irọ ibe ebi ugan kwun̄ cha, ebi ìkakaan̄ ulọk ilaak me lek kwun̄, ebele ejit, mè owu òkaan̄ umin. 48 Owu obọkọ otutuuk irọrọ mè otitọt njijọ lek ogwu òje oyet ya ikirọ. Eya orọ, Awaji ìbe ikeyi: 49 “Mâria ijo inu ijet enyi, òrere, irere nwakpa, mè ugbọọri, mè akan̄, mè oge akọn̄, mè orukan̄, isasa mfiat inu me uwu kinyi, mè ijijijaka enyi, mè ikpan̄ enyi. 50 Umin eyi unye kwun̄ ya mônenichiaak ita kubọk ajakajak, mgbọ uyok ukan̄ eriabe ijet owu isibene. 51 Lek kwun̄ môneniwọ kubọk njijọ lek enenwaan̄ esulube itap unan me lek, inyi owu okayaka ìkọt ìbọkọ ebi ugan ilile kwun̄ cha ìtap.”

52 Okumugwem ìbe ikeyi, “Kpamarọ owu me lek unye unye 53 ire owu kpomokpọkpọ ikikpan̄ ebi n̄a, mè ikibele ejit ikwak ubọk, mè ikisa mkpa kiban̄ irọ ukpatu mgbọ miin̄ osabe owu. 54 Bala isi kwun̄, inyi ijaan̄! 55 Ikpoko ogwu òje oyet me inyọn̄ ukot kwun̄ okupbe. Eya orọ, owu môbọkọ mkpukpe kwun̄. 56 Ike owu orọbe me lek ebi ngobobe inyi lek n̄a, ikeya ke emi Awaji mbarọ owu, mè ida owu itap me ufialek. Emi Okumugwem ntumu. 57 Uraafiọọn̄ môkpan̄ bọn kwun̄, oge akọn̄ môsasa owu ifo. Mêgwak ama kwun̄ geelek ifiin̄, ebi kwun̄ ebi ìkup me oron mêkwaan̄ isan̄a me otu oge akọn̄. 58 Uraafiọọn̄ môkpan̄ ebi kwun̄ ebi ìkup me inyọn̄ ogoon̄ mè inyọn̄ okpurukpu; ema mêtaka ufuk akpalek kiban̄ mije uraafiọọn̄ inorie, mè inwọ eje kiban̄ mije urak-ebek mudim. 59 Ufieejit kwun̄ môgak eyi otutuuk ebi ofifi ene, ire, owu mônu inibọkọ ayaya ukwook si igbaalek. 60 Mgbọ ema isigwak Babilọn igwook isan̄a, mè ibenije iraka ika, ema mêkpukpuku njijọ lek ama ya iriọk, mè ifiat okpọkọ me lek ijọn̄ kwun̄, mè ifieek okpọkọ me lek umin kwun̄ ichep. 61 Ema mêfaan̄ owu igwook kubọk nkirika, mè itaka owu iriọk kubọk ukan̄. 62 Ema mêben owu, mè ama kwun̄ geelek, mè ijọn̄ kwun̄, mè ogoon̄ kwun̄, imeen̄; mè itap ukan̄ iwọp otutuuk oron kwun̄, mè uti kwun̄ geelek òkisibi mfut iriọk. 63 Ema mêkwọọk bọn kinyi me usun̄ akọn̄, mè ifum inu ubọọn̄ kinyi inọọn̄, mè ijijaka uja emen isi okaan̄be isan̄a kpai.”