2 Emi mfọfọọk ibe, “Okumugwem, kpọ emi ire ogwu,” mè inan̄a ikeke me ukot.

3 Inenibe emi, “Îre me lek gwun̄ uti ke njeen̄ lek n̄a isibi, mè itumu ikọ melek kè Mosis mgbọ ebi n̄a ekupbe me irak usun̄ me Ijipiti. 4 Ọmọ ke nria ibe isan̄a ebi n̄a isibi me Ijipiti, mè isa ọmọ inene ogoon̄ Saina, mè isun̄ ọmọ melek n̄a me ere ya owuwa usen. 5 Ntumu owuwa uyeke inu inyi ọmọ, mè ijeen̄ ọmọ nlelet inu òbokup mgbọ cha, mè irọ ọmọ iriọọn̄ òta mgbọ. Nnyi ọmọ si ida òfo me lek 6 ikọ echi ìbokpa isibi, mè echi ìbosun̄ me nlelet. 7 Mgbọ keyi, ǹkibe owu: 8 Sun̄ ijejeen̄ njeen̄be owu me emen ejit kwun̄, mè ilaak omun̄be, mè ibot kiban̄ echi ebakbe inyi owu ònọ. 9 Mije, mêben owu isan̄a me etete ebilene; bene me mgbọ keyi, owu môluk melek Gwun̄ n̄a melek ebi ìbet lek kwun̄, mege ire òta mgbọ. 10 Inyọn̄ ìkayaka ìre nsek, ukot geelek òkikan. 11 Mije, eche ukot mgbọ me linyọn̄ yi akọp mè irek iba. Irek onaan̄ge me lek îraka, 12 okpọkọ me lek eyi òso akọp irek îraka si. Ìyaka inisik irek iba kan̄, ire isan̄a okpọkọ eyi òso akọp ya me lek. 13 Eya orọ, sa mgbọ keyi nen̄e uwu kwun̄ sun̄, mè kan̄ inu nyi ebi kwun̄; kat ebi ijo irek ejit, mè nyi ebi ìriọọn̄ inu nteme. Jit ugwem bukubuku, 14 mè san̄a ekiket ebilene san̄a me ejit kwun̄. Fiin̄ ukwook ebi linyọn̄, mè wọọk uwọ-lek eyi anam akpalek kwun̄ to. 15 Da ekiket geelek òkisisaak owu cha to me agba, mè gwat lek libi nwọnọ mgbọ kechi. 16 Mije, ijo inu òfefieek igak echi okimun̄ òkirọ mgbọ keyi môbọkọ irek, mgbọ mgbọ keyi isiraka. 17 Ike linyọn̄ okikan, ikeya ke lek okiwọ; ikeya si ke ijo inu obokimumana iwa me etete ebi ìkiluk me linyọn̄. 18 Atikọ môje ijọn̄ọ ere enenen, ofiaan̄ môjeje iriaak. Mije, igo ya omun̄be me ilaak ọkpọchieen̄ ya, lek ìkisoson inunu.”

19 Emi nnenifọọk ibe, “Okumugwem, tele mè ǹtumu ikọ me isi kwun̄. 20 Mije, mâje, ubọk onyibe emi ida. Mâgana ikọ inyi ebi ene ebi ìkup me ugwem mgbọ keyi. Ire, ìre ekene obotaba ubọk me utọn̄ ebi mêmanbe mgbọ mgbọ keyi isiraka? Mije, linyọn̄ ìkup me emen udun̄, ebi ìluk me emen kan̄ kpekaan̄ utoon̄. 21 Mije, mîwọp Ikan kwun̄, eya orọ, ene geege ìkariọọn̄ inu echi owu orọbe, mè echi oborọ mgbọ òkup me isi. 22 Ire ejit kwun̄ ibele me lek n̄a, ria Ekwukwu Mbuban tap emi me emen, inyi mâge inu geelek òrọrọ me linyọn̄ bene me ibebene, mè inu geelek òkup me emen Ikan onyibe, ufuna ebi ene mêkọt iweek oniin̄ imun̄, inyi ebi ìweweek iluluk me mgburudun̄ mgbọ ekọt eluk.”

23 Ifọfọọk emi ibe, “Je si titiin̄ ebi ene, mè tumu nyi ema ibe ekaweek owu mege akọp usen ini. 24 Ire, rọ owuwa akpakpa ewuuk ekisa ige inu kaan̄ me ubọk, mè sa Sareya, mè Dabiriya, mè Selemiya, mè Etanọs melek Asiyen gbaalek na. Mîjeen̄ ene go kechi ike ekigwat ubọk ige inu. 25 Owu mônu me ere keyi, mânenimin mkpukan̄ eyi ngobo-ntet me ejit kwun̄, eyi kponiin̄be, mege owu môgebe inu oboge isan̄a. 26 Osige isan̄a, usini inu, owu môsan̄a isibi, usini, owu mônween̄ lek iyaka inyi ebi ìriọọn̄ inu. Me ike mgbọ keyi iyakwut, owu môbene ikige inu cha.”

27 Nnenije, ike Okumugwem onyibe emi ida, mè igbaan̄ otutuuk ebi ene ititiin̄, mè ibe ema, 28 “Jei ebi Ijeren, ìgban̄ ikọ kechi. 29 Adasi mgbọ, ebi nte nte kiji eluk kubọk ebi ichen me Ijipiti, Awaji onyanyan̄a ema isibi me ere ya. 30 Ema ebọbọkọ Ikan òkinyi ene ugwem, eyi ema kpesun̄, eyi enyi si ejebe ilọ me lek, igọọk me akpat ukot kiban̄. 31 Eneninyi enyi ijọn̄ me lek ijọn̄ Sayọn ibe enyi ebọkọ esak; ire, enyi mè ebi nte nte kinyi erọrọ nlilọ inu, kpeje me oniin̄ Ogwu Òbebene Ichit onyibe ida ibe enyi eje. 32 Mije ọmọ orebe ogwu òkisibi unen oyerebet, mgbọ ònenen me lek kan̄, ibọbọkọ enyi inu ya înyibe enyi. 33 Mgbọ keyi, enyi ekup me ere keyi, sà ebi kinyi ekup me ujọn̄ọ ere me agan̄ emen emen. 34 Eya orọ, ire enyi itọ ikọ inyi ekiket kinyi, mè ikeme ejit kinyi isiki, mêsun̄ enyi me ugwem, mè irọ enyi nsan mgbọ enyi isikwu. 35 Mije, mkpa isiraka, oyerebet mônu, mgbọ enyi mêkpọkbe iluk ugwem, mgbọ ya, mêneniriọọn̄ erieen̄ ebi ata irọrọ, mè isan̄a ubọk ikwaan̄ ebi kperiọọn̄ Awaji isibi ikpọk mbum. 36 Ire, mgbọ keyi, ene geege ikanu me lek n̄a, ene geege ikaweek emi mege akọp usen ini me isi.”

37 Nnenigobo ene go cha, ike înyibe emi ida ibe emi ǹgobo, eji enenisi oron ya isi ikup. 38 Me ofit iwele kan̄, ida ge ogwegwen emi, mè ibe, “Ejira, chili otu kwun̄ bọkọ inu nkinyi owu nwọ.” 39 Nchichili otu n̄a, enyinyi emi ekpen̄ inu òbet lek mudim ojotbe otu, ire, chieen̄ inu ya ìbet lek chieen̄ ukan̄. 40 Mbọbọkọ inwọ. Nnwọnwọ isan̄a, ngobo-ntet okekigbọọk me ejit n̄a isibi, iriọọn̄-inu okekimumana me emen n̄a, nkọkọt ikitet inu ikaan̄ me ekiket, 41 otu n̄a ochichili, ìkayaka ìchit. 42 Ògak ge, Ogwu Òbebene Ichit onyinyi ebirieen̄ go cha ngobo-ntet, ema egege inu ngwenbe isibi inyi ema ibe ege, ogwu ikup me mgbọ eyi kan̄. Ema ekisa ubọk ikpa ema ekariọọn̄ge ige. Akọp usen ini ke ema esa ikweek irek ikige inu cha, ekige me ikarek, mè ikirie inorie me eririeen̄. 43 Ire emi, ǹkitumu ikọ me ikarek; eririeen̄ si, otu n̄a ìkakiriaan̄. 44 Sa me ikeya, me emen akọp usen ini cha, egege akọp ikpa onaan̄ge mè ini.

45 Mgbọ akọp usen ini cha osobe, Ogwu Òbebene Ichit obebe emi, “San̄a adasi akọp ikpa iba mè ini ogebe sibi, inyi ebi ata ife mè ebi ijo ife efuk. 46 Ire, sun̄ akọp ikpa jaaba cha egebe me mgburudun̄, inyi môsabe inyi ebi ìriọọn̄ inu me etete ebi kinyi. 47 Mije, îre me emen kiban̄ ke ibot mun̄ ngobo-ntet, mè ogbuuruk iriọọn̄-inu, mè okwaan̄ ifuk-ibot okup.” 48 Nrọrọ si ikeya.