Ilaak ọkpọchieen̄ eyi ene onan̄abe me okwaan̄ isibi
13
Mgbọ usen jaaba orakabe, mmumun̄ ilaak me eririeen̄. 2 M̀mun̄ efet ojibibe ibene me okwaan̄, mè ijibi otu ekoon̄ ibene me okwaan̄. 3 Ike nkikpọ, efet ya owuwut inu ge òbet lek ene inan̄a me ejit okwaan̄ isibi. Nnenikpọ, mè imun̄ ene ya okiwulu me emen oduku inyọn̄. Ere geelek îkanabe chieen̄ ikpọ, inu geelek îkikpọ îra ikiran. 4 Mgbọ geelek îsan̄abe amọn me otu, otutuuk ebi geelek ìnọnọ ida kan̄ mîra itọk kubọk mgbe okitọk me ukan̄.5 Eya iraraka, mkpọkpọ, mè imun̄ urum ebi ene kpêkọtbe ifuk otu ifuk enan̄abe me agan̄ isi ini efet okinan̄a iwut me linyọn̄, mè igbaan̄ ititiin̄ inu akọn̄ me lek ogwu ene ya ònanan̄a me okwaan̄ isibi. 6 Mkpọkpọ si, mè imun̄, ene ya îbot ikpele ogoon̄ ge inyi lek kan̄, mè iwulu inene inyọn̄. 7 Nneniweek imumun̄ agan̄ mè ìre ere îbotbe ogoon̄ ya, ire, ǹkakọt ìmun̄.
8 Eya iraraka, mkpọkpọ, mè imun̄ ibe ke ukpook îtet otutuuk ebi ìgbagbaan̄ ititiin̄ ibenitim akọn̄ me lek kan̄ enenen, ire, ema echechieek mkpa itim si. 9 Mgbọ ene ya omun̄be urum ene cha ejibibe ikilibi inin̄ ọmọ lek, ìkabene ubọk kan̄, ìkamọmọnọ si otunwa mè ìre nroon̄ akọn̄ geege ìkaan̄ me ubọk. 10 Ire, mmumun̄ îsan̄abe inu ge me otu isibi, òbet lek ukan̄ òkilolomo, mè ikigbọọk, mè ikifuuk efuuk alọm ukan̄ òkisasak isibi me ukpọk otu kan̄, mè ikisook egwijo ntat ukan̄ isibi me otu alọm kan̄. 11 Otutuuk inu chi, òrere ukan̄ òkilolomo mè ikigbọọk, mè efuuk alọm ukan̄ òkisasak, mè ikpele egwijo ntat ukan̄ ya, ogbagbaan̄ itọbọ, mè irọn̄ ikeme urum ene cha ebi ìbebem lek etim, mè itaka ema otutuuk iriọk. Chit chieen̄, mè bolo, kpeyaka imun̄ urum ene cha, ebi kpebekọt ifuk otu ifuk. Mfuun̄ mè ntọn̄ mè olu oduku gaalek ke ekimun̄. Mgbọ mmun̄be inu yi, ikwukwu emi lek enenen.
12 Eya iraraka, nnenimun̄ ene yaage onan̄abe me inyọn̄ ogoon̄ ya isibi ijọn̄, mè igween̄ ofifi urum ene ebi esuuk itap me lek kan̄. 13 Owuwa ene enunu me lek kan̄, usini ene unwọọn̄ me ejit, usini ene ufieejit me emen, usini ene ebọbọp. Usini ene ekekisa ebi ene inu, ibe esa egwa ngwugwa.
Ibot ilaak ya
Nnenibolo chieen̄ melek ikpele ukpook, mè ibeek Ogwu Òbebene Ichit ibe, 14 “Bene me ibebene, owu ojeen̄ emi, ogwu ikwaan̄ kwun̄, uyeke uyeke inu kechi. Owu ofuk emi kubọk ogwu ògbegbe ogwu owu obokinọ uriaak kan̄. 15 Eya orọ, jeen̄ emi ibot ilaak keyi si. 16 Mije, ike nkikeek me ejit n̄a, môfieek enenen inyi ebi mêsikbe me usen kecha! Môfieek enenen igak ikeya inyi ebi kpebenwọnọ me usen cha! 17 Mije, ebi kpebenwọnọ mêfieek ejit, 18 bak me lek ema mîriọọn̄ inu esun̄be iban òta usen cha, ire, inu ya ìkare ema lek. 19 Ire, môfieek inyi ebi ìsisik, mije inu yaage, bak me lek ema mêmun̄ ikpele unan mè ufialek, kubọk ilaak chi okijeen̄. 20 Ire, înwọn igọgọọk inin̄ me emen inu chi, mè ije itibi unan, igak inanan̄a me linyọn̄ isibi kubọk oduku inyọn̄, kperieen̄ chieen̄ me lek inu òborọ me mgburudun̄ usen.”
Ifọfọọk emi ibe, 21 “Mâbum ibot ilaak ya inyi owu, mè ikpa si inu cha ochakbe otu me lek inyi owu. 22 Me lek inu otumube ofolek ebi mêsikbe cha, ibot kan̄ ìre ikeyi: 23 Ogwu òsasa unan ya inu me mgbọ ya, môbem ebi ìbenin̄ me unan, òrere ebi ìsisi ata ikwaan̄ isun̄ iban lek kiban̄, mè ikaan̄ ichechieek me lek Ogwu Òkaan̄ Unye Geelek. 24 Eya orọ, riọọn̄ ibe ke ebi ìsisik ekaan̄ ugbana igak ebi ìkwakwaan̄.
25 “Ibot ilaak ọkpọchieen̄ ya ìre ikeyi: Eyi omun̄be ene ge onan̄abe me ejit okwaan̄ isibi, 26 ene ya ìre ogwu Ogwu Òbebene Ichit osun̄be akarake ukot ukot, ogwu òbonyan̄a inu Ogwu Òbebene Ichit orombe, mè inen̄e ebi ìsisik isun̄ itat. 27 Eyi omun̄be efet mè ukan̄ mè egwijo okinan̄a me otu kan̄ isibi ya, 28 mè eyi ikatetge otunwa mè ìre nroon̄ akọn̄ geege ìkaan̄ me ubọk, ire, ijijijaka urum ebi ìjijibi akọn̄ inin̄ ibenitim ọmọ ikpan̄, ibot keya ìre ikeyi: 29 Usen òkinu, mgbọ Ogwu Òbebene Ichit mônyan̄abe ebi ìkup me linyọn̄ isibi. 30 Wọlọwọlọ ejit môsisaak ebi ìluk me linyọn̄. 31 Ema mêtọt ititim akọn̄ me lek kiban̄, ge mè ge, ama mè ama, agan̄ mè agan̄, ido mè ido, mkpulu mè mkpulu. 32 Mgbọ inu chi isibọkọ irek, mè inu ijejeen̄ echi mwuukbe lek ijeen̄ owu iraka cha isikirọ, mênenichili Gwun̄ n̄a, ogwu omun̄be kubọk ene òkinan̄a me okwaan̄ isibi ya, ijeen̄ ebi ene.
33 “Mgbọ otutuuk ido isinọ ida kan̄, otutuuk ene mêtele ido kiban̄, mè itele si akọn̄ echi ema ema ekitim, 34 mè igbaan̄ ititiin̄ me urum ene ebi kpebekọt ifuk otu ifuk, mè iben ejit inenitim akọn̄ ikpan̄ ọmọ, kubọk omun̄be. 35 Ire, ọmọ môkeke me inyọn̄ ogoon̄ Sayọn. 36 Ama Sayọn, eneen̄be isun̄, mè inama isan̄a, mônenisibi ikeke me isi otutuuk ene, kubọk omun̄be ogoon̄ ya eyi kpesa ubọk ebilene ibot. 37 Ọmọ, Gwun̄ n̄a ya, mônenisook ida inyi ido ìtititiin̄ cha me lek ema ekariọọn̄ge Awaji (eyi ke egwijo ya okeke inyi), 38 mè igana ikọ inyi ema me isi kiban̄, me lek ijo otitọt kiban̄ mè ujaralek ebesa ininia ema (eyi ke alọm ukan̄ ya okeke inyi), mè isa Ikan ijijaka ema, ìkporọrọ unye unye (eyi ke ukan̄ ya okeke inyi).
39 “Eyi omun̄be ọmọ otitiin̄be ofifi urum ebi ene, ebi esuuk ya, itap me lek kan̄, 40 ebi urum ene cha ìre ebi akọp otoko cha ebi ekpulube isibi me lek ijọn̄ kiban̄ itap me usun̄ akọn̄, me ukot ogwu ubọọn̄ Osia, òrere ebi Salimanesa, ogwu ubọọn̄ ebi Asiria, okpulube me usun̄ akọn̄, isa isaba okwaan̄ isi igwook me ofifi ido. 41 Ire, îre ema etọt otitọt keyi inyi lek kiban̄, ibe ke ema mêtele urum ebi ido kechilọ, mè isi agan̄ òjọjọn̄ọ ere enenen, ere ebi ene kperarak iluk, 42 inyi ema mêtolek ikup me ere keya ikisun̄ orọmijọn̄ cha echi ema kpesun̄ me ido kiban̄. 43 Îre me lek ǹchichit utibi okwaan̄ Yuferetis ke ema etibi iraka inin̄. 44 Mije, me mgbọ ya, Ogwu Òbebene Ichit îrọ uyeke inu inyi ema; îkwek okolo okwaan̄ ya isa itet mun̄ ikaan̄ mege ema esababe itoon̄. 45 Oniin̄ ije kiban̄ me agan̄ ya îjọn̄ọ, îre ije acha mè okpọkọ; ekigwen ido ya Arijaret.
46 “Ema eneniluk ere ya mege ire òta mgbọ. Mgbọ keyi eyi ema ebeyaka igwu ikom ika, 47 Ogwu Òbebene Ichit môkpọk ikwek si okolo okwaan̄ ya, inyi ema mêkọt isaba itoon̄. Eya orọ omun̄be urum ene cha egbaan̄be ititiin̄ me esuuk. 48 Ire, ebi ìsisik me lek ebi kinyi, ebi emun̄be me emen okike ijọn̄ ido n̄a, mênyan̄a ebiba isibi. 49 Eya orọ, mgbọ isijijaka urum ebi ido kechilọ ìgbagbaan̄ ititiin̄ isan̄a, môbem ebi ìsisik. 50 Mônenijeen̄ ema owuwa uyeke uyeke inu.”
51 Nnenibe, “Jei, Ogwu Nte Ogwukaan̄-ene, bak ibot keyi nyi emi: Keke orọ mmun̄be ene ya okinan̄a me ejit okwaan̄ isibi?”
52 Ibebe emi, “Ike ene geege ìkpokọt iwọlọ mè ìre iweek iriọọn̄ inu òkup me ugwuuk okwaan̄, ikeya si, ene geege me linyọn̄ ìkpomun̄ Gwun̄ n̄a mè ìre ebi melek kan̄, îtata mgbọ usen kan̄ isire. 53 Ibot ilaak ya omun̄be ire eya. Owu gaalek ke echili ijeen̄, 54 mije, owu ojit oniin̄ eyi kwun̄, mè itap lek kwun̄ me oniin̄ eyi n̄a, mè iweek Ikan n̄a imun̄. 55 Owu osa ugwem kwun̄ inyi iriọọn̄-inu, mè isa ngobo-ntet irọ nga kwun̄. 56 Eya orọ njeen̄be owu inu chi, mije, mkpukpe òwa esun̄be me ubọk Ogwu Òbebene Ichit inyi owu. Usen ita isiraka igbaalek, mâtumu ofifi inu inyi owu, mè ikpa inu òlolobo mè ikup nke nke inyi owu.”
Ilaak ọkpọchieen̄ eyi ida okitaan̄ me emen gwun̄ uti