Nnenibolo chieen̄, ejit okekisisaak emi enenen, uga ukpook otetet emi. Ntutumu inyi lek n̄a ibe, 4 “Emi gaalek nsa inu yi inikeme lek n̄a, bak me lek mweekbe irọriọọn̄ oniin̄ Ogwu Òbebene Ichit? 5 Efuuk îta emi me emen, ekwukwu n̄a îwọ, unye geege kpunu emi me emen, mije ikpele ukpook òtetet emi me eririeen̄ keyi. 6 Eya orọ, mâbeek Ogwu Òbebene Ichit ibe inyi emi unye ire òta.”

7 Nnenibe, “Jei Ogwu Nte Ogwukaan̄-ene, ire ejit kwun̄ ibele me lek n̄a, mè ire ofuk emi kubọk ogwu ata irọrọ òbebene me isi kwun̄ igak owuwa ene, mè ire uriaak n̄a ire owu lek me atikọ, 8 nyi emi unye, mè jeen̄ emi, ogwu ikwaan̄ kwun̄, ibot ilaak yi òkup ukpook ukpook, inyi òsa òkat emi ejit, mè ibot-ejit n̄a ikup me òjot òjot esuuk. 9 Mije, owu ofuk emi kubọk ogwu ògbegbe ogwu ebejeen̄ òta mgbọ mè mgburudun̄ inu òborọ me mgbọ cha.”

10 Ibebe emi, “Ibot ilaak ọkpọchieen̄ omun̄be ya ìre ikeyi: 11 Igo ya omun̄be ònanan̄a me okwaan̄ inu, ìre òso mkpulu ini eyi Danien ngwan̄ kwun̄ omun̄be me ilaak ọkpọchieen̄. 12 Ire, kpekpa ibot ilaak ya iwele inyi ọmọ kubọk mkpabe mgbọ keyi, mè ìre ubọk mwuukbe lek ikpakpa inyi owu. 13 Usen òkinu, mgbọ mkpulu ge môbenebe me linyọn̄, eyi môkaan̄be ukpook me lek igak otutuuk mkpulu geelek òdadasi ikpulu me isi kan̄. 14 Akọp mè ubọọn̄ iba ebekup me ibot mkpulu ya, ge me udun̄ ge. 15 Ire, ogwu òso iba, me lek akọp mè ebi ubọọn̄ iba cha, môkpulu ifiin̄ mgbọ igak ebi kechilọ. 16 Eyiya ore ibot akọp mè uwop iba omun̄be cha.

17 “Ida ya onọbe òkitumu ikọ, eyi ònan̄a me etete akpalek igo ya, ìkare me ibot, ibot kan̄ ìre ikeyi: 18 Me etete okike mgbọ mkpulu ya môkupbe ire, ikpele uyọrọlek môbene, mè mkpulu ya oweek irọrọn̄. Ire, ìkporọn̄ me mgbọ ya, môyaka ikpọk ikaan̄ unye eyi îkaan̄be me adasi mgbọ ya. 19 Asasa uwop jeeta cha omun̄be òtitibi isibi me lek uwop igo ya, ibot kan̄ ìre ikeyi: 20 Ubọọn̄ jeeta mênan̄a ibene me mkpulu ya, ire, mgbọ kiban̄ môre mgbidim mgbidim, acha kiban̄ si ìbore ugwat ugwat. 21 Ene iba me lek ebi ubọọn̄ cha mêkwaan̄ mgbọ etete mgbọ mkpulu ya isigbet, ene ini mêkup ire mgbọ òta mgbọ ya môriaakbe, mêsusun̄ ene iba ire òta mgbọ ya me lek kan̄.

22 “Ibot ita cha omun̄be, echi ìkakisisik cha, ibot kan̄ ìre ikeyi: 23 Me mgburudun̄ mgbọ mkpulu ya, Ogwu Òbebene Ichit môsan̄a ebi ubọọn̄ ita isibi; ema mêrọ owuwa inu ikana ayaya me mkpulu ya, mè ikpulu linyọn̄ 24 mè ebi ìluk me linyọn̄, mè itutuku ene igak ebi ìkpukpulu sabum ema. Eya orọ egwenbe ema ibot igo. 25 Mije, îre ema eberọ otutuuk inu ikpak eyi mkpulu ya ikana igwook, mè irọ ire lek echi òta kan̄. 26 Eyi omun̄be ibot òmimin ya oniniin̄be ichep, ìre ke ene ge me lek ebi ubọọn̄ cha môkup me inyọn̄ mkpilaak kan̄ ikwu, ire, mônyinya mkpa sabum. 27 Ire, ene iba cha ìsisik, oge akọn̄ oborie ema. 28 Oge akọn̄ eyi ene ge me etete kiban̄ môrie ogwu me lek kan̄; ire, ogwulọ si môje me otu oge akọn̄ ikwu mè mgburudun̄ usen.

29 “Eyi omun̄be asasa uwop iba okanabe igọọk ibot eyi òkup me agan̄ ulom ya, 30 ibot inu keya ìre ikeyi: Îre ebibi ke Ogwu Òbebene Ichit osun̄ iban òta mgbọ eyi igo ya. Eyi ore mkpulu ya eyi ìkakup ìfiin̄ mgbọ, eyi òkaan̄ wọlọwọlọ ijot emen, kubọk omun̄be.

31 “Òfo me lek egbe àtat omun̄be òbubum me oron isibi, mè ikigọt, mè ikitumu ikọ inyi igo ya, mè ikikan̄ inu inyi, mije ijo irọrọ îkirọ, mè otutuuk ikọ kan̄ cha echi onọbe, 32 egbe àtat ya ìre ogwu Mesaya, ogwu Ogwu Òbebene Ichit osun̄be mege ire òta usen, ogwu mônan̄abe me owot iman kè Debit isibi, mè inu initumu ikọ melek kiban̄. Môgana ere inyi ema me lek ema ekariọọn̄ge Awaji, mè inu ikpak ema ekirọ, mè isa ijo irọrọ cha, ema ekisa ido Awaji erieen̄, ijeen̄ ema isi mè isi. 33 Môdasi isa ema me ògat ugwem inu me isi ikasi oyerebet, isigana ikọ inyi ema isan̄a, mônenijijaka ema. 34 Ire, môsa me nsan itele ebi n̄a ìsisik, ebi enyan̄abe isibi me otutuuk okike ijọn̄ ido n̄a, mè isun̄ ema me unwọọn̄ mege ire òta mgbọ, òrere usen oyerebet ya, eyi ntumube inyi owu me ibebene.

35 “Eyiya ore ilaak omun̄be, eyiya si ore ibot kan̄. 36 Owu gaalek ogbe irọriọọn̄ nlelet inu yi eyi Ogwu Òbebene Ichit. 37 Eya orọ, ge otutuuk inu chi omun̄be tap me ikpa, mè sun̄ me ere nlelet. 38 Sa jeen̄ ebi ìrọriọọn̄ inu me etete ebi kinyi, ebi oriọọn̄be ibe ke mêkọt itet ibot me lek inu chi, mè isun̄ si me nlelet. 39 Ire, kup me ere keyi ofifi usen jaaba gbaalek, inyi mêjeen̄ owu inu geelek Ogwu Òbebene Ichit mômabe ijejeen̄ owu.” Ogwu osat ya otetele emi.

40 Mgbọ otutuuk ebi ene enọbe ibe ke usen jaaba îraka, ke emi ǹkaka ìre ama, otutuuk kiban̄, ibene me lek ebi ijija ire lek ebi ilile, etititiin̄, mè inu me lek n̄a inibe emi, 41 “Keke ke eji erọ, eyi ònanaan̄ owu ejit? Kpasi unan ke eji etap owu me lek, eyi ojitbe eji itele, mè inikup me ere keyi? 42 Owu gaalek osik inyi eji me lek otutuuk ebi nriran. Owu òbet lek njọ gerep ge ònan̄a me ere ekichimi gerep, mè ibet lek mkpukan̄ me ere òdudun, mè ikup kubọk atasuk ere uji ònwọnwọnọ me irak egwijo me okwaan̄ okikọp initap. 43 Ìre ùrioon̄ òtotoon̄ eji ìkakekem si? 44 Eya orọ, ire owu ojit eji, kè ònwọn enenen me lek kiji ire ibe ke eji mîgọọk itaka iriọk me ukan̄ òtaka ama Sayọn. 45 Mije, eji kpenwọn igak ebi ìkwakwaan̄ me ere ya.” Ema etataan̄ ukpo ikito ito.

Emi nnenifọọk ema ibe, 46 “Jei ebi Ijeren, ìkat ejit! Jei ebi uwu kè Jekọp, ikayaka ìfieek ejit! 47 Mije, Ogwu Òbebene Ichit îkaan̄ enyi me nkeek, Ogwu Òkaan̄ Unye ìkawuuk enyi me emen kwulukwulu kinyi. 48 Ire emi, ǹkajit enyi, ǹkakpebe lek ìsan̄a me lek kinyi. Ire, ǹnu ere keyi inikiriaak uriaak mije mfufiat òrọrọn̄ ikeme ama Sayọn, mè ikibeek nsan, bak me lek inu esip erọbe ere mbuban kiji. 49 Eya orọ, otutuuk kinyi ìfon uwu kinyi. Usen inen me isi, mâka igọọk enyi.” 50 Eya orọ, ema efofon emen ama, ike mbe ema erọ.

51 Ire, nkukup me oron ya usen jaaba, ike ogwu osat ya onyibe emi ida. Otutuuk usen cha, ǹkitaka ajakajak otu oron, inu òtibi me oron ya ore inorie n̄a.