Ilaak ọkpọchieen̄ eyi igo
11
Òso eririeen̄ iba nlaakbe, mmumun̄ ilaak. M̀mun̄ igo okinan̄a me okwaan̄ isibi, mè ikaan̄ akọp mè uwop iba, melek ibot ita. 2 Nnenikpọ, mè imun̄ îsabe uwop iwele ichit otutuuk linyọn̄, otutuuk efet òkiwut me akpa inyọn̄ okekiwut igwook me lek kan̄; oduku inyọn̄ okwọkwọọk ititiin̄ ikana ọmọ. 3 Nnenikpọ, mè imun̄ ofifi uwop otibibe me lek uwop kechilọ isibi, mè iyaka isi ida agan̄ udun̄; ire, ayaya uwop cha îsiik, mè iwọ. 4 Ire, ibot kan̄ cha kpesisik. Ibot eyi etete omin igak echilọ, ire, ìkasisik si, ìkup si kubọk echilọ okupbe. 5 Nnenikpọ, mè imun̄ igo ya osabe uwop kan̄ cha iwulu, mè ikikpulu otutuuk linyọn̄, mè ebi ìluk me emen linyọn̄. 6 Mmun̄ si otutuuk inu òkup me irak isinyọn̄ ekupbe me irak unye kan̄, ene geege ìkasan̄a amọn ìje ìkeme ọmọ, inu erombe ge ikeyi me linyọn̄ ìkakpaka ibot ìnyi ọmọ. 7 Nnenikpọ, mè imun̄ igo ya osabe abọm otukot kan̄ ikeke, mè itaan̄ ukpo inyi uwop kan̄ cha ibe, 8 “Ikagbaan̄ ìkibem ere mgbọ yaage; ogwu ikup, ilaak me ere kan̄, mè ibem me mgbọ eyi kan̄ isire. 9 Ire, esun̄ ebi kè ibot eban mgburudun̄.”10 Mkpọkpọk ikpọ, mè imun̄ ibe ke ida ya ìkanan̄a me ibot kan̄, ire, ke ìnan̄a me etete akpalek kan̄. 11 Nnenifuk uwop echi òyaka isi ida agan̄ udun̄ cha, isisibi jeeta. 12 Nnenikpọ, mè imun̄ uwop ge onan̄abe ibene me agan̄ ulom, mè ikikpulu otutuuk linyọn̄. 13 Sọntiik mgbọ, mkpulu kan̄ orere okputut, mè iraka, kpeyaka imun̄ akpat ubọk kan̄. Ofifi uwop onanan̄a ibene, mè ikikpulu, mè ikpulu ifiin̄ mgbọ. 14 Mgbọ îkikpulu ya, okputut kan̄ si orere; iraraka si kubọk eyi adasi. 15 Ida ge otataan̄, ikibe ọmọ, 16 “Gban̄ utọn̄, owu ogwu òkpukpulu linyọn̄ otutuuk ujọn̄ọ mgbọ yi, ǹkilook owu etip keyi sabum owu oraka. 17 Owu osikpulu iraka, ene geege ìkpokpulu ijọn̄ọ mgbọ kubọk owu okpulube, ene geege ìkpokpukpulu si iso ìkike iba me lek mgbọ owu okpulube.”
18 Uwop eyi òso ita onanan̄a ibene, mè ikpulu si kubọk ebilọ ekpulube, mè iraka. 19 Ikeya ke otutuuk uwop cha ekpulu, ge me udun̄ ge, mè iraka, kpeyaka imun̄ ema ofifi. 20 Ike mgbọ okije, nnenikpọ, mè imun̄ uwop echi ògọgọọk onan̄abe ibene me agan̄ ujit, ibonikpulu si. Usini kiban̄ mîkpulu, ire, mè iraka me ekakpọge chieen̄. 21 Usini kiban̄ enanan̄a ibene, ire, kpekpulu.
22 Echi iraraka, mkpọkpọ, mè imun̄ ibe ke akọp mè uwop iba cha mè echi asasa iba cha mîchieen̄ isan̄a, kpeyaka imun̄. 23 Inu geege ìkayaka ìsik me akpalek igo ya, ilọ me lek ibot ita cha echi ìkakisisik, mè asasa uwop gweregwen.
24 Ike nkikpọ, mmumun̄ asasa uwop iba me lek uwop gweregwen cha enan̄abe itele echilọ inikup me irak ibot eyi agan̄ ulom, uwop ini kechilọ ekukup me ere ema ekupbe. 25 Nnenikpọ, mè imun̄ ibe ke asasa uwop chi mîtọt inanan̄a ibene inikikpulu. 26 Ike nkikpọ, ge obebene ikikpulu, mè igwat lek iraka me ekakpọge chieen̄. 27 Òso uwop iba si obebene ikikpulu, mè igwat lek iraka igak eyi adasi. 28 Mgbọ nkikpọ, uwop iba òsisik enenikitọt igbagbaan̄ ikpulu. 29 Mgbọ ema ekitọt otitọt ya, ge me lek ibot ikasisikge cha, eyi òkup me etete, obobolo chieen̄ me ilaak, ọmọ omin igak ibot iba kechilọ. 30 Mmumun̄ ubọk îrọbe inyi ibot iba kechilọ ere otu ge melek kan̄, 31 mè imun̄ ubọk ibot ya mè echi melek kan̄ eyakabe lek ikana, mè imeen̄ asasa uwop iba cha ìkitọt ikpukpulu. 32 Ògak ge, ibot yi onenikaan̄ unye me lek otutuuk linyọn̄, mè itutuku ebi linyọn̄ nnaan̄ nnaan̄, mè ikaan̄ ikpele unye me linyọn̄ igak otutuuk uwop cha òkpukpulu sabum ọmọ onikpulu.
33 Eyi iraraka, mkpọkpọ, mè imun̄ ibe ke ibot eyi etete ya îraka si me ekakpọge chieen̄, kubọk uwop cha orakabe. 34 Ire, ibot iba cha osisik, mè ikpulu si linyọn̄ mè ebi ìluk me linyọn̄ ubọk yaage. 35 Nkekikpọ si, mè imun̄ ibot eyi agan̄ ulom omenbe ibot eyi agan̄ ujit.
Egbe àtat îbum me oron isibi
36 Nneninọ ida ge okibe emi, “Kpọ isi kwun̄, mè tet chieen̄ me lek inu omun̄be.” 37 Mgbọ mkpọbe, mmumun̄ inu òbet lek egbe àtat obumube isibi me oron, mè ikigọt. Nneninọ îsabe ida ebilene ikitumu ikọ inyi igo ya ikibe, 38 “Gban̄ ǹtumu ǹnyi owu. Ogwu Òbebene Ichit ìbe owu, 39 ‘Ìre ìkare owu osik me lek anam ini cha nnyibe unye ibe ekpulu linyọn̄ n̄a, inyi okputut mgbọ n̄a môjebe me lek kiban̄ inu? 40 Owu ore òso anam ini ònunu, owu otim ikpan̄ otutuuk anam cha ìdadasi inu me isi kwun̄. Owu osa unye-ubọk ikpulu linyọn̄, mè itap ikpele ukpook me linyọn̄, mè itututuku linyọn̄ nnaan̄ nnaan̄ otutuuk mgbọ owu olukbe me linyọn̄, mè ikifiaan̄ ebi linyọn̄. 41 Owu okpulu linyọn̄, ire òkasa atikọ ìkpulu. 42 Mije, owu otutuku ebi ìsisiki lek, mè itap unan me lek ebi esuuk esuuk; owu ocha ebi ìkitumu atikọ, mè ima ebi ataak; owu ogbugbọ uwu ebi inu ojebe ijaan̄ me lek, mè igbugbọ mgban ebi kpetap owu unan geege me lek igwook. 43 Unyechieen̄ kwun̄ îre isi Ogwu Òbebene Ichit, ikeya si ke ugumulek kwun̄ ore lek Ogwu Òkaan̄ Unye. 44 Ogwu Òbebene Ichit îkpọ mgbọ kan̄; mgbọ ya îta isan̄a, acha kan̄ si îso. 45 Eya orọ, igo, owu môraka, owu melek uwop kwun̄ cha òkitet ene ukpook, mè asasa uwop kwun̄ cha òfefieek lek ichit, mè ibot kwun̄ cha okisa irọ nnaan̄, mè abọm otukot kwun̄ cha òfefieek lek ichit, mè otutuuk akpalek kwun̄ ya ikakupge me lek inu geege, 46 inyi otutuuk linyọn̄ inwọnọ afa owu okirọ, ufuna lek itọbọ ebi linyọn̄, mè isuuk, inyi ikpọ chieen̄ me lek oyerebet mè nsan ogwu òrorom ọmọ.’ ”