5 Nyayaka inu echi n̄a nkikeek ito, mè isa me unaan̄-ejit ifọọk ọmọ ibe, 6 “Owu obubut igak otutuuk ebibaan̄. Ìre òkamun̄ ufieejit eji ekifieek, mè inu òrọrọn̄ ikeme eji? 7 Ama Sayọn, ogwu òre nga kiji otutuuk, ìkup me ufieejit òdọdọk, mè ikpele saasaak. 8 Mgbọ keyi ogbe ibe eji eto ito, mije, otutuuk kiji ekitoto ito; mè efieek ejit, mije, eji otutuuk ene ekifefieek ejit. Owu òkifieek ejit me ibot gwun̄ ge kwun̄, ire, eji, ebi otutuuk linyọn̄, ekifieek ejit me ibot ama Sayọn, òrere nga kiji. 9 Do-nu linyọn̄, ke môtumu ibe ke ìre ọmọ ogbe ifefieek ejit me ibot owuwa ebi emanbe ito me lek kan̄. 10 Bene me ibebene, otutuuk ene eman isibi me lek kan̄, melek ofifi ife si ìbenunu. Ire, sọntiik osik otutuuk bọn kan̄ mekikwaan̄ ifon isi ibọkọ osusut kpunube òta. Owuwa me lek kiban̄ ebenin̄ me mfufiat. 11 Ìre ogwu owa ogbe ibe ifieek ejit igak? Ìre linyọn̄ ogwu ikpele urum ene kan̄ echieen̄be? Sà ìre owu ogwu òkifieek ejit me ibot gwun̄ ge gaalek? 12 Ire, ire obe emi, ‘Ito n̄a ìkabet lek eyi linyọn̄, mije, mfut òsibi me akpa gwun̄ n̄a ochep, eyi mbọkọbe ujat isan̄a isibi, mè iman me ufieejit. 13 Eyi linyọn̄ ìrọ ọmọ igọọk me orọmijọn̄ eyi kan̄, urum ene òkup me lek kan̄ mêfon, ike ema enube.’ 14 Emi mâneniyaka ibe owu, ‘Ike owu osabe ufieejit iman, ikeya ke linyọn̄, bene me ibebene, okisa mfut kan̄, òrere ebilene, inyi ogwu òrorom ọmọ isibi.’ 15 Eya orọ, tet ufieejit kwun̄ kaan̄ me lek kwun̄, mè kat ejit ben ufialek ònunu inyi owu. 16 Mije, ire owu oriọọn̄ ibe nteme Awaji ìnenen, owu môbọkọ gwun̄ kwun̄ me sọntiik mgbọ, ebi ene mêtọtọn̄ owu me etete ebibaan̄. 17 Eya orọ, je fo ama gọọk nlom kwun̄.”

18 Ogwu enenwaan̄ ya obebe emi, “In̄-in̄, m̀kparọ, m̀kpaje ifo ama, mbakup me ere keyi ikwu.”

19 Nnenikpọk itumu inyi ọmọ ibe, 20 “Karọ, sa mije ufialek eyi ama Sayọn nwene ejit, mè sa ufieejit eyi Jeruselem kat lek kwun̄ ejit. 21 Owu omun̄ ike egbugbọbe ere mbuban kiji igwook, mè ida ntook ngwugwa kiji ito, mè ijijaka Uwu Mbuban kiji. 22 Mîchit ibe ekanọnọ ida uneen̄ kiji, okwa kiji îriaan̄, mîfieek ijọk kiji. Mîniin̄ ukan̄ me lek ngugọọn̄ mkpukan̄ kiji, mè ifum okop inyan̄a-ibot kiji inọọn̄, mè ififila inu mbuban kiji geelek, mè ichichaka erieen̄ ya eyi ekisa igwen eji. Mîsa bọn kiji irọ inu ikagbege, mè iwọp ebi ngwugwa kiji me ukan̄ ikpan̄. Mîkpulu ebi kiji ebi otoko kè Libai isi itap me usun̄ akọn̄, mè ifiat obaak nsabọn ibaan̄ kiji lek, mè ilaak ebi nwa kiji. Mîkpulu ebi kiji ebi ata irọrọ ifon, mè itọọn̄ asa nsabọn kiji ifiin̄, mè isa nsabọn irieen̄ kiji irọ usun̄, mè irọ inyi lek iwọ ebi kiji ebi ìnyenye lek me akọn̄. 23 Eyi òfefieek ichit otutuuk ìre ke mîbọkọ Sayọn iman̄-oriọọn̄ eyi umin kan̄, mè isa iyaka itap me ubọk ebi ìchacha eji. 24 Eya orọ, gen̄ inu òkirọ ibe ejit kwun̄ ikatop fiin̄, mè da ufieejit kwun̄ to me agba ge, inyi Ogwu Òkaan̄ Unye môkpọk ikaan̄ owu nsan me lek, mè Ogwu Òbebene Ichit inyi owu isiki-efuuk, mè isan̄a owu isibi me ufialek.”

25 Mgbọ nkitumu ikọ melek kan̄, me ekakpọge chieen̄, isi kan̄ okpọkpọ itoon̄ enenen; okwut isi kan̄ okekimumen kubọk omumen-inyọn̄, ukpook otetet emi enenen ijeje inin̄ lek kan̄, owot ofefieek emi enenen. Mgbọ nkijiin̄ lek, ikikeek inu inu yi osibibe, 26 me ekakpọge chieen̄, ogwu enenwaan̄ ya otataan̄ ukpo ònyenye mè ikup ukpook ukpook; ida ukpo ya osisisik ijọn̄. 27 Mgbọ mbenebe isi, ǹkayaka ìmun̄ ogwu enenwaan̄ ya. Ire, ǹyaka inimun̄ ama enamabe ikeke; ere etọbọbe ikpele ọdọ ama ya osisibi ikeke. Mfefieek owot, mè itaan̄ ukpo unye unye ibe, 28 “Mọmọ ogwu osat Uriyen, ogwu ònunu me lek n̄a me adasi mgbọ ya? Mije, îre ọmọ osa emi initap me emen uyeke inu keyi òweweke emi ibot. Òta mgbọ n̄a îbubuku, uriaak n̄a îkana inu esip.”

29 Ikọ ya me otu n̄a, ogwu osat ya ònunu me lek n̄a me adasi mgbọ ya okakana isibi, mè ikikpọ emi. 30 Nlalaak ibia me ijọn̄ kubọk nkwukwu ene, ǹkanọ lek. Itetet emi me ubọk agan̄ ulom, mè itap emi efuuk me emen, mè ibene emi ikeke, mè itumu inyi emi ibe, 31 “Keke ore owu lek? Keke okisisaak owu? Keke orọ okanọge lek? Keke orọ mè ekiket kwun̄ isisaak owu?”

32 Mbebe, “Îre bak me lek ojitbe emi itele. Nrọ ubọk owu obe emi ǹrọ, mè isibi isi inin̄ oron. Inu mmun̄be, mè ikimun̄ si, îbuk emi otu.”

33 Ibebe emi, “Nan̄a keke kubọk enerieen̄, inyi ǹjeen̄ owu inu.”

34 Mbebe, “Ogwu nte n̄a, tumu ma. Ire, katele emi, inyi nkakwu sabum mgbọ n̄a ònore. 35 Mije, mmun̄ inu eyi nkariọọn̄ge, mè inọ inu eyi nkagoboge ìtet. 36 Ìre ekiket n̄a okifiaan̄ emi ni, sà ìre ibot-ejit n̄a ìkimumun̄ ilaak ni? 37 Eya orọ, m̀bebeek owu, bum ibot ilaak ọkpọchieen̄ yi òweweke emi ibot nyi emi.”

38 Inenifọọk emi ibe, “Gban̄, inyi ǹjeen̄ owu, mè m̀kpa inu ya okitet ukpook ǹnyi owu, mije, Ogwu Òbebene Ichit îchili owuwa nlelet inu ijeen̄ owu. 39 Îmun̄ ata irọrọ kwun̄, mè ufieejit okikaan̄ mgbọ geelek inyi ebi kwun̄, mè ikito ito mgbọ geelek me ibot ama Sayọn. 40 Eya orọ, ibot ilaak ọkpọchieen̄ ya ìre ikeyi: 41 Ogwu enenwaan̄ ya òkakana isibi me isi kwun̄ me ekakpọge chieen̄, mè ikifieek ejit, owu okekikat ejit, 42 ire owu òkayaka ìmun̄ lek, ire, ama enamabe ikeke oyaka inikana isibi owu me isi, 43 ogwu enenwaan̄ ya onenikpa ijo isi îkaan̄be me lek gwun̄ enerieen̄ kan̄ inyi owu, ibot kan̄ ìre ikeyi: 44 Ogwu enenwaan̄ ya omun̄be ìre ama Sayọn, eyi okimun̄ mgbọ keyi kubọk ama enamabe ikeke. 45 Eyi îbe ke akọp acha ita ke ọmọ ore ora, ìre ke obop acha ita oraka me linyọn̄ sabum enigwa ngwugwa ge me emen kan̄. 46 Mgbọ obop acha ita cha orakabe, Solomọn oneninama ama ya, mè ikigwa ngwugwa. Îre mgbọ ya ke ogwu enenwaan̄ ora ya oman gwun̄ enerieen̄. 47 Eyi îbe ke ọmọ ìgbagbala chieen̄ ikpukpo gwun̄ ya isibi, eya ìre okike mgbọ ebenebe ikiluk me Jeruselem. 48 Eyi îtumube inyi owu ibe, ‘Gwun̄ n̄a ìkwu mgbọ înin̄be agwut ido-nwa,’ mè ibe ke ijo isi îtet ọmọ, eya ìre jakajaka ejijakabe ama Jersuselem. 49 Owu omun̄ ubọk ọmọ okupbe, mè ubọk îkifieek ejit gwun̄ kan̄, mè ibene ikakat ọmọ ejit me lek inu òrọrọ ọmọ. 50 Mgbọ keyi, Ogwu Òbebene Ichit îmun̄ ibe ke owu ofieek ejit me atikọ, mè ikaan̄ si saasaak òdọdọk ofolek kan̄, eya orọ, îjeen̄be owu utoon̄ eyi umin kan̄, mè ubọk uja kan̄ ojaan̄be ikup. 51 Eya orọ mbe owu òkup me oron, ere kpenama uwu geege, 52 mije, nriọọn̄ ibe ke Ogwu Òbebene Ichit môchili inu chi ijeen̄ owu. 53 Eya ke mbak me lek ibe owu ònin̄ oron, ere kpetọbọ ọdọ uwu geege, 54 mije, inu eyi ubọk ene onamabe ìkpokeke me ere ebechili ama Ogwu Òbebene Ichit ijeen̄ ene.

55 “Eya orọ, kafieek owot, kachieek ibe ukpook inin̄ owu ejit. Ire, je nin̄ emen ama ya si kpọ uja mè uwele uwu cha re okike ere chieen̄ kwun̄ obokọt imọọn̄ ire. 56 Me mgburudun̄, owu mônọ okike eyi utọn̄ kwun̄ obokọt inọ. 57 Mije, mîgbana owu igak owuwa ene, mè igwen owu kubọk egwenbe ene inen mè inen, ibe enekup me isi Ogwu Òbebene Ichit. 58 Ire, eririeen̄ iyakwut òbowele, owu môkup me ere keyi. 59 Me emen ilaak ọkpọchieen̄ cha, Ogwu Òbebene Ichit môjeen̄ owu inu ọmọ oborọ ebi ìluk me linyọn̄ me òta usen.”

Nlalaak me ere ya eririeen̄ keya mè eyi ògọgọọk, ike îtumube inyi emi.