9
Inenifọọk emi ibe, “Sa ejit kwun̄ siki lek roon̄ kpọ, osimun̄ usini inu ijejeen̄ echi ntumube ibe môrọ me mgbọ ònu me isi cha okirọ, 2 owu môneniriọọn̄ ibe ke mgbọ Ogwu Òbebene Ichit obonu linyọn̄ eyi îrombe îre. 3 Eya orọ, sikisik-ijọn̄ isibene me linyọn̄, mè ebi ene isikijijiin̄, mè ido isikitọt ijo ibak ido, mè ebi mkpulu kpekeke inye, mè wọlọwọlọ isinin̄ me etete ebi ilile, 4 owu môneniriọọn̄ ibe ke ìre echichi ke Ogwu Òbebene Ichit otumu ikọ ofolek me ukot ikaan̄, bene me ibebene. 5 Ike ibebene inu geelek òkirọ me linyọn̄ okisibi utoon̄, okputut kan̄ okekikpọk mbum, 6 ikeya si ke mgbọ echi Ogwu Òbebene Ichit okup: Ibebene kan̄ ìje melek nke nke inu mè uyeke ikwaan̄, okputut kan̄ oje melek osusut mè inu ijejeen̄.7 “Otutuuk ebi mênyan̄abe, ebi mêkọtbe inwọnọ sa me lek ikwaan̄ kiban̄, mè ìre sa me ichechieek ema echieekbe, 8 ebiba mênwọnọ unan cha etumube ibe mônu mgbọ òkup me isi, ema mêmun̄ unyan̄a me ido n̄a mè okike ijọn̄ n̄a, eyi nsun̄be me mbuban inyi lek n̄a bene me ibebene. 9 Mgbọ ya, môkup uyeke uyeke me lek ebi ìtetele oniin̄ eyi mbe ema eje, ebi ìjijit oniin̄ cha ikisa ido emi erieen̄, mêluk me ujaralek. 10 Mije, otutuuk ebi geelek ekariọọn̄ge emi me ugwem kiban̄, ubọk geelek ibe ke ema mîbọkọ nnwọn n̄a, 11 mè otutuuk ebi ìkpọkpọ Ikan n̄a chieen̄ isiki mgbọ ema ekaan̄be lek, kpekọt igobo itet, ire, ekpọkpọ Ikan cha ilọ chieen̄ me mgbọ irek okupbe inyi ema igwugwu ikom, 12 ebiba ebekup me emen ujaralek iriọọn̄ Ikan ya, mgbọ ema isikwu. 13 Eya orọ, kayaka ìkaan̄ ulọk idodo ubọk ebesulu ebi ekariọọn̄ge Awaji osusut, ire, do ubọk ebenyan̄a ebi ata irọrọ, ebi ukot keya obore eyi kiban̄, ebi ebakbe me lek kiban̄ isun̄ ukot ya si.”
Ejira îkpọk ibene ifan̄a kan̄ si
14 Nnenifọọk ibe, 15 “Ntumu iraka, mè ikitumu mgbọ keyi, mâkpọk itumu si ofifi: Ebi ìbechechep mîwa igak ebi ebenyan̄a, 16 ike ekoon̄ ge ominbe igak otu mun̄ ge òrọrọn̄ọ.”
17 Ogwu osat ya ofọfọọk emi ibe, “Ike ijọn̄ uko okupbe, ikeya si ke ukwuuk uti ewopbe okup; ike ajakajak okupbe, ikeya si ke chieen̄ ajakajak okup; ike ikwaan̄ okupbe, ikeya si ke inu òsibi me lek ikwaan̄ okup; ike ogwu uko okupbe, ikeya si ke ere igen̄ akpa kan̄ okup. 18 Mgbọ nkineen̄ linyọn̄ isun̄ iban ebi ìkup me linyọn̄ mgbọ keyi, sabum enirorom linyọn̄ inyi ema eluk, ene geege ìkaje ìkeme emi, mije, ene geege ìkakup-nu. 19 Ire, mgbọ keyi, ebi erombe me linyọn̄, mè inyi inorie eyi ìkakilọlọ, mè inyi anam kiban̄ mbubet eyi ìkakitata, mîbubuku isan̄a me ugwem kiban̄. 20 Nnenikpọ linyọn̄ n̄a, mè imun̄ ibe ke îchep. Mmun̄ ibe ke lek ijọn̄ n̄a mônijijaka, mije inu ebi ìsibi me lek ekirọ. 21 Mgbọ mmun̄be, îsisaak emi enenen iwuwuwọk ema ubọk me lek, nnyanyan̄a ibot gerep ge me lek njọ ge kan̄ inyi lek n̄a, mè inyan̄a si uti ge me lek ikpele aka oron inyi lek n̄a. 22 Eya orọ, tele inyi urum ebi emanbe, kpekup me lek inu geege, echieen̄ esan̄a; ire, mè enyan̄a gerep n̄a melek uti n̄a esibi, mije, ǹsa me ikpele kwulukwulu irọ inyi ema enwọn esan̄a.
23 “Ejira, tele ibe usen jaaba iraka, kajin otu me eyi mgbọ keyi. 24 Ire, si me uko ajakajak ere kperarak inama uwu, mè kitaka ajakajak oron ya gaalek, kataka anam, kanwọ miin̄, ire, kitaka ajakajak gaalek, 25 mè kpọkpọ kiriaak Ogwu Òbebene Ichit, ke mânu initumu ikọ melek kwun̄.”
Ikan kè Mosis îkaan̄ umin ire mgbọ geelek
26 Eya orọ, njeje isibi, ike îbe emi ǹrọ, isi oron ekigwen Aridat; nsisiki ikweek irek me ere ya me etete ajakajak, mè ikirie inu òtibi me oron ya. Inorie ònan̄a me lek ojojot emi owot. 27 Usen jaaba iraraka, mgbọ nlaakbe me inyọn̄ mbubet, ejit obebene ikisisaak emi kubọk adasi mgbọ. 28 Otu n̄a ochichili, mbebene ikitumu ikọ me isi Ogwu Òbebene Ichit, ibe, 29 “Jei Okumugwem, owu ojeen̄ eji ibe ke owu òwa, me etete ebi nte nte kiji me emen èwê mgbọ ema enan̄abe me Ijipiti, mè mgbọ ema ekije itibi èwê ebilene kperarak ije, ere inu geege ìkakititibi si. 30 Owu obebe ema, ‘Jei ebi Ijeren, ìgban̄ emi, mè ìriọọn̄ ubọk ìnọ ikọ n̄a, jei ebi owot iman kè Jekọp. 31 Mije, mwop Ikan n̄a me emen kinyi, ibe môto mfut me emen kinyi, inyi enyi mêsa me lek kan̄ ikaan̄ umin ire mgbọ geelek.’ 32 Ire, ebi nte nte kiji mîbọkọ Ikan ya, kpesun̄; kperọrọ si inu otọbe ibe ema erọ. Ire, mfut Ikan ya ìkachep; ìkpokọt ichep, mije, îre eyi kwun̄. 33 Ire, ebi ìbọbọkọ Ikan ya mîchieen̄ ita, mije, ema kpesun̄ inu ya ewopbe me emen kiban̄. 34 Orọmijọn̄ ìre ikeyi: Isitap ukwuuk uti me ijọn̄ iwop, mè ìre ito uji ile me okwaan̄, mè ìre itap inorie me emen alala, mè ìre itap miin̄ me emen ekpen̄, inenire ibe ke mîjijaka inu ewopbe, mè ire uji etobe me okwaan̄, mè ìre inu etapbe me emen inu, 35 inu cha îra ijijaka ma. Ire, inu ema ekupbe me emen òwa okupbe. Me lek ebilene ìkare ikeya. 36 Mije, eji ebi ìbọbọkọ Ikan, mè irọ ijo inu, eji mêchieen̄ ita, ejit kiji eyi òbọbọkọ Ikan ya ìbochechep si. 37 Ire, Ikan ya me lek kan̄ ìkakichep, ìkikukup, melek umin kan̄.”
Ilaak ọkpọchieen̄ eyi enenwaan̄ òkito ito
38 Mgbọ nkikeek inu chi me emen ejit n̄a, nraraan̄ chieen̄ ikana, mè imun̄ enenwaan̄ ge me agan̄ ulom n̄a, okifieek ejit, mè ikitaan̄ ukpo ito ito, mè ikifieek ejit enenen, melek ntọn̄ me ibot, ekwut kan̄ ìgwagwak ita. 39 Nnenisan̄a ejit me lek inu nkikeek, mè iyaka isi ikikpọ ọmọ, 40 mè ibe ọmọ, “Keke orọ okito ito, keke orọ me ejit ifieek owu ikeyi?”
41 Ibebe emi, “Ogwu nte n̄a, tele emi, inyi ǹto ito lek n̄a, mè m̀fieek ejit, mije, nkaan̄ ujat ejit me emen ekwukwu n̄a, mè ikaan̄ si saasaak òdọdọk.”
42 Mbebe ọmọ, “Keke orọ owu ni? Tumu nyi emi ma.”
43 Ibebe emi, “Emi, ogwu ikwaan̄ kwun̄ ìre ora, ǹkakaan̄ gwun̄ geege otutuuk akọp acha ita nlukbe melek nlom n̄a. 44 Me akọp acha ita cha, ǹkirariaak uriaak igwen Ogwu Òbebene Ichit mbubak mgbọ geelek me usen geelek, ikarek mè eririeen̄. 45 Mgbọ akọp acha ita orakabe, Awaji onọnọ uriaak n̄a, emi ogwu ikwaan̄ kwun̄, mè ikpọ ubọk irek n̄a osikibe ire, mè imun̄ ofaak n̄a, mè inyi emi gwun̄ enerieen̄. Nnwọnwọọn̄ unwọọn̄ enenen, emi melek nlom n̄a, mè ebi mbuuruk kiji, me ibot kan̄. Eji enyinyi Ogwu Òkaan̄ Unye ikpele itọn̄. 46 Mgbagbala chieen̄ me lek ikpukpo isibi. 47 Mgbọ îminbe isibi, nneniweek nwa inyi, mè isun̄ usen ijọk ido-nwa.