4 Nnenifọọk ibe, “Jei, ibot-ejit n̄a, kaan̄ òjot òjot ngobo-ntet, jei ejit n̄a, kaan̄ òjot òjot iriọọn̄-inu. 5 Mije, òkaje me nkeek kwun̄ ìnu linyọn̄, òbotele si me ubọk unye, mije, enyi owu mgbidim mgbọ gaalek ibe owu òkup. 6 Jei Okumugwem ogwu òkup me inyọn̄, nyi emi ogwu ikwaan̄ kwun̄ irek, inyi eji ekup me isi kwun̄ eriaak uriaak enyi owu: Wop mfut me ejit kiji, mè nyi eji ngobo-ntet, inyi mfut ya ito, inyi ebilene, ìrere ebi ijo, mêsa me lek kan̄ iluk ugwem. 7 Mije, owu gaalek okup, eji ìre ubọk ikwaan̄ kwun̄, kubọk owu otumube. 8 Mije, owu otap ugwem me emen anam akpalek esisọkọbe me akpa gwun̄, mè itap nriro iso lek. Inu orombe ya, owu osa ukan̄ mè mun̄ ikput lek. Onyan̄ onaan̄ge ke akpa gwun̄, eyi owu orombe, obeme inu ya orombe itap me emen kan̄. 9 Ire, akpa gwun̄ ya eyi òsusun̄ gwun̄, melek gwun̄ ya eyi owu osun̄be me emen kan̄, îre owu okisun̄ ema iba cha. Mgbọ akpa gwun̄ isisan̄a gwun̄ owu otapbe me emen kan̄ isibi, 10 owu okirọ ibe nriro cha me lek kiban̄, òrere ebe, isan̄a mfut kan̄ òrere mun̄ ebe, isibi, 11 inyi mêsabe ikpukpo gwun̄ ya owu osisọkọbe, sọntiik mgbọ. Sọntiik mgbọ ya isiraka, owu mônenisa nsan kwun̄ ikikpọ gwun̄ ya chieen̄ me lek. 12 Owu okpukpo ọmọ isibi sa me ata irọrọ kwun̄, mè iteme ọmọ nteme sa me Ikan kwun̄, mè isa iriọọn̄-inu kwun̄ ikigana ikọ inyi ọmọ. 13 Owu môkọt isan̄a ugwem kan̄, mije, îre owu orom ọmọ. Owu môkọt irọ ibe ọmọ iluk ugwem, mije, ọmọ ìre ubọk ikwaan̄ kwun̄. 14 Ire, ire owu onigwat lek ijijaka inu owu obọkọbe ukwook isan̄a isibi sa me ida kwun̄, me ekakpọge chieen̄, ìre òbak me lek keke irom inu ya isibi ni? 15 Mgbọ keyi, mâsan̄a amọn itumu ikọ: Inu geelek ofolek ebilene, owu oriọọn̄ ichit; ire, mâtumu ikọ ofolek ebi kwun̄, ebi nkifieek ejit me lek; 16 mè ìrot kwun̄, ebi nkito ito kiban̄; mè ebi Ijeren, ebi ejit n̄a ìkatotop bak me lek kiban̄; mè mfut kè Jekọp, ebi nkikaan̄ saasaak ofolek. 17 Eya orọ, mâbeek mbeek me isi kwun̄ me ibot n̄a mè ibot kiban̄, mije, emi mmun̄ ijeje ilọ eji ebi ìluk linyọn̄ ekije ilọ, 18 mè inọ si ike oyerebet òbonu môgwatbe lek ire. 19 Eya orọ, nọ ida n̄a, mè gobo ikọ n̄a tet, inyi mâtumu ikọ me isi kwun̄.”

Uriaak kè Ejira ìbene ikeyi, sabum eniben ọmọ ifo inyọn̄. Ejira ìbe: 20 “Jei Okumugwem, owu okiluk ire mgbọ ikakaan̄ge itata, akpabin inyọn̄ òbebene ichit ìre eyi kwun̄, agwut inyọn̄ inyọn̄ kwun̄ ìkup me emen efet. 21 Ogboon̄ ubọọn̄ kwun̄ kpebekọt itọ, ujamgbugbo kwun̄ kpebekọt igobo itet ubọk îkupbe; urum ebi osat ìkekeke me isi kwun̄ ekiraran. 22 Owu osinyi ema ida, ema mîra ikana efet mè ukan̄. Ikọ kwun̄ ìkikekeke, inu otumube ìkpolọlọ irọrọ iso. Itọtọ ikọ kwun̄ ìkinyenye, ikan kwun̄ ìkikup ukpook ukpook. 23 Owu osiraan̄ chieen̄ ikpọ okwaan̄, ugwuuk okwaan̄ îra ichiaak, uyok unaan̄-ejit kwun̄ ìkirọ ogoon̄ itọk ita, atikọ kwun̄ ìkukup ire mgbọ geelek. 24 Jei Okumugwem, nọ uriaak ogwu ikwaan̄ kwun̄, mè gban̄ mbeek ogwu owu orombe; kpọ chieen̄ me lek ikọ n̄a ma. 25 Mije, mâtumu ikọ mgbọ nkupbe me ugwem, mè ifọọk ikọ mgbọ nkaan̄be ngobo-ntet. 26 Jei, kakpọ chieen̄ me lek ijo ebi eyi kwun̄, ire, kpọ ebi ìkisa me atikọ isi ikwaan̄ inyi owu. 27 Kasa irọrọ ebi ìkirọ inu ikpak ikpak ìgwen inu, ire, sa irọrọ ebi ìsusun̄ inyan̄a-ibot kwun̄ mè ibọkọ ukwook me ibot, gwen inu. 28 Kakeek ebi ìluk ikpak ikpak ugwem me isi kwun̄, ire, keek ebi ìrọriọọn̄ me lek kiban̄ ibe ke îgbe ibe etet owu ukpook me lek. 29 Kaben me ejit ikpakpan̄ ebi ìluk kubọk anam, ire, riọọn̄ lek ebi ìjejeen̄ Ikan kwun̄ kubọk inu òkaan̄ umin. 30 Kanaan̄ ejit ìnyi ebi ekimọnọ ibe anam oron înwọn igak, ire, ma ebi ìkitoon̄ ejit me lek umin kwun̄ mgbọ geelek. 31 Mije, eji mè ebi nte nte kiji eluk ugwem òbosa mkpa inu, ire, îre mije ibot kiji ebi ijo ke ekigwen owu ogwu nsan. 32 Mije, ire owu môkaan̄ ulọk itoto eji njijin, eji ebi kperọ ikwaan̄ ata irọrọ geege, mêkigwen owu ogwu nsan. 33 Mije, ebi ata irọrọ, ebi ata ikwaan̄ kiban̄ otitiin̄be ibene me isi kwun̄, mêbọkọ mkpukpe òje me lek inu ema erọbe. 34 Ire, ìre ebilene ekup me lek keke, eyi owu okinaan̄ ejit inyi? Sà ìre owot iman ebi bukubuku chi ekup me lek keke, eyi owu okirọ ema me lek unye unye? 35 Me atikọ, kpunu ene geege me etete ebi emanbe, ogwu ìkarọ inu ikpak geege; kpunu si ene geege me etete ebi ìkup me ugwem, ogwu ikarọge inu geege ìlọ. 36 Jei Okumugwem, mgbọ owu osikaan̄ nsan me lek ebi kperọ ata ikwaan̄ geege eyi etitiin̄be isun̄, îre sa me lek keya ke ebetumu ata irọrọ kwun̄ mè nnwọn kwun̄ isibi.”

37 Okumugwem onenifọọk emi ibe, “Usini me lek inu otumube, înen; môrọ si iso kubọk owu otumube. 38 Me atikọ, inu ofolek ugwem ebi ijo, mè ìre mkpa kiban̄, mè oyerebet kiban̄, mè ìre ijijijaka ema, ìkpogbaan̄ emi me lek. 39 Ire, mânwọọn̄ unwọọn̄ me lek irorom nrombe ebi ata irọrọ, mè inwọọn̄ si me ibot ije eyi ugwem kiban̄, mè unyan̄a kiban̄, mè ema ibọbọkọ mkpukpe kiban̄. 40 Eya orọ, ubọk ntumube, ikeya ke îbokup.

41 “Ogwu uko ìkiwop owuwa ukwuuk uti, mè otap owuwa uti òtitibi otu me ijọn̄, ire, ìkare otutuuk inu îwopbe cha obotibi isibi mgbọ mgbọ isikem, ìkare si otutuuk inu cha erọkọbe itap me ijọn̄ ebetibi ugwun̄ ijọn̄. Ikeya si, ìkare otutuuk ebi ewopbe me linyọn̄ ke ebenyan̄a.”

42 Nnenifọọk ibe, “Ire ejit kwun̄ ibele me lek n̄a, tele ǹtumu ikọ. 43 Ukwuuk uti ogwu uko owopbe ìkpotibi, ire ibot kwun̄ ìkarep me ata mgbọ, ìbojijijaka, mè ikwu, ire ibot irep unye unye. 44 Ogwu ebilene, ogwu owu osabe ubọk kwun̄ irom me mbet kwun̄, ogwu òbọbọkọ lek kwun̄, ogwu owu obakbe me lek kan̄ irom otutuuk inu, ìre owu òrom ọmọ kubọk ukwuuk uti ogwu uko ni? 45 Jei Okumugwem, ogwu òkup me inyọn̄, ìkare ikeya! Wuwọk ubọk me lek ebi kwun̄, mè kaan̄ nsan me lek ìrot kwun̄, mije, îre inu owu orombe ke okikaan̄ nsan me lek.”

46 Okumugwem onenifọọk emi ibe, “Inu òkukup mgbọ keyi ìkup inyi ebi ìkiluk me mgbọ yi; inu òkup me isi ìkup inyi ebi mêlukbe mgbọ ukot keyi isiraka. 47 Owu òkpokọt ima inu emi nrombe igak ike emi mmabe. Owuwa mgbọ, owu òkisa lek kwun̄ itọ me lek ebi ijo irọrọ. Kayaka ìrọ ikeya! 48 Ikerere me lek ikeya, Ogwu Òbebene Ichit ìkitọtọn̄ owu, 49 mije, owu osiki lek ubọk îgbebe; òkafuk lek kwun̄ ìtap me lek ebi ata irọrọ, inyi owu òkaan̄ umin òmimin ichit. 50 Me òta mgbọ, ebi ìluk me linyọn̄ mêbọkọ ujat ujat ufialek bak me lek ugumulek kiban̄ ominbe. 51 Keek lek kwun̄, mè kido inu ofolek umin ebi ata irọrọ ebi ìbet lek kwun̄, 52 mije, îre enyi ke echili Paradais ibook inyi, mè iwop uti eyi ugwem iban, mè inen̄e ukot òkup me isi isun̄ inyi, mè isun̄ owuwa inu ikikpọ, mînanama ama itele, isiki-efuuk òwa okupbe, nnwọn îkukup isan̄a ikikpọ enyi, iriọọn̄-inu ọmọ òwa okupbe. 53 Mîgon ugwun̄ ijọn̄ ijo inu ikam, inyi ikare enyi lek, mîlap orukan̄ ijọn̄ọ ere me lek kinyi, mè ilet mkpa, inyi ikamun̄ enyi; udọn̄-ufuun̄ îlibi ichep, mîwuuk bukubuku; 54 ufieejit îraka; òta kan̄, mîsan̄a inu ubọọn̄ ya, òrere una mkpa, isibi utoon̄. 55 Eya orọ, kayaka ìkpọk ìdo ikọ geege ofolek ikpele otu ifuk ene ebi ìbechechep. 56 Mije, mgbọ irek osibibe inyi ema igogobo, ema ekpọkpọ Ogwu Òbebene Ichit isiki chieen̄, mè igwen Ikan kan̄ urieek, mè ijit ijeje me oniin̄ îbe ema eje. 57 Ògak ge, ema mîjak ebi kan̄, ebi ata irọrọ, ikpukpuku, 58 mè itumu me ejit kiban̄ ibe ke Awaji kpunu, àya, ema mîriọọn̄ ijaan̄ lek ibe ke ema ebekwakwaan̄. 59 Ike inu ntumube ibe môrọ cha okupbe ikikpọ enyi, ikeya si ke urak-ebek mè ujaralek enen̄ebe isun̄ okup ikikpọ ema. Ìkare ejit Ogwu Òbebene Ichit ijijijaka ogwu ebilene geege. 60 Ire, ebi erombe mîkup me lek kiban̄ ififila erieen̄ ogwu òrorom ema, mè ijit ibebe ogwu òneneen̄ ugwem isun̄ iban ema, onirọ. 61 Eya orọ, mgbọ oyerebet n̄a òkijuuk iriaak. 62 Ǹkasa inu yi ìjeen̄ otutuuk ene, ilọ me lek kwun̄ mè ene inen mè inen ìbet lek kwun̄.”

Nnenifọọk ibe, 63 “Jei Okumugwem, owu ojeen̄ emi ikpele owuwa inu ijejeen̄ echi owu oborọ me òta mgbọ, ire, òkajeen̄ emi mgbọ oborọ inu cha.”