3 Mbebe, “Ogwu nte n̄a, tumu ma.”

Ibebe emi, “Îkaan̄ okwaan̄ ile ge esun̄be me ere òwewele enenen, eyi òrọrọ inyi idọk, mè iwele. 4 Ire, oniin̄ kan̄ ìgbagba inwan kubọk ìre okolo. 5 Ire ikaan̄ ebi ìweweek isisi lek okwaan̄ ile ya, isi ikpọ, mè ìre isi ikọp ikana me lek, kpebekọt iraka inin̄ emen kan̄, îtata ekọkọp itibi me ere ògbagba inwan ya. 6 Ofifi inu ijejeen̄ ìre ikeyi: Ama ile ge òwa enamabe me lek òla ijọn̄, eyi ata inu geelek ojotbe emen. 7 Ire, oniin̄ ekisa ije inin̄ ama ya ìgbagba inwan, mè ikup me ngugo ngugo, ukan̄ okup me agan̄ ulom, sà mun̄ ògwugwuuk okup me agan̄ ujit. 8 Sọntiik oniin̄ ge gaalek okup me etete ukan̄ ya melek mun̄ ya, ene ge gaalek obokọt ije iraka me oniin̄ ya mgbọ ge. 9 Ire isa ama ya inyi ene ge me ìrot, ogwu òborie ìrot ya ìbojeje ibọkọ ìrot kan̄ ikaan̄, ilọ me lek ijeje itibi emen unan ya òkukup me isi kan̄.”

10 Mbebe ọmọ, “Ogwu nte, eya ìre ikeya.”

Ibebe emi, “Ikeya si ke uche ebi Ijeren okup. 11 Ǹrom linyọn̄ bak me lek kiban̄. Ire, mgbọ Adam okpakabe otu ikan n̄a, itip-oyerebet orere lek inu geelek erombe cha. 12 Mije keya ke erọ ibe oniin̄ ekije inin̄ linyọn̄ keyi igba inwan, mè ikup ufieejit ufieejit, mè ukwook ukwook. Oniin̄ cha ìre inen mè inen gaalek, mè ire si ijo ijo, mè ikup unan unan, mè ikup ofaak ofaak. 13 Ire, oniin̄ echi ekisa ije inin̄ linyọn̄ òmimin ìwewele, mè ikaan̄ utelelek. Ìkisa ene itap me ugwem eyi kpunube ikwukwu. 14 Eya orọ, îtata ebi ìkup me ògat ugwem ejeje itibi ukwook mè inu ikakaan̄ge ibot, ema kpebekọt ibọkọ inu cha esun̄be iban ema. 15 Eya orọ, keke okisisaak owu, eyi omun̄be ibe ke owu òbochechep? Keke okisisik owu lek, eyi owu omun̄be ibe ke owu òbokwukwu? 16 Ìre keke orọ òkasa ejit kwun̄ ìkikeek inu òkinu, kpan̄asi inu òkukup mgbọ keyi?”

17 Nnenifọọk ibe, “Jei, Ogwu Nte Ogwukaan̄-ene, owu osun̄ me Ikan kwun̄ ibe ke ebi ata irọrọ ebekaan̄ inu chi me ìrot, ire, ke ebi kperiọọn̄ Awaji ebechechieen̄ ita. 18 Eya orọ, ebi ata irọrọ mêkọt ikat ejit ibeme ukwook, ikikpọ chieen̄ ikakaan̄ inu echi mfufet. Ire, ebi ìrọrọ ikpak mîbeme ukwook, ire, kpebemumun̄ si inu echi mfufet cha.”

19 Ibebe emi, “Owu òkare ata ogwu oyerebet ìgak Awaji, òkarọriọọn̄ si inu ìgak Ogwu Òbebene Ichit! 20 Tele inyi owuwa ebi ìkup me ugwem mgbọ keyi echieen̄ eta, eya mônwọn igak ema ikpọkpọ chieen̄ isiki me lek Ikan Awaji otobe ema me isi! 21 Mije, Awaji ìnyinyi ebi ìnu me linyọn̄ yi ida, me mgbọ ema enube, òfo me lek inu ema mêrọbe, inyi ema egat ugwem, mè inu ema mêdabe lek isan̄a me lek, inyi ema enwọnọ osusut. 22 Ire, kpan̄asi ema esikibe ibot, ema ekekitumu ikeme ọmọ, mè ikikaan̄ ekiket ikakaan̄ge ibot inyi lek kiban̄, 23 mè ikitọt inu ikpak mè ofiaan̄ inyi lek kiban̄, mè ikitumu si ibe ke Ogwu Òbebene Ichit ìkakukup, mè ijit oniin̄ kan̄. 24 Ema echachak Ikan kan̄ ochak, mè ijit inyan̄a-ibot kan̄. Kpekeke inye me lek orọmijọn̄ kan̄, kperọrọ si ikwaan̄ îbe ema erọ. 25 Eya orọ, Ejira, inu ukpọk ukpọk emen okup inyi ebi ukpọk ukpọk, sà inu òjot òjot emen okup inyi ebi òjot òjot.

26 “Me atikọ, mgbọ òkinu, mgbọ inu ijejeen̄ ofolek mgbọ òkup me isi ntumube môrọbe iso. Ama ya ekamun̄ge, môkana isibi. Ido ya eyi òlelet, mêmun̄ lek. 27 Ene geelek enyan̄abe isibi me ijo inu cha ntumube ibe mônu, mômun̄ uyeke inu nkirọ. 28 Mije, mêsan̄a gwun̄ n̄a, ogwu Mesaya (òrere ogwu Awaji otọkọbe aran̄ me ibot) mè ebi melek kan̄ isibi. Ebi mêsikbe mênwọọn̄ unwọọn̄ efit acha ini. 29 Acha kecha isiraka, gwun̄ n̄a, ogwu Mesaya ya, môkwu; ebilene geelek ìkifuuk efuuk mêkwaan̄ si. 30 Mgbọ ya, linyọn̄ môkpọk iriaan̄ ere usen jaaba, kubọk îkupbe me adasi adasi mgbọ ya, bene me ibebene. Ene geege ìkposik me ugwem. 31 Usen jaaba isiraka, mêtimi linyọn̄ ya eyi ìkabobolo-nu chieen̄ me ilaak, inu geelek òkijọjọ môjọjọ ichep. 32 Ijọn̄ môsan̄a ebi ìlaak me emen kan̄ isibi, achiaan̄ môsasan̄a ebi ìrariaan̄ ere ikup me emen kan̄ isibi, agwut isun̄-inu môsan̄a si ibot ejit echi esun̄be me emen kiban̄ isibi. 33 Mênenimun̄ Ogwu Òbebene Ichit okupbe me inyọn̄ ogboon̄ oyerebet, itoto ene njijin môraka, ikakaan̄ ukarajit ìkpokukup. 34 Oyerebet gaalek obosik, atikọ môkeke, igbegbe utoon̄-ejit môkeke inye. 35 Use òkigọọk ata ubọk ikwaan̄ môkekinu, mkpukpe môkekisibi utoon̄; ata irọrọ mônanan̄a ikeke, ijo irọrọ ìkpolalaak kubọk ge. 36 Udọn̄ ujaralek môwọwọọk isibi, usaba agan̄ kan̄ môre ere isiki-efuuk; mêsasan̄a ukan̄ ama yọk isibi, usaba agan̄ kan̄ môre Paradais ere ubelejit. 37 Ogwu Òbebene Ichit mônenitumu inyi ido echi ejomobe me mkpa ibe, ‘Mgbọ keyi, ìkpọ-nu, mè ìgobo ìtet ogwu enyi ejitbe, ogwu enyi kpesi ikwaan̄ inyi, ogwu enyi ekpọbe Ikan kan̄ chieen̄ isiki. 38 Ìkpọ-nu me agan̄ keyi mè agan̄ keyilọ. Agan̄ keyi ìre ubelejit mè isiki-efuuk, sà agan̄ keyilọ ore ukan̄ mè ujaralek.’ Ikeyi ke Awaji obotumu inyi ema me usen oyerebet. 39 Usen ya ìkakaan̄ ura, mè ìre onyan̄, mè ìre ntoronyan̄. 40 Ìkakaan̄ oduku inyọn̄, mè ìre nsook-isinyọn̄, mè ìre omumen-inyọn̄, mè ìre efet òkiwuwut, mè ìre mun̄, mè ìre efet ebekifuuk, mè ìre udun, mè ìre ikakwun̄, mè ìre ewelegwe. 41 Ìkakaan̄ mgbọ ura, mè ìre otu ura, mè ìre uyok, mè ìre mgbọ utọọk, mè ìre senesene ibot mun̄ ewuuk, mè ìre ofiik, mè ìre ibot mgbọlọ, mè ìre ibot, mè ìre mbat. 42 Ìkakaan̄ ikarek, mè ìre eririeen̄, mè ìre obum egwe, mè ìre inu òkitoon̄, mè ìre ere òtotoon̄, mè ìre utoon̄, îtata uja eyi ujamgbugbo Ogwu Òbebene Ichit gaalek, eyi otutuuk ene mêsabe imọọn̄ inu edọmọbe isun̄ iban ema. 43 Môkup iso nde ge, eyi òbokup kubọk ìre acha acha. 44 Oyerebet n̄a ire eya, onineen̄ kan̄ ìboje ikeya si. Owu gaalek ke nchili inu chi ijeen̄.”

45 Emi nnenifọọk ibe, “Jei Ogwu Nte Ogwukaan̄-ene, nra itutumu, mâkpọk itumu si: Ugbana môkup inyi ebi ìkup me ugwem, mè ikisun̄ ikan kwun̄!

46 “Ire, sà ebi nriaakbe uriaak me ibot cha ye? Mije, ìre ekene me etete ebi ìluk ugwem ore ogwu ikajege ìlọ? Sà ìre ekene me etete ebilene ikajege ìlọ me lek inyan̄a-ibot kwun̄? 47 Inu mmun̄be ìre ke linyọn̄ òbonu ìbosa unwọọn̄ ijet ene inen mè inen gaalek, mè isa ujaralek ijet owuwa ene. 48 Mije, ejit ikpak îtibi isibi me emen kiji, mè isan̄a eji isan̄a me lek Awaji, mè isa eji initap me emen bukubuku ugwem mè oniin̄ mkpa, mè ijeen̄ eji oniin̄ eyi ichep, mè ida eji isan̄a ijọn̄ọ ere me lek ugwem. Ìkare ene inen mè inen gaalek ke inu yi otobo, ire, sọntiik osik mokpulu otutuuk ebi erombe isan̄a kpai.”

49 Ifọfọọk emi ibe, “Ejira, gban̄ utọn̄ nyi emi, mâteme owu nteme, mè ikpọk ikan̄ inu inyi owu. 50 Mije keyi, Ogwu Òbebene Ichit ìkarom linyọn̄ ge, ire, ìrom linyọn̄ iba. 51 Eyi owu obebe ke ebi ata irọrọ kpewa, ke ìre ene inen mè inen gaalek, ire, ke ìre ebi kperiọọn̄ Awaji ewa, gban̄ inu òrọrọ îkupbe ikeyi.

52 “Ire okaan̄ ewuuk unye otu ewe inen mè inen gaalek, ìre owu môtap oporolo mè arika igbaalek, inyi iwa?”

53 Mbebe ọmọ, “Okumugwem, ìbojeje ire ikeya?”

54 Ọmọ oyayaka ibe emi, “Ìkare eya gaalek. Do-nu ijọn̄, ke môtumu inyi owu; tumu nyi, ke môkpa inyi owu. 55 Tumu nyi ibe, ‘Owu okisan̄a alata araran̄ mè alata okuket mè ekwe isibi, mè ikisan̄a si okwukwut mè oporolo mè arika isibi. 56 Ire, alata okuket owa igak alata araran̄, sà ekwe owa igak alata okuket, okwukwut owawa igak ekwe, oporolo owawa igak okwukwut, arika owawa igak oporolo.’ 57 Eya orọ, owu tumu-nu, inu echi owa okup me unye otu ewe, mè ire si echi ekiweek? Ìre echi òwawa, sà ìre echi ònanan?”

58 Mbebe, “Jei, Ogwu Nte Ogwukaan̄-ene, inu echi owuwa ìre mfe ewe, echi ònanan ore echi unye otu ewe.”

59 Ifọfọọk emi ibe, “Tọ-nu inu okeekbe me lek kwun̄ kpọ, mije, ogwu òkaan̄ inu òkiyọyọt ikakaan̄ okibele ejit igak ogwu òkaan̄ inu òwawa ijot ere. 60 Ikeya ke oyerebet nchieekbe use obokup. Mânwọọn̄ unwọọn̄ me ibot ene inen mè inen ebi mênyan̄abe, mije, îre ema erọ inyi ujamgbugbo n̄a ikeke inye mgbọ keyi; sa me lek kiban̄ si ke emin erieen̄ n̄a. 61 M̀kpafieek ejit me ibot ikpele otu ifuk ebi ìbechechieen̄ cha, mije, ema kpere inu geege igak oruk, ema si ebet lek alọm ukan̄ mè oduku. Ema ekitet ukan̄, mè èkesak unye unye, mè èniin̄ èta.”

62 Nnenitumu inyi ijọn̄ ibe, “Jei, ijọn̄, keke ke oman isibi, ire ke ìre mfuun̄ ijọn̄ ke esa irom ekikeek ene, kubọk inu kechilọ erombe? 63 Mije, kè ònwọn ire kpememaman mfuun̄ ijọn̄ me lek kan̄, ufuna kpemerom ekikeek ene inan̄a me lek kan̄. 64 Ire, ekikeek melek kiji ekigbagbaan̄ itibi isibi, eji ekekibọkọ ujaralek, mè ikichieen̄ ita, mè iriọọn̄ si ibe ke ìre ọmọ orọ ibe eji echieen̄ eta. 65 Kè ebilene efieek ejit, mè ebi kè anam oron ebele ejit. Kè otutuuk ebilene ekup me ufieejit, ire, kè ebi kè anam ukot ini mè ebi kè anam uwu enwọọn̄ unwọọn̄! 66 Mije, înwọn me lek kiban̄ igak eji. Ema kpekpọ chieen̄ ibe ke oyerebet mônu inyi ema, kperiọọn̄ ujaralek mè ire unyan̄a geege echieekbe ema use ibe ke mônu mgbọ ugwem keyi isiraka. 67 Mọmọ oruru isusun̄ eji me ugwem, mè ininyi eji ujaralek me nnaan̄? 68 Mije, otutuuk ebi emanbe mîfufuku me nrọ-nlọ, mè ijot me ijo inu, mè ikup me irak ukwook eyi nje-nlọ. 69 Ire ibe ke oyerebet ìkpokup me mgbọ mkpa isiraka, eya kè ònwọn eji me lek.”

70 Uriyen, ogwu osat, onenifọọk emi ibe, “Mgbọ Ogwu Òbebene Ichit orombe linyọn̄ mè Adam mè otutuuk owot iman kan̄, ìdadasi inen̄e oyerebet mè inu geelek ògbaan̄ me lek oyerebet isun̄. 71 Ire, sa me lek ikọ kwun̄ gobo tet, mije, owu òbe ke ekikeek ìgọọk ebilene igbaan̄ itibi isibi. 72 Eya orọ, ebi ìluk me linyọn̄ mêbọkọ ujaralek mije keya. Bak me lek, ema mîkaan̄ ngobo-ntet, ire, mè ije ilọ; mîbọkọ nteme, ire, kpesun̄; mîbọkọ Ikan, ire, kpekọt ikeke inye me lek inu ema ebọkọbe ya. 73 Keke ke ema ebetumu me usen oyerebet? Sà ìre keke ke ema ebefọọk me òta mgbọ? 74 Kpọ ujọn̄ọ mgbọ Ogwu Òbebene Ichit osabe ikaan̄ ime me lek ebi linyọn̄ ire! Ìkare bak me lek kiban̄, ire, îre mije mgbọ eyi îwuwuuk lek idọmọ isun̄ itele.”

75 Mfọfọọk ibe, “Ire obele ejit me lek n̄a, jei Okumugwem, jeen̄ emi, ogwu ikwaan̄ kwun̄, eyiyi si: Mgbọ mkpa, mgbọ eji isiyaka ibot ejit kiji inyi me ere înan̄abe, ìre mêsun̄ eji, inyi eji ekup eketap efuuk ekpọ mgbọ owu môrombe aya inyọn̄, sà ìre eji mêbọkọ ujaralek mgbọ yaage?”

76 Ifọfọọk emi ibe, “Mâjeen̄ owu eya si. Ire, kafuk lek kwun̄ ìtap me otu ifuk ebi ìkirọ ochak, kasasa lek kwun̄ ìgbaan̄ me lek ebi mênyibe ujaralek. 77 Mije, ikwaan̄ kwun̄ òwa esun̄be kubọk inu ubọọn̄ inyi owu me ubọk Ogwu Òbebene Ichit. Ire, kpebesa owu ijeen̄, mege òta mgbọ òre. 78 Ijejeen̄ òfo me lek mkpa ìre ikeyi: Mgbọ Ogwu Òbebene Ichit isinyi ida ibe ene ikwu, ike ibot ejit ene ya okitele akpalek igwu ikom isi lek ogwu ònyinyi, môdasi itọbọ ebum inyi ujamgbugbo eyi Ogwu Òbebene Ichit. 79 Ire ibot ejit ya ire ge me lek ebi ìchachak oniin̄ Ogwu Òbebene Ichit ochak, mè ijit igọgọọk oniin̄ ya, mè ire si ogwu òkpọkpọ Ikan kan̄ isiki chieen̄, mè icha ebi ìkitet ukpook Awaji, 80 ojelek ekwukwu kecha ìkponin̄ ere nluk. Ire, ìbobene mgbọ yaage ikijijen̄e ikana me emen ujaralek, mè ikifieek ejit, mè ikitọ lek mgbọ geelek me oniin̄ jaaba. 81 Adasi oniin̄ ìre mije ke ema mîsa Ikan Ogwu Òbebene Ichit irọ inu ochak. 82 Òso oniin̄ iba ìre mije ke ema kpebekọt igwu ikom ijaan̄ me ijo inu kiban̄, inyi ema eluk ugwem. 83 Òso oniin̄ ita ìre mije ke ema mêmun̄ mkpukpe esun̄be iban ebi ìtotoon̄ ejit me lek inyan̄a-ibot Ogwu Òbebene Ichit. 84 Òso oniin̄ ini ìre mije ke ema mêkeek ekiket ofolek ujaralek esun̄be iban ema me òta usen. 85 Òso oniin̄ go ìre mije ke ema mêmun̄ ebi osat ekibem ere ebilọ elukbe, me kpunube okput geege. 86 Òso oniin̄ gweregwen ìre mije ke ema mêmun̄ ibe ke ema mîsaba inin̄ emen ujaralek. 87 Òso oniin̄ jaaba, eyi òfefieek ichit me lek otutuuk oniin̄ egobe cha, ìre mije ke wọlọwọlọ môjijaka ema isan̄a kpai, esip môchichit ema isi bùk, ema mêjejet ita mije ukpook, me mgbọ ema isimun̄ ujamgbugbo Ogwu Òbebene Ichit, ogwu ema erọbe ijo inu mgbọ ema ekupbe me ògat ugwem, ogwu ebesibi ema oyerebet me ibot me isi kan̄ me òta mgbọ.

88 “Òfo me lek ebi ìjeje me oniin̄ Ogwu Òbebene Ichit obe eje, isisan̄a ema isan̄a me anam akpalek òkikwukwu, onineen̄ kiban̄ ìre ikeyi: 89 Mgbọ ema elukbe me linyọn̄, ema mîchieek mkpa ikisi ikwaan̄ inyi Ogwu Òbebene Ichit, mè ikikeke ida unan mgbọ geelek, inyi ema eriọọn̄ ubọk esun̄ Ikan ogwu Ònyi Ikan ejaan̄ lek. 90 Eya orọ, ijejeen̄ ofolek kiban̄ ìre ikeyi: 91 Adasi kan̄, ema mêsa me ikpele unwọọn̄ imun̄ ujamgbugbo ogwu òbọbọkọ ema itap, mije, ema mêkaan̄ isiki-efuuk me onineen̄ jaaba. 92 Adasi onineen̄ ìre mije ke ema mîtap efuuk enenen, mè itim ikpan̄ ijo ekiket ya ema esabe iniman, inyi ikasa ema ìje ìlọ oniin̄ ìnan̄a me ugwem ìsi ìnin̄ me mkpa. 93 Onineen̄ òso iba ìre mije ke ema mîmun̄ saasaak eyi ibot ejit ebi kperiọọn̄ Awaji okinyinya ikana me emen, mè imun̄ si osusut òkukup ikikpọ ebiba. 94 Onineen̄ òso ita ìre mije ke ema mîmun̄ ata-ikọ eyi Ogwu Òrorom ema okekebe me ibot kiban̄ ibe, me otutuuk ugwem kiban̄, ke ema mîsun̄ Ikan enyibe ibe ema ekpọ chieen̄ me lek. 95 Onineen̄ òso ini ìre mije ke ema mîgobo isiki-efuuk ema ekaan̄be mgbọ keyi itet, eyi etaakbe ema me agwut kiban̄, echi ebi osat ekibem me kpunube okput geege, mè igobo si itet umin òkup inyi ema me òta mgbọ. 96 Onineen̄ òso go ìre mije ke ema ekinwọọn̄ unwọọn̄ ibe ke ema mînwọnọ inu òbojọjọ, mè ikaan̄ inu òbonu me isi me ìrot; ema mîmun̄ si ufialek mè ukwook eyi enyan̄abe ema isibi me emen; mè imun̄ si ugwem utelelek, eyi inu geege ìkpofifinibe ema, eyi ema ebebọkọ mè ikinwọọn̄ mege ire mgbọ geelek, me ekakwuge. 97 Onineen̄ òso gweregwen ìre mgbọ ejeen̄be ema ike isi kiban̄ obokitoon̄ kubọk ura, mè ike mêrọbe ibe ema ekup kubọk utoon̄ ntoronyan̄, mè ekajọjọ bene me mgbọ yi nyi isi. 98 Onineen̄ òso jaaba, eyi òmimin igak otutuuk echi egobe cha, ìre mije ke ema mênye ejit inwọọn̄ unwọọn̄, mè ikaan̄ òjot òjot ikpọchieen̄ eyi kpunube wọlọwọlọ me emen, mè ibele ejit me kpebetet ukpook, bak me lek ema mîtet lek inye imumun̄ isi mè isi melek ogwu ema esibe ikwaan̄ inyi me ògat ugwem kiban̄, mè ogwu ema mêbọkọbe mkpukpe me ubọk mgbọ isinyi ema umin. 99 Eyiyi ore onineen̄ òkup inyi ibot ejit ebi ata irọrọ, ike etumube bene me mgbọ keyi. Echi etumube iraka ore oniin̄ ujaralek eyi ebi kpegban̄ utọn̄ mêbọkọbe mgbọ mgbọ keyi isiraka.”

100 Emi nnenifọọk ibe, “Ìre mênyi ibot ejit, echi echebe isan̄a me lek akpalek, mgbọ, inyi ema emun̄ inu chi okpabe ijeen̄ emi ni?”

101 Ifọfọọk ibe, “Mênyi ema utelelek usen jaaba. Me emen usen jaaba cha, ema mêmun̄ inu ekpabe inyi owu, òta me ubọk, mêgbagbaan̄ ema isi itaak me ere ema ebekup.”

102 Nnenifọọk ibe, “Ire ejit kwun̄ ibele me lek n̄a, jeen̄ emi, ogwu ikwaan̄ kwun̄, inu keyi gbaalek-nu: Me usen oyerebet ya, ìre ebi ata irọrọ mêkọt ibeek mbeek me ibot ebi kperiọọn̄ Awaji, sà ìre mêkọt iriaak Ogwu Òbebene Ichit ibe ito ema nsan? 103 Ìre ebi ute mêkọt ibeek mbeek me ibot bọn, mè bọn èbeek mbeek me ibot ebi ute, mè ebi ngwan̄ èbeek me ibot ebi ngwan̄, mè bọn ulọk èbeek me ibot ebi ulọk kiban̄, mè ebi unene èbeek me ibot ebi ema emabe enenen?”

104 Ogwu osat ya ofọfọọk emi ibe, “Eyi ejit n̄a obebele me lek kwun̄, mâjeen̄ owu eyi si igbaalek. Usen oyerebet ìre usen inu geelek obofieek, usen keya ke ebesa iman̄ oriọọn̄ eyi atikọ ijeen̄ otutuuk ene. Me mgbọ keyi, ute ìkakiria gwun̄, gwun̄ ìkakiria ute, nte uwu ìkakiria gwun̄ uwu, unene ìkakiria ata unene kan̄, ibe irọn̄ orukan̄, mè ìre ibe ilaak, mè ìre ibe irie inorie, mè ìre ibe lek inye, me useen̄ kan̄. 105 Ikeya si, ene geege ìkporariaak uriaak me ibot ofifi ene me usen ya, kpukpunu si ogwu òboben akpan kan̄ itoon̄ ofifi ene. Mgbọ ya, ene geelek ìbobeme akpan eyi kan̄, mè ìre akpan ata irọrọ, mè ìre akpan ijo irọrọ.”

106 Nnenifọọk ibe, “Ire ikeya, eji ejeje inu inimun̄ ibe ke Ebereyam îdasi iriaak uriaak me ibot ebi Sodọm, Mosis orariaak si me ibot ebi nte nte kiji ebi ìrọrọ ijo inu me emen èwê? 107 Josuwa, ogwu ògọgọọk Mosis me udun̄, îriaak si me ibot ebi Ijeren me ukot kè Ekan. 108 Samien îriaak si me ibot ebi Ijeren me ukot kè Sọọlu; Debit îriaak si me ibot ebi Ijeren mgbọ ijo orukan̄ onube; Solomọn orariaak me ibot kiban̄ mgbọ ekigbana Uwu Mbuban. 109 Ilaija îriaak me ibot ebi Ijeren ibe ibot irep, mè iriaak si me ibot ogwu òkwukwu, inyi ijomo. 110 Ejikaya îriaak si me ibot ido Ijeren me ukot kè Senakerip, owuwa ofifi ebi ene erariaak me ibot owuwa ene. Ìjeje ire ikeya ni? 111 Eya orọ, ire mgbọ keyi, eyi bukubuku ominbe, ijo irọrọ owabe, ebi ata irọrọ mîriaak uriaak me ibot ebi kperiọọn̄ Awaji, keke oborọ ibe ìkpore ikeya me mgbọ keya ni?”

112 Ifọfọọk ibe, “Linyọn̄ keyi ìkare òta kan̄. Òjot òjot ujamgbugbo Awaji ìkakup me linyọn̄ keyi. Eya orọ, ebi ìnyenye lek eriaakbe uriaak me ibot ebi kpenye lek. 113 Ire, usen oyerebet obore itata eyi ukot keyi, mè ire si ibebene ukot òkinu me isi, eyi ikwukwu mkpa ìkpoyaka ikup. Me ukot keya, bukubuku îraka, 114 itatap lek me ijo inu môta, mêfieek una ichechieek isan̄a, ata irọrọ môwa ijot, atikọ môsisibi utoon̄. 115 Eya orọ, kpunu ogwu òbokọt ikaan̄ nsan me lek ogwu oyerebet otipbe, mè ìre isak unan me lek ogwu oyerebet onwọnbe.”

116 Nnenifọọk ibe, “Eyi ore adasi mè òta otu mbatap: Kè ònwọn ibe ijọn̄ ìkasan̄a Adam ìsibi, mè ìyaka ire, mgbọ îsan̄abe ọmọ isibi, kè ekwek ọmọ, inyi ikarọ ijo inu. 117 Kpasi oruru ke otutuuk ene ekaan̄, ibe ke ema mêluk me ufieejit mgbọ keyi, mè ikikpọ si chieen̄ ikakaan̄ osusut mgbọ ema isikwu? 118 Jei Adam, keke ke orọ ikeyi? Ubọk geelek ibe ke ìre owu orọ ijo inu, irọn̄ ògọgọọk ìkayaka ìkup ìnyi owu gaalek. Ire, îre si eji ebi owot iman kwun̄ lek. 119 Mọmọ oruru eyi kiji, ire ke mîchieek eji use ibe ke ikwukwu mkpa ìkpokup inyi eji, ire, eji enenirọ irọrọ eyi òbosa mkpa inu? 120 Mọmọ oruru echieekbe eji use ibe ke eji mêkaan̄ ikpọchieen̄ eyi kpotabe, ire, eji enanan̄a irọn̄ welewelewele? 121 Mọmọ oruru echieekbe eji use ibe ke mîsun̄ ere utelelek mè unye-lek iban eji, ire, eji eluluk ugwem ikpak ikpak? 122 Mọmọ oruru echieekbe eji use ibe ke ujamgbugbo Ogwu Òbebene Ichit môbem ebi ìluk ugwem òtatana, ire, eji erọrọ inu ikpak echi òfefieek ichit? 123 Mọmọ oruru echieekbe eji use ibe ke Paradais òwa mêsan̄abe ijeen̄ ene, eyi mfut kan̄ kpojọbe, ere ata inu ojotbe gbak, ere igwagwa okupbe, ire, eji kpebenin̄; 124 mije, eji elukbe ugwem ijo inu me linyọn̄ keyi? 125 Mọmọ oruru echieekbe eji use ibe ke isi ebi geelek ìkọkọt itet lek ikaan̄ môtoon̄ kubọk ntoronyan̄, ire, isi echi kiji mônenifit igak udun? 126 Mije, mgbọ eji ekupbe me ògat ugwem, mè ikirọ nlilọ inu, eji kpekeek ufialek eji mêbọkọbe mgbọ eji isikwu.”

127 Ifọfọọk emi ibe, “Eyiyi ore ibot ibot akọn̄ ya ebi emanbe me linyọn̄ ebetim: 128 Ire itim ikpan̄ ema, ema mêbọkọ ufialek owu otumube. Ire, ire ema itim ikpan̄, ema mêbọkọ mkpukpe emi ntumube. 129 Mije, oniin̄ ya ire eyi, eyi Mosis otumube inyi ebi ene, mgbọ îkupbe me ugwem, ibe, ‘Gobo ugwem nyi lek kwun̄, inyi owu òluk ugwem!’ 130 Ire, ema kpechieek ikọ kan̄, mè ìre eyi ebi nriran ìnu me udun̄ kan̄, mè ikerere eyi n̄a, emi ogwu òtutumu si ikọ inyi ema. 131 Eya orọ, kpebekọt isa ufieejit òbokup mgbọ isijijaka ema, itọ me lek ikpele ikpele unwọọn̄ òbokup mije ebi enyan̄abe.”

132 Emi nnenifọọk ibe, “Ogwu nte, emi nriọọn̄ ibe ke ekigwen Ogwu Òbebene Ichit ogwu nsan, mije, îkaan̄ nsan me lek ebi kpemaman-nu itap me linyọn̄. 133 Ekigwen ọmọ ogwu ata ejit, mije, îkaan̄ ata ejit me lek ebi ìgwugwu ikom isibi me ijo inu inu me lek Ikan kan̄. 134 Ekigwen ọmọ ogwu ukarajit, mije, îkaan̄ ukarajit me lek ebi ìrọrọ ijo inu, bak me lek ọmọ orom ema. 135 Ekigwen ọmọ ogwu nnwọn, mije, ìkinyinyi igak ike îkibọkọ. 136 Îjot me njijin, mije, njijin kan̄ îwa me lek ebi ìkup me ugwem, mè ebi ìkwakwaan̄, mè ebi ìbenunu. 137 Mije, ire ìkakaan̄ njijin ìwa ikeya, linyọn̄ mè ebi ìkiluk me emen kpemekaan̄ ugwem. 138 Ekigwen ọmọ ogwu òkinyi inyinyi, mije, ire ìkanyi nnwọn kan̄, inyi ebi ìrọrọ nlilọ inu enwọnọ nrọ-nlọ kiban̄, kpunu ogwu mogat ugwem, ikerere ge me emen akọp obop me lek ebilene. 139 Ekigwen si ọmọ ogwu oyerebet, mije, ire ìkatele ìnyi ebi îsabe ikọ kan̄ irom, mè ìtutuku urum ijo inu ema erọbe ìsan̄a, 140 usini mgbọ, kè more ibot ene inen mè inen gaalek me lek urum ene ekariọọn̄ge otu ifuk cha menisik me ògat ugwem.”