6
Ibebe emi, “Bene me mgbọ nkat linyọn̄ obenebe, sabum otunchit echi linyọn̄ onikukup, sabum ebi kè efet enitititiin̄ ikiwut, 2 sabum nsook-isinyọn̄ onibene ikisook, sabum omumen inyọn̄ onibene ikikebe, sabum enitọtọbọ ọdọ Paradais, 3 sabum enikimun̄ ujuja ajakajak, sabum unye òkijibi inu ije onibọkọ irek, sabum enititiin̄ urum ebi osat kperiọọn̄ otu ifuk, 4 sabum enitap efet ijot ubene ere efet okire, sabum akpabin onikaan̄ erieen̄ ike edọmọbe isun̄, sabum ebon ogoon̄ Sayọn onikeke ikam, 5 sabum enikifuk acha ekifuk chi, sabum ekiket ebi ìrọrọ ijo inu mgbọ keyi oninan̄a itele Awaji, sabum enigon iman̄ òriọọn̄ Awaji me lek ebi ìtititiin̄ inu ubọọn̄ eyi ichechieek isun̄, 6 mgbọ ya ke ndọmọ inu chi, mè irom ema me lek n̄a gaalek, ǹkarom ìtibi ofifi ene geege. Ikeya si, òta mgbọ ìboje me ubọk n̄a inu, ìkpoje me ubọk ofifi ene.”Icheche mgbọ
7 Mfọfọọk ibe, “Mọmọ ubọk ebeche mgbọ? Sà ìre mgbọ owa ke ukot eyi adasi obota, mè ukot eyi òbogọọk ibene?”
8 Ibebe emi, “Ìbene me lek kè Ebereyam ire lek kè Ajiki, mije, ọmọ obon Jekọp mè Isọ, bak me lek, ubọk kè Jekọp ìtetet ebek ukot kè Isọ bene me ibebene. 9 Isọ ore òta ukot keyi, sà Jekọp ore ibebene ukot ògọgọọk. 10 Ene ìbene me lek ubọk, mè ita me lek ebek ukot. Otutuuk inu ene orebe ìkup me etete ebek ukot melek ubọk. Ejira, kayaka ìweek irọriọọn̄ ofifi inu igak ikeya!”
Ofifi inu echi ebesa iriọọn̄ òta mgbọ
11 Mfọfọọk si ibe, “Jei Ogwu Nte Ogwukaan̄-ene, ire ejit kwun̄ ibele me lek n̄a, 12 jeen̄ emi, ogwu ikwaan̄ kwun̄, mgburudun̄ ijejeen̄ kwun̄ echi ojeen̄be emi okpọkọ me lek me eririeen̄ iyakwut.”
13 Ifọfọọk emi ibe, “Nan̄a keke me ukot kwun̄, owu mônọ ida ge ònyenye okikput. 14 Ire ere okekebe isisik enenen, 15 me mgbọ ida ya okitumu ikọ, katet ukpook, mije, ikọ ya ìre ikọ ofolek òta mgbọ. Ọdọ cha òkibeme linyọn̄ môgobo itet 16 ibe ke ikọ ya ìgbaan̄ me lek kiban̄. Ema mêran, mè inyinyọn̄ọ, mije, ema mîriọọn̄ ibe ke mênwene òta mgbọ kiban̄.”
17 Mgbọ nnọbe ikọ yi, nnanan̄a ikeke ikeke me ukot, mè igban̄. Ida ge okekitumu ikọ, ida ya ìkitaan̄ kubọk agbugbuk, 18 ikibe, “Usen òkikpat igbet, mgbọ mâjuukbe lek igbet inichichini ebi ìluk me linyọn̄, 19 mè inikpe mkpukpe inyi ebi ìkisa inu ikpak kiban̄ itap ebi ofifi ene unan me lek. Mgbọ ya ke esip òkitet Sayọn obota. 20 Mgbọ ya si ke ebegon iman̄ oriọọn̄ me ukot eyi òboraraka ya. Mgbọ ya, emi mânenijeen̄ inu ijejeen̄ kechi: Mêchili owuwa ikpa oyerebet ibook me isi akpabin inyọn̄, otutuuk ene mêgbagbaan̄ imun̄ oyerebet n̄a. 21 Asa nsabọn acha ge mêtumu ikọ me ida kiban̄, ebi nwa-owot mêmaan̄ bọn owot onyan̄ ita mè onyan̄ ini me ugeen̄, mè bọn cha egat ugwem, mè èkejop okwa ekana ere. 22 Chit chieen̄ mè bolo, uko ewopbe inu me emen môkana eyi kpewowop, mè uwu isun̄-inu etapbe inu ijot gbak okana ukpọk emen. 23 Otita môtaan̄ ida unye unye me nriki, otutuuk ene mênọnọ, uga ukpook môtetet ema. 24 Me mgbọ ya, unene môtim akọn̄ me lek unene, kubọk ema ìre ochicha; uga ukpook môtetet linyọn̄ mè ebi ìluk me lek kan̄. Ibot mun̄ ogbuuruk geelek môkeke; otuuk kè mbubak mgbọ ita, mun̄ geege ìkpogbuk isibi me emen kiban̄.
25 “Ebi geelek mêsikbe mgbọ otutuuk inu chi geelek ntumube inyi owu môborọ iraka, ebiba ke mênyan̄a. Ema mêmumun̄ unyan̄a n̄a, mè imun̄ si òta linyọn̄. 26 Ema mêmumun̄ ebi ebenbe ifo emen inyọn̄, ebi kpekwu mkpa akarake emanbe ema. Awaji mônwenwene ejit ebi linyọn̄, mè ikana itap me esese erumun̄. 27 Mêsan̄a ijo inu isan̄a, ofiaan̄ môchechep. 28 Ikekeke inye me lek Awaji obojot ere; mêtim ikpan̄ bukubuku ugwem. Atikọ, eyi ikakọtge ìto mfut akarake ujọn̄ọ ujọn̄ọ mgbọ ya, mêrọ ibe isibi utoon̄.”
Òta ilaak ọkpọchieen̄ eyi òso iba
29 Mgbọ îkitumu ikọ melek n̄a, ijọn̄ ere nkekebe obebene ikisisik sọntiik sọntiik. 30 Inenitumu inyi emi ibe, “Ǹnu inenijeen̄ owu inu chi me eririeen̄ yi. 31 Eya orọ, ire owu môkpọk iriaak uriaak, mè ikpọk ijin otu usen jaaba, mâtumu inu òmimin igak echichi inyi owu, 32 mije, ida kwun̄ îre utọn̄ Ogwu Òbebene Ichit, bak me lek, Awaji Ogwu Òkaan̄ Unye îmun̄ ibe ke owu òkekeke itat, mè ikiluk ugwem òtatana bene me ijija kwun̄. 33 Eya orọ, îriabe emi ibe ǹnenjeen̄ owu otutuuk inu kechi, mè ǹtumu nnyi owu ibe: ‘Chieek, mè katet ukpook! 34 Karan lek ìkeek ekiket ikakaan̄ge ibot òfo me lek mgbọ òraraka, inyi owu okaran lek ìrọ inu me òta mgbọ.’ ”
Ilaak ọkpọchieen̄ eyi òso ita
35 Mgbọ eyi orakabe, mkpọkpọk ito ito, mè ijin otu usen jaaba, kubọk mwuukbe lek irọ, inyi iso nde ita eyi efieekbe inyi emi. 36 Me òso eririeen̄ jeeta, ejit n̄a okpọkpọk ibene ikisisaak emi, mbebene ikitumu ikọ me isi Ogwu Òbebene Ichit. 37 Ekwukwu n̄a ojijibi ibene, ibot ejit n̄a okukup me ujaralek.
38 Mbebe, “Jei Okumugwem, owu otumu ikọ me mgbọ obenebe irom inu. Me adasi usen owu òtumu ibe, ‘Kè erom inyọn̄ mè ijọn̄!’ Ikọ kwun̄ orọrọ si ikwaan̄ ya iso. 39 Ekwukwu kwun̄ okekiwulu ikana, udun ochichit inu geelek, ere orariaan̄, kpunu okput geege. Ida amọn ogwu ebilene geege ìkakup-nu mgbọ ya. 40 Owu oneninyi ida ibe esan̄a ntat ura ge esibi me agwut ere osun̄be, inyi emọọn̄ ikwaan̄ kwun̄.
41 “Òso usen iba, owu ororom ekwukwu akpabin inyọn̄, mè inyi ida ibe iche mun̄, mè ida agan̄ ge ibọkọ me lek agan̄ keyilọ, inyi agan̄ ge ijibi ifo inyọn̄, mè agan̄ ge keyilọ ikup me agan̄ irak.
42 “Òso usen ita, owu onyinyi ida ibe mun̄ igbaan̄ lek kan̄ ititiin̄ me okpọkọ irek ge me etete irek jaaba eyi linyọn̄. Irek gweregwen ke owu osun̄ nchat, inyi mêkọt ikigbọ usini ere cha isa iwop uko, mè ikisa iwop si ofifi inu geelek isa ikirọ ikwaan̄ inyi owu. 43 Ikọ kwun̄ ojeje, ikwaan̄ otata mgbọ yaage. 44 Mgbọ yaage mfut osisibi iwa kpunu okputut, mè ikaan̄ esese esese utop kiban̄, mè kpa chieen̄ kpa chieen̄ ajakajak òkidun̄u utop olu kpebekọt ikpa. Echi ke erom me òso usen ita.
45 “Me òso usen ini, owu onyinyi ida ibe utoon̄ eyi ura, mè utoon̄ eyi onyan̄, mè ebi kè ntoronyan̄ me onineen̄ me onineen̄ esibi ekup; 46 mè inyi si ida ibe ema erọ ikwaan̄ enyi ogwu ebilene, ogwu owu oborom.
47 “Me òso usen go, owu onyinyi irek ge me irek jaaba ya, ere mun̄ ogbaan̄be ititiin̄, ida ibe isan̄a inu òkifuuk efuuk ugwem, òrere ebi kè unọn mè ebi kè irin̄, isibi. Irọrọ si ikeya. 48 Mun̄ òrere mbuuk, ìkakakaan̄ si ugwem, osasan̄a inu òkifuuk efuuk ugwem isibi, kubọk etọbe inyi, ufuna ebi ido geelek mêtumu uyeke ikwaan̄ kwun̄ isibi.
49 “Owu onenisun̄ inu iba òkifuuk efuuk ugwem, erieen̄ ge ore nririe, sà erieen̄ keyilọ ore mgbugbo anam ejit okwaan̄. 50 Owu odada ge ibọkọ me lek ge, mije, irek ge me lek irek jaaba ya, eyi mun̄ ogbaan̄be ititiin̄ ìkakọt ìben ema anam iba cha. 51 Owu onyinyi nririe agan̄ ge me lek okpọkọ eyi òchachiaak me òso usen ita ya, ere obop obop ogoon̄ ojotbe, ibe iluk. 52 Ire, mgbugbo anam ejit okwaan̄ ya ke onyi okpọkọ òso jaaba, agan̄ mun̄ mun̄ ya, mè isun̄ ema inyi ebi ìneneme owu ibe etaka, me mgbọ òneneme owu.
53 “Me òso usen gweregwen, owu onyinyi ijọn̄ ida ibe isan̄a anam uwu mè anam oron, mè inu geelek òkinyinyọnọ isibi. 54 Owu onenisa Adam ito me ibot inu chi geelek ibe ikikpulu otutuuk ikwaan̄ owu orọbe. Îre me lek kan̄ ke otutuuk kiji, ebi owu ogobobe inyi lek kwun̄, enan̄a isibi.
Keke orọ ebi eyi Awaji ekibọkọ ufialek?
55 “Jei Okumugwem, ǹkitumu otutuuk inu yi me isi kwun̄, mije, owu otumube ibe ke îre bak me lek kiji ke orom linyọn̄. 56 Òfo me lek ebi ido kechilọ ebi ìnan̄a si me owot iman kè Adam isibi, owu òbe ke ebiba kpekup me lek inu geege, ke ema ekup kubọk sọntiik ataak egọkọbe, owu òsa uwa ene kiban̄ itọ me lek otu mun̄ ge òrọrọn̄ọ inin̄ alala. 57 Jei Okumugwem, ido chi, ebi eriọọn̄be ibe ke kpekup me lek inu geege, ema ere ebi ìkikeme eji inwan, mè ikimeen̄ eji isan̄a mgbọ keyi. 58 Ire eji ebi kwun̄, ebi owu ogwenbe adasi bọn, ọkpọkpọ bọn, ebi ulọk inu kwun̄ ominbe me ejit, ebi owu omabe ichit cha, ebiba ke eyaka itap me ubọk kiban̄. 59 Ire me atikọ ibe ke erom linyọn̄ inyi eji, ìre keke orọ eji kpekaan̄ linyọn̄ kiji ya kubọk ìrot kiji? Ìre ìbokup ikeyi isi ire mgbọ owa ni?”