Inu ijejeen̄ ofolek òta mgbọ
5
“Òfo me lek inu ijejeen̄ eyi òta mgbọ: Usen òkinu mgbọ uga ukpook môtetbe ebi ìluk me linyọn̄, oniin̄ atikọ eyi Awaji môlelet me lek kiban̄, ichechieek si mônanan me linyọn̄. 2 Una ata irọrọ mômin igak ubọk owu me lek kwun̄ omun̄be mgbọ keyi, mè imin si iraka ubọk owu onọbe me oka mgbọ. 3 Ido omun̄be òkikpulu mgbọ keyi môyat ita, mè ikana èwê ikakaan̄ge akpat oniin̄ ekije isi. Ebi ene ebekimun̄ ubọk îyatbe inọọn̄. 4 Ire, ire Ogwu Òbebene Ichit isun̄ owu me ugwem inyi isi, òso mgbọ ita isiraka, owu mômun̄ wọlọwọlọ onin̄be ido ya. Me ekakpọge chieen̄, ura môbene ikira me ejit eririeen̄, onyan̄ môbebene ikitoon̄ me ikarek. 5 Eje môkekirọn̄ọ me lek uti, ewuuk môkekitumu ikọ. Ebi ido geelek mêninin̄ me ufieejit, ebi kè ntoronyan̄ mêkekirurọn̄ọ. 6 Ogwu ge ebi linyọn̄ ekakpọge chieen̄ mônenikeke ubọọn̄, ebi kè unọn mêwuwulu inan̄a, otutuuk kiban̄. 7 Okwaan̄ Uchi môtọtọọn̄ irin̄ igwook me ijọn̄. Ogwu owuwa ene kperiọọn̄ môtataan̄ ukpo me eririeen̄, otutuuk ene mênọnọ ida kan̄. 8 Wọlọwọlọ môkukup si me owuwa ere, ukan̄ môkekibumu isibi, ebi kè anam oron mêkekije iraka ikeke ere ema ekibọm urie ire. Ebibaan̄ mêkukup me irek ibaan̄ imaan̄ nke nke isi anam. 9 Ala môkekisibi me emen mudim, unene ge mônenitim akọn̄ ikpan̄ unene ge; ifuk-ibot mônenilet lek kan̄, iriọọn̄-inu môkpekpebe inin̄ emen agwut kan̄. 10 Owuwa ene mêweweek ọmọ, ire, kpebemun̄. Ijo irọrọ mè una itetet lek ikaan̄ mômumana me linyọn̄. 11 Ido ge môdo ido melek kan̄ ibe, ‘Ìre ata irọrọ, mè ìre ogwu òkirọ inu ònenen îje itibi owu?’ Ido keya môfọfọọk ibe, ‘In̄-in̄.’ 12 Mgbọ ya, ebi ene mêkaan̄ ikpọchieen̄, ire, ìkpokaan̄ ibot. Ema mêkwukwulu, ire, inu ìkpoje ijaan̄ me lek kiban̄. 13 Echi ore inu ijejeen̄ echi echieekbe ibe emi m̀kpa ǹnyi owu. Ire, okpọk iriaak uriaak, mè ito ito, kubọk orọbe mgbọ keyi, mè ijin otu usen jaaba, owu mônọ ikpele inu ògagak echichi.”Ejira îbolo chieen̄ me ilaak
14 Nnenibolo chieen̄ me ilaak, lek okekiran emi unye unye, mè isisik emi ekwukwu n̄a, nrọrọn̄ igak iweek. 15 Ire, ogwu osat ya, ogwu ònunu initumu ikọ melek n̄a, otetet emi, mè itap emi unye me emen, mè irọ ukot n̄a inye.
16 Falitiyen, ogwu ibot ebi kiji, onunu lek n̄a me òso eririeen̄ iba, mè inibe emi, “Owa ke osi? Keke orọ ufieejit osibibe owu me isi? 17 Ìre òkariọọn̄ ibe ke etap ebi Ijeren me ubọk kwun̄ me ido ema ekupbe me usun̄ akọn̄ ni? 18 Eya orọ, nan̄a keke rie inorie sa tet efuuk, mè kajit eji ìtele kubọk ogwu òkpukpo arọọn̄ òtele urum arọọn̄ kan̄ inyi ebi kè ibo oron ìkigwak anam itaka.”
19 Nnenibe ọmọ, “Je nan̄a, kaje ìgbet emi lek mege usen jaaba. Mgbọ ya isiraka, owu môkọt iyaka inu.” Mgbọ înọbe ikeyi, itetele emi. 20 Nnenijin otu usen jaaba, mè ifieek ejit, mè ikito ito kubọk ogwu osat Uriyen obe emi ǹrọ.
Òso uriaak iba Ejira osabe inina lek
21 Mgbọ usen jaaba orakabe, ekiket okpọkpọk inin̄ igak emi ejit enenen. 22 Ire, ekwukwu ngobo-ntet oneninin̄ emi emen, mbebene ikpọk ikitumu ikọ me isi Ogwu Òbebene Ichit. 23 Nnenitumu ibe, “Jei Ogwu Nte Ogwukaan̄-ene, me etete otutuuk uti òkup me oron geelek me linyọn̄, owu ogobo olik ge inyi lek kwun̄. 24 Me etete otutuuk ido me linyọn̄, owu ogobo agan̄ ge inyi lek kwun̄. Me etete otutuuk ajakajak òkup me linyọn̄, owu ogobo ajakajak lili ge inyi lek kwun̄. 25 Me etete otutuuk ugwuuk okwaan̄ geelek, owu ogobo okwaan̄ ge gaalek, mè itap mun̄ ijot inyi lek kwun̄. Me etete otutuuk ama geelek enamabe, owu ogobo Sayọn isun̄ esese inyi lek kwun̄. 26 Me etete otutuuk unọn orombe, ekerekwukwu ge ke obak erieen̄ ibe ìre eyi kwun̄. Me etete otutuuk urum arọọn̄ orombe, arọọn̄ ge ke ogobo isun̄ inyi lek kwun̄. 27 Me etete urum ebi ife geelek, owu ogobo ife ge inyi lek kwun̄. Ife chi, ebi owu omabe, owu onyi Ikan, eyi ema otutuuk ebọkọbe itap. 28 Mgbọ yi, jei Okumugwem, keke orọ mè òyaka ife ge ya òtap me ubọk ebi owuwa ife, mè òsa esip òtet ugwun̄ ijọn̄ ge ya ògagak echilọ cha, mè òyiyala ife ge yi gaalek okaan̄be òtap me etete ebi owuwa ife? 29 Ebi ìjeje ikeme use kwun̄ ejajak ebi ìchechieek me lek inyan̄a-ibot kwun̄ ikpukpuku. 30 Ire ocha ebi kwun̄, me atikọ, ke more owu mosa ubọk kwun̄ gaalek isulu ema osusut.”
Ifọọk enyibe Ejira
31 Mgbọ ntumube ikọ chi isan̄a, Awaji oraria ogwu osat ya ònunu me lek n̄a me eririeen̄ keyilọ ya inu emi lek. 32 Ibebe emi, “Gban̄ utọn̄, mè ǹnyi owu nteme. Riọọn̄ ubọk kigban̄ emi, mè ǹtumu owuwa inu ǹsọkọ ǹnyi owu.”
33 Emi nnenibe, “Ogwu nte n̄a, tumu ma.”
Ibebe emi, “Ìre ejit ìkisisaak owu enenen mije ebi Ijeren ni? Ìre owu oma ebi Ijeren igak ike Òrom kiban̄ omabe ema ni?”
34 Mbebe, “In̄-in̄, ogwu nte n̄a, m̀bak me lek ufieejit n̄a itumu ikọ. Mije, mbubak mgbọ geelek, ejit n̄a ìkisisisaak emi mgbọ nsikiweek igogobo itet sọntiik me lek ubọk Ogwu Òbebene Ichit okirọ inu, mè irọriọọn̄ usini oyerebet kan̄.”
35 Ibebe emi, “Owu òkpokọt!”
Emi mbebe ọmọ, “Ogwu nte n̄a, mije keke ni? Ire ikeya, ebak me lek keke iman emi? Keke orọ akpa gwun̄ nga n̄a ikarege udọn̄-ufuun̄ n̄a, inyi nkanimun̄ ukwook kè Jekọp, mè efuuk òtata Ijeren me owot?”
36 Ibebe emi, “Fuk otu ifuk ebi kpemaman-nu nyi emi, mè kwọọk ibot òrururọn̄ọ iyiyala titiin̄ sun̄ nyi emi, mè rọ inyi ajakajak òchachiaak ikpọk isek nyi emi-nu. 37 Gwuku agwut egwukbe ichit cha nyi emi-nu, mè san̄a efet egonbe ikam me agwut cha sibi nyi emi. Ilọ ikeya, jeen̄ emi-nu ubọk ida ene okupbe; inyi mânenikpa ukwook ya okiweek irọriọọn̄ ibot inyi owu.”
38 Mbebe, “Jei Ogwu Nte Ogwukaan̄-ene, ekene obokọt iriọọn̄ inu kechi, ilọ me lek ogwu ìkakiluk me etete ebilene? 39 Ire me lek n̄a, ǹkakaan̄ iriọọn̄-inu, mọmọ ike mbasa itumu ikọ ofolek inu odobe emi?”
40 Ibebe emi, “Ike owu kpokọtbe irọ ge me lek inu chi egobe, ikeya si, owu òkpokọt iweek oyerebet n̄a iriọọn̄, mè ìre ibot ibot imumechieen̄ nchieekbe ebi n̄a use.”
Inu òrọrọ ebi ene ekisibi me ukot me ukot
41 Mbebe, “Jei Okumugwem, owu òkikpọ chieen̄ me lek ebi mêlukbe me òta mgbọ. Sà ebi ìluluk sabum eji chi, mè eji me lek kiji, mè ebi ìbenu me udun̄ kiji eberọrọ?” 42 Ibebe emi, “Mâsa oyerebet n̄a itọ me lek àtu. Ike kpokupbe ususuk inyi ebi òta, ikeya si, ìkpokup ugwat ugwat inyi ebi adasi.”
43 Nnenifọọk ibe, “Ìre owu kpomokọt igbaan̄ ebi ìkukup iraka mè ebi ìkukup mgbọ keyi mè ebi mêkupbe mgbọ òkinu me isi irom mgbọ yaage, inyi oyerebet kwun̄ môgwat lek inu ni?”
44 Ifọfọọk emi ibe, “Ǹrom ìkpokọt ije igwat ukot igak ogwu òrom, linyọn̄ ìkpokọt ibeme otutuuk ebi erombe me emen kan̄ me mgbọ yaage.”
45 Emi nnenibe, “Ire ikeya, òjeje itumu inyi emi, ogwu ikwaan̄ kwun̄, ibe ke owu môgbaan̄ inyi otutuuk inu orombe ugwem mgbọ yaage? Ire ke otutuuk inu erombe mêgbaan̄ iluk mgbọ yaage mè linyọn̄ okọt obeme ema otutuuk, kè linyọn̄ okọt ògbaan̄ otutuuk ene obeme mgbọ yaage me mgbọ keyi si.”
46 Itutumu inyi emi ibe, “Do-nu akpa gwun̄ enenwaan̄, ibe ‘Ire akọp ibot gwun̄ ke oman, keke orọ okiman ema ge igọọk ge?’ Tumu-nu nyi ibe igbaan̄ akọp cha iman mgbọ ge.”
47 Mbebe, “Ìkpokọt, ìbore ge mgbọ ge.”
48 Ibebe emi, “Ikeya si ke nnyi linyọn̄ ebi ìbekisibi me akpa gwun̄ kan̄ me mgbọ me mgbọ. 49 Mije, ike gwun̄ aya ìkakiman gwun̄, enenwaan̄ òkakan ìkakiman si gwun̄, ikan yaage ke ntap inyi linyọn̄ emi nrombe”
Mgbọ owa ke òta mgbọ obonu, ìbojeje?
50 Nnenido ibe, “Eyi owu onyinyi emi irek mgbọ keyi, mâtumu ikọ me isi kwun̄. Nga kiji ya, ogwu owu otumube ikọ ibak, òrere linyọn̄, ìre ìkup nsek nsek ni? Sà ìre òkigbet lek ukan ni?”
51 Ifọfọọk emi ibe, “Do enenwaan̄ òmamaan̄ bọn, ke môtumu inyi owu. 52 Do ibe, ‘Keke orọ ebi omaan̄be egwe inen keyi kpekup kubọk ebi omaan̄be iraka? Keke orọ ebi omaan̄be mgbọ keyi esiikbe igak ebi adasi cha?’ 53 Ọmọ môfọọk owu ibe, ‘Ebi nsabe lek nsabọn ibaan̄ imaan̄ mîsibi esese me lek ebi mmaan̄be me ukan, mgbọ akpa gwun̄ okiwọ.’ 54 Eya orọ, owu riọọn̄ si ibe ke owu mè ebi ukot eyi kwun̄ mîsiik igak ebi ìkukup sabum ukot eyi kinyi. 55 Ebi ìkinu me udun̄ kinyi mêsiik igak enyi, kubọk ebi emaan̄be me ukot eyi inyọn̄ òkakan, mè isaba iraka mgbọ unye eyi nsabọn ibaan̄.”
56 Mbebe, “Jei Okumugwem, m̀bebeek owu, ire obele ejit me lek n̄a, jeen̄ emi gwun̄ ikwaan̄ kwun̄, ogwu owu oboje me lek inisibi oyerebet me ibot ebi owu orombe.”