3 Nchechieek ibe, “Iin̄, ogwu nte, mâkọt.”

Ifọfọọk emi ibe, “Eria emi inu ibe emi ǹnenjeen̄ owu oniin̄ ita, mè ǹto si ikọ ita me isi kwun̄. 4 Ire okọt ikpa ge me lek ijeen̄ emi, mânenijeen̄ owu ubọk Awaji okirọ inu kan̄, mè ijeen̄ si owu inu òrọrọ ibe ikpak ikup me ejit ene.”

5 Mbebe, “Ogwu nte n̄a, tumu ma.”

Ibebe emi, “Je, mè si tọ ulobo ukan̄ nyi emi-nu, mè ìyaka ire si tọ ikeke efet òwuwut mgbọ ge, mè ìre, gwen-nu usen ge òraraka sa gwu kom jet emi.”

6 Mfọfọọk ọmọ ibe, “Ekene me lek bọn ebilene emanbe obokọt irọ inu kecha obe emi nrọ?”

7 Iyayaka inibe emi, “Ire mado owu ibe, ‘Ìre uwu inen okup me ejit okwaan̄? Sà ìre ibot mun̄ inen okisibi igwook me ugwuuk okwaan̄? Sà ìre okolo inen okup me akpabin inyọn̄? Sà ìre otu oniin̄ ekije inan̄a me ama ekwukwu isibi ìkup me owa, sà ìre otu oniin̄ ekije inin̄ Paradais ìkup me owa?’ 8 Usini mgbọ, kè owu obe emi, ‘Ǹkararak ìsibi ugwuuk okwaan̄, ǹkararak ìnin̄ ama ekwukwu, ǹkanenene si ìsi emen inyọn̄.’ 9 Ire, ukan̄ gaalek, mè efet, mè usen ke ndo owu inu òsi lek, òrere inu echi owu oriọọn̄be ijaan̄ lek, echi owu okije itibi mgbọ geelek me ugwem kwun̄, òkakọt ìfọọk emi inu geege òfo me lek kiban̄.” 10 Ibebe emi, “Ire òkakọt ìgobo inu echi osabe imin isibi ìtet, 11 ìre òbojeje ikọt isa nkeek kwun̄ iriọọn̄ ubọk Ogwu Òbebene Ichit okirọ inu kan̄? Ìre ogwu inyọn̄ bukubuku orọbe inyi ibubuku isan̄a ìbojeje ikọt iriọọn̄ ubọk ogwu ìkakibubuku okirọ inu kan̄?”

Mgbọ nnọbe ikeyi, nrọrọn̄ inyana ikana isi ichit, 12 mè inibe ọmọ, “Kè ònwọn ire eji kpemenunu linyọn̄ keyi, igak eji inunu iniluk ugwem kperiọọn̄ Awaji, mè ikinibọkọ ukwook eyi ekariọọn̄ge ibot.”

13 Uriyen ofọfọọk emi ibe, “Ǹnin̄ emen oron, ere uti òkup me òla ijọn̄ ekupbe, ebi kè uti cha eninin̄ oru ibe, 14 ‘Ìna, mè eji esi akọn̄ me lek okwaan̄, inyi ikpebe lek, ufuna eji ekaan̄ ere etibi oron ewa enyi lek kiji.’ 15 Ikeya si, ebi kè ekoon̄ me okwaan̄ eninin̄ oru ibe, ‘Ìna, mè eji esi etim ekpan̄ oron òkup me lek òla ijọn̄, inyi eji mêkaan̄ ere isọkọ lek inyi lek kiji.’ 16 Ire, otitọt eyi oron ya okakana inu ikike, mije, ukan̄ înitaka oron isan̄a kpai. 17 Ubọk yaage si ke otitọt ebi kè ekoon̄ cha okana si inu ikike, mije, achiaan̄ agba awaji îkeke inye, mè ikput ema. 18 Me mgbọ keyi, ire ibe owu òsibi oyerebet ònyi ema, ogwu owa ke oyerebet monwọn, sà ogwu owa ke oyerebet motip?”

19 Mfọfọọk ibe, “Ema agan̄ iba mîtọt ilọ, mije, Awaji ìsa ijọn̄ inyi oron, mè inyi okwaan̄ ere ekoon̄ kan̄ obokifan̄a igwook.”

20 Ifọfọọk emi ibe, “Owu ofieek oyerebet ya inen. Ire, ìre keke orọ owu òkakọt ìsibi oyerebet eyi kwun̄ ikeya? 21 Mije, ike ijọn̄ okupbe inyi oron, okwaan̄ okukup inyi ekoon̄, ikeya si, ebi ìluk linyọn̄ ebegobo inu eyi linyọn̄ gaalek itet. Îre ogwu òbebene iraka akpabin inyọn̄ obogobo inu òkup me ere òbebene isaba iraka ubene linyọn̄ itet.”

22 Nnenifọọk ibe, “Ogwu nte n̄a, keke orọ enyibe emi unye eyi isasa ikigobo inu itet? 23 Ǹkado ikọ ofolek inu òkup me akpabin inyọn̄, ǹkido ikọ òfo me lek inu eji ekimun̄ usen geelek. Ǹkido inu òrọrọ oyakabe ido Ijeren inyi ebi ofifi ido esa erọ ochak, mè inu òrọrọ oyakabe ebi owu omabe inyi ebi kperiọọn̄ Awaji, mè ijijaka Ikan ebi nte nte kiji, mè irọ inyi inyan̄a-ibot egebe isun̄ ìkayaka ìkup. 24 Eji ekiwulu iraka me linyọn̄ kubọk akaka ituuk. Ugwem kiji ìkup kubọk oruk, eji kpegbegbe ebi ebekaan̄ nsan me lek. 25 Ire, ìre ọmọ ìborọrọ erieen̄ kan̄ ya, eyi eji ekichieek? Îre ikọ òfo me lek inu kechi ke nkido.”

26 Uriyen ofọfọọk emi ibe, “Ire ògat ugwem, owu mômun̄. Ire oluk ugwem ifiin̄, môkike owu chieen̄. Mije, ukot keyi òkije isi ge isi ge ifo itata kan̄. 27 Ìkpokọt isa inu echieekbe ebi ata irọrọ use inu me mgbọ esun̄be, mije, ufieejit melek orukan̄ ojot me ukot keyi. 28 Mije, mîra iwop ijo inu edobe ikọ ofolek, ire, irọrọkọ kan̄ ìkare-nu. 29 Eya orọ, ire kperọkọ inu ya ewopbe, mè ire akpat ere ewopbe ijo inu ya ìkanan̄a, uko eyi ewopbe ata inu ya, ìkponu. 30 Mije, ukwuuk ijo inu ge ke ewop me emen ejit kè Adam me ibebene, itoto ijo inu eyi una irọriọọn̄ Awaji inire mgbọ keyi. Môto si mege ire mgbọ igegen̄ ijo inu erọkọbe, kubọk ekigen̄ akpa, mônube! 31 Keek-nu me lek kwun̄ ikeke mfut eyi una irọriọọn̄ Awaji eyi ukwuuk ijo inu ge gaalek otobe. 32 Ire iwop owuwa ukwuuk echi kperiọọn̄ otu ifuk, ere igegen̄ mfut kiban̄ ìbomimin ikup?”

33 Nnenifọọk ibe, “Mgbọ ya ìbojọjọn̄ọ ire? Ìre mgbọ owa ke inu chi oborọ? Keke orọ ugwem kiji ire acha inen mè inen, mè ikup ufialek ufialek?”

34 Uriyen ofọfọọk emi ibe, “Kaweek igwagwat lek igak Ogwu Òbebene Ichit. Mije, igwagwat lek eyi kwun̄ ìkup inyi owu gaalek, ire, igwagwat lek eyi Ogwu Òbebene Ichit ìkup inyi owuwa ene. 35 Ìre ibot ejit ebi ata irọrọ kpekup me agwut esun̄be ema ikido ikọ yaage si ikibe, ‘Ìre mgbọ owa ke eji ebekup me ere keyi ire ni? Sà ìre mgbọ owa ke irọrọkọ uko eyi mkpukpe kiji obonu ni?’ 36 Jerimiyen, ogwu ibot ebi osat, ofọfọọk ibe, ‘Ìbore mgbọ otu ifuk ebi mbet kinyi isiso. Mije, Awaji îtọ ulobo ebi ukot keyi me otitọ, 37 mè iroon̄ si mgbọ me oriroon̄, mè ifuk mgbọ me otu ifuk. Eya orọ, ìkpojibi ema ije, ìkpotitimi si ema, mege oriroon̄ cha môsobe ifuk.’ ”

38 Emi nnenifọọk ibe, “Ire, jei Ogwu Nte Ogwukaan̄-ene, una irọriọọn̄ Awaji ìjojot otutuuk kiji lek si. 39 Usini mgbọ, ìbore bak me lek kiji, bak me lek ijo inu ebi linyọn̄, ke ekikikene mgbọ igegen̄ mfut ebi ata irọrọ.”

40 Ifọfọọk emi ibe, “Je si do-nu nwa-owot ibe ìre ìkekikọt itet gwun̄ ikaan̄ me akpa gwun̄ mgbọ onyan̄ onaan̄ge isiso?”

41 Emi mbebe, “In̄-in̄, ogwu nte, ìkpokọt.”

Ibebe emi, “Me emen udọn̄-ufuun̄, agwut ere ibot ejit ekupbe, ìbet lek emen akpa gwun̄. 42 Ike enenwaan̄ uman okifiak okison lek iweek inwọnwọnọ ufiak uman, ikeya si ke ere chi okison lek iweek isasan̄a inu cha etapbe ema emen, me ibebene, isibi. 43 Mgbọ ya, inu cha òkilọk owu imumun̄, mêchili ijeen̄ owu.”

44 Mfọfọọk ibe, “Ire obele ejit me lek n̄a, mè ire ifet, mè ire emi mgbe, 45 jeen̄ emi inu keyiyi si gbaalek: Jeen̄ emi nu, me lek kiji, ìre mgbọ òkinu ojọn̄ọ igak eyi òraraka, sà ìre mgbọ òraraka ojọn̄ọ igak eyi òkinu? 46 Mije, nriọọn̄ eyi òraraka, ire, ǹkariọọn̄ eyi òbonu.”

47 Inenibe emi, “Keke emi me agan̄ ulom, inyi ǹjeen̄ owu ibot urọk ge.”

48 Nnenikeke, mè ikpọ, mè imun̄ ukan̄ òkisasak orakabe emi me isi, mgbọ alọm ukan̄ kan̄ orakabe, mkpọkpọ, mè imun̄ oduku obiabe. 49 Mgbọ eya orakabe, oduku inyọn̄ mun̄ ojotbe lek oraraka emi me isi, mè irep nnaan̄ nnaan̄ ibot egwijo ònyenye. Mgbọ ibot egwijo ya orakabe, senesene ibot obabia me emen oduku inyọn̄ ya.

50 Uriyen obebe emi, “Owu, keek-nu me lek kwun̄, mije, ike ibot ya owabe igak senesene kan̄, mè ike ukan̄ ya ominbe igak oduku kan̄, ikeya si ke inu echi òraraka owa enenen. Ire, eyi òsisik ìre senesene ibot melek oduku.”

51 Nneniriaak uriaak ibe, “Ìre owu okeek ibe ke emi mâgat ugwem ire usen cha? Sà ìre ebi owa ebeluk me ugwem isoon̄ usen kecha?”

52 Ifọfọọk emi ibe, “Òfo me lek inu ijejeen̄ odobe emi, mâkọt itumu okpọkọ me lek inyi owu. Ire, inu òfo me lek ugwem kwun̄, ikare eya ke eria emi inu ibe emi ǹnentumu ǹnyi owu, emi si ǹkariọọn̄.”