Ejira îriaak uriaak inina lek
3
Me òso akọp mè acha ita me lek egwakbe ama kiji, Jeruselem, isan̄a, emi, Salatien ogwu ekigwen si, Ejira, ǹkup me Babilọn. Usen ge, mgbọ nlaakbe me inyọn̄ mkpilaak n̄a, ekiket oninin̄ ijot emi ejit, 2 mije, mmun̄ ubọk ama Sayọn oyatbe ita, mè imun̄ ubọk ebi ìluk me Babilọn ekibọọn̄ ubọọn̄. 3 Ekwukwu n̄a osisisik enenen, mbebene ikitumu ikọ òfo me lek saasaak n̄a inyi Awaji Ogwu Òbebene Ichit, ibe, 4 “Jei Ogwu Nte Ogwukaan̄-ene, ìre ìkafat ìre owu otumu ikọ me ibebene, mè irom linyọn̄, ene geege ìkatap ubọk ìnyi owu? Ìkafat ìre owu otumu ikọ inyi mfuun̄, 5 Adam, òrere akpalek ikakaan̄ge ugwem, onanan̄a isibi? Ire, ọmọ îre inu ubọk kwun̄ orombe. Owu ochocho efuuk ugwem itap me emen kan̄, ikakana ogwu ògat ugwem me isi kwun̄. 6 Owu osasa ọmọ isi emen uko eyi owu osabe ubọk ulom kwun̄ iwop sabum linyọn̄ onisibi. 7 Owu onyinyi ọmọ ikan ge kpọi, ire, ọmọ ochachaka ikan ya. Owu okukup mgbọ yaage ito mkpa inyi ọmọ melek owot iman kan̄. Îre nan̄a me lek kan̄ ke ido, mè otoko, mè ebi ife geelek, mè owot iman ikakaan̄ge otu ifuk onan̄a isibi. 8 Ido geelek okekije ikpọ me lek nkeek eyi kan̄, ema erọrọ inu ebi kperiọọn̄ Awaji ekirọ me isi kwun̄, mè ijit ikan kwun̄, ire, owu òkagban ema. 9 Ire, ofifi kan̄, mgbọ mgbọ okembe, owu osa mun̄ ile inijijaka ebi linyọn̄ isan̄a. 10 Chieen̄ mfufiat yaage onunu inyi otutuuk kiban̄: Ike mkpa onube inyi Adam, ikeya si ke mun̄ ile onu inyi ema. 11 Ire, owu otetele ibe ene ge kiban̄ isibi, òrere Nuwa, mè ebi ototun̄ ukan̄ kan̄, mè otutuuk ebi ata irọrọ ebi ìje me owot iman kan̄.12 “Mgbọ ebi ìluk me linyọn̄ ebenebe ikimumana, ema emamaan̄ bọn, mè imaan̄ ebi ife geelek, mè owuwa ido. Ema si ekpọkpọk ikirọ inu ebi kperọriọọn̄ Awaji ekirọ igagak echi ebi nte nte kiban̄ erọbe. 13 Mgbọ ema ekirọ nlilọ inu me isi kwun̄, owu ogogobo ene ge me lek kiban̄, ogwu ekigwen Ebereyam, inyi lek kwun̄. 14 Owu omama ọmọ, mè inween̄ lek ichili okputut mgbọ ijeen̄ ọmọ gaalek, me eririeen̄. 15 Owu oneninyan̄a ibot eyi môkupbe ire mgbọ ikakaan̄ge itata melek kan̄, mè ichieek ọmọ use ibe ke owu òkpojit ebi owot iman kan̄ itele mgbọ geege. Owu onyinyi ọmọ Ajiki, mè inyi Ajiki, Jekọp mè Isọ. 16 Owu ogogobo Jekọp inyi lek kwun̄, mè ijit Isọ. Jekọp onenikana ikpele urum ene ìwawa enenen. 17 Mgbọ owu osabe ebi owot iman kan̄ me Ijipiti isibi, owu osasa ema inu me lek ogoon̄ Saina. 18 Mgbọ ya, owu otetet akpa inyọn̄ inwun, mè isisik linyọn̄, mè ijibi linyọn̄ me akpat, mè isisik ugwuuk okwaan̄, mè itap wọlọwọlọ me lek otutuuk inu orombe. 19 Ujamgbugbo kwun̄ ojeje itibi otunchit ini, eyi ukan̄, mè sikisik-ijọn̄, mè efet, mè mun̄ ewuuk, ininyi ebi owot iman kè Jekọp Ikan kwun̄, mè inyi bọn bọn kè Ijeren inu owu otọbe.
20 “Ire, owu òkasan̄a ema ejit ikpak kiban̄ me emen, inyi Ikan kwun̄ ito mfut me emen kiban̄. 21 Mije, ejit ikpak ya îkeme ogwu adasi ene, Adam, irọrọ ilọ, ijijibi ọmọ iwook, kubọk îrọbe si me lek otutuuk ebi ìje me lek kan̄ isibi inyọn̄. 22 Eya orọ, nrọ-nlọ ya okakana orukan̄ kpekigwa. Ikan kwun̄ melek ugwun̄ ijọn̄ inu ikpak ya egbagbaan̄ ikup me emen ejit ebilene. Ire, eyi òrere ata inu osisibi, eyi òrere ijo obabia. 23 Mgbọ oneniraka, acha oneniso me lek, owu onenisan̄a gwun̄ ikwaan̄ ge, egwenbe Debit, isibi inyi lek kwun̄. 24 Owu onyi ọmọ ida ibe inama ama me erieen̄ kwun̄, mè isa inu owu okaan̄be ikigwa ngwugwa me ere ya inyi owu. 25 Mîrọ inu yi owuwa acha, ire, ebi ìluk me ama ya erọrọ nlilọ inu, 26 me inu geelek ema erọbe, kubọk Adam mè otutuuk owot iman kan̄ erọbe, mije, ema si mîkaan̄ ejit ikpak ya. 27 Eya orọ, owu oyayaka ama kwun̄ ya itap me ubọk ebi ochicha kwun̄.
Ejira îsa Babilọn itọ me lek Sayọn
28 “Nnenido me emen ejit n̄a ibe, ìre irọrọ ebi ìluk me Babilọn, înwọn igak eyi ebi Sayọn ni? Ìre ikeya orọ Babilọn okikpulu Sayọn ni? 29 Mije, mgbọ nnube ama Babilọn, mmun̄ ekirọ nlilọ inu owuwa owuwa, ire lek kpebekọt ifuk otu ifuk. Me emen akọp acha ita kechi nkupbe me ere yi, chieen̄ n̄a îmun̄ owuwa ebi ijo ife. Ejit ofefieek emi, 30 mije, mmun̄ ubọk owu okime ebi ìkirọ ijo inu, mè ikitele ebi ìkirọ inu ikpak, òkasulu ema osusut. Ire, owu ojijaka ebi kwun̄, mè ikput lek ebi ochicha kwun̄. 31 Òkajejeen̄ ene geege ubọk mêsabe igobo oniin̄ owu okirọ inu itet. Ìre irọrọ ebi Babilọn înwọn igak eyi ebi Sayọn ni? 32 Sà ìre îkaan̄ ofifi ido òrọriọọn̄ owu, ilọ me lek ebi Ijeren ni? Sà ìre otoko echi owa ochieek me lek inyan̄a-ibot kwun̄ geelek kubọk ebi otoko kè Jekọp chi? 33 Ire, bọn kè Jekọp kpemun̄ mkpukpe kiban̄, ubọk ikwaan̄ kiban̄ ìkato mfut geege. Mije, emi njijen̄e ije iwele owot ikana me owuwa ido, mè imun̄ ibe ke ema mîbọọn̄ ubọọn̄ enenen, ubọk geelek ema kperiọọn̄ inu geege òfo me lek Ikan kwun̄. 34 Eya orọ, mgbọ keyi, sa otitọ ekisa itọ ulobo inu tọ-nu nlilọ inu echi kiji mè echi ebi ofifi ife ìluk me linyọn̄, inyi ekpọ-nu agan̄ otitọ ya obokọọn̄ inin̄. 35 Ìre mgbọ owa ke ebi linyọn̄ kperọ ijo inu me isi kwun̄? Sà ìre ido eyi owa ire eyi òsusun̄ ikan kwun̄ ijaan̄ lek? 36 Me atikọ, owu môkọt imun̄, ebi ìsusun̄ Ikan kwun̄, me ene me ene, ire, me ido me ido, owu òkpomun̄.”