Osusut Awaji onyibe ebi Ijeren
2
“Okumugwem ìtumu ibe ikeyi: Nsan̄a ife chi me uwu usun̄ isibi, mè inyi ema Ikan n̄a sa me otu ebi ikwaan̄ n̄a ebi nriran. Ire, ema kpegban̄ utọn̄ inyi ebi nriran cha, esasa nteme n̄a cha igwen inu ikike. 2 Uga òmaman ema obebe ema, ‘Bọn n̄a, ìje, mije, emi ìre nwakpa, ogwu ejitbe itele. 3 Mkpukpo enyi isibi me ubelejit, ire, enyi enanan̄a ichep emi me ito mè ufieejit, mije, enyi mîrọ ijo inu me isi Okumugwem Awaji, mè irọ inu òfefieek me chieen̄ n̄a. 4 Mgbọ keyi, ìre keke ke mbakọt irọ inyi enyi? Mije, emi ìre nwakpa, ogwu ejitbe itele. Nsabọn n̄a, ìje, ìsi ìbeek Okumugwem nsan.’ 5 Mgbọ keyi, owu ute, Ejira, ngwen owu melek nga nsabọn me ata-ikọ, mije, ema kpesun̄ inyan̄a-ibot n̄a, 6 inyi owu môtap wọlọwọlọ inyi ema, mè isa ichep ijet nga kiban̄, inyi ema ekakaan̄ bọn kubọk ge. 7 Tele ema eyiyala enin̄ me etete ebi ofifi ido geelek, mè etutuku erieen̄ kiban̄ esan̄a me linyọn̄, mije, ema mîkpọ inyan̄a-ibot n̄a ilọ chieen̄.8 “Môfieek inyi owu, ido Asiria, ogwu òlelet ebi ijo irọrọ me emen kwun̄! Jei, ido ebi ikpak, keek inu nrọbe Sodọm mè Gomora, 9 ebi ijọn̄ kiban̄ okanabe okpukpuk mfifit mè èdọ ntọn̄. Ikeya ke mbarọ ebi geelek kpegban̄ emi utọn̄ me lek. Emi Okumugwem Ogwu Òkaan̄ Unye Geelek ntumu.”
10 Okumugwem onenitumu inyi Ejira, ibe: “Tumu nyi ayaya ebi n̄a cha ibe ke mâninyi ema ama ubọọn̄ eyi Jeruselem, eyi mbe m̀basa inyi ebi Ijeren ya. 11 Ògak ge, emi mâbọkọ ema umin kiban̄ inyi lek n̄a, mè isa ere ema melukbe ire mgbọ geelek ya inyi ebilọ cha, ere cha eyi mgbọ nnen̄ebe isun̄ inyi ebi Ijeren. 12 Uti eyi ugwem môkidun̄u utop olu inyi ema, ema kpebeyaka ikwook ukwook, lek si ìkpowọ ema. 13 Ìdo, ke mênyi enyi. Ìbeek, inyi usen kinyi ire inen mè inen, inyi igbigbidim. Mîwuuk lek inenen̄e mkpulu ya isun̄ inyi enyi. Ìgwọk chieen̄ ìkikpọ! 14 Ìgwen, mè ìkpọk ìgwen inyọn̄ mè ijọn̄ me ata-ikọ. Ìkpọ, mben ijo inu ito me agba, mè irom ata inu isibi, mije, emi ǹkukup me ugwem. Emi Okumugwem ntumu.
Ebe erọ ata ikwaan̄
15 “Owu uga, Jeruselem, kat bọn kwun̄ riaak me lek, mè bele ejit kpukpo ema sibi, kubọk ekerekwukwu okirọ. Rọ inyi ukot kiban̄ inye me ijọn̄, mije, emi ngobo owu. Emi Okumugwem ntumu. 16 Mâjomo ebi ìkwakwaan̄ me ere ema ekupbe, mè isan̄a ema me udọn̄-ufuun̄ kiban̄ isibi, mije, mmun̄ erieen̄ n̄a me lek kiban̄. 17 Owu Jeruselem, nga nsabọn̄, katet ukpook, mije emi ngobo owu. Emi Okumugwem ntumu. 18 Mâria ebi ikwaan̄ n̄a, Asaya mè Jerimaya, inyi enetap ubọk enyi owu. Ike ema enyibe me nteme, ngobo owu isun̄ esese, mè ineen̄ akọp mè uti iba, esese chieen̄ mfut odekebe me lek, isun̄ iban owu, 19 mè okolo, otu ifuk yaage si, eyi mun̄ ebe melek aran̄ akwọọk okigbuk me emen, mè ikpele ogoon̄ jaaba echi ajakajak rôs mè lili otibibe me inyọn̄. Echichi ke mbasa itap unwọọn̄ ijot bọn kwun̄ ejit.
20 “Kpọ chieen̄ me lek unen ebi nwakpa, gbini unen nyi ebi kpekaan̄ ute me lek, che inu nyi ebi una, tim akọn̄ me ibot ebi kpà-nte, kwun ebi ìkup njak ekwut, 21 kpọ chieen̄ me lek ebi unan osakbe mè ebi lek owọbe, kachak ogwu akọọk, kput lek ebi lek ìkaso, mè rọ inyi ebi ǹnàan̄ emun̄ lek utoon̄ eyi òrirọ n̄a. 22 Kput lek ebi oka ugane mè asa nsabọn ìkup me uwu kwun̄. 23 Oje ichichini me lek nkwukwu ene, ben fuun̄ me udọn̄-ufuun̄, mè tap iman̄ me lek, ke mânyi owu adasi irek mgbọ nsijomo ebi ìkwakwaan̄. 24 Ebi n̄a, ìgele efuuk, mè iriaan̄ ere, mije, mgbọ enyi mêsikibe efuuk òkinu.
25 “Owu ata ogwu òban nsabọn, kpukpo nsabọn kwun̄ jaan̄. Rọ inyi ukot kiban̄ inye me ijọn̄. 26 Ogwu ikwaan̄ geege me lek ebi nnyibe owu ìkpochep, mije, mâdo ema inan̄a me otu ifuk kinyi. 27 Kasisaak lek kwun̄, mije, usen ufialek mè ofaak isire, ebi ofifi ife mêto ito, mè ifieek ejit. Ire, owu mônwọọn̄ unwọọn̄, mè ikaan̄ inu ogbogbo. 28 Ebi ofifi ido mêmin ejit me lek kwun̄, ire, kpebekọt irọ owu inu geege. Emi Okumugwem ntumu. 29 Mâsa unye n̄a ichit owu, inyi bọn kwun̄ ekanin̄ ukan̄ ama yọk.
30 “Jei uga, Jeruselem, nwọọn̄ unwọọn̄ melek bọn kwun̄, mije, mânyan̄a owu isibi. Emi Okumugwem ntumu. 31 Keek bọn kwun̄ ebi ìlalaak me udọn̄-ufuun̄, mije, mâsan̄a ema me ijọn̄ òkilet ene isibi, mè ikaan̄ ema nsan me lek. Mije, emi ìre ogwu nsan. Emi Okumugwem ntumu. 32 Kat bọn kwun̄ riaak me lek mege mânube, mè ininyi ema ulook nsan nrọbe ema. Mije, ogbuuruk mun̄ n̄a îbaak ijot, mè ikifin, atata nnwọn n̄a ìkpolọlọ.”
Ejira me inyọn̄ ogoon̄ Orebu
33 Emi, Ejira, ke Okumugwem onyi ida me inyọn̄ ogoon̄ Orebu ibe emi ǹsi lek ebi Ijeren. Mgbọ nnube lek kiban̄, ema ejijit emi, mè ijit ibọbọkọ Ikan Okumugwem. 34 Eya orọ mbe enyi ebi ido ìnọnọ mè igobo itet, “Ìkup ìkikpọ ogwu òkikpukpo enyi kubọk arọọn̄. Mônyi enyi isiki-efuuk ire mgbọ geelek. Mije, ogwu òbonu me òta mgbọ ya îgbet ere. 35 Ìbem lek ìkikpọ mkpukpe eyi ama ubọọn̄, mije, utoon̄ mgbọ ikafieekge môtoon̄ me lek kinyi ire mgbọ geelek. 36 Ìlibi lek udun udun inu eyi linyọn̄ keyi, mè ìbọkọ unwọọn̄ òje me lek umin kinyi. Ǹkup me isi otutuuk ene ikigwen Ogwu Unyan̄a n̄a ibe ire ogwu ata-ikọ. 37 Ìbọkọ inu Okumugwem onyibe enyi ibe enyi ekpọ chieen̄ me lek, mè ìnwọọn̄ unwọọn̄. Ìnyi ọmọ ogwu ògwegwen enyi itap me ama ubọọn̄ emen inyọn̄ itọn̄. 38 Ìnan̄a ìkeke, ìkeke ìtat, mè ìmun̄ lek otu ifuk ebi egonbe iman̄ òriọọn̄ me lek, ebi ìberie ijọk eyi Okumugwem. 39 Ebi ìnanan̄a itele udun udun inu echi ukot mgbọ keyi mîbọkọ ofọnti umin me ubọk Okumugwem. 40 Jei, Sayọn, kpọk mọnọ òjot òjot otu ifuk ene kwun̄, mè chit ikpa erieen̄ ebi kwun̄ ebi ìtaak ofọnti okuket, òrere ebi ìrọrọ Ikan Okumugwem ijot. 41 Otu ifuk bọn kwun̄, ebi oweekbe, îso mgbọ keyi. Beek unye Okumugwem, inyi môrọ ibe ebi kwun̄, ebi egwenbe akarake ibebene, ekup me mbuban.”
Ejira îmun̄ gwun̄ Awaji
42 Emi, Ejira, mmun̄ ikpele urum ene eyi ǹkakọt ìfuk otu ifuk me inyọn̄ ogoon̄ Sayọn, otutuuk kiban̄ ekekikọt okwa itọn̄ Okumugwem. 43 Nnenimun̄ ogbaragbat gwun̄ enerieen̄ ge, òmimin enenen, mè ijọn̄ọ igak otutuuk kebilọ, me etete kiban̄. Gwun̄ enerieen̄ yi onenikwuun̄ ebilọ cha ge ge okpibot ubọọn̄ me ibot. Ire, ọmọ ya omin ene igak ebilọ. Mbiribọ ogwogwook emi me lek. 44 Nnenido ogwu osat ge ibe, “Ogwu nte, ìre ebi owa ere ebibi?”
45 Ifọfọọk emi ibe, “Ebibi ìre ebi ìwọwọọk ofọnti eyi anam akpalek òkijọjọ ito, mè itap eyi ikarege eyi anam akpalek òkijọjọ, mè ichieek me lek erieen̄ Awaji. Mgbọ keyi, ekikwuun̄ ema okpibot ubọọn̄, mè ikinyi ema nlak.”
46 Nnenibe ogwu osat ya, “Ekene ore ogbaragbat enerieen̄ ya ogwu òkikwuun̄ ema okpibot, mè ikitaak ema nlak me ubọk?”
47 Ifọfọọk emi ibe, “Îre Gwun̄ eyi Awaji, ogwu ema echieekbe me lek me linyọn̄.” Mbebene ikitọn̄ ebi ìkekeke inye itim etim me ibot erieen̄ Okumugwem.
48 Ogwu osat ya onenibe emi, “Je, si tumu nyi ebi n̄a ibe ke ikwaan̄ òkup nke nke echi Awaji orọbe, echi owu omun̄be, îmin, mè iwa.”