4 Okumugwem onenitumu inyi emi ibe, 5 “Je, si lek ebi n̄a si tumu ijo irọrọ kiban̄ sibi nyi ema, mè si lek bọn kiban̄ si tumu si nlilọ inu echi ema erọbe emi nyi ema, inyi ema mêtumu inyi bọn bọn kiban̄ 6 ibe ke ema erọ ijo inu igak ebi nte kiban̄, mije ke ema mîwuuk emi, mè ikisi igwa ngwugwa inyi awaji ema ekariọọn̄ge. 7 Ìre ìkare emi nsan̄a ema isibi me ido Ijipiti, me uwu usun̄ ema ekupbe? Ire, ema mîrọ ejit inaan̄ emi, mè ikpọ nteme n̄a isiki chieen̄. 8 Eya orọ, owu Ejira, sa me ufieejit jibi ijeek me ibot kwun̄, mè tọp ùrioon̄ gwook ema me lek, mije, ema kpesun̄ Ikan n̄a, ema ìre ebi mkpaka-ibot. 9 Ìre m̀bakaan̄ ime me lek kiban̄, ebi emi nrọbe ikpele nnwọn inyi, ire mgbọ owa ni? 10 Mije kiban̄, nsan̄a owuwa ebi ubọọn̄ me irek; njijaka ogwu Fero mè ebi ikwaan̄ kan̄ mè otutuuk urum akọn̄ kan̄ isan̄a. 11 Njijaka otutuuk ido geelek òkekeke ikput ema isan̄a me isi kiban̄, mè iyiyala ebi agan̄ mkpulu iba me agan̄ mbum-ura, òrere Taya mè Saidọn; mkpan̄ si otutuuk ebi ochicha kiban̄ isan̄a.

12 “Tumu nyi ema ibe ke emi Okumugwem m̀be: 13 Îre emi nsa enyi ije itibi emen okwaan̄, mè ichili uga oniin̄ me ere kpunube oniin̄ inyi enyi eje me utelelek. Nnyi enyi Mosis kubọk ogwu ibot, mè inyi enyi Erọn kubọk ogwu ngwugwa. 14 Nnyi enyi utoon̄ inan̄a me lek ujọn̄ọ efit ukan̄, mè irọ ikpele uyeke inu me etete kinyi. Ire, enyi ewuwuuk emi. Emi Okumugwem ntumu.

15 “Okumugwem Ogwu Òkaan̄ Unye Geelek ìbe ikeyi: Ekun̄kun̄ cha nnyibe enyi ìre inu ijejeen̄ inyi enyi. Nnyi enyi m̀gba-ǹgwele ukan̄ enyi ekisa ikwek lek, enyi ekukup me emen ikinunuun̄. 16 Enyi kpenwọọn̄ unwọọn̄ me erieen̄ n̄a mgbọ njijakabe ebi ochicha kinyi isan̄a, ire, mege inire chereyi, enyi ekpọkpọ ikinunuun̄. 17 Mọmọ nnwọn cha nrọbe inyi enyi? Mgbọ uraafiọọn̄ otetbe enyi me emen èwê, ebek orakbe enyi, ìre enyi kpetaan̄ ukpo inyi emi, 18 ikibe, ‘Keke orọ osabe eji ije inu me emen èwê keyi ibonikpan̄ eji? Kè ònwọn eji me lek ikukup me usun̄ inyi ebi Ijipiti, igak inenikwaan̄ ita me emen èwê keyi?’ 19 Nto enyi nsan mije nuunuun̄ enyi enunuun̄be, mè inyi enyi mana erie, enyi ererie inorie ebi osat Awaji ekirie. 20 Mgbọ ebek orakbe enyi, ìre ǹkasulu ewuuk ìbum, inyi mun̄ igbọọk isibi owuwa owuwa? Bak me lek ere oyokbe, nsasa inwan̄ ibot uti ikwek enyi lek. 21 Nche ata ijọn̄ òkisibi mfut inyi enyi, nrieen̄ ebi Kenan, mè ebi Pereji, mè ebi Filisia isan̄a me isi kinyi. Keke ke mbayaka irọ isọkọ inyi enyi? Emi Okumugwem ntumu.

22 “Okumugwem Ogwu Òkaan̄ Unye Geelek ibe: Mgbọ enyi ekupbe me emen èwê, me agba lek okolo mun̄ òkijajat, mè ikirak ebek, mè ikitumu erieen̄ n̄a ifiat, 23 ǹkaria ukan̄ ìgwook enyi me lek bak me lek ijo otu ikọ kinyi. Ire, ǹtọtọp uti ito me emen okolo ya, isa irọ ibe mun̄ ya itop.

24 “Jei ebi kè Jekọp, ìre m̀barọrọ enyi mọnọ? Enyi ebi Juda, enyi kpekisiki ibot inyi emi. Mâgwu ikom isi lek ebi ofifi ido, mè inyi ema erieen̄ n̄a, inyi ema ekerọ orọmijọn̄ n̄a. 25 Mije enyi ejitbe emi, emi mâjit enyi si. Mgbọ enyi isibeek emi nsan, emi m̀kpato enyi nsan kubọk ge. 26 Mgbọ enyi isigwen emi, emi m̀kpagbagban̄ kubọk ge; mije, enyi mîsa eje ene îfifila ubọk kinyi isan̄a, ukot kinyi si ìfefet me ikpakpan̄ ene. 27 Me atikọ, ìkare emi ke enyi ejit, lek kinyi gaalek ke enyi ejit. Emi Okumugwem ntumu.

28 “Okumugwem Ogwu Òkaan̄ Unye Geelek ìbe: Ìre ǹkabebeek enyi kubọk ute okibeek bọn ebirieen̄ kan̄, mè ìre uga okibeek bọn ebibaan̄ kan̄, mè ìre ogwu òkpọ chieen̄ me lek nsabọn okibeek nsabọn kan̄, 29 inyi enyi ere ebi n̄a, mè emi ǹre Awaji kinyi; mè enyi ere bọn n̄a, inyi emi ǹre nte kinyi ni? 30 Nkwọọk enyi ititiin̄ kubọk uman unọn okikwọọk bọn ititiin̄ me irak uwop kan̄. Ire, me mgbọ keyi, keke ke mbayaka irọ inyi enyi? Mârieen̄ enyi isibi me isi n̄a. 31 Mgbọ enyi isigwa ngwugwa inyi emi, m̀badada isi n̄a isan̄a, mije, njit ijọk kinyi cha, mè mfaka aya onyan̄ kinyi, mè orirọ ifieek afi kinyi. 32 Nria ebi ikwaan̄ n̄a ebi nriran ijet enyi, enyi etetet ema ikpan̄, mè ibak. Mâdo eje kiban̄ me ubọk kinyi. Emi Okumugwem ntumu.

33 “Okumugwem Ogwu Òkaan̄ Unye Geelek ìbe: Uwu kinyi îyat ita; mâwut enyi ije kubọk efet okiwut mfufe akpa. 34 Bọn ebirieen̄ kinyi kpebekaan̄ bọn, mije, ema ebet lek kinyi, mîkpọ Ikan n̄a isiki chieen̄, mè irọ ijo inu me chieen̄ n̄a. 35 Mâsa uwu kinyi inyi ebi ofifi ife ìbenunu, ebi mêchieekbe me lek n̄a, ubọk geelek ibe ema kperarak inọ ikọ ofolek n̄a. Ebi ǹkarọrọ inu ijejeen̄ geege ìnyi emun̄, mêrọ inu nnyibe ida ibe erọ. 36 Ema kperarak imun̄ ebi nriran, ire, kpebewuuk inu ebi nriran ejeen̄be me ukot ikaan̄. 37 Ebi ìkinu cha mêbe emi onirọ, eya mônenire inu ata-ikọ inyi emi. Bọn kiban̄ mênwọọn̄ me ubelejit. Ubọk geelek ema kpesa chieen̄ iba kiban̄ imun̄ emi, ema mêsa me ekwukwu kiban̄ ichieek inu geelek ntumube.

38 “Eya orọ, mgbọ keyi, owu ute, Ejira, kpọ-nu ebi ìkinan̄a me agan̄ mbum-ura inu, mè kisa gugo lek. 39 Ema ke mâsa ebi ukot ikaan̄ cha irọ ebi ibot inyi, ìrere Ebereyam, mè Ajiki, mè Jekọp, mè Osiya, mè Emọs, mè Maika, mè Juwen, mè Obidaya, mè Jona, 40 mè Nawum, mè Abakuk, mè Jefanaya, mè Agai, mè Jekaraya, mè Malakai, ogwu ekigwen si gwun̄ ikwaan̄ Okumugwem.”