Ogwu ubọọn̄ Ayaserọs îto ijọk
1
a 1 Îkaan̄ mgbọ ge, me ukot mgbọ Ayaserọsb orebe ubọọn̄ me ido Pesia mè Midia, îre Ayaserọs keyi okikpulu efit ido mè akọp iba mè jaaba, òbebene me ido India igban isi igwook me ido Etiopia. 2 Me ike mgbọ ya, Ayaserọs ìkikup me inyọn̄ ogboon̄ ubọọn̄ kan̄ me ama mgban ekigwen Susa, òrere ama ibot me ido Pesia, ikikpulu. 3 Me òso acha ita me lek Ayaserọs orebe ubọọn̄, inenito ijọk irerie mè inwọnwọ inyi otutuuk ebi ibot mkpulu kan̄, mè ebi ibot ikwaan̄ kan̄ geelek, òrere ebi ibot mkpulu me ido Pesia mè Midia, mè otutuuk ebi isi ene geelek, mè ebi ibot mkpulu me otutuuk ido geelek Ayaserọs okikpulu.4 Otuuk kè onyan̄ gweregwen ke Ayaserọs oto ijọk yi isa ijeen̄ ikpele ubọọn̄ ido kan̄ obọọn̄be, mè ijeen̄ si òrirọ mè umin mè ngugo mè unye echi ido kan̄ okaan̄be. 5 Mgbọ ijọk keya otabe, ogwu ubọọn̄ Ayaserọs okpọkpọk inito ofifi ijọk inyi otutuuk ebi ìluk me Susa ama mgban ya, ibene me lek ebi ilile ire lek ebi asasa. Ekup me emen ujuja uko ajakajak òkup me emen oyet egep uwu ogwu ubọọn̄ ikirie ijọk ya. Ijọk ya ìben otuuk kè usen jaaba. 6 Me emen uko ya, esa ekwut okuket mè echi oluku oluku ijijen me lek olik esabe lilin̄ mè ekwut irio irio ilọk, mè iniben olik cha inwunwan̄ itibi chieen̄ ògbọ alata okuket etọkọbe ikam me ebek atà ewuuk urọt lek. Ikasi ikweek irek òkup me emen ogọ ya ìre echi alata araran̄ mè echi alata okuket. Ijọn̄ emen ogọ ya, ere eyiyikbe ikasi cha, esa ewuuk urọt lek echi araran̄ mè echi okuket, mè akalari mè esese chieen̄ ewuuk unye otu ewe irọ. 7 Ekpen̄ esabe inwọ miin̄ me ere ijọk ya ìre echi alata araran̄ me esese chieen̄ me esese chieen̄, kpunu ekpen̄ iba òjeje lek ge. Ekpọkpọ ikpulu miin̄ ebi ubọọn̄ ekinwọ igwook ichit inyọn̄ otutuuk ikasi cha gboi, ike ogwu ubọọn̄ onyibe ida ibe erọ. 8 Ogwu ubọọn̄ ìnyinyi ebi ikwaan̄ uwu kan̄ ikan ibe enyi ene geelek miin̄ ike ene ya oweekbe. Eya orọ, otutuuk ene enwọnwọ miin̄ ike efuuk kiban̄ obenbe, mè ike ema eweekbe.
9 Me mgbọ ogwu ubọọn̄ okitet ebirieen̄ ichen me agan̄ eyi kan̄, Basiti, nwa ogwu ubọọn̄ ototo si ijọk inyi ebibaan̄ me emen uwu ubọọn̄ eyi ogwu ubọọn̄ Ayaserọs.
Ogwu ubọọn̄ Ayaserọs îjit ogwu nwa Basiti
10 Me òso usen jaaba me lek ijọk ya, mgbọ ogwu ubọọn̄ Ayaserọs onwọbe miin̄ ikana me chieen̄, mè ikibele ejit, inenigwen Meyuman mè Bijita mè Aribona mè Bigita mè Abagita mè Jetari mè Karikas, òrere ene jaaba me lek ebi otuchieen̄ ikwaan̄ uwu kan̄, ebi esan̄abe òsok, 11 mè iniria ema ibe esi esa Basiti nwa kan̄ melek okpibot ubọọn̄ me ibot enu me isi kan̄, inyi inisa uja kan̄ ijeen̄ otutuuk ebi ene mè ebi ibot mkpulu. Me atikọ, nwa ogwu ubọọn̄ ya ìre enenwaan̄ òjajaan̄ uja me chieen̄ ene. 12 Ire, mgbọ etip ya onire lek nwa ogwu ubọọn̄, ikpakpaka ida ogwu ubọọn̄, mè ijit isisibi inu. Ogwu ubọọn̄ onanaan̄ ejit enenen, ire lek, ìkayaka ìkọt ìtet lek ìkaan̄.
13 Îre orọmijọn̄ ogwu ubọọn̄ ibe, mgbọ geelek inu ògbaan̄ me lek ikan mè oyerebet isirọn̄, ogwu ubọọn̄ ìkidadasi ido ikọ me otu ebi usọ ifuk-ibot. Eya orọ, igwegwen ebi ìriọọn̄ inu mè ebi ìkisa me lek ntoronyan̄ iriọọn̄ inu òborọ me ibot mgbọ, mè ibọkọ nteme me otu kiban̄. 14 Ebi ife chi ebi ìkukup igbet ọmọ lek, ebi îkimalek ibọkọ nteme me otu, ìre Karisena mè Setari mè Adimata mè Tasis mè Meres mè Marisena mè Memukan, òrere ebi ibot mkpulu jaaba me ido Pesia mè Midia, mè ebi irek kiban̄ obenebe ichit me mkpulu ogwu ubọọn̄ Ayaserọs.
15 Ogwu ubọọn̄ onenido ebi usọ ifuk-ibot chi ibe, “Ìre keke ke ikan otumu ibe erọ Basiti nwa ogwu ubọọn̄, ogwu òkpakpaka ibot me lek ida ogwu ubọọn̄ Ayaserọs onyibe, eyi òje me ubọk ebi otuchieen̄ ikwaan̄ uwu kan̄, ebi esan̄abe òsok?”
16 Memukan onenitumu me isi ogwu ubọọn̄ mè isi otutuuk ebi ibot ikwaan̄ cha ibe, “Basiti nwa ogwu ubọọn̄ îrọ inu òfefieek enenen. Ìkare ogwu ubọọn̄ gaalek ke îrọ inu ya ikeme, ìrọ si ikeme otutuuk ebi ibot mkpulu mè ebi otutuuk ibot ido geelek òkukup me irak mkpulu ogwu ubọọn̄ Ayaserọs. 17 Mije, etip inu yi nwa ogwu ubọọn̄ orọbe môtaan̄ ikana ere geelek, mè ire utọn̄ otutuuk ebibaan̄ geelek. Ebibaan̄ mêbebene ikikpọ nlom kiban̄ chieen̄ isiki, mè ikitumu ibe, ‘Kpọ ogwu ubọọn̄ Ayaserọs înyi ida ibe esa Basiti ogwu nwa enu, ijijit isisi.’ 18 Cherekeyi, ebibaan̄ ìrere nwa ebi ibot mkpulu me ido Pesia mè Midia mêbene ikirọ ebi olom si inu yaage, mè ikikpọ ebi nlom kiban̄, ìrere ebi ibot mkpulu ogwu ubọọn̄, chieen̄ isiki, mè ikikaan̄ ijo unaan̄-ejit me lek ebi nlom kiban̄. Wọlọwọlọ môneninin̄ me uwu geelek.
19 “Eya orọ, ire mônwọn me lek kwun̄, ogwu ubọọn̄, owu môtap ikan ònan̄a me ubọk ogwu ubọọn̄, inyi ege etap me lek ikan ebi Pesia mè Midia, eyi kpekikọt ifaan̄, ibe ke Basiti ìkpoyaka ikpọk inu me isi kwun̄, ogwu ubọọn̄ Ayaserọs, ofifi. Owu ogwu ubọọn̄ mônenisa irek kè Basiti inyi ofifi enenwaan̄ ònwọnwọn igak ọmọ. 20 Mgbọ ikan ogwu ubọọn̄ yi isire utọn̄ otutuuk ene me otutuuk owuwa ido chi geelek ogwu ubọọn̄ okikpulu, otutuuk ebibaan̄ mêkekinyi ebi olom umin, ibene me lek ebi ilile ire lek ebi asasa.”
21 Nteme ya ototop me lek ogwu ubọọn̄ mè lek ebi ibot mkpulu kan̄. Ogwu ubọọn̄ orọrọ ike Memukan otumube. 22 Mgbọ yaage egebe ikan ya isibi, ogwu ubọọn̄ oraria ikpa ichon ikana otutuuk ido kan̄ cha geelek. Ege ikan ya inyi ebi agan̄ geelek me ubọk ige inu eyi kiban̄, mè ige inyi ebi ido geelek me otu usem kiban̄. Ege ibe ke ogwu enerieen̄ geelek obore ogwu ibot me uwu kan̄, mè ikitumu usem ebi kan̄.