^a 1-2 Me òso acha iba me lek mkpulu kè Ayaserọs ogwu ilile, me adasi usen me onyan̄ Nisan, Mọdikai gwun̄ kè Jairi, gwun̄ kè Simei, gwun̄ kè Kis, ogwu otoko kè Benjamin, onenimun̄ ilaak. 3 Mọdikai ìre ogwu Ju òkiluk me ama Susa, mè ire ene ilile òkirọ ikwaan̄ me oyet egep ogwu ubọọn̄. 4 Ọmọ ìre ene ge me lek ebi Nebukadineja, ogwu ubọọn̄ Babilọn, okpulube me usun̄ akọn̄ melek Jekonaya ogwu ubọọn̄ Juda me Jeruselem. Ilaak ya îmun̄be ìre ikeyi: 5 Înọ okput mè wọlọwọlọ, mè nsook isinyọn̄, mè sikisik-ijọn̄, linyọn̄ okekijijiin̄. 6 Ikpele anam ukpook iba enanan̄a isibi inu, mè ibem lek ititim akọn̄, mè itap ikpele okput òririki ere. 7 Ida okput ya orọrọ ibe ebi ido geelek etọbọ ejibi, mè ebem lek ititim akọn̄ me lek ido eyi ata irọrọ. 8 Usen ya ìre usen udun mè ugwuuk, mè ufieejit melek ofaak, mè tukutuku melek ikpele wọlọwọlọ, me linyọn̄. 9 Otutuuk ido ata irọrọ osisisik, bak me ukpook inu òkinu inyi ema. Ema ebebem lek ibe, ire mkpa, ke ema mêkwaan̄. 10 Ema etataan̄ ukpo igwen Awaji. Mgbọ Awaji ofọọkbe ema otu, ìkup kubọk ikpele okwaan̄ òkigbuk mun̄ isibi, onan̄a me emen sọntiik gwun̄ ibot mun̄ ikilibi isibi. 11 Egwe onenitoon̄, ura obubum, Awaji ojijibi ebi irek kiban̄ osikibe ibene, ema ememeen̄ ebi unye isan̄a kpai. 12 Sa me lek ilaak ya, Mọdikai omumun̄ inu Awaji odọmọbe isan̄a îborọ. Mgbọ îmun̄be ilaak ya isan̄a, mè ibolo chieen̄, ikekikeek ilaak ya otutuuk egwe usen ya, mè ikiweek igogobo ibot ilaak ya itet.