Mfufuk òkup me emen ikpa Esita ìre mfufuk ubọk gwun̄ enenwaan̄ kpà-nte ge, ogwu Ju, ekigwen Esita, osabe me ikpele ukarajit inyan̄a ebi kiban̄, ebi Ju, isibi me ubọk ebi ochicha kiban̄. Inu chi ìbọkọ irek me uwu ogwu ubọọn̄ Pesia, ogwu ekigwen Ayaserọs. Emen ikpa yi si ke ekpa ubọk ijọk ebi Ju eyi ekigwen Purim osabe ibene.

Me emen ikpa Esita keyi, mîgbaan̄ eyi usem Iburu melek eyi usem Giris isọk. Mîtaba okop ikeyi […] ikana inu echi òkup me ikpa eyi usem Giris gaalek, echi kpunube me emen ikpa eyi usem Iburu. Ikpa Esita eyi usem Giris ìre mfufuk echi etapbe isọkọ me lek ikpa Esita eyi usem Iburu. Inu òrọrọ me emen mfufuk keyi ìre si ìkike me lek eyi usem Iburu, isan̄a me lek owuwa esese erieen̄, melek irek enyibe ubọk iraak Awaji ebi Ju.

Inu etapbe isọkọ me lek mfufuk cha ìre esese ubọk mfufuk cha osabe ibene, mè ubọk îsabe ita, mè ubọk esabe ige ikpa etip geelek echi egebe me emen mfufuk cha igọọk me ike ekige ikpa etip. Mîbieen̄ si ubọk iraak Awaji inye, sa me itap uriaak ebi kè Esita mè Mọdikai eriaakbe, mè mfufuk ubọk Awaji osabe ifọọk uriaak cha.