16
Ìsa ekpete ìkọt okwa ìtọn̄ Awaji n̄a,ìsa mkpamkpa ìkọt okwa ìnyi ọmọ;
ìsan̄a aya okwa itọn̄ ìnyi ọmọ,
ìmin ọmọ, mè ìgwen erieen̄ kan̄!
2 Okumugwem ìre Awaji òkifieek akọn̄
îgwuun̄ uwu kan̄ me etete ebi kan̄,
mè itaba emi isibi me ubọk ebi ìkililaba emi.
3 “Ogwu Asiria înan̄a me
ogoon̄ agan̄ inyọn̄ inu,
îsa akọp akọp obop ebi akọn̄ kan̄ inu;
urum kiban̄ owawa ichọkọ ichit okolo,
inyinya kiban̄ obabaan̄ ichit inyọn̄ ogoon̄.
4 Ikekigugo lek ibe ọmọ
môwọp ido n̄a iriọk,
mè isa oge akọn̄ ikpaan̄
nsabọn irieen̄ n̄a isan̄a,
mè ibọkọ ebi n̄a me otu ebe itọọn̄ ikpukpuku,
mè iteen̄ asasa nsabọn n̄a me usun̄ akọn̄,
mè ikpulu nsabọn ibaan̄ n̄a ifon.
5 Ire, Okumugwem Ogwu
Òkaan̄ Unye Geelek îgban ema,
sa me ubọk enenwaan̄.
6 Mije, ogwu unye kiban̄ ìkaje
me ubọk nsabọn irieen̄ ìkwu,
ìkare ebi oguga ile ekep ọmọ ito,
ìkarere si ebi ujọn̄ọ ile egbugbọ ọmọ ito,
ire, îre Judit gwun̄ kè Merari,
osa uja okwut isi kan̄ ibọkọ
ọmọ nroon̄ akọn̄ isan̄a me ubọk.
7 Îyaka ofọnti nwakpa kan̄ ito,
inyi ebi Ijeren
ebi ekitutuku etaan̄ etip;
îchiọọk aran̄ utop olu me isi;
8 îsa akisi ifiaka ijeek kan̄,
mè itap ofọnti lilin̄
isa ikọlọ ọmọ ebek
9 Ikpukot kan̄ înwunween̄ ọmọ chieen̄,
uja kan̄ îrie ọmọ ibot ejit,
oge akọn̄ ofefieek ọmọ ebek!
10 Unye-ejit kan̄ îtet ebi Pesia ukpook,
ukarajit kan̄ îtap ebi Midia èweke.
11 Ebi n̄a ebi etutukube
etataan̄ ukpo inwọọn̄ unwọọn̄;
ebi n̄a ebi kpunube efuuk
me owot etataan̄ ukpo,
ogwu ochicha oririki;
ema etataan̄ ukpo,
ogwu ochicha olilibi ikpebe.
12 Bọn irieen̄ mè ibaan̄
ebi usun̄ emaan̄be echichiin̄ ema itibi,
mè itaak ema unan me lek
kubọk bọn ebi mkpat akọn̄;
ema echechieen̄ ita me
ubọk ebi akọn̄ Ogwukaan̄ n̄a!
13 Mâkọt aya okwa
inyi Awaji n̄a:
Okumugwem, owu omin, mè ikaan̄ mgbugbo,
unye kwun̄ îsaba iraka,
akọn̄ ìkakifieek owu.
14 Kè otutuuk inu orombe isi ikwaan̄ inyi owu,
mije, owu onyi ida, ema otutuuk ekukup.
Owu oria Ekwukwu kwun̄a inyi ema, irorom ema;
kpunu ogwu òbokpaka ida kwun̄.
15 Ogoon̄ môkọt isisik mè igbugbọ,
okwaan̄ mè ogoon̄ mêkọt igbaan̄ ifuku,
ewuuk ìkitọtọk me isi kwun̄
kubọk mgbe,
ire, ebi ìkitet ukpook kwun̄,
òbokpọkpọ ikikaan̄ si nsan me lek kiban̄.
16 Ngwugwa òkidun̄u utop utop olu,
ìre sọntiik inu;
ikeya si okpọn̄ ewọpbe inyi
owu me ngwugwa ewọwọp,
ìre atalek sọntiik inu;
ire, ogwu geelek òkitet ukpook Okumugwem,
ìbomimin ire mgbọ geelek.
17 Môfieek inyi ido kechilọ cha
ebi ìkirọ ikeme ebi n̄a!
Okumugwem Ogwu Òkaan̄ Unye Geelek
mônyi ema osusut me usen oyerebet;
môria ukan̄ mè mkput itaak ema me ufuk,
ema mêto ito mije unan ire mgbọ geelek.”
18 Mgbọ ema erebe Jeruselem, ema etọtọbọ ebum inyi Okumugwem. Ema igbagbama lek isan̄a, ema egwagwa ngwugwa ewọwọp iriọk mè ngwugwa esuuk, mè inyi inyinyi ata ejit, melek esese uche kiban̄.
19 Judit oyayaka otutuuk inu kè Olofenes cha, ebi ene enyibe ọmọ ya, isa inyi Awaji. Okwukwek ya eyi ọmọ me lek kan̄ ojenebe me lek mkpilaak kè Olofenes, iyayaka inyi Awaji isa irọ inyan̄a-ibot înyan̄abe iso.
20 Otuuk kè onyan̄ ita ke ebi ene ekup me Jeruselem ikirie ijọk me isi Uwu Mbuban. Judit ogọgọọk ema ikup.
Etip mè mkpa kè Judit
21 Mgbọ ijọk ya otabe, ene geelek okaka uwu kan̄. Judit okaka inu me Betulia, mè isi iluk me inyọn̄ ijọn̄ kan̄. Otutuuk mgbọ îlukbe ugwem ire, ebi ene ekinyinyi ọmọ umin me otutuuk ido Ijeren.
22 Akarake Manasi ogwu olom okwube, ebenbe ifuun̄ igba ebi kan̄, owuwa ene mînu iniweek idodo ọmọ. Ire ọmọ ojijit, mè ikup me irek nwakpa, ìkafiat lek kan̄, mege otutuuk usen ugwem kan̄. 23 Judit okpọkpọ ikitaan̄ etip, mè iluk me uwu ogwu olom ikan, mege îsobe efit acha mè go. Îtele ogwu usun̄ kan̄ enenwaan̄ ibe isibi me usun̄. Inenikup me Betulia ikwu, efufuun̄ me emen nkororok ere efuun̄be Manasi ogwu olom. 24 Ebi uwu kè Ijeren etoto ito mkpa kan̄ egwe jaaba. Sabum înikwu, îche inu-nkaan̄ kan̄ inyi bọn ulọk kan̄ mè bọn ulọk kè Manasi ogwu olom.
25 Otutuuk mgbọ Judit okupbe me ugwem, mè mgbọ îkwube iraka ijọn̄ọ mgbọ, ene geege ìkayaka ìkpọk ìtap ukpook me lek ebi Ijeren.