Ebi Asiria mîlilim iweek agan̄ ugwem
15
Mgbọ ebi ene ìkukup si me emen uwu ọfọ kiban̄ enọbe etip inu òrọrọ ya, mbiribọ ogwogwook ema me lek. 2 Urimi mè ukpook otetet ema enenen, kpunu ogwu òyayaka ikọt ikup iban ogwu melek kan̄. Ema otutuuk ene elililim me oniin̄ geelek isaba lek òla ijọn̄, mè ibum itibi ogoon̄ geelek. 3 Ebi akọn̄ ebi ìgwugwuun̄ me lek ogoon̄ ikana Betulia egọgọọk iliin̄. Otutuuk ebi Ijeren, ebi geelek ìrere ebi akọn̄, elilibi igọọk ema.4 Ujiya oraria osat ijet me Betomesitayim, mè Bebai, mè Koba, mè Kola, mè otutuuk lek ogoon̄ ijọn̄ Ijeren, irọ ema eriọọn̄ inu òrọrọ, mè ibe ema otutuuk elibi esibi egọọk ebi ochicha kiban̄, mè ekpan̄ ema esan̄a kpai. 5 Mgbọ yaage ebi Ijeren ebọkọbe etip ya, ema esasa ejit ge isibi ita ichit ebi ochicha cha, mè ikpan̄ ema mege isi igwook me Koba. Ebi Jeruselem mè otutuuk ebi lek ijọn̄ ogoon̄ ogoon̄ ya egwogwook inin̄, mije, ema mînọ inu òrọrọ me m̀gba-ǹgwele ukan̄ ebi ochicha. Ebi Giliadi mè ebi Galili ekpakpa ikana ema, mè ikpan̄ ema nsak nsak mege inigbet Damasikọs, mè okike ijọn̄ keya.
6 Ebi ìsisik me Betulia eninin̄ m̀gba-ǹgwele ukan̄ ebi Asiria, mè ifum inu owuwa owuwa, mè isa me ikeya inin̄ ubọọn̄ enenen enenen. 7 Mgbọ ebi Ijeren egwube ikom inan̄a me isi akọn̄ ya ika, ekwọkwọọk inu geelek òsisik me m̀gba-ǹgwele ukan̄ ya. Ebi ìkup me ama ile mè asabọn ama geelek me agan̄ ijọn̄ ogoon̄ ogoon̄ ya, mè lek òla ijọn̄ ya, efufum ikpele mfum, mije, inu ìjojot ere gboi.
Ebi Ijeren mîwulu òkô
8 Jowakim ogwu òban Awaji melek ebi oru ebi Ijeren, ebi ìluk me Jeruselem, enunu inenikpọ ikpele ata inu Okumugwem orọbe inyi ebi Ijeren, mè inenimun̄ si Judit, mè ibe ọmọ onirọ. 9 Mgbọ ema erebe uwu kan̄, ema egbagbaan̄ itọn̄ ọmọ ibe, “Owu orọ Jeruselem itaan̄ etip! Owu orọ Ijeren igugo lek! Owu orọ ebi kiji ekaan̄ ikpele ulibi! 10 Owu gaalek orọ otutuuk inu chi, me kpunube ntap-ubọk geege. Owu orọ ikpele ata inu inyi ebi Ijeren. Awaji îbọkọ inu orọbe itap. Kè Okumugwem Ogwu Òkaan̄ Unye Geelek igbana owu mege ire mgbọ geelek.”
Otutuuk ene echechieek igwook ibe, “Ikup ikeya!”
11 Otutuuk ene efufum inu me m̀gba-ǹgwele ukan̄ ebi Asiria ya otuuk kè akọp usen ita. Enyinyi Judit uwu ọfọ kè Olofenes, mè otutuuk efeek alata okuket kan̄, mè mkpilaak kan̄ cha, mè ekpen̄ mudim kan̄, melek otutuuk inu ibala-uwu kan̄. Judit obọbọkọ, mè ikpulu itoon̄ me inyọn̄ inyinya mgbidim ukot kan̄, mè ibọp uji ekpirikpo kan̄, mè ikpulu si itaak ijot ibene me emen kiban̄.
12 Otutuuk ebibaan̄ Ijeren esisibi inimun̄ ọmọ, mè ikifit ifit isa imin ọmọ. Judit omọmọnọ agọọk uti melek inwan̄ me lek ikaan̄ me ubọk, mè isa inyi ebibaan̄ cha melek kan̄. 13 Judit mè ebibaan̄ cha melek kan̄ ekwakwaan̄ ọgbọn̄ inwan̄ uti olifu, ọmọ okekijop ikije me isi urum ebi ifit cha, ikisa otutuuk ebibaan̄ cha ije. Otutuuk ebirieen̄ Ijeren, ebebeen̄ nroon̄ akọn̄ ikaan̄, mè ikwaan̄ si ọgbọn ajakajak isa igọọk ikikọt okwa itọn̄ igọọk ema me udun̄.
Judit îkọt okwa itọn̄ inyi Awaji
14 Ike otutuuk ebi Ijeren ekanabe Judit okokop, Judit ototo okwa itọn̄ keyi, otutuuk ene egọgọọk ikitaan̄ ukpo ikikọt ibe: