2 “Egwe isiwele, mè ura isibum, otutuuk ebi lek osobe ekpulu nroon̄ akọn̄ kiban̄, mè eje esibi me ama. Ìsan̄a ogwu ibot ìnyi ema, mè ìfiaan̄ ìrọ kubọk enyi ebegele isiki ifo lek òla ijọn̄ isi lek ebi akọn̄ ebi Asiria etobe me ere ya. Ire, ikasi-nu. 3 Ebi Asiria ìkup me ere ya mêneniteen̄ nroon̄ akọn̄ kiban̄, mè isi m̀gba-ǹgwele ukan̄ kiban̄ isi itimi ebi ibot kiban̄. Ebiba mênenilibi isi uwu ọfọ kè Olofenes, ire, kpebemun̄ lek kan̄. Urimi mônenigwook ichit ema lek, ema mêkekililim inan̄a me isi kinyi. 4 Mgbọ keya, enyi mè otutuuk ebi geelek ìluk me inyọn̄ ijọn̄ ebi Ijeren mêtotolek inigọọk ema, mè ikeen̄ ema ikpan̄ ike ema mêkililim ikpebe. 5 Ire, sabum enyi ènerọ inu chi geelek, ìgwen Akiyọ ogwu Amọn ìjet emi, inyi inimun̄ ene yi, mè iriọọn̄ isi, ogwu òkpọkpọ ebi uwu kè Ijeren isiki chieen̄, mè iria ọmọ ijet eji kubọk ogwu eriabe ibe inikwu mkpa.”

6 Esisi igwen Akiyọ me uwu kè Ujiya inu. Akiyọ inunu, mè inimun̄ ibot kè Olofenes me ubọk ene ge me lek ebi ìtititiin̄ cha, irọrọn̄ ikana isi ichit me ijọn̄, mè igak iweek. 7 Mgbọ ebenebe igwuun̄, lek kan̄ osikibe, igwogwook ekpe me ukot kè Judit, mè ibe, “Kè otutuuk uwu ebi Juda etọn̄ owu. Kè mbiribọ igwook me lek ido geelek ònọnọ erieen̄ kwun. 8 Kpa nyi emi-nu inu orọbe me otutuuk usen chi.”

Judit okukup me isi otutuuk ebi ìgbagban ikana ọmọ ikpa inyi Akiyọ inu geelek ọmọ orọbe bene me usen ọmọ onan̄abe me Betulia inire mgbọ keyi ọmọ okitumu ikọ yi. 9 Mgbọ îkpabe ire òta, ebi ene etataan̄ ukpo ikinwọọn̄ lek, ama odidimi ichak.

10 Mgbọ Akiyọ omun̄be ikpele ikwaan̄ Awaji ebi Ijeren orọbe, ichechieek inye me lek Awaji, efefieek ọmọ afi, mè ibọkọ ọmọ itap me uwu kè Ijeren, ikukup ikeya inire mgbọ geelek.

11 Mgbọ egwe owelebe, ebeben ibot kè Olofenes ijeen̄ me lek mgban ama. Otutuuk ene eteteen̄ nroon̄ akọn̄ kiban̄ ikwaan̄, mè ije me ukpa me ukpa ifo lek osiki ijọn̄ ogoon̄. 12 Mgbọ ebi Asiria emun̄be ema, eraria etip ijet ebi ibot kiban̄, ebiba esisi ikpa inyi ebi isi kiban̄, mè ebi ibot ìkikpulu obop ene, mè otutuuk ebi ibot kechilọ geelek. 13 Ebi ibot chi geelek esisi uwu ọfọ kè Olofenes, mè itumu inyi Bagowas ogwu ibot ikwaan̄ akpalek kan̄ ibe, “Timi ogwukaan̄ kiji. Ebi usun̄ chi mîkan chieen̄ isibi inu ibenitim eji akọn̄ me lek. Ebekwakwaan̄ ita kpai!”

14 Bagowas otitibi inin̄ uwu, mè ikup me isi ekwut ukwek esabe ifieek ikwek uwu ọfọ ya ikisulu ubọk, mije, ìkikeek ibe ke Olofenes òwa okilaak melek kè Judit. 15 Mgbọ ene geege ikabọkọge otu, itataba ekwut ukwek ya igba, mè iraka inin̄ emen agwut ya, mè isi imun̄ Olofenes oyatbe iwele me ijọn̄, nkwukwu, kpunu ibot me lek. 16 Bagowas obọbọn̄ ukpo, mè ito ito, mè ikifim, mè itaan̄ ukpo, mè igwak ofọnti me lek. 17 Inenisi inin̄ uwu ọfọ eyi Judit okupbe me emen, ire, ìkamun̄ Judit. Ililibi isibi isi lek ebi ene cha, mè ikitaan̄ ukpo ibe, 18 “Ebi usun̄ cha mîfiaan̄ eji! Enenwaan̄ Iburu ge îsa esip ijet uwu ogwu ubọọn̄ Nebukadineja. Ìnisi ìkpọ, Olofenes me ijọn̄ olaakbe, mîfieek ibot isan̄a me lek!” 19 Mgbọ ebi isi akọn̄ ebi Asiria cha enọbe ikeyi, ema egwagwak ofọnti kiban̄ mije ikpele ufieejit. Okput ito kiban̄ mè ukpo kiban̄ okekirep me otutuuk emen m̀gba-ǹgwele ukan̄ ya.