4 Me ike mgbọ ya, otutuuk ene mîsibi isan̄a kpai, ere okpọkpọọk, kpunu ogwu ilile geege mè ìre ogwu ijija òkukup me agwut ya. Judit onenikeke me agba lek mkpilaak kè Olofenes ya, mè iriaak uriaak me emen ejit kan̄ ibe, “Okumugwem Awaji, unye geelek ìre owu okaan̄, tap ubọk, inyi inu ubọk n̄a oborọ mgbọ yi ije ijaan̄, inyi môre ikpele umin inyi Jeruselem. 5 Mije, mgbọ ya ire eyi, mgbọ owu obonyan̄a ebi okaan̄be me ìrot, mè irọ ibe nkeek n̄a, òrere ijijijaka ebi ochicha ìnunu eji akọn̄ me lek, irọ iso.” 6 Irariaak uriaak ya isan̄a, inenije isi lek atà mkpilaak kè Olofenes me agan̄ ibot, mè ijene oge akọn̄ kè Olofenes, eyi ejeen̄be me ere ya. 7 Inenije iriaak me lek mkpilaak ya, mè itet Olofenes me lek ijeek ibot, mè iriaak uriaak ibe, “Jei Okumugwem Awaji ebi Ijeren, tap emi unye me lek cherekeyi.” 8 Isasa otutuuk unye kan̄ ikep Olofenes mgbọ iba me ebek, mè ifieek ibot san̄a me lek. 9 Inenikpukpọt akpalek kè Olofenes isan̄a me inyọn̄ mkpilaak, mè ijene okwukwek mkpilaak ya isan̄a me lek atà. Sọnja mgbọ iraraka, isasa ibot kè Olofenes isibi, mè isa inyi ogwu usun̄ kan̄ enenwaan̄. 10 Ogwa obọbọkọ itap me emen akpa inorie kan̄.

Ema ene iba egbagbaan̄ isibi me m̀gba-ǹgwele ukan̄ ya, kubọk ema ekirọ mgbọ geelek ema ekisi uriaak. Ema ijeje itibi m̀gba-ǹgwele ukan̄ ya, etoto ikana me lek iteke ijọn̄, mè inene inyọn̄ ogoon̄ ifo Betulia, mè inire otunchit ama ya. 11 Judit okukup me ujọn̄ọ ere itaan̄ ukpo inyi ebi ìkibem otunchit ya ibe, “Ìgwuku otunchit! Ìgwuku otunchit! Okumugwem Awaji kiji òwa melek kiji si okupbe ikijeen̄ unye kan̄ me Ijeren, mè ikijeen̄ si unye-lek kan̄, eyi îkisa irọ ebi ochicha kiji inu, kubọk îrọbe me chereyi!”

12 Mgbọ ebirieen̄ ama kiban̄ cha enọbe ida kan̄, elilibi ugwat ugwat isibi isi otunchit ama, mè igween̄ ebi ugane ama ititiin̄. 13 Otutuuk ene, ebi ilile mè ebi ijija, elilibi isibi inu, mije, kpekpọ chieen̄ ibe ke môyaka ika. Egwugwuku otunchit inyi ema, mè ibọkọ ema itap, mè imin ukan̄ itoon̄ ere, mè igban ikana ema okokop.

14 Judit obebene ida itaan̄ ukpo ibe, “Ìtọn̄ Awaji! Ìtọn̄ ọmọ! Ìtọn̄ Awaji ogwu ìkatet nsan kan̄ me lek ebi uwu Ijeren ìkaan̄, ire, ijijijaka ebi ochicha kiji me eririeen̄ keyi, sa me ubọk n̄a!”

15 Inenitaba ibot ene ya isibi me emen akpa ya isa ijeen̄ ema, mè ibe, “Ìkpọ, ibot kè Olofenes, ogwu ibot otutuuk ebi otu-uji akọn̄ ebi Asiria, ire eyi. Eyiyi ìre okwukwek îlaakbe me irak mgbọ înwọbe miin̄ isa idide. Okumugwem îsa me ubọk enenwaan̄ ikpan̄ ọmọ! 16 Kè lek Okumugwem, ogwu òbebem emi me oniin̄ njebe! Okwut isi n̄a ofiaan̄ ọmọ itap me ichep. Ìkarọ ijo inu geege me lek n̄a ìsa ìfifila emi, mè ìtap emi esip me isi.”

17 Inu ya okeke otutuuk ene me emen ama chieen̄ enenen. Ema egwogwook ekpe me ijọn̄, mè itọbọ ebum inyi Awaji, mè igbaan̄ itumu ibe, “Jei Awaji kiji, itọn̄ ikup inyi owu. Owu otap ebi ochicha ebi kwun̄ esip me isi cherekeyi!”

18 Ujiya onenibe Judit, “Gwun̄ n̄a enenwaan̄, Awaji Ogwu Òbebene Ichit îgbana owu igak otutuuk ebibaan̄ me linyọn̄. Itọn̄ ikup inyi Okumugwem Awaji, ogwu òrom inyọn̄ mè ijọn̄. Îsa owu ije, inyi owu òfieek ibot ogwu ibot ebi ochicha kiji. 19 Ebilene kpebewuuk utoon̄-ejit okaan̄be me lek Awaji, ire, môkirọ inyi ema ekekeek unye eyi Awaji. 20 Kè Awaji irọ inyi ekenyi owu ulibi mgbọ geelek mije inu yi, mè inyi owu ugbana kubọk mkpukpe. Mije, òkakeek ugwem eyi kwun̄ me mgbọ ido kiji orọn̄be isiki. Ire, owu okekeke inye me lek Awaji, mè ibieen̄ mfufiat isan̄a eji me lek.”

Otutuuk ene echechieek igwook ibe, “Ikup ikeya! Ikup ikeya!”