Olofenes îbọkọ Judit itap
12
Olofenes onenibe etap Judit me uwu me ere enen̄ebe efeek alata okuket îkisa irie inorie isun̄, mè eto ikasi inorie enyi Judit, mè enyi inorie eyi ọmọ okirie, mè etọkọ miin̄ eyi ọmọ okinwọ enyi. 2 Ire, Judit obebe, “In̄-in̄, m̀kparie, kisi ǹchaka ikan. Inorie eyi nsabe inu môso emi.”3 Olofenes ododo ọmọ ibe, “Ire inorie osabe inu ita, mọmọ ubọk eji eberọ ikaan̄ mbet keya inyi owu? Eji kpekaan̄ ogwu kinyi geege me ere keyi.”
4 Judit ofọfọọk ọmọ ibe, “Ogwukaan̄ n̄a, katet ukpook. Sabum inorie ogwu ikwaan̄ kwun̄ ònota, Okumugwem îra isasa emi irọ nkeek kan̄ isan̄a.”
5 Ebi ikwaan̄ uwu kè Olofenes esasa ọmọ isi itap me uwu ọfọ ge, ere îlaakbe ire ejit eririeen̄. Sabum mgbọ iban-ere agan̄ egwe onire, ibobolo chieen̄, 6 mè iria etip ijet Olofenes ibe, “Nye lek nyi ida, inyi etele ibe ogwu ikwaan̄ kwun̄ isibi isi iriaak uriaak.”
7 Olofenes onyinyi ebi ìkibem ọmọ ida ibe ekagban ogwugwu. Ikukup me m̀gba-ǹgwele ukan̄ ya egwe ita. Eririeen̄ geelek îra ikisibi isi iteke ijọn̄ Betulia, mè òken mun̄ me emen odidim ya. 8 Isiken isan̄a, îra iriaak Okumugwem Awaji ebi Ijeren ibe ijeen̄ ọmọ oniin̄, inyi ebi kan̄ etim ekpan̄. 9 Isigwọk lek isan̄a, îra ika inikup me uwu ọfọ kan̄ mege ire ikakwun̄, mè ònorie inorie.
Judit îsi ijọk inorie mè miin̄ Olofenes otobe
10 Me òso egwe ini, Olofenes onenito ijọk inorie mè miin̄ inyi ebi ìkikpọ ọmọ chieen̄ me lek gaalek, ìkagwen ebi ibot akọn̄ geege. 11 Inenibe Bagowas, ogwu esan̄abe òsok òkikpọ chieen̄ me inu òfo me lek kan̄ gaalek, “Je si sisaak ogwu enenwaan̄ Iburu òkup me ubọk kwun̄ ibe inu, mè inigọọk eji irie, mè inwọ. 12 Môre inu esip itetele enenwaan̄ òkup ikeya ibe ifo, kpelaak. Ire eji kpechieek mkpa itet me unye ilaak, môchak eji me imọm.”
13 Bagowas otetele Olofenes, mè isi lek kè Judit, mè ibe, “Ujuja gwun̄ enenwaan̄, ìre môneme owu inunu me lek ogwukaan̄ n̄a ni? Mênyi owu irek umin me isi kan̄. Owu môgọọk eji inwọ miin̄ ibele ejit, mè ikup kubọk ebibaan̄ Asiria ebi ìkirọ ikwaan̄ me uwu ogwu ubọọn̄ Nebukadineja.”
14 Judit ofọfọọk ibe, “Emi ìre ekene, ogwu òbonijit ogwukaan̄ n̄a? M̀kpajit inu geelek îweekbe ibe emi ǹrọ. Ìbore unwọọn̄ inyi emi isi ire usen kpa n̄a!”
15 Judit onanan̄a ikeke isi inwene lek, mè ibala lek otutuuk ubọk îkibala kubọk enenwaan̄. Ogwu usun̄ kan̄ enenwaan̄ odadasi kan̄ ije, mè isa ikpa arọọn̄, eyi Bagowas onyibe Judit ibe ikisa irọ inu usen geelek, isi iwele me ijọn̄ me isi kè Olofenes, inyi Judit môkup me inyọn̄ ikirie inorie. 16 Judit oninin̄ inu inikup me irek kan̄. Olofenes imumun̄ lek, ebek okekigọlọ, lek okekitek. Ulọk ilaak enenwaan̄ ya otatap ọmọ sese, mije, bene me adasi usen îmun̄be Judit, ìkikpọkpọ ibe irek isibi, inyi ọmọ itet me unye ilaak. 17 Olofenes onenibe ọmọ, “Nwọ miin̄, mè gọọk eji bele ejit!”
18 Judit obebe, “Ogwukaan̄ n̄a, mâbele ejit inwọ, mije, akarake emanbe emi, chereyi ke ugwem n̄a omin emi me lek ichit.” 19 Inenimọnọ inorie ogwu usun̄ kan̄ enenwaan̄ obalabe, mè ikup me isi kè Olofenes irie mè inwọ. 20 Ulọk kan̄ îtet Olofenes kubọk ǹcha, inwọnwọ miin̄ iwa enenen isaba iraka ike îkinwọ me usen ge, karake emanbe ọmọ.