5 Judit onenibe, “Soso, gban̄ ikọ ogwu usun̄ kwun̄ obotumu. Nye lek chieek ibe gwun̄ ikwaan̄ kwun̄ itumu ikọ me isi kwun̄. M̀kpakan̄ ataak geege inyi ogwukaan̄ n̄a me eririeen̄ yi. 6 Ire ogọọk otu ikọ ogwu ikwaan̄ kwun̄ enenwaan̄ obotumu, Awaji môsa owu irọ ikwaan̄, inu geelek owu ogwukaan̄ n̄a odọmọbe, ìkpolọ. 7 Ujọn̄ọ ugwem ikup inyi Nebukadineja, ogwu ubọọn̄ otutuuk linyọn̄, ogwu òraria owu isibi ibe owu ònonen̄e ebilene geelek òtat. Kè unye kan̄ ikup ire mgbọ geelek! Sa me lek kwun̄, ìkare ebilene gaalek ekirọ ikwaan̄ inyi ọmọ, ire, ebi kè anam oron mè anam uwu, melek ebi kè ofut òwulu me inyọn̄ otutuuk, ebeluk ugwem mije unye kwun̄, mè ikirọ ikwaan̄ inyi Nebukadineja melek otutuuk uwu kan̄.

8 “Me atikọ, eji mînọ inu ofolek iriọọn̄-inu me ifuk-ibot okaan̄be. Ere geelek me otutuuk linyọn̄, mêkitumu ibe ke owu gaalek onwọn ichit me irak otutuuk mkpulu Asiria, ke owu ofaak me igwugwuku chieen̄, mè isibi esese me irọriọọn̄ ukot akọn̄. 9 Eji mînọ si ikọ Akiyọ otumube me emen ntitiin̄ ebi oru kwun̄. Ebi Betulia kpechak ọmọ ubọk me lek, ọmọ si okpakpa otutuuk inu îtumube inyi owu. 10 Nte uwu n̄a mè ogwukaan̄ n̄a, kakpọ ikọ kan̄ ìlọ chieen̄. Tap me ejit kwun̄, mije, îre atikọ, kpebekọt inyi ido kiji osusut, akọn̄ si ìkpokọkọt irie ema, îtata ema erọrọ Awaji kiban̄ ilọ.

11 “Ogwukaan̄ n̄a, ike îkupbe me mgbọ keyi, ema kpebekọt ibieen̄ owu ikpebe, kpebekọkọt si ijijaka nkeek kwun̄. Mkpa mônirọn̄ ikeme ema me ibot, mije, ijo inu îbọkọ ema irek. Ema mêniribi Awaji kiban̄ unaan̄-ejit mgbọ ema mêrọbe inu òlọlọ. 12 Mgbọ keyi inorie kiban̄ otabe, mudim kiban̄ òkifo lek irarak, ema mîtọt ikpakpan̄ anam uwu kiban̄, mè iben me ejit irerie otutuuk inu cha Awaji otapbe Ikan kan̄ igban ibe ema ekarie. 13 Ofifi kan̄, ema mîtumu ifieek me ejit kiban̄ irerie adasi mfut akpa erọkọbe me uko, mè irek ge me akọp irek miin̄ melek aran̄, echi ema ekisun̄ me mbuban, mè ikisan̄a isun̄ esese inyi ebi ngwugwa ebi ìkikup me Jeruselem ikirọ ikwaan̄ me isi Awaji kiji. Inu chi ìre inu echi Ikan ogbanbe ibe ebi ikike ekachak ubọk me lek. 14 Eyi ebi ìkup me Jeruselem ekekirọrọ inu ya, ema mîria ene isi ibe esi ebọkọ unye me ubọk Oru ebi ugane ama, inyi ema mêgọọk irọ si ikeya. 15 Isibọkọ unye ya ika, mè irọ ikpọ me lek, usen yaage, Awaji môyaka ema itap owu me ubọk, ibe owu òjijaka. 16 Mgbọ emi, gwun̄ ikwaan̄ kwun̄, nnọbe otutuuk inu kechi, nlilibi inan̄a itele ema. Awaji ìria emi inu ibe emi ǹnengọọk owu ǹrọ inu echi môkebe ebi linyọn̄ chieen̄ mgbọ ema isinọ. 17 Mije, emi ogwu ikwaan̄ kwun̄ ìre enenwaan̄ òkitet ukpook me lek Awaji, mè ikitọbọ ebum inyi Awaji òkup me inyọn̄ ikarek mè eririeen̄. Eya orọ, ogwukaan̄ n̄a, mâgọọk owu ikup. Ire, eririeen̄ geelek, emi, ogwu ikwaan̄ kwun̄, mâkisibi isi emen iteke isi iriaak Awaji, inyi, mgbọ ema isirọ ijo inu ya, Awaji môtutumu inyi emi. 18 Emi mânenilook owu, inyi owu môsa otutuuk urum akọn̄ kwun̄ isibi igọọk ema. Ene geege kiban̄ ìkpokọt ikeke ida owu. 19 Emi mânenisa owu ije itibi Judia mege isi ire Jeruselem. Ere keya ke mârọ owu ubọọn̄ me eden̄ ama ya. Owu môneniyiyala ema kubọk arọọn̄ ikakaan̄ge ogwu òkikpukpo. Ibo geege ìkpokama otu igbin owu. Awaji îwuwuuk lek ichili inu yi ijeen̄ emi. Mgbọ yaage îchilibe ijeen̄ emi, iraria emi ibe ǹnemkpọk mbum inu yi ǹnyi owu.”

20 Ikọ kan̄ ototop Olofenes mè otutuuk ebi ikwaan̄ kan̄ me lek. Ema etọtọn̄ iriọọn̄-inu kan̄, mè ibe, 21 “Kpunu enenwaan̄ geege, bene me okputut linyọn̄ agan̄ ge si re agan̄ keyilọ, òjajaan̄ uja ikeyi, mè ikitumu ikọ me iriọọn̄-inu ikeyi!”

22 Olofenes obebe, “Awaji îrọ ijaan̄ idadasi iria owu me isi ebi kinyi inu, inyi eji mêkaan̄ unye, mè ijijaka ema ebi ìnyenye chieen̄ inyi ogwukaan̄ n̄a. 23 Ire owu, ubọk ojaan̄be uja, ikeya si ke oriọọn̄ itumu ikọ. Ire orọ ike ochieekbe use, Awaji kwun̄ môre Awaji n̄a, owu me lek kwun̄ môluk me emen uwu ubọọn̄ kè Nebukadineja, mè ikitaan̄ etip iso otutuuk linyọn̄.”