Judit ìsi m̀gba-ǹgwele ukan̄ kè Olofenes
10
Mgbọ Judit oriaakbe uriaak mè ito ito igwen Awaji ebi Ijeren isan̄a, 2 inanan̄a ikeke me ere ya îgbanbe inyan̄a. Inenigwen ogwu usun̄ kan̄ enenwaan̄, mè inan̄a isibi isi inin̄ emen agwut ere îkikup me Usen Mbuban, mè usen ijọk. 3 Inenitọn̄ọ ekwut ufieejit îkikwun ya ito, mè iwọọk ofọnti nwakpa isan̄a, mè iken mun̄, mè ichiọọk aran̄ unye otu ewe òtotop olu me lek, mè iyat ijeek kan̄, mè isa akisi ifiaka ikana, mè itap ofọnti kan̄ òjajaan̄ ichit eyi îkitap me usen ijọk, mgbọ Manasi ogwu olom okupbe me ugwem. 4 Inenitap ikpukot me ukot, mè itap asi ebek, mè asi ebek ubọk, mè mkpọtubọk, mè mkputọn̄, mè otutuuk ujuja inu nken kan̄, mè ibala lek kan̄, mè ijaan̄ uja enenen, ufuna enerieen̄ geelek òmumun̄ ọmọ ikọọn̄ chieen̄. 5 Ineniben miin̄ me ogbokot ikpa anam, mè aran̄ me emen iko inyi ogwu usun̄ kan̄ enenwaan̄, mè itap akpa balì ewọpbe ijot akpa, mè nchicha nchat figi, mè ata fituru, mè inigbaan̄ otutuuk inorie chi ibọp isa inyi gwun̄ ikwaan̄ kan̄ enenwaan̄ ya iben.6 Ema enenisibi ije ifo lek otunchit ama Betulia, mè isi imun̄ Ujiya mè ebi ugane ama cha, Kabiris melek Kamis ekekebe ikikup iban ema. 7 Mgbọ ema emun̄be Judit, mè imun̄ ubọk isi kan̄ onwenebe, mè imun̄ nken òsisibi esese me lek kan̄, uja kan̄ oririki ema lek. Ema ebebe ọmọ, 8 “Kè Awaji ebi nte nte kiji igọọk owu me udun̄, mè irọ ibe inu otọtbe irọ iso, inyi ebi Ijeren mêkaan̄ umin, mè Jeruselem itaan̄ etip.”
Judit otọtọbọ ebum inyi Awaji, 9 mè itumu inyi ema ibe, “Ìnyi ida ibe egwuku otunchit ama enyi emi, inyi ǹje ǹsibi ǹsi ǹrọ inu enyi etumube melek n̄a.” Enenibe nsabọn irieen̄ egwuku otunchit enyi, ike îbeekbe. 10 Mgbọ egwukube otunchit, Judit osisibi, ọmọ melek ogwu usun̄ kan̄ enenwaan̄. Ebi ene me ama ekekikpọ ike îkije me lek ogoon̄ igele isibi, mè isaba lek iteke ijọn̄, mege ichechep me chieen̄ kiban̄.
Ebi Asiria mîtet Judit
11 Ebibaan̄ iba chi etetet isi itat ikije me lek iteke ya, ebi akọn̄ Asiria ìkijijen̄e ikpọ ere, echichichini ema, 12 mè itet Judit, mè ikido ikọ ibe, “Ogwu ido owa ke owu ore? Ònan̄a me ere owa inu? Òbosi ere owa?”
Ifọfọọk ibe, “Emi ìre gwun̄ enenwaan̄ Iburu. Ire, ǹkililibi itele ebi n̄a, mije, Awaji môniyaka ema inyi enyi egwak eche. 13 M̀basi imun̄ Olofenes, ogwu ibot akọn̄ kinyi, isi ikpa ata mbia inyi. Mâjeen̄ ọmọ ike îborọ isa ibọkọ otutuuk agan̄ ijọn̄ ogoon̄ ogoon̄ ya, eyi ene geege kan̄ ìkponan̄a me lek ichep.”
14 Mgbọ ebirieen̄ cha ekigban̄ ikọ îkitumu, ema ekekigwuun̄ chieen̄ ikpọ isi kan̄, mije, îjaan̄ uja enenen me chieen̄ kiban̄. Ema enenibe ọmọ, 15 “Eyi ogwagwat lek isibi inu me lek ogwukaan̄ kiji, owu onyan̄a ebek ugwem kwun̄. Kpọkpọ raka si uwu ọfọ kan̄. Usini kiji mêsa owu iban, mè iyaka owu itap me ubọk kan̄. 16 Osire isi kan̄, kafieek owot geege. Tumu inu otumube inyi eji mgbọ keyi nyi ọmọ, ke môrọ owu ijaan̄.”
17 Ema esasan̄a efit ene ibe esa ọmọ mè ogwu usun̄ kan̄ enenwaan̄ eban. Ebiba esasa ema iban inire uwu ọfọ kè Olofenes.
18 Etip inunu kan̄ ojeje ikana me uwu ọfọ me uwu ọfọ, mè idimi m̀gba-ǹgwele ukan̄ ya isi ichak. Mgbọ ebi akọn̄ cha enin̄be isi ikitumu ikọ òfo me lek kan̄ inyi Olofenes, urum ofifi ebi akọn̄ esisibi inu inikeke ikana ọmọ okokop, me isi oyet uwu ọfọ kè Olofenes, ere îkekebe ikikpọ ibe esa ọmọ ejeen̄ ogwa. 19 Uja kan̄ okeke ema chieen̄, ema esasa me lek kan̄ ikiririin̄ ubọk ebi Ijeren ejaan̄be ire. Ema ekekitumu me etete kiban̄ ibe, “Ekene obokọt ikpọ ebi ìkaan̄ ebibaan̄ ijaan̄ uja ikeyi isiki chieen̄? Înwọn ibe ekatele enerieen̄ geege kiban̄ iluk ugwem. Ire itele, ife chi mêfit chieen̄ otutuuk linyọn̄!”
Judit îre isi kè Olofenes
20 Ebi ìkibem Olofenes, mè otutuuk ebi ikwaan̄ kan̄ esisibi inu inisa Judit inin̄ emen uwu ọfọ ya. 21 Me mgbọ ya, Olofenes me inyọn̄ mkpilaak kan̄ okitọbọ efuuk. Mkpilaak ya îkaan̄ okwukwek esabe igbaka ichit. Esa eri irio irio mè eri alata araran̄ ilọk okwukwek ya, mè isa ewuuk unye otu ewe, emeran, mè ofifi chieen̄ ewuuk unye otu ewe inwunwan̄ me lek.
22 Mgbọ elookbe Olofenes ibe ke mîsa Judit inu, isisibi inu me isi uwu ọfọ melek mkpukan̄ alata okuket ekisa ije me isi kan̄. 23 Mgbọ Judit okekebe me isi kè Olofenes mè ebi ikwaan̄ kan̄, uja isi kan̄ okeke ema otutuuk ene chieen̄. Judit orọrọn̄ inyana me ijọn̄ ikana isi ikwuun̄ inyi Olofenes ulibi. Ire, ebi ikwaan̄ kè Olofenes ebebene ọmọ me ijọn̄ igwuun̄.