2 “Jei Okumugwem, Awaji kè Simiọn nte n̄a. Owu onyi nte n̄a oge akọn̄ îsabe isan̄a useen̄ me lek ebi ìtọtọn̄ọ obaak enenwaan̄ fanti me ebon isa ififila ọmọ. Mîchili ọmọ owut-ukot isa itap ọmọ esip me isi, mè ichichaka akpa gwun̄ kan̄ isa irọ ọmọ ochak. Eyi ìre inu owu otumube ibe ekarọ. Ire, ema erọrọ. 3 Bak me lek keya, owu osasa ebi ibot mkpulu kiban̄ inyi ekpan̄, eje okeken mkpilaak kiban̄ ema esabe ofiaan̄ ififila. Owu ògbagbaan̄ ebi usun̄ mè ebi ubọọn̄ ijijaka, mè ikpan̄ ebi ubọọn̄ me inyọn̄ ogboon̄ ubọọn̄ kiban̄. 4 Owu otele ibe esa ebi nwa kiban̄ eje, mè eteen̄ bọn ebibaan̄ kiban̄ me usun̄ akọn̄, mè eche inu kiban̄ efumbe enyi bọn kwun̄ ebi owu omabe, ebi ulọk kiban̄ ominbe me lek kwun̄, ebi kpema eje kiban̄ ya efifilabe, ebi ìgwegwen owu ibe owu ònotap ubọk ònyi ema.

“Awaji, jei Awaji n̄a, nọ si ida n̄a, emi ogwu nwakpa keyi. 5 Mije, owu orọ inu cha, echi mgbọ òraraka, mè mgbọ ògọgọọk. Owu odọmọ si inu echi òkirọrọ mgbọ keyi, mè echi òbogọọk. Me atikọ, inu geelek owu odọmọbe îrọ iso. 6 Inu echi owu odọmọbe cha esisibi ikeke, mè ikibe, ‘Kpọ eji ire ebi!’ Mije, owu òkineneen̄ otutuuk inu kwun̄ geelek isun̄ itele, inu geelek otumube ifieek, òkidadasi iriọọn̄ isan̄a.

7 “Kpọ, ebi Asiria mînye lek mgbọ keyi igak adasi mgbọ, mè ikigugo lek urum akọn̄ ema ekaan̄be, mè ikisa inyinya kiban̄ mè ebi ìkikọp ibaan̄ alọm, mè ikisa unye ebi akọn̄ ukot ukot kiban̄ iriak lek. Ekisa agbọ mè otunwa kiban̄ itoon̄ ejit, mè ogbaan̄ melek olik mgbọlọ kiban̄. Kperiọọn̄ ibe ke owu ore Okumugwem, ogwu òkiyat akọn̄. Owu gaalek okichieek Okumugwem. 8 Sa unye kwun̄ kpukpuku unye kiban̄, mè sa unaan̄-ejit kwun̄ da unye kiban̄ gwook. Mije, ema ekitọt inenififila ere mbuban kwun̄, mè ichichaka Akpatan̄ Mbuban, ere erieen̄ mgbugbo kwun̄ okikup, mè inenisa oge akọn̄ kiban̄ igọ iko lek ntook ngwugwa kwun̄ igwook. 9 Kpọ ugumulek kiban̄, mè gbuku uyok uyok unaan̄-ejit kwun̄ gwook ema me ibot! Nyi emi, ogwu nwakpa yi, unye-ejit isasa irọ inu òkup emi me ejit. 10 Sa ofiaan̄ òbonan̄a me otu n̄a kpan̄ ogwu usun̄ melek ogwu nte uwu, mè nte uwu melek gwun̄ uwu. Kpukpuku ugumulek kiban̄ sa me ubọk enenwaan̄. 11 Unye kwun̄ ìkare me uwa ene, unye ubọk kwun̄ me akọn̄ ìkabieen̄ me lek ebirieen̄ ebi unye. Mije, owu ìre Awaji ebi ìsisiki lek, ogwu ntap-ubọk ebi ekitutuku, ogwu òkibieen̄ ebi kpenye lek ikaan̄, ogwu òkikput lek ebi una ene, mè ogwu unyan̄a ebi kpekaan̄ ikpọchieen̄. 12 Soso, soso, nọ emi ida, jei Awaji kè nte n̄a, Awaji ogwu òrere ìrot ebi Ijeren, Ogwukaan̄ Inyọn̄ mè Ijọn̄, Ogwu Òrorom okwaan̄, Ogwu Ubọọn̄ otutuuk nrom. Soso, nọ uriaak n̄a. 13 Nyi emi otu eyi ofiaan̄, ǹsa ǹtap unan, mè ǹsa m̀kpan̄ ebi ìtọtọt inu ikpak eberọ ikeme inyan̄a-ibot kwun̄, ikeme Uwu Mbuban kwun̄ eyi egbamabe lek, ikeme inyọn̄ ibot ogoon̄ Sayọn, mè irọ ikeme uwu bọn kwun̄ ekaan̄be. 14 Rọ sa jeen̄ otutuuk ebi ido kwun̄, mè otoko geelek, ibe ke owu ore Okumugwem, Awaji ogwu mkpulu mè unye geelek okupbe me ubọk, jeen̄ ibe ke kpunu ofifi ogwu geege òkikput ebi Ijeren lek, ilọ me lek kwun̄ gaalek.”