Judit ogwu nwakpa
8
Me ike mgbọ ya, Judit onọnọ inu cha òkibọkọ irek. Judit ìre gwun̄ enenwaan̄ kè Merari, gwun̄ kè Okisi, gwun̄ kè Josefu, gwun̄ kè Ojien, gwun̄ kè Elikaya, gwun̄ kè Ananayas, gwun̄ kè Gidiọn, gwun̄ kè Rafayim, gwun̄ kè Ayitubu, gwun̄ kè Ilaija, gwun̄ kè Ilikiya, gwun̄ kè Eliabu, gwun̄ kè Netanayen, gwun̄ kè Salamien, gwun̄ kè Sarasadai, gwun̄ kè Ijeren. 2 Manasi, ogwu olom, ogwu otoko mè ototun̄ ukan̄ yaage melek kan̄, ìkwu me mgbọ ekirọkọ akpa balì me uko. 3 Ike îkekebe me uko ikikpọ chieen̄ me lek ebi ìkibọp akpa, uyok ura otatap ọmọ orukan̄ me lek, ifafiak ikup me inyọn̄ mkpilaak, mè ikwu me Betulia, ama kiban̄, efufuun̄ ọmọ me agba lek ebi nte nte kan̄ me lek oron òkup me etete Dotan mè Balamọn.4 Judit oluluk me uwu kan̄ me irek nwakpa acha ita mè onyan̄ ini. 5 Înama atanga itoon̄ me inyọn̄ otoon̄-uwu, mè inin̄ iluk. Ìkitobo ekwut ufieejit ikana ebon, mè ikiken nken nwakpa. 6 Ìkijijin otu otutuuk usen cha îrebe nwakpa, îtata usen òbowele Usen Mbuban, mè Usen Mbuban me lek kan̄, mè usen òbowele Usen ijọk Aya Onyan̄, mè usen Aya Onyan̄ me lek kan̄, mè usen geelek òrere usen ijọk, mgbọ ebi uwu kè Ijeren ekibele ejit. 7 Judit îjaan̄ uja enenen, mè igbe ikpọkpọ. Manasi ogwu olom îkwu itele alata araran̄ mè alata okuket inyi, mè itele si ebi usun̄ ebirieen̄ mè ebibaan̄ melek anam, mè ijọn̄ uko. Ọmọ okekikpọ chieen̄ me lek inu-nkaan̄ chi geelek. 8 Ene geege ìkatumu ijo ikọ ìbak ọmọ, mije, îkaan̄ ukpook Awaji me emen, mè ikimin si Awaji.
Judit îchichini melek ebi ibot ama
9 Mgbọ Judit onọbe ijo ikọ ebi ene etumube ikeme Ujiya, ogwu ibot ama, mije una mudim otapbe ene ufialek me lek, mè inọ si inu Ujiya ofọọkbe ema, mè ibot înyan̄abe iyayaka ama inyi ebi Asiria egwe go isiraka, 10 Judit oraria ogwu ikwaan̄ kan̄ enenwaan̄, ogwu òkikpọ chieen̄ me lek inu geelek îkaan̄be, ibe igwen Ujiya mè Kabiris mè Kamis, ebi ugane ama kiban̄ ibe enu.
11 Mgbọ ife chi enube, itutumu inyi ema ibe, “Ìgban̄ utọn̄, enyi ebi ibot ama Betulia! Ikọ enyi etumube inyi ebi ene chereyi, ìkatat. Enyi mînyan̄a si ibot, mè itumu me isi Awaji mè isi ebi ene ibe ke enyi mêyaka ama inyi ebi ochicha kiji, ire Okumugwem ìkatap ubọk ìnyi eji me otu ifuk usen enyibe. 12 Kpasi unen ke enyi ekaan̄ isasa itọ Awaji ikpọ cherekeyi, mè ikisun̄ lek kinyi kubọk Awaji me etete ebilene? 13 Îre Okumugwem Ogwu Òkaan̄ Unye Geelek ke enyi etọ ikpọ! Enyi kperiọọn̄ inu geege, kpeberọriọọn̄ si. 14 Ire enyi kpekọt itọ ike ejit ebilene odọkbe ire, kpekọt iriọọn̄ inu ogwu ebilene okikeek, ìre enyi mêkọt igobo itet ogwu Okumugwem, ogwu òrorom otutuuk inu chi geelek, orebe? Enyi ebejeje iriọọn̄ ekiket kan̄, mè ìre igobo ejit kan̄ itet? In̄-in̄, ebi ngwan̄ n̄a, ikaribi Okumugwem Awaji kiji unaan̄-ejit. 15 Ire ìkatatap ubọk ìnyi eji me emen usen go chi, îkaan̄ unye ibebem eji ire usen geelek òneneme ọmọ. Ire iweek, môkọt itele ibe ebi ochicha kiji ekpan̄ eji esan̄a. 16 Enyi kpekakaan̄ unen ibebe Awaji inichieek enyi use me inu Okumugwem Awaji kiji oborọ me nkeek kan̄. Mije, Awaji ìkare ogwu ebilene, ogwu mêkọtbe inwe chieen̄ inin̄ lek, ìkakukup si kubọk ebilene ikike, ogwu mêkọtbe isa unin̄i otu iriaak, mè inwene ejit. 17 Eya orọ, ike eji ekikat ejit ikup ikikpọ ibe ininyan̄a eji, eji ekebebeek ọmọ ibe itap ubọk inyi eji. Mônọ eji ida, mè ire ima.
18 “Me atikọ, me ukot keyi, mege inire chereyi, kpunu otoko kiji geege, mè ìre ototun̄ ukan̄, mè ìre ama ija, mè ìre ama ile kiji, eyi òtọtọbọ ebum inyi awaji ubọk ene orọbe, kubọk erọbe mgbọ òraraka. 19 Îre eya orọ Awaji odabe ebi nte nte kiji itap me otu oge akọn̄, mè isa ema inyi efum, ema emumun̄ tukutuku, mè ichieen̄ ita me ubọk ebi ochicha kiban̄. 20 Eyi kiji, eji kperiọọn̄ ofifi Awaji, ilọ me lek kan̄. Eya orọ, eji ekikpọ chieen̄ ibe ke ìkpojuuk eji itele, ìkpojijit si ene geege me etete ebi ido kiji.
21 “Ire ema itet eji, mêtet si otutuuk Judia, mè ifum inu me Uwu Mbuban kiji. Isire ikeya, Awaji mônenirọ ibe eji esa eje kiji ekpe ewe filafila ya. 22 Ikpakpan̄ mêkpan̄be bọn ulọk kiji, mè ikpukpulu ebi ido kiji me usun̄ akọn̄, mè ene inanan me inyọn̄ ijọn̄ eji ekaan̄be me ìrot, otutuuk chi môkana itoon̄ eji me ibot me etete ebi ido geelek cha, ebi eji mêkanabe usun̄ inyi. Eji mênenikana nsak mè ochak me chieen̄ ebi ayaya nte uwu kiji cha. 23 Eji igegele igwook inyi ema ìkporọ ibe ema ekaan̄ ata ejit me lek kiji. Okumugwem Awaji kiji môrọ inyi ikana inu esip inyi eji.
24 “Eya orọ, ebi ngwan̄ n̄a, eji ere ata inu ijejeen̄ enyi ebi ngwan̄ kiji, mije, ugwem kiban̄ ìkup eji me ubọk. Ikeya si, ere mbuban, òrere Uwu Mbuban melek ntook ngwugwa, ìkup eji me ubọk. 25 Me emen inu chi geelek, eji etọn̄ Okumugwem Awaji kiji, ogwu òkitọ eji ikpọ mgbọ keyi kubọk îtọbe ebi nte nte kiji ikpọ. 26 Ìkeek inu îrọbe Ebereyam, mè ike îtọbe Ajiki ikpọ, mè inu òrọrọ Jekọp me Mesopotemia me agan̄ Siria mgbọ îkikpukpo arọọn̄ kè Leban, ngwan̄ ogwu uga. 27 Awaji ìkasa-nu ukan̄ ukan̄ lek ufialek ìtọ eji ìkpọ kubọk îrọbe melek kiban̄. Awaji ìsa kwulukwulu kecha iwọlọ emen ejit kiban̄ ikpọ. Eya orọ, ìkare useen̄ ijo inu ke îkikpe eji mgbọ keyi. Ire, Okumugwem ìkisulu ebi ìrariaak ọmọ me lek osusut, isasa itaba ema ubọk me utọn̄.”
28 Ujiya onenifọọk otu ibe, “Inu geelek owu otumube, òtumu me ata ejit, kpunu ogwu òbowut ifan̄a me lek. 29 Ìkare chereyi ore adasi usen osan̄abe iriọọn̄-inu kwun̄ isibi. Akarake ijija kwun̄, otutuuk ene mîriọọn̄ ibe ke owu okaan̄ ngobo-ntet mè iriọọn̄ si ibe ke ifuk-ibot kwun̄ îtat. 30 Ire, îre ubọk ebek ochatbe ebi ene orọ ema etetbe eji me unye ibe eji echieek ema use ya eji echieekbe, mè irọ ibe eji enyan̄a ibot ya, eyi eji kpebekọt ifaan̄. 31 Eya orọ, eyi owu orere enenwaan̄ òkitet ukpook Awaji, riaak uriaak nyi eji, inyi Okumugwem iria ibot ijet eji, inyi udọn̄ mun̄ kiji ijot, mè eji ekayaka ìgak ìweek mije urak-ebek.”
32 Judit onenitumu inyi ema ibe, “Ìgban̄, îkaan̄ inu mweekbe irọrọ, eyi bọn kiji ebekikeek mege ire otutuuk ukot geelek. 33 Me eririeen̄ cherekeyi, enyi ene ita, ìkeke me otunchit ama. Mâraka isibi, emi melek ogwu usun̄ n̄a. Sabum otu ifuk usen ya enyi enyibe kubọk mgbọ mêyakabe ama inyi ebi ochicha kiji mônikem, Okumugwem môsa emi inyan̄a ebi Ijeren. 34 Ire, ikado emi inu mbarọ. M̀kpatumu inyi enyi, mege nrọ ǹsan̄a.”
35 Ujiya mè ebi ibot kebilọ ebebe ọmọ, “Je me esuuk. Kè Okumugwem Awaji kiji ijeen̄ owu oniin̄ obosa irọ ebi ochicha kiji useen̄.”
36 Ema enanan̄a me atanga òkup me inyọn̄ otoon̄-uwu ya isibi, mè ije ifon ere ikwaan̄ kiban̄.