Olofenes îkpa mbin akọn̄ ikana Betulia
7
Ofit iwele kan̄, Olofenes onyinyi ida ibe otutuuk urum akọn̄ kan̄, mè otutuuk ebi ìnunu inigbaan̄ itọbọ melek kan̄, ekpọk eyat me m̀gba-ǹgwele ukan̄, mè ejibi akọn̄ esi Betulia, mè ebọkọ oniin̄ utibi ogoon̄ cha òkup me inyọn̄ ogoon̄, mè etim akọn̄ me lek ebi Ijeren. 2 Otutuuk urum ebi akọn̄ cha ekpọkpọk iyat usen ya. Urum ebi ìkitim akọn̄ ìre efit mè akọp obop ebi ukot ukot jaaba, mè akọp mè obop ebi inyọn̄ inyinya iba, kpefuk urum ebi ìbeme akpan, mè ogbogbo ebi akọn̄ ukot ukot ebi ìkikpọ chieen̄ me lek akpan cha. Otutuuk kiban̄ ìre nga ikpele urum akọn̄ òmimin enenen. 3 Ema enenirieen̄ akọn̄ me emen iteke òkup iriaak Betulia, me agba lek odidim ya. Onineen̄ akọn̄ kiban̄ îwele ibene me Dotan isi ire Balibayim, mè ijọn̄ọ inan̄a me Betulia isi ire Kiyamọn, òkikpọ iteke ijọn̄ Esidaralọn.4 Mgbọ ebi Ijeren emun̄be ikpele urum ebi ene cha, ukpook otetet ema enenen. Ema ekekitumu me etete kiban̄ ibe, “Ife chi mêlaka otutuuk lek ijọn̄ yi irọt. Otutuuk ogoon̄ echi òbebene ichit, mè iteke ijọn̄, mè otutuuk orioon̄ chi geelek ìkpokọt ibeme ulobo kiban̄.” 5 Ubọk geelek si, otutuuk kiban̄ eteteen̄ nroon̄ akọn̄ iso ubọk, mè imin ukan̄ iyiyik me uwu-oket kiban̄ cha, mè ikup ikibem ere otutuuk eririeen̄ ya. 6 Ofit iwele kan̄, Olofenes osasan̄a otutuuk urum ebi akọn̄ inyọn̄ inyinya kan̄ isibi isa ikije, inyi ebi Ijeren ìkup me Betulia ekemun̄. 7 Inenijijen̄e ikana ikikpọ lek òsiki ijọn̄ ekije isi ama ya, mè isi lek odidim cha ebi ama ya ekisa ikaan̄ mun̄, mè ibọkọ odidim cha, mè ito ebi akọn̄ ibe ekebem, mè inigwu ikom ifo igọọk uga urum akọn̄ kan̄.
8 Ebi ibot ebi Edọm, bọn kè Isọ, mè ebi ibot mkpulu ebi Mowabu, mè ebi otu-uji akọn̄ ebi ido agan̄ agba awaji enunu me lek kan̄, mè inibe, 9 “Ogwu nte kiji, ire ogban̄ inu eji ebetumu, kpebetim ikpan̄ urum akọn̄ kwun̄. 10 Ebi Ijeren chi kpekisa otunwa kiban̄ itoon̄ ejit, ekisa ubene ogoon̄ cha ere ema elukbe itoon̄ ejit, mije, ìkafet inenene ire ibot ogoon̄ cha. 11 Eya orọ, ogwu nte, kasa me onineen̄ akọn̄ ìtim akọn̄ me lek kiban̄, inyi ene geege me etete ebi akọn̄ kwun̄ ikakwu. 12 Kup me m̀gba-ǹgwele ukan̄ kwun̄, mè sun̄ si otutuuk ebi akọn̄ kwun̄ melek kwun̄ me ere keya. Ire, ria ebi kwun̄, mè esi ebọkọ odidim ya òkigbuk inan̄a me ebon ogoon̄ isibi. 13 Ọmọ ore ere ebi Betulia ekikaan̄ mudim. Urak-ebek mudim isikikpan̄ ema, ema mêgele igwook, mè iyaka ama kiban̄ inyi owu. Mgbọ keyi, eji mè ebi akọn̄ kiji mêsi inene inyọn̄ ibot ogoon̄ echi òkukup igbet, mè igwuun̄ me ere keya ikibem, inyi ene geege ikanan̄a me ama ya ìsibi. 14 Uraafiọọn̄ mônenikpan̄ ema melek ebi nwa kiban̄ mè bọn kiban̄ isan̄a kpai. Sabum otu oge akọn̄ môbonirere ema lek, ema mîra ikwaan̄ ililam ichit lek oniin̄ ere ema elukbe cha. 15 Ikeyi ke owu oborọ isa ikpe ema mkpukpe unye-ibot kiban̄, mije ema ejitbe ibọbọkọ owu itap me esuuk.”
16 Ikọ kiban̄ ototop Olofenes mè ebi ibot akọn̄ kan̄ me lek. Inyinyi ida ibe erọ ikeya.
17 Urum akọn̄ ebi Amọn mè obop ebi akọn̄ Asiria go egbagbaan̄ ijibi ije, mè isi igwugwuun̄ me lek iteke ya, mè ibọkọ otu mudim melek odidim ebi Ijeren. 18 Ebi Edọm mè ebi Amọn esisi imọnọ irek me inyọn̄ ogoon̄ echi òkiyaka isi ikpọ ama Dotan, mè iria usini ebi kiban̄ ifo agan̄ osiki mè agan̄ mbum-ura òkisi ama Egereben, me agba lek ama Kusi òkup me lek okolo Mọkumuri. Urum akọn̄ ebi Asiria kechilọ emọmọnọ irek me lek òla ijọn̄, mè itutọmọ ichit ijọn̄ ya. Uwu ọfọ kiban̄ mè nroon̄ kiban̄ owewele ichit ere gboi, otu ifuk kiban̄ îwa enenen, kpekọt ifuk.
Ufieejit înin̄ lek ebi Ijeren
19 Ebi Ijeren etoto ito igwen Okumugwem Awaji kiban̄, mije, ejit kiban̄ ìkayaka ìnye, bak me lek, ebi ochicha mîkana ema okokop, mè ikwek ema itele, kpunu ubọk ema ebesa inwọnọ.
20 Otutuuk urum akọn̄ ebi Asiria, ebi ukot ukot mè ebi uji akọn̄, mè ebi inyọn̄ inyinya ekpakpa mbin akọn̄ ikana ema okokop otuuk kè akọp usen ita mè ini. Otutuuk ugọn̄ mun̄ ebi ìluk me Betulia orarak ita kpai. 21 Udọn̄ mun̄ kiban̄ òkekichiaak. Eyaka ikitọtọ mudim otubọk otubọk inyi ene, kpunu usen geege enwọbe mudim ijot isiki ebek. 22 Efuuk otata asasa nsabọn me owot, lek owọwọ ebibaan̄ mè nsabọn irieen̄ bak me lek urak-ebek. Ema ekekigak iweek, mè ikirurọn̄ọ ilaak me lek oniin̄ mè otunchit ama. Unye ge ikeyi ìkayaka ìsik ema me emen.
23 Otutuuk ene, nsabọn irieen̄, mè ebibaan̄, mè nsabọn egbugbuku isi lek kè Ujiya mè ebi ibot ama, mè ikana ichit ema okokop, mè ikitaan̄ ukpo itumu, me isi otutuuk ebi ugane cha, ibe, 24 “Awaji isibi oyerebet inyi enyi melek kiji! Enyi mîtap eji ikpele unan me lek, eyi enyi kpegọọk ebi Asiria irọ esuuk. 25 Mgbọ keyi, eji kpekaan̄ ogwu ntap-ubọk geege. Awaji îyaka eji itap me ubọk kiban̄, inyi eji ekwaan̄ erurọn̄ọ me isi kiban̄ mije urak-ebek mè uwọ-lek.
26 “Ìgwen ebi Asiria mgbọ keyi ibe enin̄ ama, mè ìyaka otutuuk ama ìnyi urum ebi akọn̄ kè Olofenes, mè otutuuk ebi akọn̄ geelek ìje melek kan̄ efum. 27 Ema ikpukpulu eji me usun̄ akọn̄ mônwọn eji me lek igak ikeyi. Atikọ ibe ke mêsa eji irọ usun̄, ire, eji mêkup me ugwem, kpebesa chieen̄ imun̄ asasa nsabọn kiji ekikwaan̄, mè ìre ebi nwa kiji mè bọn kiji ekigọt me ubọk mkpa. 28 Kè lek inyọn̄ mè ijọn̄, melek Awaji kiji, Ogwukaan̄-ene ebi nte nte kiji, ogwu òkisut eji osusut me ibot ijo inu kiji mè ijo inu ebi nte nte kiji, eji ekirariaak enyi ibe enyi erọ ubọk eji ekitumu me chereyi.”
29 Otutuuk ebi ìtitiin̄ me ere ya egwogwook inin̄ me lek ujat ujat ito, mè itaan̄ ukpo igwen Okumugwem Awaji. 30 Ujiya onenitumu inyi ema ibe, “Ebi ngwan̄ n̄a, ìkat ejit! Eji etet ekaan̄ ekpọ-nu usen go esọkọ me lek. Me ike mgbọ ya, Okumugwem Awaji kiji môto eji nsan, mije, ìkpojit eji itele isi ge. 31 Ire, mgbọ ya isiso iraka, mè eji kpemun̄ ntap-ubọk geege, mârọ ubọk enyi etumube.” 32 Ikeyi ke îsa irọ ebi ene eyat efon esese esese irek kiban̄. Ebirieen̄ ejeje ifon inyọn̄ mgban melek uwu-oket ama ya isi ikup ikibem. Ebibaan̄ mè nsabọn efofon uwu. Ikpele urimi mè ugwuuk oninin̄ emen ama.