2 “Akiyọ, ìre owu ìre ekene, owu melek ebi akọn̄ ọkọ kwun̄ ìnan̄a me Iferem, eyi owu okiben nriran ikeyi me etete kiji chereyi, ibe eji ekasi akọn̄ me lek ebi Ijeren, mije, ke Awaji kiban̄ môtim akọn̄ me ibot kiban̄. Ìre ekene ore awaji, ilọ me lek Nebukadineja? Ọmọ môria ebi akọn̄ kan̄, inyi enekwọọk ife chi esan̄a me linyọn̄! Awaji kiban̄ ìkpokọt inyan̄a ema. 3 Ire, eji ebi ikwaan̄ ogwu ubọọn̄ Nebukadineja, eji ebekpakpan̄ ema isan̄a mfufet mfufet kubọk ke ìre ene ge gaalek. Ema kpebekọkọt ikeke ida unye ebi akọn̄ inyọn̄ inyinya kiji. 4 Eji ebetata ichit ema bùk. Eje kiban̄ ìbochichit inyọn̄ ogoon̄ kiban̄, nkwukwu kiban̄ môjojot emen iteke ijọn̄ kiban̄. Ema kpebekọt ikeke ida eji, otutuuk kiban̄ ebekwakwaan̄ ita kpai. Ikeya ke ogwu ubọọn̄ Nebukadineja, ogwukaan̄ otutuuk linyọn̄ otumu. Ọmọ îtumu isan̄a, ikọ kan̄ geege ìkpore ukpọk ukpọk otu ikike, ìborọrọ iso.

5 “Ire owu, Akiyọ, ogwu akọn̄ ọkọ ònan̄a me Amọn, owu oriraka lek itumu ikọ kechi me ijo usen. Bene me cherekeyi, owu òkpoyaka imun̄ isi n̄a ofifi, mege mgbọ mâsulube ebi ìlilibi inan̄a me Ijipiti chi osusut isan̄a, mè ika. 6 Mgbọ nsika, oge akọn̄ ebi akọn̄ n̄a mè otunwa ebi ibot akọn̄ n̄a môtibi agba owot kwun̄ agan̄ iba, owu môrọrọn̄ ikwu me etete ebi kiban̄ ebi unan môsakbe me lek. 7 Mgbọ keyi, ebi ikwaan̄ n̄a mêsa owu ifo inyọn̄ ijọn̄ ogoon̄ ogoon̄ ya, mè iben owu ito me ama ge me lek ama emen utibi ogoon̄ cha. 8 Kpebekpan̄ owu nu mege owu môgọọkbe ema igbaan̄ ikwu mgbọ ge. 9 Ire ejit kwun̄ inye ibe ke kpebekọt itim ikpan̄ ife cha, kafieek ejit ma! Ntumu isan̄a. Kpunu ikọ n̄a geege òbore ukpọk ukpọk otu ikike, ìborọrọ iso.”

10 Olofenes oneninyi ida ibe ebi ikwaan̄ kan̄, ebi ìkisi ikwaan̄ inyi ọmọ me emen uwu ọfọ kan̄, etet Akiyọ, mè esa esi Betulia esi eyaka etap me ubọk ebi Ijeren. 11 Ebi ikwaan̄ cha etetet Akiyọ, mè isan̄a isibi me m̀gba-ǹgwele ukan̄ ya, mè isa ije itibi lek òla ijọn̄, mè isa inan̄a me ere keya inene ifo lek ijọn̄ ogoon̄ ogoon̄, mè inire lek odidim me òsiki ijọn̄ ama Betulia.

12 Mgbọ yaage ebi ama ya emun̄be ebi Asiria cha, ekpukpulu nroon̄ akọn̄ kiban̄ ikwaan̄, mè ilibi isibi me emen ama ikifo inyọn̄ ogoon̄. Ebi olik mgbọlọ ekekisa ewuuk itọọn̄ ife cha, mè ikwek ema, inyi ekanene ìnu ama kiban̄. 13 Ebi Asiria cha elelet me irak ogoon̄ ya, mè ibọp Akiyọ ito, mè imaan̄ ọmọ itele me ebon ogoon̄ ya, mè igwu ikom ifon igọọk Olofenes nte uwu kiban̄.

14 Ebi Ijeren esisibi me ama inu, mè inimun̄ Akiyọ, mè itọn̄ọ, mè isa inin̄ Betulia isi me isi ebi ibot ama. 15 Ebi ìkukup me ibot ama me mgbọ ya ìre Ujiya gwun̄ kè Maika ogwu otoko kè Simiọn, mè Kabiris gwun̄ kè Gotonien, melek Kamis gwun̄ kè Melikien. 16 Ebi ibot ama chi enenigwen ebi ugane ama ititiin̄. Nsabọn irieen̄ mè ebibaan̄ egwagwat lek ilibi igọọk isibi isi ere ntitiin̄ ya. Enenisa Akiyọ inu, ikekeke me eden̄ otutuuk ene cha. Ujiya onenikido ọmọ inu òrọrọ. 17 Ikpakpa inu òrọrọ me emen oru Olofenes ogwenbe, mè otutuuk inu ọmọ otumube me isi ebi ibot akọn̄ ebi Asiria, mè otutuuk inu Olofenes otumube me ugumulek ibe ọmọ môrọ ebi uwu kè Ijeren.

18 Mgbọ ebi ene enọbe ikọ chi, ema otutuuk erururọn̄ọ igwook me ijọn̄, mè itọbọ ebum inyi Awaji, mè itaan̄ ukpo igwen Awaji ibe: 19 “Jei Okumugwem Awaji òkup me inyọn̄, kpọ ubenelek kiban̄, mè to eji nsan me lek esip ekitap eji me isi. Soso, kaan̄ ata ejit chereyi me lek ebi owu osun̄be esese inyi lek kwun̄.” 20 Ema enenitumu ikọ ukarajit inyi Akiyọ, mè itọn̄ ọmọ enenen. 21 Mgbọ erọbe ntitiin̄ isan̄a, Ujiya onenisa Akiyọ ifo uwu kan̄, mè ito ijọk inorie mè miin̄ inyi ebi ugane ama. Otutuuk eririeen̄ ya, ema ekekiriaak uriaak ikigwen Awaji ebi Ijeren ibe itap ubọk inyi ema.