Olofenes melek ebi kan̄ mînin̄ oru ikeme ebi Ijeren
5
Mbia akọn̄ onenire lek kè Olofenes, ogwu ibot ebi otu-uji akọn̄ ebi Asiria, ibe ke ebi Ijeren mêkineen̄ lek akọn̄; ke mîchit oniin̄ utibi ogoon̄ me inyọn̄ ogoon̄ geelek, mè inama mgban akọn̄ me ibot ogoon̄ geelek òbebene, mè igon oniin̄ geelek me lek òla ijọn̄ ichit. 2 Olofenes onanaan̄ ejit ijo ijo, mè igwen otutuuk ebi ibot mkpulu ebi Mowabu, mè otutuuk ebi otu-uji akọn̄ ebi Amọn, mè otutuuk ebi ibot mkpulu ìkikpulu ido cha òkup me agba awaji, 3 mè ikido ema ibe, “Enyi ebi Kenan, ìkpa ìnyi emi-nu, ìre ife chi ebi ìluk me lek ogoon̄, ìre kpasi ife? Ama echi owa ke ema ekiluk? Urum akọn̄ kiban̄ ìmimiin̄ ire? Ìre unye akọn̄ kiban̄ mè unye-ejit kiban̄ ìnan̄a me owa? Ekene ore ogwu ubọọn̄ òkikpulu ema, mè ikije me isi akọn̄ kiban̄? 4 Keke orọ eyi ema gaalek, me lek otutuuk ebi agan̄ ichep-ura, ejitbe inanan̄a isibi inigele igwook inyi emi?”Ikọ Akiyọ otumube
5 Akiyọ, ogwu ibot otutuuk ebi Amọn onenibe, “Ogwukaan̄ n̄a, soso, nye lek gban̄ inu emi ogwu ikwaan̄ kwun̄ mbatumu. Mâtumu atikọ inyi owu òfo me lek ife chi ebi ìluk me agan̄ ijọn̄ ogoon̄ ogoon̄ igbet owu lek. Kpunu ofiaan̄ geege òbonan̄a me otu ogwu ikwaan̄ kwun̄ isibi. 6 Ife chi ìre ebi owot iman ebi Kalidia. 7 Me mgbọ òraraka, ema eluk me Mesopotemia, mije, ema kpeweek irariaak awaji ebi nte nte kiban̄ ebi ìkup me Kalidia. 8 Ema mîtele orọmijọn̄ ebi nte nte kiban̄, mè isi ikiriaak Awaji òkup me akpabin inyọn̄. Awaji keya ke ema eyaka iniriọọn̄. Ebi nte nte kiban̄ ererieen̄ ema isibi inan̄a me isi awaji kiban̄. Ema elilim ifo Mesopotemia, mè iluk me ere keya ijọn̄ọ mgbọ.
9 “Awaji kiban̄ onenibe ema etele ere ema ekiluk ya, mè efon lek ijọn̄ Kenan. Ema esisi iluk me Kenan, mè ibọọn̄ ubọọn̄ me alata araran̄ melek alata okuket, mè owuwa urum anam. 10 Mgbọ akan̄ onin̄be iso lek ijọn̄ Kenan, ema esisibi ifon Ijipiti, mè iluk me ere keya otutuuk mgbọ inorie okupbe me ere ya, mè ikana ife ìwawa enenen, kpekọt ifuk otu ifuk. 11 Ire, ogwu ubọọn̄ Ijipiti onenikirọ ema nnaan̄ me lek, mè itutuku ema, mè isa unye-ubọk itet ema ibe ekerọ okpungwu, mè ikeme ema isiki, mè isa ema irọ usun̄. 12 Ema etataan̄ ukpo igwen Awaji kiban̄, isasa orukan̄ echi kpekikọt igwa isulu otutuuk ido Ijipiti osusut. Ebi Ijipiti ererieen̄ ema isibi. 13 Awaji orọrọ inyi okwaan̄ Anyiaan̄ ichiaak me isi kiban̄, 14 mè isa ema ije me oniin̄ agan̄ Saina mè Kades Bania. Ema elalap otutuuk ebi ìluk me emen èwê isan̄a, 15 mè iniluk me inyọn̄ ijọn̄ ebi Amọ. Ema esasa me unye kiban̄ ijijaka otutuuk ebi Esibon, mè isaba okwaan̄ Jodan itoon̄, mè ibọkọ otutuuk lek ijọn̄ ogoon̄ ogoon̄ cha ikaan̄. 16 Ema ererieen̄ ebi Kenan isan̄a me isi kiban̄, mè irieen̄ ebi Pereji, mè ebi Jebus, mè ebi Sekem, mè otutuuk ebi Girigas, mè ibọkọ ere kiban̄ cha iluk owuwa acha.
17 “Awaji kiban̄ îcha inu ikpak. Eya orọ, ire ema kperọ Awaji kiban̄ ilọ, inu ìkijeje ijaan̄ me lek kiban̄. 18 Ire, ema isijeje ilọ me oniin̄ îbe ema eje, owuwa akọn̄ îra inikwọkọ ema, mè ekpulu ema me usun̄ akọn̄ esa efon ofifi ido, mè egwak Uwu Mbuban Awaji kiban̄ egwook me ijọn̄, mè ebi ochicha kiban̄ ebọkọ ama kiban̄ eluk. 19 Ire, me mgbọ keyi, ema mîgwu ikom inu me lek Awaji kiban̄, mè inan̄a me ere eyiyalabe ema isi igwook ika, mè inikpọk iluk me Jeruselem, ere Uwu Mbuban kiban̄ okupbe, mè iniluk me inyọn̄ ijọn̄ ogoon̄ ogoon̄ ya ema eyatbe itele, mije, kpunu ene geege òluluk me ere ya mgbọ ema enan̄abe.
20 “Eya orọ, nte uwu n̄a mè ogwukaan̄ n̄a, ire ife chi irọ inu ilọ, mè irọ Awaji kiban̄ ijo inu, mè ire eji itap chieen̄ imun̄ ibe ke ema mîrọ ilọ me atikọ, eji mêkọt ijibi akọn̄ isi, mè itim ikpan̄ ema. 21 Ire, ire ido ya ìkarọ inu geege ìlọ, ogwukaan̄ n̄a, mônwọn ibe owu òje agba agba òraka ema. Mije, Ogwukaan̄ kiban̄ mè Awaji kiban̄, môtim akọn̄ me ibot kiban̄, eji mênenikana inu ochak me chieen̄ ebi linyọn̄.”
Ikọ kè Akiyọ îsibi okput
22 Mgbọ Akiyọ otumube ikọ kan̄ isan̄a, otutuuk ebi ìkekeke ikana uwu ọfọ ya, ebebene ikigbini. Ebi isi me lek ebi ibot ebi akọn̄ kè Olofenes, mè otutuuk ebi agba awaji mè ebi Mowabu ebebe echo Akiyọ efiin̄. 23 Ema ebe, “Ìre keke orọ eji ebetet ukpook me lek ebi Ijeren? Ema ìre ife ìdedek, kpekakaan̄ unye mêkọtbe isa ikeke ida akọn̄. 24 Olofenes, ogwu nte, eji ejibi enin̄! Ikpele urum akọn̄ kwun̄ môkpulu ema imeen̄ isan̄a!”