Ebi Judia mîbem lek ikpọ akọn̄ òkinu
4
Mgbọ ebi Ijeren ìkiluk me Judia enọbe inu Olofenes, ogwu ibot ebi otu-uji akọn̄ kè Nebukadineja, ogwu ubọọn̄ Asiria, orọbe ebi ofifi ido cha, ike îfumbe inu me emen isi-ijọn̄ ife cha, mè ijijaka isi-ijọn̄ cha, 2 inunu kan̄ otetet ema ukpook enenen, mè itap ema ufieek-owot me emen òfo me lek ama Jeruselem melek Uwu Mbuban Okumugwem Awaji kiban̄. 3 Mije, sọnja lek mgbọ gaalek ke ema enan̄a me usun̄ akọn̄ ika. Ìkafifiin̄ mgbọ ebi ene eyakabe ikpọk inikiluk me Judia, mè ikpọk igbama lek ntook ngwugwa mè nroon̄ kan̄ geelek mè Uwu Mbuban efifilabe. 4 Eya orọ, ema elolook etip ikana otutuuk agan̄ Sameria, mè Kona, mè Bet Oron, mè Belimayin, mè Jeriko, mè Koba, mè Ayesora, mè iteke ijọn̄ Salem, ibe egbala chieen̄.5 Ema emọmọnọ irek me inyọn̄ ibot otutuuk ogoon̄ geelek òbebene ichit, mè itap mgban ikana asabọn ama òkup me inyọn̄ ogoon̄ cha, mè isun̄ si inorie me ere cha ikibem lek ikpọ akọn̄ ya, mije, emen mgbọ ya ke erọkọ uko isan̄a.
6 Jowakim ogwu òban Awaji, òkup me Jeruselem me mgbọ ya, ogege ikpa ijet ebi Betulia mè Betomesitayim, ama òkiyaka isi ikpọ Esidaralọn me usaba agan̄ òla ijọn̄ òkup me agba lek ama Dotan, 7 ibe ema esi ebọkọ oniin̄ utibi ogoon̄ cha òkup me inyọn̄ ibot ogoon̄, echi mêkọtbe ije itibi iraka inin̄ Judia, etet ekaan̄. Ere keya obofet ikọkọt ikwek ogwu akọn̄ geelek òkinunu, mije îgbaan̄be inwan, ene iba gaalek ebekọt igbaan̄ ije itibi iraka mgbọ ge. 8 Ebi Ijeren cha erọrọ ike Jowakim ogwu òban Awaji, mè ebi oru otutuuk ido Ijeren, ebi ìninin̄ ntitiin̄ me Jeruselem, enyibe ida ibe ema erọ.
Ebi Ijeren mînin̄ uriaak
9 Otutuuk ebi Ijeren erariaak uriaak igwen Awaji me ijọn̄ ijọn̄ ejit kiban̄, mè inin̄ ijin-otu, mè isiki lek kiban̄ me isi Awaji. 10 Ema otutuuk ene, mè ebi nwa kiban̄, mè bọn kiban̄, mè anam kiban̄, mè otutuuk ebi ichen ìluk me etete kiban̄, mè ebi ebọkọbe me ọkọ, mè ebi usun̄ elelep, etotobo ekwut ufieejit ikana me ebon.
11 Otutuuk ebi Ijeren ìluk me Jeruselem, ebirieen̄, mè ebibaan̄, mè nsabọn, elilililam inyana me ijọn̄ ikana isi ikwuun̄ me isi Uwu Mbuban, mè igwook ntọn̄ me ibot, mè ikpulu ekwut ufieejit kiban̄ iwele me isi Okumugwem. 12 Ema mîsa si ekwut ufieejit igbaka ikana ntook ngwugwa, mè igbaan̄ isa me otutuuk ejit kiban̄ ikibeek Awaji ebi Ijeren ibe ikachieek ibe ekpaan̄ asasa nsabọn kiban̄; ikachieek ibe ekpulu ebi nwa kiban̄ me akọn̄; ikachieek ibe ejijaka ama cha ema ekaan̄be me ìrot; ikachechieek si ibe ebi ofifi ido efifila Uwu Mbuban mè echichaka mbuban me lek, mè esa ekebele ejit erie otu enyi ema.
13 Okumugwem onọnọ ida kiban̄, mè imun̄ ufieejit kiban̄, mije, ebi ene mîjin otu owuwa usen me otutuuk Judia, mè Jeruselem, me isi Uwu Mbuban Okumugwem Ogwu Òkaan̄ Unye Geelek.
14 Jowakim, ogwu òban Awaji, mè otutuuk ebi ngwugwa ìkisi ikwaan̄ inyi Okumugwem me emen Uwu Mbuban kan̄, ekwukwun ekwut ufieejit ikana me ebon kiban̄ mgbọ ema ekigwa ngwugwa ewọwọp eyi ekigwa usen geelek, mè ngwugwa ebi ene esabe irọ inyan̄a-ibot iso, mè ngwugwa ata ejit ebi ene esabe inu. 15 Ema egwogwook ntọn̄ me lek akisi ibot kiban̄ isa ikitaan̄ ukpo igwen Okumugwem unye unye, ibe isa me ejit nsan ikpọ chieen̄ me lek otutuuk uwu kè Ijeren.