Mîria ebi osat ibe esi erọ esuuk
3
Otutuuk ebi ido chi eneniria ebi osat ibe esi lek kè Olofenes esi erọ esuuk, mè etumu enyi ibe, 2 “Eji, ebi usun̄ kè Nebukadineja, ikpele ogwu ubọọn̄, mîrọn̄ inyana me isi kwun̄. Sa eji rọ inu òneme owu. 3 Kpọ, uwu kiji mè otutuuk ijọn̄ kiji, mè otutuuk uko akpa wit kiji, mè urum eriembuuk kiji melek urum arọọn̄ kiji, mè otutuuk arọọn̄ kiji òkup me ere isun̄-anam me oron melek uwu ọfọ kiban̄ geelek ìkup me ubọk kwun̄. Sa rọ inu òneme owu. 4 Ama kiji geelek mè otutuuk ebi ìluk me emen ìre usun̄ inyi owu. Na sa ema rọ ike înemebe owu.”5 Ebi eriabe osat cha enunu me lek kè Olofenes initumu ikọ cha otutuuk inyi. 6 Olofenes onenisa ebi urum akọn̄ kan̄ isibi ifo agba okwaan̄, mè isun̄ ebi akọn̄ ibe ekebem ama mgban cha geelek, mè igobo ebi ene me ama cha ito, ibe eketap ubọk enyi ọmọ. 7 Ebi ama kechi geelek mè otutuuk ebi asabọn ama òkup me lek ijọn̄ ya, ekekikwak ekpete, mè ijijen ọgbọn ajakajak me ebek isa ikijop ifit, isa ibọkọ ọmọ itap. 8 Ire, Olofenes ogbugbugbọ isi-ijọn̄ kiban̄ igwook, mè ichon uti emen àwa kiban̄, mije, mînyi ọmọ ida ibe ijijaka otutuuk awaji geelek me lek ijọn̄ cha, inyi otutuuk ido geelek eketọbọ ebum enyi Nebukadineja gaalek, mè itet ebi otu usem geelek mè ido geelek me unye ibe ekeriaak uriaak enyi Nebukadineja kubọk awaji.