Nebukadineja îsi akọn̄ me agan̄ ichep-ura
2
Me òso akọp usen iba mè iba, me adasi onyan̄, me òso akọp mè acha jeeta, me ukot mkpulu kè Nebukadineja ogwu ubọọn̄ Asiria, ekekinunuun̄ ikana emen uwu ubọọn̄ ibe ke ogwu ubọọn̄ mônirọ otutuuk ebi linyọn̄ useen̄ inu, ike îtumube ibe ke ọmọ môrọ. 2 Inenigwen otutuuk ebi ibot akọn̄ kan̄ mè ebi ibot mkpulu kan̄ ititiin̄, mè inin̄ oru melek kiban̄, mè isa otu kan̄ ikpa otutuuk inu ikpak ebi agan̄ ya erọbe isan̄a kpai, mè itumu si nlelet otitọt kan̄ inyi ife cha. 3 Etutumu ifieek ibe ke ebekpakpan̄ ene geelek òjijit ichechieek ogwen ogwu ubọọn̄.4 Mgbọ enin̄be oru ya isan̄a, Nebukadineja, ogwu ubọọn̄ ebi Asiria, oraria ikwaan̄ igwen Olofenes, ogwu ibot otutuuk ebi otu-uji akọn̄ kan̄ geelek, mè ogwu òrariaak me lek kan̄ ichit me irek mkpulu, mè itumu inyi ibe, 5 “Emi, ikpele ogwu ubọọn̄, ogwukaan̄ otutuuk linyọn̄, nkitumu ibe: Osinan̄a me isi n̄a isibi, teen̄ ebi ene ebi ìnyenye lek me akọn̄, efit mè akọp obop ebi ukot ukot iba, melek akọp mè obop ebi akọn̄ inyọn̄ inyinya iba, sa gbaalek kwun̄ si akọn̄. 6 Sa ema jibi akọn̄ nin̄ otutuuk ido agan̄ ichep-ura cha ebi ìkijit ogwen n̄a. 7 Be ema ekpulu achiaan̄ mè mun̄ ebesa igwa ngwugwa enen̄e esun̄,a mije, m̀basa me uyok uyok unaan̄-ejit ijibi akọn̄ inin̄ ema lek. Ukot ebi akọn̄ n̄a ìbochichit lek ijọn̄ cha gbak, ebefufum ema otutuuk irak. 8 Ebi kiban̄ ebi mêbenbe unan ebejojot emen iteke kiban̄ cha, ebi mêkwaan̄be mêkput agbugbuk, mè ikwek okwaan̄, mun̄ okwaan̄ môwuwuku igbọọk imeen̄ ere. 9 Mâkpulu ema me usun̄ akọn̄, isa ifon ntutun̄ ere geelek me linyọn̄.
10 “Je mgbọ keyi! Si tim akọn̄ bọkọ otutuuk ido kiban̄ sun̄ ban emi. Ire ema igele igwook inyi owu, tet ema kaan̄ ban emi, mege ire mgbọ osusut kiban̄ môsobe. 11 Ire, ire ema inye ibot, kakakaan̄ ene geege nsan me lek. Kpan̄ ema, mè fum inu kana me otutuuk ido cha owu môbọkọbe. 12 Nsa ugwem n̄a mè unye eyi mkpulu n̄a inyan̄a ibot, ibe inu geelek ntumube, ke m̀barọrọ. 13 Owu, kalọlọ irọrọ inu emi nte uwu kwun̄ ntọbe. Mun̄ ibe ke orọ otutuuk inu chi geelek ubọk nnyibe owu ida. Kafafiat mgbọ geege.”
Olofenes îjibi akọn̄ ije
14 Olofenes onanan̄a me isi ogwu ubọọn̄ isibi, mè igwen otutuuk ebi otu-uji akọn̄, mè ebi isi akọn̄, mè ebi ibot ebi akọn̄ Asiria ititiin̄ mgbọ yaage. 15 Inenigobo ebi usọ akọn̄ me ọgbọn̄ me ọgbọn̄, ike nte uwu kan̄ onyibe ida. Îgobo efit mè akọp obop ebi akọn̄ iba, igbaalek akọp mè obop ene iba ebi oraan̄ ìkilibi me inyọn̄ inyinya, 16 mè inisun̄ ema me onineen̄ me onineen̄, kubọk ekito urum akọn̄ mgbọ ekisi ewe akọn̄. 17 Îkpulu si owuwa owuwa aligọ, mè inyinya akpan, mè inyinya mgbidim ukot ebesa ibeen̄ akpan, mè owuwa owuwa arọọn̄, mè eriembuuk, mè ebot, ebesa irie inorie. 18 Ogwu akọn̄ geelek îbọkọ owuwa inorie mè ikpele mkpukpe ikpoko alata araran̄ mè alata okuket, echi ònan̄a me akpa ikpoko ogwu ubọọn̄.
19 Olofenes onenijibi akọn̄ ije melek otutuuk urum akọn̄ kan̄, inyi ọmọ idasi ije isi ire ere cha sabum ogwu ubọọn̄ Nebukadineja ònonu. Îsa ebi uji akọn̄ mè ebi akọn̄ inyọn̄ inyinya, mè ebi akọn̄ ukot ukot egogobo, isa ichit otutuuk lek ijọn̄ agan̄ ichep-ura gbak. 20 Esese esese urum ebi ene egọgọọk ema ije, mè iduku ichit ere kubọk akaka ituuk, mè ibaan̄ ijot ere kubọk nkwukwuuk achiaan̄ òkup me ijọn̄. Urum ene mîwa ire lek kpekọt ifuk.
21 Ema eneninan̄a me Ninife isa egwe ita ije isi ire òla ijọn̄ Bekitilet. Bene me Bekitilet, ema ejeje iriaak me lek ogoon̄ me agan̄ inyọn̄ Silisia eyi Inyọn̄ Inyọn̄, mè igwugwuun̄ uwu ọfọ kiban̄ ikiyaka isi ida ama Bekitilet. 22 Olofenes onenisa otutuuk urum akọn̄ kan̄, ebi ukot ukot, me ebi inyọn̄ inyinya, mè ebi uji akọn̄, ije inene ifo agan̄ lek ijọn̄ ogoon̄ ogoon̄ cha, 23 mè ijijaka agan̄ Put mè agan̄ Ludu isan̄a kpai, mè ijijaka ebi owot iman kè Rasis mè ebi owot iman kè Isimen ìkiluk me otu utọn̄ èwê me osiki agan̄ Keleyan inọọn̄.
24 Inenisaba okwaan̄ Yuferetis itoon̄, mè ije itibi ido Mesopotemia, mè igwak otutuuk ama mgban geelek òkup me lek okolo Aburọn isan̄a, mege isi igwook me agba awaji. 25 Îbọkọ si agan̄ Silisia, mè ikpan̄ otutuuk ebi geelek ìsisibi ikeke ikwek ọmọ, mè ije isi igwook me agan̄ osiki me okike otubọk ijọn̄ agan̄ Jefet, òkitat ikpọ agan̄ Arebia. 26 Ìkpakpa mbin akọn̄ ikana ebi Midia okokop, mè iwọp uwu ọfọ kiban̄, mè ifum arọọn̄ kiban̄ inọọn̄.
27 Inenikwala isibi, mè ibum inin̄ agan̄ Damasikọs me mgbọ ekirọkọ akpa wit, mè iwop otutuuk uko kiban̄, mè ijijaka urum arọọn̄ mè ebot mè eriembuuk, mè igbugbọ ama kiban̄ igwook, mè ikpukpuku lek ijọn̄ ya iriọk, mè isa oge akọn̄ isọp otutuuk nsabọn irieen̄ ikpaan̄ isan̄a. 28 Ukpook mè urimi oninin̄ ijot me emen otutuuk ebi ìluk me agba okwaan̄. Ebi Saidọn, mè Taya, mè ebi Suru, mè Okina, mè Jaminia, mè Ajọtọs melek Asikelọn efefieek owot me lek kan̄ enenen.