Judit
Akọn̄ kè Nebukadineja mè Afakisadi
1
Me òso akọp mè acha iba eyi Nebukadineja okupbe me ama Ninife ikikpulu ido Asiria, ke Afakisadi okup me Ekibatana ikikpulu ido Midia. 2 Afakisadi îsa ewuuk ebabak inama mgban ikana Ekibatana okokop. Akpọk ewuuk cha ge ge ìre agbagba otubọk gweregwen, sà ujọn̄ọ kiban̄ ge ge ore ejit ge mè agbagba otubọk ini. Ubene mgban ya ìre akọp mè ejit jaaba mè ìkike iba, sà uwele kan̄ ore akọp mè ejit iba mè ìkike iba. 3 Înama uwu-oket me otunchit geelek òkup me lek mgban ya. Ubene uwu-oket cha ge ge ìre akọp ejit iba mè go, sà uwele ebon kiban̄ ge ge ore akọp mè ejit go. 4 Înama si otunchit òwewele iso ere ebi akọn̄ kan̄ ebekọt ikije itibi isi ge, ebi akọn̄ ukot ukot si mêkekije me onineen̄ kiban̄ itibi. Ubene otunchit cha ge ge ìre akọp mè ejit jaaba mè ìkike iba, sà uwele kiban̄ ge ge ore akọp ejit.5 Me emen mgbọ ya ke ogwu ubọọn̄ Nebukadineja ojibi akọn̄ isi lek ogwu ubọọn̄ Afakisadi me lek ikpele òla ijọn̄ òkup me okike otubọk ijọn̄ ebi Ragawu. 6 Otutuuk ebi ìkiluk me inyọn̄ ijọn̄ ogoon̄ ogoon̄, mè otutuuk ebi ìluk me agba lek okwaan̄ Yuferetis, mè okwaan̄ Tigiris, mè okwaan̄ Ayidasipes, mè ebi ìnan̄a me lek òla ijọn̄, eyi Ariọk ogwu ubọọn̄ ebi Elam okikpulu, mîgọọk ọmọ igbaan̄ itọbọ. Owuwa ido mîtap lek me lek akọn̄ ebi Kelodua yi.
7 Nebukadineja, ogwu ubọọn̄ ebi Asiria, oneniria etip ijet otutuuk ebi ìluk me ido Pesia, mè otutuuk ebi ìkup me agan̄ ichep-ura, ebi ìluk me agan̄ Silisia mè Damasikọs mè Lebanọn mè Antilebanọn, mè otutuuk ebi ìluk me agba awaji, 8 mè ebi agan̄ Kamen mè Giliadi, mè Galili agan̄ inyọn̄, mè ebi ìluk me lek ikpele òla ijọn̄ Esidaralọn, 9 mè otutuuk ebi ama Sameria mè asabọn ama kiban̄ geelek, mè ebi ìluk me usaba okwaan̄ Jodan isi igwook me Jeruselem, mè Betani, mè Kelọs, mè Kades, mè okwaan̄ Ijipiti, mè Tapenes, mè Rameses, mè otutuuk agan̄ Gosen, 10 mè ire Tanis, mè Memfis iraka inyi isi, mè ire lek otutuuk ebi ìluk me Ijipiti iraka isi igwook me otubọk ijọn̄ ebi Etiopia.
11 Ire, otutuuk ebi ìluk me agan̄ chi geelek ejijit ogwen kè Nebukadineja ogwu ubọọn̄ Asiria, mè ijit igọgọọk ọmọ igbaan̄ itim akọn̄. Ema kpefieek owot me lek kan̄, ire, emọnọ ọmọ kubọk ibot ene ge gaalek. Eya orọ, ema eraria ebi ikwaan̄ kan̄ ifo ukpọk ubọk me esip.
12 Nebukadineja onanaan̄ ejit enenen inyi otutuuk ebi ido cha, mè isa ogboon̄ ubọọn̄ kan̄ mè mkpulu kan̄ inyan̄a ibot ibe ke ọmọ môrọ useen̄ me lek otutuuk ebi agan̄ Silisia, mè Damasikọs, mè Siria, mè ebi Mowabu, mè ebi Amọn, mè ebi Judia, isi ire lek ebi Ijipiti, mè isi gwook me agba awaji iba cha, ke ọmọ ìbosasa oge akọn̄ ijijaka ebibi isan̄a kpai.
Akọn̄ îrie Afakisadi
13 Me òso akọp mè acha jaaba me mkpulu kè Nebukadineja, isasa urum akọn̄ kan̄ isibi akọn̄ igọọk ogwu ubọọn̄ Afakisadi, mè itim ikpan̄ ogwa, mè ijijaka otutuuk urum ebi akọn̄ kè ogwa, ebi ukot ukot, mè ebi inyọn̄ inyinya, mè ebi uji akọn̄. 14 Inenibọkọ otutuuk ama kè Afakisadi, mè ijibi akọn̄ inin̄ ama Ekibatana, mè ibọkọ uwu-oket cha, mè ifum ewe ama ya inọọn̄, uja eyi ama okakana inu esip inyi ama ya. 15 Itetet Afakisadi me inyọn̄ ogoon̄ me Ragawu, mè isa otunwa kan̄ ichiin̄ ikpan̄, mè ijijaka igwook, ikwukwu ichep isi ge dìp dìp. 16 Itotolek igwu ikom ika inu Ninife, ọmọ melek urum akọn̄ kan̄ mè otutuuk ebi ofifi urum akọn̄ ìgbagbaan̄ itọbọ melek kan̄, atalek ikpele urum akọn̄ òmimin enenen. Ọmọ mè ebi melek kan̄ etọtọbọ efuuk me ama ya, mè ikirie ijọk ibele ejit otuuk kè efit mè akọp usen iba.