3 Usini ebi ikwaan̄ ogwu ubọọn̄ ebi ìkisi ikwaan̄ me otunchit enenido Mọdikai ibe, “Ìre keke orọ owu okikpaka ibot me lek ikan ogwu ubọọn̄ onyibe?” 4 Usen geelek ife cha ekpọkpọ ikisa ikọ ya isisaak Mọdikai. Ire, Mọdikai ìkagban̄ utọn̄ ìnyi ema. Eya orọ, ema eneniben inu ya isi ikpa inyi Aman, inyi ema ekpọ mè ìre ikọ kè Mọdikai môkeke. Mije, Mọdikai îwuuk lek itumu inyi ema ibe ke ọmọ ìre ogwu Ju.

5 Mgbọ Aman omun̄be ibe ke Mọdikai ìkakigwuun̄ ekpe ìnyi ọmọ, mè ìtọbọ ibot ìnyi ọmọ, inanaan̄ ejit enenen. 6 Ire, Aman ìkaweek isusulu Mọdikai gaalek osusut, mije, mîtumu inyi ọmọ ibe ke Mọdikai ìre ogwu Ju. Eya orọ, inu îweekbe ìre igbagbaan̄ otutuuk ebi Ju, òrere ebi ido kè Mọdikai cha, ìkup me otutuuk ere geelek me irak otutuuk mkpulu kè Ayaserọs, ikpan̄ isan̄a kpai, melek Mọdikai me lek kan̄.

7 Me adasi onyan̄, òrere onyan̄ Nisan,^a me òso akọp mè acha iba me lek mkpulu kè Ayaserọs ogwu ubọọn̄, enenikiroon̄ nriroon̄ eyi ekigwen puru me isi kè Aman ikpọ, me usen me usen, me onyan̄ me onyan̄ isa ikiweek usen ebekpan̄ otutuuk ebi Ju. Ǹcha ya onenirọn̄ me òso akọp mè onyan̄ iba, òrere onyan̄ Adari.^b

8 Aman onenisi itumu inyi ogwu ubọọn̄ Ayaserọs ibe, “Ogwu ubọọn̄, îkaan̄ ife ge, ebi ìluluk ikana me etete ebi geelek me otutuuk ido geelek òkup me mkpulu kwun̄, kpunu ere ema enanbe. Ire, ikan ife chi mè orọmijọn̄ kiban̄ ìkup esese me lek echi ebi ofifi ife geelek. Ikerere ikan ogwu ubọọn̄ otapbe, ema kpekichieek isusun̄. Ìkatat ibe ogwu ubọọn̄ ikpọkpọ itele ibe ife chi ekup ikeya. 9 Ire ineme owu, ogwu ubọọn̄, mâbe mè owu otap ikan, mè ònyi ida, inyi ege etap me ikpa ibe ekpan̄ otutuuk ife cha esan̄a, ene geege ikasisik. Ire owu otap ikan ya, emi mânyi alata okuket òlolobo iso efit obop kilo ita mè akọp obop ini, inyi ebi ikwaan̄ ekpe etap me uwu isun̄-ikpoko ogwu ubọọn̄.”

10 Ogwu ubọọn̄ ogbagban̄ ikọ ya isan̄a, mè iniwọọk mkpọtubọk iman̄ òriọọn̄ kan̄ òkup ọmọ me otubọk isan̄a, mè isa inyi Aman gwun̄ kè Amedata, ogwu owot iman kè Agagi, ogwu ochicha ebi Ju. 11 Ogwu ubọọn̄ otutumu inyi Aman ibe, “Tet ikpoko kwun̄ kaan̄. Ire, rọ ife cha inu geelek òneneme owu.”

12 Eya orọ, enenititiin̄ ebi uti ikpa ogwu ubọọn̄ me òso akọp mè usen ita me emen adasi onyan̄. Ema egege otutuuk inu geelek Aman onyibe ida ibe ege esa ejet otutuuk ebi ibot mkpulu otutuuk ido geelek òkup me irak mkpulu ogwu ubọọn̄, mè ebi ibot mkpulu agan̄ geelek, mè ebi ibot mkpulu ebi ife geelek ìkup me irak mkpulu ogwu ubọọn̄. Ebi uti ikpa cha ege ikan ya me ubọk ige inu eyi ebi ido geelek, me usem otutuuk ebi ife geelek me otutuuk ido geelek. Ema ege ikpa ikan cha me erieen̄ ogwu ubọọn̄ Ayaserọs, mè isa mkpọtubọk iman̄ òriọọn̄ ogwu ubọọn̄ igon iman̄ me lek otutuuk ikpa cha geelek. 13 Enenisa ikpa ikan cha itap me ubọk ebi osat ìkiben ikpa etip, ibe esa elibi ekot ekot esi echon ekana me otutuuk ido geelek òkup me irak ubọk mkpulu ogwu ubọọn̄. Ege me emen ikpa ikan cha ibe, isire akọp mè usen ita me emen akọp mè onyan̄ iba, òrere onyan̄ Adari, ere geelek ebi Ju ekupbe, mè ebi ene esa me usen ge ya gaalek ejijaka ema esan̄a, mè ekpan̄ otutuuk kiban̄ esan̄a kpai, mè echep ido kiban̄ esan̄a enọọn̄ ijọn̄. Ekpan̄ ebirieen̄ mè ebibaan̄, mè ebi ugane, mè ebi ijija, mè asa nsabọn. Isikpan̄ ema otutuuk isan̄a kpai, efum otutuuk inu kiban̄ esak, kubọk inu ekpulube me akọn̄.

13a Ikpa ogwu ubọọn̄ ogebe ìre ikeyi:^c

“Emi, Ayaserọs, ikpele ogwu ubọọn̄, nge ikpa keyi inyi ebi ibot mkpulu ìkikpulu efit mè akọp agan̄ iba mè jaaba, òbene me India isi ire Etiopia, mè ige si inyi ebi ibot geelek ìkup me irak kiban̄.

13b “Emi ǹkasa unye nkaan̄be ìgumu lek, ire, ǹkisa me otutuuk ifuk-ibot n̄a melek ata ejit ikikpulu. Emi kubọk ogwu òkikpulu owuwa ido, mè ire si ogwukaan̄ otutuuk linyọn̄, îre nkeek n̄a irọrọ ibe ebi nkikpulu eluk ugwem eyi kpunube saasaak mgbọ geege, inyi ido n̄a ikup me esuuk, mè ebi ene ekọt ekeje enan̄a me ibot agan̄ ge esi ere ofifi agan̄ me utelelek, mè eluk me esuuk, ike otutuuk ebilene ekiweek.

13c “Ndo ebi ìkiteme emi nteme ike mêkọtbe irọ nkeek ya iso. Ene ge me lek kiban̄, òrere Aman, ofọfọọk otu. Aman ìre ene ogwu òsisibi isi me etete kiji mije iriọọn̄-inu kan̄, ogwu emun̄be ibe ke îgbe sa me lek ata ejit îkikaan̄ mgbọ geelek, mè ubọk îkikeke inye me lek inu eyi mkpulu, mè ire si òso ene iba me irek mkpulu. 13d Aman ìkpa inyi eji ibe ke îkaan̄ ebi ife ge ìgwugwugwa me etete otutuuk ebi ido geelek me linyọn̄, ke ife cha ekup lek uyọt uyọt. Ìbe ke ife cha mîkaan̄ ikan echi kiban̄ isa ikije ikeme ikan ebi ido geelek, kè ife cha ekikpọkpọ ikọ geelek ogwu ubọọn̄ otọbe chieen̄ isiki. Eru kiban̄ ìkpokọt ichieek ibe otitọt eji ekaan̄be, irọrọ otutuuk agan̄ me irak mkpulu igbaan̄ ire ge, irọ iso. 13e Eji mîmun̄ ibe ke ebi ife chi gaalek ere ebi ìkpọkpọ ikije ikeme otutuuk ebi ido geelek mgbọ geelek, mè ikisa nke nke ugwem ema ekiluk ikifiala ikan, mè ikirọ ijo inu òfefieek enenen, isa ikinye ibot inyi mkpulu kiji, inyi utelelek ikakup me irak mkpulu kiji.

13f “Eya orọ, eji ekinyi ida ibe, ebi ife cha, ebi Aman, ogwu ibot mè ogwu nte kiji òso iba, otapbe erieen̄ me emen ikpa ijet enyi cha, ìgbaan̄ otutuuk kiban̄ mè ebi nwa kiban̄ mè nsabọn, ìsa oge akọn̄ ebi ochicha kiban̄ ìkpaan̄ ema ìsan̄a kpai, me òso akọp mè usen ita me onyan̄ Adari, òrere akọp mè onyan̄ iba acha keyi. 13g Sa me ikeya, otutuuk ebi ife cha ìkisisaak eji akarake akat, mè ikisisaak si ire chereyi, mêkwaan̄ isan̄a usen yaage me mkpa afa, mè ifon ama ekwukwu, mè itele ibe mkpulu kiji ikup me utelelek, mè esuuk ikup ibene me usen keya ifo isi.”]

14 Enyi ikpa ya ibe esun̄ kubọk ikan me ido geelek, mè efuk esibi enyi otutuuk ebi ife geelek, inyi eriọọn̄, mè ebem lek eban usen ya.

15 Ebi osat cha echochon ikpa cha ikana ere isi ge isi ge, igọọk me lek ikan ogwu ubọọn̄. Ikpa ya oninin̄ emen ama Susa òrere ama ibot. Mgbọ ikpa ya onin̄be emen ama Susa, ogwu ubọọn̄ melek Aman esisiki ikweek irek ikinwọ miin̄. Ire, otutuuk ama Susa okekijijiin̄, wọlọwọlọ mè urimi oninin̄ otutuuk emen ama.