4 Mgbọ ebibaan̄ ebi ìkisi ikwaan̄ inyi Esita, mè ebi esan̄abe òsok, ebi ìrere ebi ibot ikwaan̄ me uwu ebibaan̄, emun̄be Mọdikai melek ekwut ufieejit mè ntọn̄ me lek, ema esisi isi ikpa inyi Esita. Ejit osisisaak Esita enenen, iweweek ofọnti inyi ibe esa ejet Mọdikai isa inwene lek. Ire, Mọdikai ìkachieek ibọbọkọ ofọnti cha isa inwene lek. 5 Esita ogwegwen Atak, ene ge me lek ebi ibot ikwaan̄ ogwu ubọọn̄, ebi esan̄abe òsok, ogwu òkikpọ ọmọ chieen̄ me lek, iria isi lek kè Mọdikai, ibe isi iweek iriọọn̄ inu òrọrọ, mè ubọk inu ya ojebe.

6 Atak onenije isi lek kè Mọdikai me oyet ile ama me isi otunchit uwu ogwu ubọọn̄. 7 Mọdikai oneniben otutuuk inu cha òrọrọ ikpa inyi Atak, mè ibak otu ifuk ikpoko Aman ochieekbe use ikpekpe itap me uwu ikpoko ogwu ubọọn̄, inyi ekpan̄ otutuuk ebi Ju esan̄a kpai. 8 Mọdikai îsan̄a si ikpa ikan ya isibi, eyi egebe igon ikana me ama Susa ibe ekpan̄ otutuuk ebi Ju esan̄a, mè isa inyi Atak ibe isa isi ijeen̄ Esita, mè ikpa otutuuk inu cha iwele inyi Esita. Mọdikai îtumu si inye inyi Atak ibe itumu inyi Esita ibe isi me isi ogwu ubọọn̄ isi ibeek mbeek me ibot ebi Ju, inyi ogwu ubọọn̄ ikaan̄ ejit nsan me lek ebi kiban̄, òrere ebi Ju. [ 8a Mọdikai îtumu inyi Atak ibe itumu si inyi Esita ibe ikawuuk mgbọ ogwugwu orebe ene ikike, mgbọ ọmọ okpukpobe ogwugwu isibi. Eyi Aman, òrere òso ene iba me ibot mkpulu otumube inyi ogwu ubọọn̄ ibe ekpan̄ ebi Ju esan̄a, 8b mè ogwugwu iriaak uriaak ibeek Okumugwem mbeek, mè isi itumu ikọ melek ogwu ubọọn̄, mè isa me ikeya inyan̄a ebi ju isibi me mkpa.]

9 Atak onenigwu ikom, mè iniben otutuuk inu Mọdikai otumube inyi ọmọ ikpa inyi Esita. 10 Esita oyayaka iria Atak ibe igwu ikom isi ilook Mọdikai ibe, 11 “Otutuuk ebi ikwaan̄ ogwu ubọọn̄ mè otutuuk ebi ido geelek ìkup me irak mkpulu ogwu ubọọn̄ mîriọọn̄ ibe ke kpunu enerieen̄ mè ìre enenwaan̄ geege ogwu òkikpọkpọ ije iraka inin̄ oyet egep eyi emen emen isi imun̄ ogwu ubọọn̄, me mgbọ ogwu ubọọn̄ ikagwenge ene ya. Ikan ge gaalek ogwu ubọọn̄ okaan̄be inyi ene ya ìre ikpakpan̄ ene ya. Îtata mè ogwu ubọọn̄ ìbebene okuba alata araran̄ kan̄ inyana ida ene ya, sabum ene ya môninwọnọ mkpa. Eyi n̄a, îra iso akọp usen ita, kpegwen emi ibe emi ǹnu me isi ogwu ubọọn̄.”

12 Ubọk yaage si, Atak obeben etip kè Esita isi ilook Mọdikai. 13 Mọdikai otutumu inyi Atak ibe isi ilook Esita ibe, “Kakeek me ejit kwun̄ ibe, mije owu okupbe me uwu ogwu ubọọn̄, ke owu gaalek me etete otutuuk ebi Ju mônwọnọ mkpa, ire ikpan̄ otutuuk ebi Ju isan̄a. 14 Ire owu okpọkpọ iriaan̄ otu, me ike mgbọ òkup ikeyi, mè òkarọ inu geege, ntap-ubọk mè unyan̄a môkọt inan̄a me ofifi ere inu inyi ebi Ju. Ire, owu melek ebi uwu nte kwun̄ mêkwaan̄ ita. Usini mgbọ si, ekene oriọọn̄! Môkọt ire ibe ke îre mije ojelek mgbọ òkup ikeyi ke irek osibi inyi owu ònonin̄ emen uwu ogwu ubọọn̄.”

15 Esita oyayaka iria ufọọk-otu ijet Mọdikai ibe, 16 “Gwu kom fo, mè si titiin̄ otutuuk ebi Ju ìkup me Susa, mè ìjin otu ìriaak uriaak me ibot n̄a. Ikanwọ mudim, ikarie inorie mege usen ita, egwe mè eririeen̄. Emi si melek ebibaan̄ ebi ìkisi ikwaan̄ inyi emi, eji mêgọọk enyi ijin otu. Eji isijin otu iso usen, emi mânenisi isi ogwu ubọọn̄, ubọk geelek ibe ke îre ichachaka ikan. Ire isibi mkpa, mâkwu.”

17 Mọdikai oneninan̄a ije ifo, mè isi irọ otutuuk inu ike Esita onyibe ida ibe erọ.

17a Mọdikai onenikeek uyeke ikwaan̄ Okumugwem orọbe me mgbọ òraraka, mè iniriaak uriaak ibe:

17b “Jei, Ogwukaan̄-ene! Ogwukaan̄-ene, owu ore ogwu ubọọn̄ òkikpulu otutuuk inu, mije, inu geelek orombe ìkup me irak unye kwun̄. Kpunu ene geege òbokọt ikeke ikeme owu mgbọ îrebe nkeek kwun̄ inyanyan̄a ebi Ijeren. 17c Mije, îre owu orom inyọn̄ mè ijọn̄, mè uyeke inu geelek òkup me irak isinyọn̄. Îre owu okaan̄ otutuuk kiban̄. Kpunu ene geege òbokọt ikeke ida owu, jei Ogwukaan̄-ene. 17d Owu oriọọn̄ otutuuk inu. Jei, Ogwukaan̄-ene, owu oriọọn̄ ibe ke ìkare unyechieen̄ mè ìre ugumulek mè ìre umin lek n̄a orọ ibe nkagele ibot ìkwuun̄ ìnyi Aman ogwu ugumulek. Kè mbele ejit m̀fip akajit ukot kan̄, ire eya mônyan̄a ebi Ijeren. 17e Ire, ǹrọ eyi nrọbe ya, inyi nkanyi ogwu ebilene umin eyi òbebene igak eyi Awaji. Emi m̀kpagegele si ibot ikwuun̄ inyi ene geege ilọ me lek kwun̄, ogwu òrere Ogwukaan̄ n̄a. Emi m̀kparọrọ si inu chi sa me ugumulek. 17f Mgbọ keyi, jei, Ogwukaan̄-ene Awaji, Ogwu Ubọọn̄, Awaji kè Ebereyam, nyan̄a ebi kwun̄ sibi me emen ufialek! Mije, ebi ochicha kiji mîgwuun̄ eji chieen̄ me lek, ichechep eji isan̄a kpai. Ema ekiweek ijijijaka ìrot ya òrere eyi kwun̄ bene me ibebene. 17g Kakpọ ìrot kwun̄ ìlọ chieen̄ ma, ìrot eyi owu ofakabe isibi me Ijipiti inyi lek kwun̄. 17i Soso, nọ uriaak n̄a, mè kaan̄ nsan me lek ìrot kwun̄, mè kana ufieejit kiji tap me ijọk, inyi eji egat ugwem, mè ekekọt okwa etọn̄ erieen̄ kwun̄, jei, Ogwukaan̄-ene. Kachechieek ibe otu ebi ìkitọn̄ owu iriaan̄ ere.”

17j Otutuuk ebi Ijeren esasa otutuuk efuuk kiban̄ ikitaan̄ ukpo ito ito iriaak uriaak, mije, mkpa kiban̄ ìkekeke ema me isi.

17k Esita nwa ogwu ubọọn̄ onenilet lek me emen Ogwukaan̄-ene mgbọ îmun̄be saasaak eyi môsabe mkpa ijet ọmọ. Ineniwọọk uja ofọnti kan̄ isan̄a, mè itap ofọnti ito mè ufieejit. Kpan̄asi aran̄ utop olu, igwọgwọ ntọn̄ mè ifin anam igwook ichit ibot kan̄, mè isiki lek kan̄ enenen. Otutuuk lek kan̄ ere îkibala ijaan̄ cha, ìyaka inisa gwakagwaka ijeek kan̄ iyiyala ichit. Ineniriaak uriaak igwen Ogwukaan̄-ene Awaji ebi Ijeren ikibe:

17l “Jei Ogwukaan̄ n̄a, owu gaalek ore ogwu ubọọn̄ kiji. Tap ubọk nyi emi, emi ogwu ibot ge, ǹkakaan̄ ogwu ntap-ubọk, ilọ me lek kwun̄. Mije, mânisa ubọk n̄a ifiin̄ ugwem n̄a. 17m Akarake ijija n̄a, nnọ me emen ototun̄ ukan̄ kiji ibe ke owu, Ogwukaan̄-ene, ogobo ebi Ijeren isibi me etete otutuuk ido geelek, mè igobo ebi nte nte kiji me etete otutuuk ebi kiban̄ ebi ukot ikaan̄, ibe enere ìrot kwun̄ ire mgbọ geelek. Nnọ si ibe, inu geelek ochieekbe ema use, ke owu òkekirọ inyi ema.

17n “Mgbọ keyi, eji mîrọ ijo inu ikeme owu, owu oyayaka eji itap me ubọk ebi ochicha kiji, mije, eji ekisi imin ebi kè awaji kiban̄. Ogwukaan̄-ene, owu orọ inen.

17o “Mgbọ yi, ujaralek usun̄ eji ekupbe me emen ìkajot ema owot. Ema mîsa mkpọmfaka kiban̄ inyan̄a ibot, igwagwak ikan osabe otu kwun̄ itap, mè ijijijaka ebi owu okaan̄be me ìrot, mè ichichit otu ebi ìkitọn̄ owu, mè igbugbugbọ ntook ngwugwa kwun̄, mè ichechep umin eyi uwu kwun̄. 17ọ Ema ekiweek irọrọ ibe ebi ekariọọn̄ge owu ekekọt itọn̄ enyi mkpọmfaka ikike, mè ekemin ogwu ubọọn̄ eyi anam akpalek ere mgbọ geelek.

17p “Jei Ogwukaan̄-ene, kayaka okuba ubọọn̄ kwun̄ ìnyi mkpọmfaka ikarege inu geege. Kachieek ibe ebilene echak eji ibe eji mîrọn̄. Ire, yaka ijo ntọt kiban̄ sa keme ema, mè sa ogwu òbebene irọ inu yi ikeme eji rọ inu ijejeen̄. 17r Ogwukaan̄-ene, keek eji, mè jeen̄ lek kwun̄ sibi me mgbọ keyi eji ekisak ofaak. Nyi emi unye-ejit, jei, owu ogwu òrere ogwu Ubọọn̄ inyi awaji geelek, mè Nte Uwu inyi otutuuk unye geelek. 17s Tap ikọ ògbegbe me otu n̄a, mgbọ mâsibibe ikeke me isi egbe àtat ya. Da unaan̄-ejit kan̄ kana toon̄ me lek ogwu òkitim eji akọn̄ me lek, inyi ugwem kan̄ melek echi ebi melek kan̄ ire okputut. 17t Ire, sa ubọk kwun̄ gaalek nyan̄a eji, mè tap ubọk nyi emi, ogwu ibot ge, ǹkakaan̄ ogwu ntap-ubọk, ilọ owu gaalek, jei, Ogwukaan̄-ene.

17u Owu oriọọn̄ otutuuk inu, mè iriọọn̄ ibe ke ǹkama umin ebi ekariọọn̄ge owu ekinyi emi, ǹkamama si mkpilaak ebi kpefieek afi, mè ìrere eyi ogwu ofifi ido geelek. 17v Owu oriọọn̄ ibe irek nkupbe ìkup emi me lek ifi ifi, ke ǹkamama okpibot irek umin enyibe emi, eyi nkikwuun̄ me usen nsikup me isi ene. Ǹchacha kubọk oka ekwut ibaan̄, ǹkakikwukwuun̄ si me usen ikike. 17w Emi, gwun̄ ikwaan̄ kwun̄ enenwaan̄, ǹkanwọ miin̄ kè Aman, ǹkakakaan̄ ulọk me lek ijọk inorie mè miin̄ ogwu ubọọn̄, ǹkanwọnwọ si miin̄ egwookbe inyi mkpọmfaka. 17y Emi, gwun̄ ikwaan̄ kwun̄ enenwaan̄, ǹkakaan̄ unwọọn̄ geege, bene me usen esabe emi inu me ere yi, mege inire chereyi. Otutuuk unwọọn̄ n̄a ìkup me lek kwun̄ gaalek, jei, Ogwukaan̄-ene, Awaji kè Ebereyam. 17z Jei Awaji, unye kwun̄ omin igak otutuuk unye geelek. Soso, gban̄ ida ukpo ebi kperiọọn̄ ubọk geege ebeyaka irọ, mè nyan̄a eji sibi me ubọk ebi ikpak. Nyan̄a emi sibi me emen ukpook yi òkitet emi.”